Tsy ho ela, le ho tapetse ty fahareta i Jehovah amy ty tontolo toy. Ho foagne o fivavahan-disò sady hitambatse hanafike ty vahoan’Andrianagnahare o firenenao. Ho vonovonoe i Jehovah ka o ndaty ratio iaby amy i Aramagedonay. Fa tsy lignentika Kristiana o raha miambake rehoe.

Maregne aloha fa tsy haintikagne ty pitsopitson-draha iaby hiseho amy i haoreagne lahibeỳ. Ohatse, ty fotoagne hanomboha’e naho ty anto’e hahavy o fitondragne ara-politikeo hanafike o fivavahagneo. Eo ka ty ho fahareta ty fanafiha o firenenao o vahoan’Andrianagnahareo naho ty raha hiseho agnate izay ao. Tsy haintika zao tie ino maregne ty raha hampiasae i Jehovah mba hamonovonoagne o raty fagnahio amy i Aramagedonay.

Faie ty raha saontsie ty Soratse Masigne amantikagne, le fa afake magnampe antika hatoky sady hanagne herim-po hiatrehagne ty raha hiseho amy ty hoavy. Ohatse, haintikagne zao fa miaigne “amy ty andro fara’e” tikagne tie amy izao. (2Ti 3:1) Haintikagne ka zao fa ‘hohafohezegne” ty fanafihagne o fivavahagneo, amy izay tsy ho rava o fivavahagne maregneo. (Mt 24:22) Atokisantika fa havota i Jehovah o vahoa’eo. (2Pe 2:9) Haintikagne iaby fa manao ty maregne sady mahery i Finily i Jehovah hamonovono o ndaty raty fagnahioy sady hiaro i vahoake maro amy i Aramagedonay.​—Ap 19:11, 15, 16.

Hisy ndaty “ho toragne noho ty tahotse” naho fa mahatrea i raha hiseho rey. Faie naho fa itika mamaky sady misaintsaigne ty fomba nagnavota i Jehovah ty mpanompo’e taloha naho ty raha ampahafantare’e antika miomba ty hoavy, le ‘hitsangagne sady hiandra’ tika amy ze fotoagne zay satria fa marine ty fagnavotagne antika. ​—Lk 21:26, 28.