1. Ino ty raha mila ataontikagne?

HAGNEKE handrambe anjara amy ty korsa lay raike vao rehe, ie amy izao fa fanta’o tie tsy mora ze o manao korsa lay zao sady irehe marare ndra rokake? Azo antoke fa tsy hagneke hanao izay rehe. Faie nirehafe i apostoly Paoly fa manao korsa lay ty Kristiana vata’e. (Heb. 12:1) Manao o korsa lay iohoe tika ndra tanora ndra antetse, ndra maozatse ndra tsy maozatse. Faie mila miaretse hatrake am-para’e tika naho te hahazo i loka ampitamae i Jehovah-y.—Mat. 24:13.

2. Nagnino ty Paoly ro sahy nandrisike ty hafa mba hanahake aze, naho henteagne ty 2 Timoty 4:7, 8?

² Hoe ty Paoly: ‘Fa nahavita ty laiko amy i korsaỳ raho.’ (Vakio ty 2 Timoty 4:7, 8.) Izay ty nahavy aze ho sahy nandrisike ty hafa mba hanahake aze. Faie inogne o korsa lay iohoe?

3. Inogne i korsa lay nirehafe i Paolỳ?

³ Mateteke ty Paoly ro nampiasa fagnoharagne miomba ty fihisàgne natao ta Gresy agne naho fa nisy lesogne lahibey tea’e hampianaregne. (1 Kor. 9:25-27; 2 Tim. 2:5) Nohare’e amy ty korsa lay ohatse ty fiaigna o Kristianao sady tsy indraike avao ty nirehafa’e izay. (1 Kor. 9:24; Gal. 2:2; Fil. 2:16) Manomboke manao o “korsa lay” iohoe ty ndaty raike naho fa manokan-tegna hoahy i Jehovah vaho atao badisa. (1 Pet. 3:21) Naho fa mey i Jehovah valesoa ndra i havelogne nainai’ey reke, le midika zay fa nahavita nilay hatrake am-para’e tamo o korsa iohoe reke.—Mat. 25:31-34, 46; 2 Tim. 4:8.

4. Ino ty hodinehentikagne ato?

⁴ Inogne iaby ty raha mampitovy ty fiaigna o Kristianao amy ty fanoagne korsa lay? Maro ty mampitovy aze, faie ty telo  ama’e avao ro hodinehentikagne. Voaloha’e, tsy maintsy milay amy i lalagne toko’e hilaìsagney tika. Faharoe, mila mifantoke amy ze hahavitagne i korsay tikagne. Fahatelo, mila tohizantikagne avao i korsay ndra tie misy olagne.

5. Ino i lalagne tsy maintsy orihentikagney? Ino ty anto’e?

⁵ Ino ty raha tsy maintsy atao ty ndaty raike mpanao korsa lay naho te hahazo i lokay reke? Ze lalagne fa jinobo ty mpikarakara i korsay avao ro tsy maintsy ilaìsa’e. Hoe izay ka tikagne. Tsy maintsy orihentikagne avao i lalagne toko’e horihe ty Kristianay. Ty dika izay, mila magnorike ty fomba fiaigne atoro i Jehovah antikagne tika. (Asa. 20:24; 1 Pet. 2:21) Faie heje i Satana naho ze ndaty magneke ho fehé’e hanao izay tika. Ty anto’e, tea o ndaty rehoe ‘hiarake hilay amy iareo’ avao tikagne. (1 Pet. 4:4) Magnaratiraty ty fomba fiaignantikagne areke iareo, le rehafe iareo tie ty fomba fiaigna iareo ro tena soa satria afake manao ze tea’e hatao iareo. Faie vande zay!—2 Pet. 2:19.

