Andao hatao tihoe miaigne tamy ty andro i Jesosy rehe sady mitoboke a Galilia ao. Hankalaza ty Fete ty Tragno Rantsankazo a Jerosalema agne rehe. Mihorentsegne ty an-tanàgne ao, satria avy iaby i mpiara-manompo boake lavitse rey. Te hanao fagnatetse ho ahy i Jehovah rehe. Lasa amy izay rehe reketse i ose hatao’o fagnatetsey, ndra tie tere sady feno ndaty i lalagney. Ie rehe avy amy i tempolỳ eo, zoe’o tie fa feno ndaty hanao fagnatetse ka ty eo. Tsy maintsy mandigne ela bey eo hey rehe vaho izay anjara’o ty mizilike ao. Ie rehe le handeha hagnomey i ose’oy i mpisorogney, tsiaro’o tampoke tie misy rahalahi’o managne alahelo ama’o. Va’e ho agnate i vahoakey ao reke ndra va’e ho an-tanàgne ao. Faie fa nihazavae i Jesosy ty raha toko’e hatao’o. (Vakio Matio 5:24.) Ino ty hatao’o naho ty hatao i rahalahi’oy mba hahavy anareo hilongo indraike? Mareho ty vale’e maregne amy ty lisitse ambane eto retoa.

TY TOKO’E HATAO’O

• hirehake amy i rahalahi’oy naho ohatse trea’o tie maregne ty aze

• hikezake hagnitsy i rahalahi’oy satria mihevetse rehe tie sarotsarote’e loatse reke ndra mba diso ka anio reke

• hitsanogne soa ze raha rehafe i rahalahi’​oy. Ndra tie tsy le azo’o soa ty raha tsapa’e, le hiala tsiny ama’e rehe satria namparare ty fo’e ndra nampanahelo aze

TY TOKO’E HATAO I RAHALAHI’OY

• hitantara amy ty hafa amy i fiangonagney eo ty raha tsy mete natao’o tama’e

• hirehadrehake azo vaho hagnonigne ze raha tsy mete natao’o tama’e sady tsy hagneke naho tsy le mifona ama’e rehe

• hagneke tie nitake fiambaneagne naho herim-po boake ama’o ty nagnatogna’o aze. Mamela azo amy ty fo’e

Tsy mila manao fagnatetse biby sasa tikagne hinane zao. Faie akore ty ahatreavagne fa misy ifandrambesa’e ty fanompoantikagne naho ty filongoantikagne amy ty hafa naho ty fampianara i Jesosy ro henteagne?