1. Ombia ro va’e ho halignontika fa tena lahibey ty fanompoagne i Jehovah?

NAHO ty heve’o, ombia ro tena sarotse ty manompo i Jehovah? Naho fa amy ihe miatreke olagney vao sa amy ihe milamindamingey? Mateteke ro tsy sarotse amantika ty miantehetse amy i Jehovah naho fa managne olagne tika. Faie akore naho fa milamigne ty fiaignantika, halignontikagne vao fa mbe toko’e ho raha lahibey amantika avao ty fanompoagne i Jehovah? Nampitao o Israelitao zao ty Jehovah mba tsy hanao izay.​—Deot. 6:10-12.

2. Nagnino ty Asa Mpanjaka ro modely ho antika?

² Tena modely soa ho antika ty Asa Mpanjaka satria niantehetse tanterake tamy i Jehovah reke. Tsy tihoe naho fa niatreke raha sarotse avao reke vaho nanao izay fa ndra tamy ty fotoagne nisia ty filaminagne ka aza. Rehafe ty Baiboly fa ‘nanompo i Jehovah tamy ty fo’e reke amparampahafate’e.’ (1 Mpanj. 15:14) Fomba raike nampisehoa’e izay zao ty namoagna’e ty fanompoan-tsampy ta Joda tao. Rehafe ty Baiboly ka fa nafaha’e iaby ze alitara o hafa firenenao naho ty toeragne abo, sady dinemodemo’e ze vatolahy natao hivavahagne, le nitapahe’e ka ze oren-katae masigne. (2 Tan. 14:3, 5) Nafaha’e tamy ty toeragne ambone nitana’e tamy i fanjaka’ey tao aza ty Maka, i bebei’ey. Nagnino? Satria nitarihe’e hanompo sampy o ndatio.​—1 Mpanj. 15:11-13.

3. Ino ty hodinehentika amy ty lahatsoratse toy?

³ Tsy namoagne ty fanompoan-tsampy avao ty Asa fa nagnampe ty ndaty ta Joda tao ka mba hanompo i Jehovah indraike.  Tena nitahie i Jehovah reke, le nilamigne ty fiaigna ty ndaty ta Joda tao. Rehafe ty Baiboly fa ‘nilamigne i taney tagnate ty folo taogne nanjaka i Asa.’ (2 Tan. 14:1, 4, 6) Hodinehentika amy ty lahatsoratse toy tie akore ty nagnararaota i Asa o fotoagne nisia ty filaminagne iohoe. Afara izay tika, le handineke ty fomba nanahafa ty Kristiana tamy taonjato voaloha’e i Asa Mpanjaka. Hodinehentikagne ka tie akore ty azontika agnararaotagne ty fotoagne isia ty filaminagne naho mbe tsy misy fagnenjehagne ty amy ty tane misy antikagne.

4. Akore ty nagnararaota i Asa i fotoagne nisia ty fiadanagne tamy i tane nisy iareoy, areke ty 2 Tantara 14:2, 6, 7?

⁴ Vakio ty 2 Tantara 14:2, 6, 7. Nirehafe i Asa tamo o vahoakeo fa i Jehovah ty ‘nanao ze hisia ty fiadanagne tamy iareo eo.’ Faie tsy nieretseretse reke tamy izay tie toko’e hitofatofa iareo fa tsy hanao raha. Ireke aza nagnoregne tanàgne, le nasia’e manda niaro aze naho fitalakesan-davitse maro vaho vavahady. Hoe ka reke tamy ty ndaty ta Joda tao: “Mbe malalake i taney, le azontikagne ampiasaegne soa.” Te hirehake amy iareo reke tie afake mandeha amy ze tane tea’e hitobohagne iareo satria tsy i Joda avao ty tane nimey i Jehovah iareo. Afake magnoregne tanàgne ka iareo satria tsy nisy fahavalo nanakatsakagne.

5. Nagnino ty Asa ro nampitombo ty fatanja ty tafike nanagna’e?

⁵ Azo antoke fa nihararaote i Asa ka o fotoagne nisia ty filaminagne iohoe mba hampitomboagne ty fatanja ty tafike nanagna’e. Amy izay ho vognogne iareo naho misy aly. (2 Tan. 14:8) Tsy natoky i Jehovah vao reke kanao nanao izay? Aha’a, tsy izay. Amy ty maha-mpanjaka aze, le andraiki’e ty nanao ze  hahavognogne o ndatio hiatreke raha sarotse naho miseho tampoke zay. Nihay i Asa ka fa tsy hilamigne nainai’e avao iareo. Tena tsy diso reke nieretseretse izay.