6. Ino ty azo’o ianaragne boake amy i Brian?

⁶ Tsy maintsy ho tsapa ty ndaty magnorike ty fomba fiaigna ty tontolo toy fa tsy managne fahafahagne zao iareo. Naho ty maregne aza, le ndevo ty tontolo i Satana toy naho ty fagniria’e iareo. (Rom. 6:16) Izay ty nitsapa i Brian. Nandrisike aze mba hagnorike ty fomba fiaigne toko’e horihe o Kristianao ty rae aman-drene’e. Faie nisalasala reke naho tena hahasambatse aze vata’e zay tamy ireke mbe nitanora. Nijobogne ty hiarake hilay amy ty ndaty managne ty toe-tsay i Satana areke ty Brian. Hoe reke: “Ni-te hanao ze teako raho tamy izay. Faie tsy nampoizeko tie kay ndra nanjare nandevoze ty raha raty maro raho. ... Nanjare zatse nifoke rongony naho ninon-toake vaho naloto findesan-tegna raho. Nipay ze rongony tena mahery aza raho naho fa tafara tatoy, le vao mainke nandevoze’e. ... Namarotse rongony aza raho mba hahazoako vola.” Ie tafara tatoy, le nanapa-kevetse ty Brian fa hagnorike ty fitsipy i Jehovah. Natao badisa reke tamy 2001, le natoro’e boake amy izay tie nagnorike i lalagne soa toko’e horihe ty Kristianay reke. Tena sambatse reke tie amy izao. *

7. Misy lalagne roe azontikagne ijobognagne, arake ty Matio 7:13, 14. Ino iaby zay?

⁷ Tena mila mijobogne i lalagne toko’e horihe ty Kristianay tikagne! Faie tena tea i Satana naho miala amy i lalagne maifitse “mbamy i havelogne nainai’e mbeoy” tikagne, le hagnorike i lalagne malalake orihe ty ankamaroa ty ndaty amy ty tontolo toỳ. Maro mpitea o lalagne iohoe sady mora ty mandeha ama’e, faie ‘mbamy i fandringanagney mbeo.’ (Vakio ty Matio 7:13, 14.) Tsy maintsy matoky i Jehovah naho mitsanogne aze tika, naho tsy te ho voatarike hiala amy i lalagne atoro’e antikagney sady handeha amy io avao.

8. Ino ty atao o ndaty manao korsa laio naho sondia’e reke tonta?

⁸ Inogne ty toko’e hatao o ndaty manao korsa laio mba tsy ho tonta? Magnente soa i lalagne omba’ey. Faie va’e mbe ho voafinga ty ndaty hafa avao reke, ndra hisy raha hafa hanonta aze. Le naho sondia’e reke tonta, le mitsangagne sady manohy i lai’ey. Tsy ty raha ndra i ndaty namingagne azey ro ifantoha’e, fa ze hahavia’e amy i tsipike fara’ey agne naho ty hahazoa’e i lokay.

9. Ino ty toko’e hataontikagne naho sondia’e tika tonta?

⁹ Va’e ho tonta mateteke ka tikagne naho fa manao i lay ara-pagnahỳ. Ty dika izay, va’e hanao fahadisoagne amy ty raha rehafentika naho ataontika tikagne. Ndra va’e ty ndaty hafa miarake lomay amantika ro hanao izay, le va’e hamparare fo antika. Tsy mahalatsa zay satria sambe tsy voririke tikagne iaby sady toe maifitse ka i lalagne ilaìsantikagney. Misy fotoagne areke tikagne mifampidosy. Nirehake ty Paoly tie va’e hanao raha hahavy ty hafa ‘hitaraigne’ tika ndra iareo ty hanao izay amantika. (Kol. 3:13) Faie naho fa miseho zay, le ko i ndaty nidosy azoy ro ifantohagne fa ty hahazoa’o i lokay. Le naho sondia’e rehe tonta, le mitsangàna sady tohizo avao i lai’oy. Ty anto’e, naho tsy magneke hitsangagne rehe fa boseke sady mitàgne am-po, le tsy ho avy amy i tsipike fara’ey agne sady tsy hahazo i lokay. Ho sakagne hoahy ty hafa ka rehe, ie amy izao iareo fa mikezake mafe lomay amy i lalagne mbamy i havelogney mbeoy.

10. Ino ty hagnampe antika tsy hanjare ho ‘vato mahatafintohigne ndra hanonta’ ty hafa?

¹⁰ Ino ka ty hagnampe antika tsy hanjare ho ‘vato mahatafintohigne ndra hanonta’ ty hafa? (Rom. 14:13, 19-21; 1 Kor. 8:9, 13) Toko’e ho vognogne handefetse tika fa tsy hizizo avao amy ze raha teantikagne. Izay ty tsy mampira antika amy ty ndaty mpanao korsa lay ara-bakiteny.  Mifaninagne iareo satria sambe te hahazo i lokay. Ty tegna’e avao ro eretserete’e, le va’e hodosie’e ty hafa mba hahavy aze ho voaloha’e. Faie itika tsy hoe izay satria tsy mifaninagne. (Gal. 5:26; 6:4) Hoe ty Paoly: “Mipaliava ze hahasoa ty hafa nareo tsikiraikiraike fa tsy ze hahasoa ty vatan-tegna’areo avao.” (Fil. 2:4) Mikezake mafe mampihatse o torohevetse iohoe tikagne satria ty tena tanjontikagne le ty hagnampe ndaty maro mba ho avy amy i tsipike fara’ey agne, le hahazo i lokay ka ndra hiaigne nainai’e amy i tontolo vaovaoy ao.

11. Ino ty raha toko’e ifantoha i ndaty manao korsay? Ino ty anto’e?

¹¹ Tsy ampe avao tihoe magnente soa i lalagney i ndaty manao korsay. Mila atao’e an-tsaigne avao ka i tsipike fara’ey. Ndra tie mbe tsy trea’e maso zay, le azo’e atao ty mangalake sare an-tsaigne tie inge reke fa avy amy i tsipike fara’ey sady azo’e i lokay. Naho atao’e an-tsaigne avao i lokay, le ho tapa-kevetse ty hilay hatrake am-para’e reke.

12. Ino ty raha nimey i Jehovah antikagne?

¹² Tena soa fagnahy ty Jehovah le nimei’e toky tikagne fa hahazo valesoa ze mahavita i korsay. Hahazo havelogne nainai’e an-dagnitse agne ndra amy ty paradisa an-tane etoy iareo. Mirehake miomba o valesoa iohoe ty Soratse Masigne mba hahafahantika mangalake sare an-tsaigne ty fiaignagne fanjaka mandigne antika. Naho ataontika an-tsaigne avao areke ty raha tamaentikagne, le hanohy i korsay avao tika sady hitsangagne avao ndra tie tonta aza.

13. Ino ty mampiambake antika amy ty mpanao korsa lay ara-bakiteny?

¹³ Va’e ho nirokake i mpanao korsa lay ta Gresy agne rey, ndra nanaintaigne ty vata iareo, ndra va’e nisy olagne hafa nanjò iareo. Ze fiofagnagne niazo’e naho ty herim-bata’e avao ro mba azo iareo nianteheragne. Mahazo fiofagnagne ka tikagne satria ampianaregne antika ty fomba anoagne i korsay. Faie ino ty mampiambake antikagne amy iareo? Mahazo hery boake amy i Jehovah tika sady afake magnomey hery mihoatse ze paliaentikagne reke satria tsy misy fetra’e ty heri’e. Naho miantehetse ama’e areke tika, le sady hampiofagne’e avao ro hatao’e maozatse ka.—1 Pet. 5:10.

14. Nagnino ty 2 Korintianina 12:9, 10 ro magnampe antika hiatreke olagne?

¹⁴ Maro ty olagne natrehe i Paoly. Nenjehegne reke sady niharatiratie o ndatio, le nisy fotoagne nitsapa’e tie maleme reke. Nisy raha sarotse hafa ka natrehe’e, le natao’e tihoe “fatike tamy ty nofo” zay. (2 Kor. 12:7) Faie tsy natao’e tali’e tsy hanohizagne ty fanompoagne i Jehovah o olagne rehoe. Vao mainke aza reke niantehetse tamy i Jehovah. (Vakio ty 2 Korintianina 12:9, 10.) Noho ze toe-tsai’e zay, le lava nagnampe aze avao ty Jehovah isake tie nanagne olagne reke.

15. Ino ty ho voka’e naho manahake i Paoly tika?

¹⁵ Va’e henjehe o ndatio sady ho haratiratie iareo ka rehe noho ty raha inoa’o. Va’e harare ka rehe ndra hahatsiaro ho tsy managne hery. Tahafo areke ty Paoly, le hararaoto rey mba hampisehoa’o amy i Jehovah tie tena miantehetse ama’e rehe. Naho manao izay rehe, le ho trea’o tie tena tea naho manohagne azo reke.

16. Ino ty azo’o atao ndra tie marare rehe?

¹⁶ Marare vao rehe sady tsy afake mihetseke am-pandreagne eo ndra mampiasa o seza misy larò’eo? Sa marare ty ongo’o? Sa tsy le mahatrea soa rehe? Naho izay ty manjò azo, le matokia fa vita’o ty hanao i lay ara-pagnahỳ miarake o tanorao naho o ndaty salama soao. Maro ty ndaty fa antetse naho marare milay amy i lalagne mbamy i havelogne mbeoy. Tsy ho nahavita izay iareo naho niantehetse tamy ty herim-bata’e avao. Mitsanogne an-telefony o fivoriagneo, ohatse iareo ndra magnente izay amy ty video mba hahazo hery boake amy i Jehovah. Mandrambe anjara amy ty fanoagne mpianatse ka iareo, le mitory amy ty longo’e naho ty rasaze vaho ty dokotera mitsabo iareo.

17. Akore ty fihevera i Jehovah ty mpanompo’e marare?

¹⁷ Naho mahatsapa rehe fa tsy le mahavita bey amy ty fanompoagne, le ko kivy ndra  mieretseretse tie tsy ho afake hiaretse hatrake am-para’e rehe. Tsiarovo fa ty mahavy i Jehovah ho tea azo, le noho irehe mino aze sady nanao raha ho aze am-parake izay. Tsapa’e fa tena mila ty fagnampea’e rehe tie amy izao. Tsy hahafoe azo reke fa vao mainke hagnarine azo. (Sal. 9:10) Hoe ze rahavave raike marare zay: “Mihamitombo mihamitombo avao ty aretegne mahazo ahy, le manjare tsy nahatrea hirike fire hitoriagne ty hamarenagne raho. Faie ndra tie kede avao aza ty vitako, le fantako fa mampifale i Jehovah zay, le mahatsiaro ho sambatse raho.” Naho fa kivy areke rehe, le tsiarovo fa eo avao ty Jehovah hanohagne azo. Saintsaigno ty ohatse nengà i Paoly, le tadidio avao ty raha mampahery rineha’e toy. Hoe reke: “Mahafale ahy ty fahalemeako, ... naho fa maleme raho, le amy izay raho ro mahery.”—2 Kor. 12:10.

18. Ino ty raha tena sarotse atrehe ty ndaty ila’e?

¹⁸ Misy raha sarotse hafa ka atrehe ty ndaty ila’e manao i korsa hahazoagne i havelogneỳ. Va’e tsy trea ty hafa ty raha manjò aze sady va’e tsy ho taka iareo. Misy ohatse tena kivy ndra minekoneko mafe, hafara’e manjare aretegne ho aze zay. Nagnino ro tena mafe ty manjò i rahalahy naho rahavaventikagne rey? Satria naho ohatse don-tagnagne ty ndaty raike ndra reke atoseke amo o seza misy larò’eo, le avy le trea o ndatio ty raha mahazo aze, le va’e hagnampe aze iareo. Faie tsy mitovy amy izay ty ndaty azo ty hakiviagne ndra mikorotan-tsaigne. Ty anto’e, tsy trea ivela’e atoa ty raha manjò aze le va’e tsy tsapa o ndatio tie mila ampeagne reke. Faie naho ty maregne, le mijale mafe manahake i ndaty don-tagnagne naho don-tombokey avao ka iareo.

19. Ino ty raha ianarantikagne boake amy i Mefiboseta?

¹⁹ Marare vao rehe sady mahatsapa tie tsy taka o ndatio ty raha manjò azo? Naho izay ty tsapa’o, le va’e hampahery azo ty tantara i Mefiboseta. (2 Sam. 4:4) Tsy vita tihoe maleme tomboke reke, fa mbe nitsaratsara aze ka ty Davida Mpanjaka. Ie amy izao tsy noho ty hadisoa’e ty nahavy o olagne nahazo aze reo. Faie tsy nenga’e hahakivy aze o raha rehoe. Ireke aza nankasitrake ze raha soa niseho tamy ty fiaigna’e. Agnisa izay ty hasoa fagnahy naseho i Davida tama’e. (2 Sam. 9:6-10) Nikezake  nahatakatse ty raha tena nisy ty Mefiboseta naho fa nidiso hevetse miomba aze ty Davida. Tsy natao’e hahaboseke aze ze hadisoagne natao i Davida zay. Tsy nagnomey tsiny i Jehovah ka reke. Ze raha niazo i Mefiboseta natao mba hanohagnagne i mpanjaka tinendre i Jehovah-y ro nifantoha’e. (2 Sam. 16:1-4; 19:24-30) Le nampanorate i Jehovah agnate Baiboly ao ty raha soa natao’e mba ho tsikombentika.—Rom. 15:4.

20. Ino ty raha sarotse atrehe ty ndaty ila’e? Ino ty raha azo iareo atokisagne?

²⁰ Misy rahalahy naho rahavave ila’e tsy le azo’e ty fiai’e naho fa manao raha miarake amo o marò ndra tie tsy vaovao amy iareo ty raha atao. Ty anto’e, misy raha mampinekoneko mafe aze. Va’e tsy le tena mete ama’e aza ty miarake amo o ndaty marò, faie mbe magnatreke fivoriagne naho havoriambey avao iareo. Sarotse amy iareo ka ty mirehake amy ty ndaty tsy fanta’e, faie mbe mandeha manompo avao iareo. Naho hoe izay ty tsapa’o, le matokia fa tsy irehe raike avao ty miatreke olagne hoe izay fa ndaty maro ka. Tsiarovo fa fale ty Jehovah mahavazoho azo mikezake mafe. Kanao rehe mbe manohy i laỳ avao, le midika zay fa mitahy azo ty Jehovah sady magnomey hery azo. * (Fil. 4:6, 7; 1 Pet. 5:7) Naho marare areke rehe ndra azo ty hakiviagne faie mbe manompo i Jehovah avao, le matokia fa mampifale aze rehe.

21. Ino ty ho vitantikagne iaby noho ty fagnampea i Jehovah?

²¹ Soa avao fa tsy mitovy amy o korsa lay ara-bakitenio i korsa nirehafe i Paolỳ. Ty anto’e, ndaty raike avao ty mahazo loka tamy i korsa lay tamy ty andro o Baibolioy. Fa amy i korsa lay ataontikagney, le mahazo loka iaby ze miaretse hatrake am-para’e. (Jaona 3:16) Ankoatse izay, le tsy maintsy salama soa iaby ka ze mandrambe anjara amy i korsa lay ara-bakitenỳ fa naho tsy izay le tsy handrese iareo. Fa tsy hoe izay i korsa ara-pagnahỳ satria maro amantika ty marare faie mahavita miaretse. (2 Kor. 4:16) Hahavita hilay hatrake am-para’e tika satria magnampe antika ty Jehovah.