Bey Fagnazavagne: Tsy ze kila raha le hohazavae’o iaby. Akore ty natao i Jesosy naho fa nampianatse? Nampiasa fagnonteneagne reke mba hahavy i ndatỳ handineke naho hahatakatse ty fomba hampiharagne aze. (Mt 17:24-27) Mahavelombolo i fianaragney naho mametrake fagnonteneagne rehe sady izay ka ty hagnampe azo hahafantatse ty raha inoa i mpianatsey naho ty raha mbe tsy azo’e. (be 253 § 3-4) Mahalignisa. Va’e ho diso ty vale’e homey i mpianatsey, faie ko le avy le meigne aze ty vale’e maregne. Mampiasà fagnonteneagne fagnampe’e mba hagnampeagne i mpianatsey hahafantatse ty vale’e maregne. (be 238 § 1-2) Mirehafa miadagne naho fa mirehake hevetse vaovao amy i mpianatsey mba hahazoa’e aze soa.—be 230 § 4.

Magnasaro-draha: Mitaoa soa mba tsy hagnazava ze raha hai’o miomba i foto-kevetsey. (Jn 16:12) Mifantoha amy ze hevetse lahibey amy i fehentsoratsey. (be 226 § 4-5) Ko magnazava hevetse hafa ndra tie mahaliagne. (be 235 § 3) Naho fa mazava ama’e ty hevetse lahibey, le mifindrà amy ty fehentsoratse magnarake.

Magnazava avao: Ty hanohigne ty fo i mpianatsey ro kendrentikagne fa tsy ty hagnazava avao. (Lk 24:32) Vakio ze andinin-teny fototse amy i fianaragney mba hisy heri’e amy i mpianatsey ty Saontsin’Andrianagnahare. (2Ko 10:4; He 4:12; be 144 § 1-3) Mampiasà fagnoharagne tsotra. (be 245 § 2-4) Fantaro ze raha manahiragne i mpianatsey naho ty raha inoa’e. Le anò mifanandrife amy izay ty fagnazavagne mei’o naho ty fampiharagne aze. Agnonteneo reke tie: “Akore ty fahatreava’o ty fagnazavagne toy?” “Ino ty ampianare io miomba i Jehovah?” “Ino ty soa ho rambese’o naho mampihatse ty fianaragne toy rehe?”—be 238 § 3-5; 259 § 1