6. Ino ty natao ty Kristiana tamy taonjato voaloha’e tamy ty fotoagne tsy nisia ty fagnenjehagne?

⁶ Mateteke ty Kristiana tamy taonjato voaloha’e ro nenjehegne. Faie nisy fotoagne ka iareo tsy nenjehegne. Ino ty natao iareo tagnate ze fotoagne zay? Nagnararaotse nitory i talily soay iareo fa tsy nitofatofa. Tena nazoto nitory o Kristiana rehoe sady nifantoke tamy ty fanompoagne avao. Voka’e, ‘nihanitombo avao ty isa iareo.’ Trea boake amy izay, fa tena ty nitahy iareo ty Jehovah noho iareo nagnararaotse ty fotoagne tsy nisia ty fagnenjehagne.​—Asa. 9:26-31.

7-8. Nahay nagnararaotse fotoagne vao ty Paoly naho ty Kristiana hafa? Hazavao.

⁷ Nitory avao o Kristiana tamy taonjato voaloha’e rehoe naho fa nahatrea hirike hanoagne izay. Naho fa nihay i apostoly Paoly zao ohatse tie nisy lalagne malalake nisokafegne ho aze ty ta Efesosy ao, le nagnararaotse nijanogne tao reke mba hahafaha’e hitory naho hampianatse ty ndaty tao.​—1 Kor. 16:8, 9.

⁸ Nisy aly hevetse miomba ty savatse tamy taogne 49. Nihararaote i Paoly naho ty Kristiana hafa o fotoagne iohoe mba hitoriagne amy ty ndaty maro. (Asa. 15:23-29) Naho fa nandeha nirehake ty fanapaha-kevetse nirambesegne tamy izay tamo o fiangonagne marò iareo, le nikezake mafe mba hagnambara “i talily soa miomba ty saontsy i Jehovah-y.” (Asa. 15:30-35) Ino ty voka’e? Rehafe ty Baiboly fa “nihamafe ty finoa i fiangonagne rey sady nihamaro isan’andro ty ndaty tagnate’e ao.”—Asa. 16:4, 5.

9. Manao akore ty mpanompo i Jehovah amy ty ankamaroa ty tane ila’e agne, le ino ty raha mila saintsaignentika?

⁹ Tsy misy fagnenjehagne ty ankamaroa ty tane ila’e amy izao, le afake mitory malalake ty mpitory agne. Hoe izay ka vao ty tane misy azo? Naho izay ty raha misy, le saintsaigno zao: ‘Akore ty azoko agnararaotagne ze o fotoagne zao?’ Vao mainke mahavy ty vahoa i Jehovah hafana fo amy ty asa fitoriagne naho fampianaragne ze o andro fara’e zao. (Mar 13:10) Maro ty raha azontika atao mba hanoagne o asa iohoe.

10. Mandrisike antika hanao ino ty 2 Timoty 4:2?

¹⁰ Naho mbe tsy misy fagnenjehagne ty ama’areo agne, akore ty azo’o agnararaotagne ze fotoagne zay? (Vakio ty 2 Timoty 4:2.) Dineho tie: ‘Kera misy fagnovàgne azoko atao amy ty fiaignako ndra ty fiaigna’ay keleian-draike mba hahafaha’ay mampitombo ty fanompoa’ay, ohatse manao mpisava lalagne? Tsy fotoagne toko’e hamoriantika harena zao. Ty anto’e, tsy misy hipaiantikagne irey amy i haoreagne lahibeỳ.​—Ohab. 11:4; Mat. 6:31-33; 1 Jaona 2:15-17.

11. Ino ty raha atao ty mpitory ila’e mba hahafaha iareo mitory amy ty ndaty fara’e ze ty maro?

¹¹ Maro ty mpitory nianatse firehake hafa mba hahafaha’e magnampe ty hafa hahafantatse ty miomba i Jehovah. Maro ty fitaovagne mey i Jehovah amy ty alala ty fandamina’e mba hagnampeagne antika hahavita hitory amy ty firehake maro. Tamy 2010 ohatse, le nadika tamy ty firehake 500 eo ho eo o boke naho gazetentikagneo. Fa amy izao, le fa losotse ty 1000 ty firehake andikagne aze.

12. Ino ty soa rambese o ndatio naho fa maharey ty hamarenagne amy ty fireha’e iareo? Magnomeza ohatse raike.

¹² Ino ty voka’e naho fa maharey ty hamarenagne amy Saontsin’Andrianagnahare ao  amy ty fireha’e o ndatio? Mareho ty soa nirambese ty rahavave raike nagnatreke havoriambey vondrom-paritse tamy ty firehake kinyarwanda ta Etazonia agne toy. Io ty firehake tena ampiasae ty ndaty a Rwanda agne, a Kinshasa a Congo agne naho a Ogandà agne. Hoe i rahavavey naho fa nivita i havoriambey: “Fa 17 taogne zay ty nitobohako ta Etazonia eto faie igne ty fandaharagne ara-pagnahy tena niazoko soa am-parake izay.” Trea boake amy izay fa tena nanohigne ty fo i rahavavey i fandaharagney satria tamy ty fireha’e. Naho afake mianatse firehake hafa rehe, nagnino naho mianatse ty firehake ampiasae ty ndaty ila’e amy ty faritane’areo? Ino ty mahasoa izay? Va’e ho tena tea i ndaty rey naho amy ty firehake ampiasae iareo ty itoriagne amy iareo i talily soay. Tena ho fale rehe naho mikezake manao izay.

13. Ino ty natao ty rahalahintikagne a Rosia agne mba hagnararaotagne ty fotoagne tsy nisia ty fagnenjehagne?

¹³ Tsy afake mitory malalake ty mpiara-manompo amantika amy ty tane ila’e agne satria enjehe o fanjakagneo. Hoe izay ohatse ty manjò ty rahalahintikagne a Rosia agne. Nenjehe ty fanjakagne tao avao iareo tagnate ty taogne maro. Faie nimeigne fahafahagne iareo tamy Marsa 1991. Tamo o fotoagne iohoe, le eo ho eo 16 000 ty isa ty mpitory ta Rosia agne. Ie 20 taogne tafara izay, le nitombo ho 160 000 ty isa iareo. Azo antoke fa nihararaote o rahalahintikagne agne rehoe i fotoagne tsy nagnenjehagne iareoy. Faie tsy nitohy avao ze fotoagne zay. Ndra tie eo aza ty fagnenjehagne iareo, le mbe mazoto mitory avao iareo. Manao ze azo iareo atao iareo mba hahafaha iareo manompo i Jehovah avao.

14-15. Akore ty nampiasa i Jehovah ty heri’e mba hagnampeagne ry Asa?

¹⁴ Nisy fara’e avao i fotoagne nisia ty filaminagne tamy i andro i Asa Mpanjakay. Nisy maramila an-tapetrisa’e boake a Etiopia agne niavy nanafike iareo. I Zera ty nitarike o maramila rehoe sady tena natoky iareo fa ho rese iareo ty ry Asa. Akore ty natao i Asa? Niantehetse tamy i Jehovah reke fa tsy tamy i tafike nanagna’ey. Izao ty raha nirehafe’e naho fa nivavake reke: “O Jehovah Andrianagnahare’ay! Ihe ro iantehera’ay, sady amy ty tahina’o ty iavia’ay etoa mba hialy amo o vahoake iohoe.”​—2 Tan. 14:11.

¹⁵ Naheregne indroe ty isa ty maramila i Asa vaho izay mitovy tamy ty maramila o Etiopianao. Faie natoky ty Asa fa mahery ty Jehovah sady tsy sarotse ama’e ty magnampe ty vahoa’e. Tsy diso reke naho natoky izay, satria tena nagnampe iareo vata’e ty Jehovah, le nivita iareo ty nandrese o Etiopianao.​—2 Tan. 14:8-13.

16. Nagnino ro ampoizentikagne fa hisy ty fagnenjehagne?

¹⁶ Tsy tena fantantikagne amy ty pitsopitso’e ty raha hiseho amantika tsikiraidraike amy ty hoavy. Faie haintikagne fa tsy tihoe hilamigne hoe avao ty fiaignantikagne fa hisy ty fagnenjehagne. Fa nirehafe i Jesosy mialoha aza fa “ho heje ze kila ndaty” ty mpiana’e amy ty andro fara’e. (Mat. 24:9) Fa nirehafe i apostoly Paoly ka tie: “Ze ndaty magniry hahafoe tegna ho an’Andrianagnahare sady miharo amy Kristy Jesosy, le henjehegne ka.” (2 Tim. 3:12) “Tena boseke mafe” ty Satana amy izao, le tsy toko’e hieretseretse tika tie hilamigne avao ty fanompoantikagne i Jehovah.​—Apok. 12:12.

17. Ino ty raha va’e hitsapa ty finoantikagne?

¹⁷ Rehafe ty Baiboly fa hisy raha hitsapa ty finoantikagne tsy ho ela. Tsy inogne zay fa i “haoreagne lahibeỳ.” ‘Mbe tsy nisy haoreagne hoe izay indraike boake amy ty nifotora ty tane toy hatrake amy hinane zao.’ (Matt. 24:21) Amy ze fotoagne zay, le ndra ty longontikagne aza, le va’e hagnenjeke antika sady hanakatsakagne ty asa fitoriagne ataontikagne.  (Mat. 10:35, 36) Hanahake i Asa vao rehe amy izay, le hatoky fa hagnampe azo sady hiaro azo ty Jehovah?

18. Ino ty hagnampe antika ho vognogne hiatreke ty fagnenjehagne hanjò antika, arake ty Hebreo 10:38, 39?

¹⁸ Mey i Jehovah hanegne ara-pagnahy maro tika amy izao mba hagnatanjahagne ty finoantikagne. Mampiasa o “mpanompo mahihitse naho mahimbagneo” reke mba hagnomey antikagne izay “amy ty fotoagne mete.” Managne ze raha iaby ilaegne areke tika mba hahavy antika tsy hivalike amy i Jehovah. (Mat. 24:45) Faie mila mikezake mafe tika tsikiraidraike mba hanao ze hagnatanjahagne ty finoantika i Jehovah.​—Vakio ty Hebreo 10:38, 39.

19-20. Ino iaby ty raha mila saintsaignentikagne, le nagnino tika ro mila manao izay, arake ty 1 Tantara 28:9?

¹⁹ Mila “mipay i Jehovah” manahake i Asa tika. (2 Tan. 14:4; 15:1, 2) Asehontika fa mipay i Jehovah tika naho mianatse miomba aze, le atao badisa. Le naho fa vita badisa tika, le mila mikezake mafe mba hampitombo ty hateantikagne i Jehovah. Mba hahafantarantika tie manao akore ty hateantika aze, le mila misaintsaigne hoe izao tika: ‘Mivory tsy tapake vao raho?’ Naho fa itika mivory, le vao mainke tapa-kevetse ty hanompo i Jehovah avao satria mahazo hery sady mahazo fampaherezagne boake amo o mpiara-manompò. (Matio 11:28) Mila misaintsaigne hoe izao ka tika: ‘Mamaky Baiboly isan’andro vao raho? Manao fotoam-pivavaha ty keleiagne tsy tapake vao zahay keleian-draike isan-keregnandro? Ndra manao fianaragne raike tsy tapake vao raho? Manao ze azoko atao vao raho mba hahafahako hitory naho hampianatse ty hafa?’

²⁰ Rehafe ty Baiboly fa mandineke ty raha eretseretentikagne naho ze raha am-pontikagne ao ty Jehovah. (Vakio ty 1 Tantara 28:9.) Mila misaintsaigne o fagnonteneagne rehoe areke tika mba hahafantarantikagne tie mampifale i Jehovah vao ty raha eretseretentika naho ty raha am-pontika ao. Naho treantikagne fa misy raha mila ovagne ty amantikagne, ohatse ty tanjontikagne ndra ty toe-tsaintikagne, le mila mangatake fagnampeagne amy i Jehovah tika mba hahavitantikagne izay. Izao ty fotoagne toko’e hiomanantikagne mba ho vognogne hiatreke ze raha hiseho tsy ho ela. Hararaoto soa areke ty fotoagne amy ie mbe milamigneo!