1. Ino ty raha nirehafe i Jesosy tamy ty mpagnarato efa-dahy rey, le akore ty natao iareo?

NI-MPAGNARATO ty niasa i Petera, i Andrea, i Jakoba naho i Jaona tie taloha. Va’e ho nitaitse areke iareo naho fa nirehake tamy iareo ty Jesosy tie: “Andao hagnorike ahy, fa hataoko mpagnarato ndaty nareo.” * Akore ty natao iareo? Hoe ty Baiboly: “Le avy le nagnenga i haroto’ey iareo, le nagnorike aze.” (Mat. 4:18-22) Azo antoke fa nagnova ty fiaigna iareo ze fanapaha-kevetse nirambese iareo zay. Ty anto’e, tsy hagnarato fiagne sasa iareo fa hanjare ho “mpagnarato ndaty.” (Lioka 5:10) Mbe manasa ty ndaty managne toe-po soa ndra ndaty tea ty hamarenagne ka ty Jesosy tie amy izao. (Mat. 28:19, 20) Fa nagneke o fanasà i Jesosy hanjare ho mpagnarato ndaty iohoe vao rehe?

2. Nagnino tika ro mila mandineke soa hey aloha ty hanapa-kevetse ty hanjare ho mpagnarato ndaty, le ino ty hagnampe antika handrambe o fanapaha-kevetse lahibey iohoe?

² Va’e fa mianatse Baiboly rehe sady fa mampihatse ty raha ianara’o ka. Misy raha mila atao areke. Mila manapa-kevetse mba hanjare ho mpitory i talily soay rehe. Faie akore naho mbe misalasala ty hagneke o fanasà i Jesosy iohoe rehe? Ko kivy naho izay ty tsapa’o. Ty anto’e, trea boake amy izay fa tena fanapaha-kevetse lahibey io ama’o sady tena maregne zay. Maregne fa mirehake ty Baiboly tie “le avy le” nagnenga i harato iareoy ty Petera naho i nama’e rey. Faie tsy midika zay tie tsy nandineke soa iareo naho fa nandrambe o fanapaha-kevetse iohoe. Fa nahafantatse i Jesosy iareo enem-bolagne taloha io, le nirese lahatse fa ireke ro Mesia. (Jaona 1:35-42) Va’e fa maro ka ty raha fanta’o miomba i Jehovah naho i Jesosy tie amy izao, sady magniry ty hifandrambe  maifitse amy i Jehovah avao rehe. Faie aloha ty handrambesa’o fanapaha-kevetse iohoe, le mila mandineke soa hey rehe. Ino ty nagnampe i mpagnarato efa-dahy rey handrambe o fanapaha-kevetse iohoe?

3. Ino iaby ty toetse hagnampe azo mba hanjare ho mpitory naho mpampianatse mahay?

³ Nisy toetse efatse nanagna i mpiana i Jesosy rey tamy iareo mbe ni-mpagnarato fiagney. Inogne iaby zay? Hatea naho ty fahaiagne i asay, herim-po naho fifehezan-tegna. Mbe nila nanagne o toetse rehoe ka iareo naho fa nanjare mpagnarato ndaty. Hodinehentika amy ty lahatsoratse toy tie ino ty hagnampe antika hanagne o toetse rehoe mba hahavy antika ho mpitory naho mpampianatse mahay.

4. Ino ty tena nahavy i Petera hagnarato?

⁴ Nagnarato ty Petera mba hahafaha’e mamelogne ty keleia’e. Faie tsy izay avao ty nahavy aze hagnarato. Tena nitea’e ka o asa iohoe. (Jaona 21:3, 9-15) Nila nitea i Petera ka i asa fagnaratoagne ndatỳ. Noho ty fagnampea i Jehovah, le nanjare nahatrea vokatse soa reke naho fa nanao o asa iohoe.—Asa. 2:14, 41.

5. Nagnino ty Petera ro natahotse arake ty Lioka 5:8-11? Ino ty toko’e hataontikagne naho mahatsapa izay ka tika?

⁵ Ty hateantika i Jehovah ty anto’e lahibey mahavy antika mitory i talily soay. Ze hateantika i Jehovah zay ka ty hagnampe antika hahavita hitory amy ty hafa ndra tie mahatsapa ho tsy mahay aza tika. Naho fa nasae i Jesosy hanjare ho mpagnarato ndaty ty Petera, le hoe reke tama’e: “Ko matahotse.” (Vakio ty Lioka 5:8-11.) Fa nagnino ty Jesosy ro nirehake izay? Tsy tihoe natahotse ty raha va’e hanjò aze naho fa hanjare mpitory ty Petera. Nieretseretse ty vata’e ho tsy fagneva ty hanao o asa iohoe reke naho fa nahatrea ty fiagne maro niazo iareo noho ty fahagagagne natao i Jesosy. Va’e  hatahotse manahake i Petera ka rehe naho fa mahafantatse ty raha mila atao’o naho fa manjare mpiana i Kristy. Naho izay ty tsapa’o, le ampitombò ty hatea’o i Jehovah naho i Jesosy vaho ty ndaty magnodidigne azo. Hagnampe azo hagneke i fanasà i Jesosy mba hanjare ho mpagnarato ndatỳ ty fanoa’o zay.​—Mat. 22:37, 39; Jaona 14:15.

6. Inogne ka ty anto’e hafa mahavy antika hitory?

⁶ Ino ka ty anto’e hafa mahavy antika hitory? Te hankatò i lily i Jesosy manao tihoey tie: “Mandehana..., le anò mpianatse ze ndaty.” (Mat. 28:19, 20) Treantikagne ka tie mahaferenaigne o ndatio satria aparitake manahake ty agnondry tsy misy mpiarake iareo, le mila ampianaragne ty hamarenagne miomba i Fanjakagney. (Mat. 9:36) Tea i Jehovah hanagne fahalalagne maregne soa ty hamarenagne naho ho voavonje ka ze kila o ndaty.—1 Tim. 2:4.

7. Nagnino ty Romanina 10:13-15 ro mampiseho fa tena lahibey ty asa fitoriagne?

⁷ Manjare magniry hitory i talily soay ka tika naho misaintsaigne tie mamonje ty fiay ze ndaty mitsanogne antika o asa iohoe. Naho fa mahazo fiagne zao o mpagnaratò, le avaro’e ndra hane’e. Fa itika “magnarato” ndaty mba hamonjeagne ty fiay iareo.​—Vakio ty Romanina 10:13-15; 1 Timoty 4:16.

8-9. Ino ty raha tsy maintsy nifantare o mpagnaratò, le ino ty anto’e?

⁸ Tsy maintsy namantatse ty karazam-piagne azo hanegne ty mpagnarato tamy ty andro i Jesosy. (Lev. 11:9-12) Nila nifantare’e soa ka tie aia ty toeragne imaroa o fiagneo. Mateteke o fiaigneo ro miheo amy ty toeragne tena mete amy iareo naho amy ty toeragne misy hanegne. Mila hay o mpagnaratò ka tie ombia ty fotoagne mete soa hagnaratoagne. Magnamaregne izay ty tantara raike toy. Misy vavolombelogne raike mipetrake amy ty tokonose a Pasifika agne. Nasae’e hiarake hagnarato ama’e ty misionera raike tie indraike. Le hoe i misioneray tama’e: “Maray maraindraigne amy sive areke ty fotoantikagne.” Le hoe ty navale i rahalahỳ: “Trea rehe rahalahy tie tsy mpagnarato vata’e. Amy ze fotoagne mahamaro i fiagney anio tika ro toko’e hagnarato fa tsy amy ze fotoagne metemete amantikagne.”

⁹ Hoe izay ka ty natao i mpagnarato ndaty tamy taonjato voaloha’e rey. Nifantare iareo tie aia ty toeragne va’e hahatreavagne ndaty maro, le amy fire iareo ro va’e ho zoe eo. Nitory tamy i tempolỳ tao naho tamo o synagogao tagne ohatse i mpiana i Jesosy rey. Nitory isan-tragno naho ta bezara ey ka iareo. (Asa. 5:42; 17:17; 18:4) Mila fantarentikagne ka areke tie ombia ty fotoagne tena ahatraragne o ndatio an-tragno’e ao. Naho fa haintikagne zay, le mila vognogne tika hagnova ty fandaharam-potoantikagne mba hahafahagne mitory amy i ndaty rey amy ty fotoagne mete soa amy iareo.​—1 Kor. 9:19-23.

10. Ino ty fitaovagne mey i fandaminagne antika?

¹⁰ Mila fantare o mpagnaratò ka tie ino ty fitaovagne toko’e hampiasae’e, le mila hai’e soa ka ty fomba fampiasagne aze. Misy fitaovagne mila ampiasaentikagne ka naho fa mitory. Mila haintikagne soa ty fomba fampiasagne irey. Naho fa nagnirake i mpiana’e rey hagnarato ndaty ty Jesosy, le nagnomey toromareke mazava soa iareo. Nirehafe’e tamy iareo ohatse tie ino ty raha tsy toko’e hindese iareo, aia ty toeragne hitoria iareo, le ino ty raha toko’e ho rehafegne. (Mat. 10:5-7; Lioka 10:1-11) Maro ka ty fitaovagne mey i fandaminagne antika amy izao, agnisa izay o Fitaovagne Fampianaragneo. * Tena magnampe antika hahatrea vokatse  amy ty fanompoagne rey satria ampianare i fandaminagne ty fomba ampiasagne aze. Le i fampiofagnagne antika rey ty mahavy antika hatoky tegna naho ho mpampianatse mahay.​—2 Tim. 2:15.

11. Nagnino o mpagnarato ndatio ro mila managne herim-po?

¹¹ Mila managne herim-po ka o mpagnaratò. Ty anto’e, kindraike le mivalike tampoke i androy ndra misy tiobey amy iareo an-driake eỳ. Amy i halegney ka iareo mateteke ro magnarato, ie amy izao maiegne ty amy izay. Mila managne herim-po hoe izay ka o mpagnarato ndatio. Naho fa manomboke mitory tika sady mampahafantatse o ndatio tie Vavolombelo i Jehovah, le va’e hanohetse antikagne ty keleiantika, ndra ho tsikihe ty namantikagne tika, ndra va’e hanohetse ty hafatse torientikagne o ndatio. Faie fa ampoizentikagne zay satria fa nirehake ty Jesosy tie hanohetse o mpiana’eo ty ndaty hitoria iareo.​—Mat. 10:16.

12. Naho henteagne ty Josoa 1:7-9, ino ty hagnampe antika hanagne herim-po?

¹² Ino ty hagnampe azo hanagne herim-po? Voaloha’e, anò ze haharese lahatse azo fa mitarike antika ty Jesosy naho fa manao ty asa fitoriagne tika. (Jaona 16:33; Apok. 14:14-16) Faharoe, matokia fa tena hagnomey ze raha ilae’o ty Jehovah. (Mat. 6:32-34) Naho fa tena mino ireo rehe, le vao mainke ho bey herim-po. Trea tie tena nanam-pinoagne ty Petera naho i nama’e rey naho fa nagnenga i asa fiveloma iareoy, le nanonjohy ty lia i Jesosy. Trea ka tie tena nanam-pinoagne rehe naho fa nirehake  tamy ty longo’o ndra ty nama’o tie hianatse Baiboly sady hivory miarake amo o Vavolombelo i Jehovah-o. Fa niova ka rehe, le tsy manao ty raha fatao’o taloha sasa mba hagnorihagne ty fitsipy i Jehovah. Mila finoagne naho herim-po ka reo. Vao mainke hanagne herim-po rehe, naho tena matoky tie “manohagne azo ty Jehovah Andrianagnahare’o ndra aia ndra aia andehana’o.”​—Vakio ty Josoa 1:7-9.

13. Nagnino ty fisaintsaignagne naho ty vavake ro magnampe azo hanagne herim-po?

¹³ Ino ka ty hagnampe azo hanagne herim-po naho fahasahiagne? Mangataha amy i Jehovah. (Asa. 4:29, 31) Matokia fa hamale ze fangataha’o zay reke sady hanohagne azo avao. Agnila’o eo avao reke. