1. Ino ty raha mila atao’o naho te ho mpinamagne maifitse amy ty ndaty raike rehe?

INOGNE mateteke ty atao’o naho te ho mpinamagne amy ty ndaty raike rehe? Manokagne fotoagne mba hifampirehafagne ama’e. Le arakarake ty ifampirehafa’areo ty raha eretserete’areo naho ze raha am-po’areo ao ty hahavy anareo ho mpiragnetse maifitse. Afake ty ho nama i Jesosy ka tika faie misy olagne va’e hisakagne antika tsy hiragnetse ama’e. Inogne iaby ze olagne zay?

2. Ino ty olagne voaloha’e va’e hisakagne antika tsy hinamagne amy i Jesosy?

² Voaloha’e, mbe liantikagne naho nahatrea i Jesosy. Maro amy ty Kristiana tamy ty taonjato voaloha’e ka ty tsy nahatrea aze. Faie ndra tie eo zay, le hoe ty apostoly Petera: “Ndra tie mbe lia’areo aza naho nahatrea i Kristy, le tea aze nareo. Ndra tie tsy trea’areo ka aza reke tie amy izao, le mino aze nareo.” (1 Pet. 1:8) Tena afake ho nama i Jesosy areke tikagne ndra tie mbe liantika naho nahatrea aze.

3. Ino ty olagne faharoe va’e hisakagne antika tsy hinamagne amy i Jesosy?

³ Faharoe, tsy afake mirehake amy i Jesosy tikagne. Naho fa mivavake tika, le avy le avantantika amy i Jehovah. Maregne fa ataontika amy ty agnara i Jesosy ty vavake anoentikagne faie tsy midika izay tie mirehake ama’e tikagne. Toe heje i Jesosy hivavake ama’e ka tikagne. Ino ty anto’e? Satria agnisa ty fanompoagne ty vavake, sady i Jehovah raike avao ty fagneva ty hotompoegne. (Mat. 4:10) Faie afake mampiseho ty hateantikagne i Jesosy tikagne.

4. Ino ty olagne fahatelo va’e hisakagne antika tsy hinamagne amy i Jesosy? Ino ty hodinehentikagne ato?

 ⁴ Fahatelo, tsy afake miarake amy i Jesosy tika satria an-dagnitse agne reke. Faie ndra tie eo zay, le afake mahafantatse raha maro miomba aze tikagne. Horehafentikagne ato ty raha efatse azontikagne atao naho te ho mpiragnetse maifitse amy i Jesosy tikagne. Faie andao hey ho henteantikagne tie nagnino tika ro tena mila minamagne ama’e.

5. Nagnino tika ro tsy maintsy minamagne amy i Jesosy? (Henteo ty efajoro tihoe “Hanjare ho Nama i Jehovah Tikagne Naho Minamagne amy i Jesosy” naho tihoe “Mitaoa mba Tsy Hanjare i Jesosy ro ho Tea’o Voaloha’e.”)

⁵ Tsy maintsy minamagne amy i Jesosy tika naho te hifandrambe maifitse amy i Jehovah. Ino ty anto’e? Voaloha’e, hoe ty Jesosy tamo o mpiana’eo: “Tea anareo ty Rae noho ty niteava’areo ahy.” (Jaona 16:27) Hoe ka reke: “Tsy misy ndaty mbaman-dRaeko mbeo naho tsy amy ty alalako.” (Jaona 14:6) Naho irehe te hizilike amy ty tragno raike, le mila miary amy ty lala’e eo. Hoe izay ka fa naho ihe te ho nama i Jehovah, le mila miragnetse maifitse amy i Jesosy. Nirehake fagnoharagne mitovitovy amy izay ty Jesosy. Hoe reke: “Izaho ty vavahady o agnondrio.” (Jaona 10:7) Faharoe, tena nanahake ty toetoen-dRae’e ty Jesosy. Hoe reke tamo o mpiana’eo: “Ze nahatrea ahy, le nahatrea an-dRaeko ka.” (Jaona 14:9) Tena mila mianatse miomba ty fiaigna i Jesosy areke tikagne naho te hahafantatse soa i Jehovah. Naho manao izay tika, le hitombo ty hateantikagne i Jesosy. Ie naho fa mitombo ty hateantika aze, le hitombo ka ty hateantikagne an-dRae’e.

6. Ino ka ty anto’e hafa mahavy antika tsy maintsy minamagne maifitse amy i Jesosy? Hazavao.

 ⁶ Tsy maintsy minamagne amy i Jesosy ka tika, naho te hahazo valem-bavake. Tsy ampe avao areke ty mirehake tihoe “amy ty agnara i Jesosy” amy ty fara ty vavake ataontika. Tsy maintsy fantarentikagne ka tie akore ty ampiasà i Jehovah i Jesosy mba hamaleagne ty vavake ataontika. Hoe reke tamo o apostoli’e reo: “Ze kila raha angatahe’areo amy ty agnarako, le hataoko.” (Jaona 14:13) Ndra tie i Jehovah ro mijanjigne naho mamale ty vavake ataontikagne, le nimei’e fahefagne ty Jesosy mba hagnatanterake ty fanapahan-keve’e. (Mat. 28:18) Aloha ty hamela i Jehovah ty vavake ataontika, le vazohoe’e hey tie nagnorike ty torohevetse nimey i Jesosy vao tikagne. Intoy misy ohatse raike. Hoe ty Jesosy: “Naho mamela ty helo o ndatio nareo, le hamela ty helo’areo ka i Rae’areo an-dagnitse agney. Fa naho tsy mamela ty helo o ndatio nareo, le tsy hamela ty helo’areo ka ty Rae’areo.” (Mat. 6:14, 15) Tena toko’e ho soa fagnahy manahake i Jehovah naho i Jesosy areke tikagne naho fa mifandrambe amy ty hafa.

7. Ia ty handrambe soa boake amy i solovoigne nanoe i Jesosỳ?

⁷ Ze minamagne maifitse amy i Jesosy avao ro handrambe soa amy i solovoigne nanoe’ey. Ty anto’e, nirehake ty Jesosy tie ‘hahafoe ty fiai’e hoahy ty ragne’e reke.’ (Jaona 15:13) Ze mpanompo i Jehovah tsy nivalike tama’e niaigne taloha ty nahavia i Jesosy tan-tane etoy, le tsy maintsy mbe hianatse miomba i Jesosy naho hikezake ho tea aze. Agnisa izay ty Abrahama, i Saraha, i Mosesy, naho i Rahaba. Maregne fa ndaty maren-tane iareo, faie tsy maintsy mikezake hinamagne amy i Jesosy iareo naho fa hovelomegne indraike. Tsy ho afake hiaigne nainai’e iareo naho tsy manao izay.—Jaona 17:3; Asa. 24:15; Heb. 11:8-12, 24-26, 31.

8-9. Ino ty ho vitantikagne naho minamagne amy i Jesosy tika, arake ty Jaona 15:4, 5? Nagnino tika ro toko’e ho tea aze avao?

⁸ Miara-miasa amy i Jesosy tika naho fa mitory naho mampianatse ty talily soa miomba i Fanjakagney. Tena mahafale antika zay! Mpampianatse ty nahafantaragne i Jesosy tamy ie tan-tane etoỳ. Mbe nitarike ty asa fitoriagne naho fampianaragne ka reke tafara ty niheregna’e tan-dagnitse agne, satria ie ty loha ty fiangonagne. Fale reke mahatrea antika mikezake mafe manao ze fara herintika mba hagnampeagne ty hafa hahafantatse aze naho i Rae’e. Faie naho ty tena maregne ka anio, le tsy hahavita izay tika naho tsy eo ty fagnampea i Jehovah naho i Jesosy.—Vakio ty Jaona 15:4, 5.

⁹ Rehafe ty Saontsin’Andrianagnahare mazava soa tie naho itika te hampifale i Jehovah, le tsy maintsy tea i Jesosy sady mikezake ho tea aze avao. Ino areke ty toko’e hataontika mba hahavy antika ho nama i Jesosy? Misy raha efatse toko’e hataontika.

10. Ino ty raha voaloha’e toko’e hataontika naho te ho nama i Jesosy?

¹⁰ 1) Mikezaha hahafantatse i Jesosy. Hahafantatse aze tika naho mamaky ty boke i Matio, i Marka, i Lioka naho i Jaona. Hahavy antika ho tea i Jesosy naho hagnaja aze ty fisaintsaignagne ty tantara’e agnate o boke rehoe ao satria trea ao tie soa fagnahy reke naho fa nifandrambe tama o ndaty. Tsy natao’e manahake ty mpanompo ohatse o mpiana’eo ndra tie ireke aza ty Tompo iareo. Ireke aza nirehake tamy iareo ty eretseretse’e naho ze raha nitsapa’e. (Jaona 15:15) Naho  fa nanahelo iareo, le nitagny reketse iareo reke. (Jaona 11:32-36) Ndra ty fahavalo’e aza nahatrea tie nanjare nama’e ty ndaty nagneke ty hafatse nitorie’e. (Mat. 11:19) Ho soa ty fifandrambesantika amy ty hafa naho mitsikombe ty fomba nifandrambesa i Jesosy tamo o mpiana’eo tika. Ho sambatse ka tika, le hitombo ty hateantika i Kristy sady hagnaja aze tika.

11. Ino ty raha faharoe toko’e hataontika naho te ho nama i Jesosy tikagne? Le nagnino zay ro tena ilaegne?

¹¹ 2) Tsikombeo ty toe-tsay i Jesosy naho ty raha natao’e. Arakarake ty ahafantarantika ty toe-tsai’e naho anahafantikagne izay ty hahavy antika ho mpiragnetse maifitse ama’e. (1 Kor. 2:16) Akore ty hanahafantikagne i Jesosy? Dineho ty ohatse raike toy. Ty hagnampe ty hafa ty nieretserete’e voaloha’e, fa tsy ty hanao ze hampifale ty tegna’e. (Mat. 20:28; Rom. 15:1-3) Nahavy aze nahafoe tegna naho namela heloke zay. Tsy le avy le niboseke reke naho fa nisy ndaty nirehake miomba aze. (Jaona 1:46, 47) Naho nisy ndaty raike ka nanao fahadisoagne tie taloha, le tsy i fahadisoagne nanoe i ndaty igne ro avy an-tsai’e ao naho fa mandineke aze reke. (1 Tim. 1:12-14) Hoe ty Jesosy: “Naho mifankatea nareo, le izay ty hahafantara ze kila ndaty fa mpianako nareo.” (Jaona 13:35) Dineho areke zao: “Manahake i Jesosy vao raho, le mikezake mafe mba hilongo soa avao amo o rahalahio naho o rahavaveo?”

12. Ino ty raha fahatelo toko’e hataontika naho te ho nama i Jesosy tikagne? Akore ty hanoantikagne izay?

¹² 3) Tohagno o rahalahy i Kristy reo. Ze raha ataontika amo o rahalahi’e voahosotse reo, le tena rambese i Jesosy ho raha ataontika ho aze. (Mat. 25:34-40) Manao izay tika naho fa manao ze fara herintika amy ty asa fitoriagne naho fampianaragne. Izay ty fomba lahibey anohagnantikagne iareo. Sady toe nandily ty mpanonjohy ty lia’e mba hanao o asa iohoe ka ty Jesosy. (Mat. 28:19, 20; Asa. 10:42) Tsy hahavita hitory magneran-tane ka o rahalahy i Jesosy voahosotseo naho tsy eo ty fagnampea o ‘agnondry hafao.’ (Jaona 10:16) Naho agnisa ty agnondry hafa areke rehe, le ko haligno fa isake tie mandrambe anjara amo o asa iohoe rehe le mampiseho ty hatea’o o voahosotseo naho i Jesosy.

13. Akore ty azontika ampiharagne ty reha i Jesosy amy Lioka 16:9 aoy?

¹³ Hagnampe antika ho ragne i Jehovah naho i Jesosy ka ty fagnomeantika vola mba hanohagnagne ty asa nampanoe iareo antika. (Vakio ty Lioka 16:9.) Azontikagne atao ohatse ty magnomey vola hoahy ty asa magneran-tane. Naho manao izay tika, le manohagne ty asa fitoriagne amy ty toeragne mitokagne agne, ty fagnoregnagne naho fikolokoloagne ty Anjomba i Fanjakagney vaho ty tragno hafa ampiasaegne amy ty fanompoagne i Jehovah. Naho manao izay ka tika, le magnampe ty hafa amy ze raha ilae’e noho ty loza tampoke mahazo iareo. Afake magnomey vola hanohagnagne ty fiangonagne misy antika naho ze ndaty haintika fa mila fagnampeagne ka tika. (Ohab. 19:17) Manohagne o voahosotseo tika naho manao ireo.

14. Ino ty raha fahaefatse toko’e hataontikagne naho te ho nama i Jesosy tika, arake ty Efesianina 4:15, 16?

¹⁴ 4) Oriho ty lamigne misy agnivo i fandamina i Jehovah eo. Hifandrambe maifitse amy i Jesosy, i loha o fiangonagneoy, tika naho mankatò ze ndaty tinendre hikarakara antikagne. (Vakio ty Efesianina 4:15, 16.) Mikezake ohatse tika mba hampiasa soa ty Anjomba i Fanjakagney iaby. Voka’e, naharo raike ty fiangonagne ila’e, le novagne ka ty faritane itoria iareo. Tsy maintsy niova tamy ze raha fa nahazatse aze areke o mpitorio. Ty anto’e,  va’e fa an-tao’e maro reke ro niarake tamy i fiangonagne nisy aze talohay, le misy amy ty mpiara-manompo ao va’e tena fa nifandrambe bey ama’e. Faie ndra tie eo zay, le nisy voka’e soa o fagnovàgne iohoe satria mahavy ty vola fagnomezagne ataontika tsy lanilany avao. Azo antoke fa tena fale ty Jesosy mahatrea o mpiana’e tsy mivalikeo magnorike o lamigne iohoe.

15. Nagnino tika ro vao mainke ho mpiragnetse amy i Jesosy amy ty hoavy?

¹⁵ Mitamà hiarake amy i Jesosy nainai’e o voahosotseo satria hiara-manjaka ama’e amy i Fanjakàn’Andrianagnaharey ao. Tena hahatrea maso i Jesosy iareo amy izay sady ho afake hirehake ama’e mivantagne. (Jaona 14:2, 3) Faie haneho hatea naho hikarakara soa ze ndaty mitamà hiaigne nainai’e an-tane etoy ka ty Jesosy. Tena hahafa-po iareo ty fiaignagne homey i Jehovah naho i Jesosy iareo tie amy izay, sady vao mainke ho mpiragnetse maifitse amy i Jehovah naho i Ana’ey iareo.—Isaia 9:6, 7.

16. Inogne iaby ty fitahiagne azontika noho itika nama i Jesosy?

¹⁶ Maro ty fitahiagne ho azontika naho magneke hiragnetse amy i Jesosy tika. Fa anehoa’e hatea ohatse tika tie amy izao sady ampea’e. Afake mitamà hiaigne nainai’e ka tika. Fa ty tena lahibey, le tihoe hanjare ho nama i Jehovah, i Rae i Jesosỳ tikagne. Tsy misy harena sarobily mihoatse tihoe mifandrambe maifitse amy i Jehovah. Tombotsoa lahibey areke ty tokavegne tihoe nama i Jesosy!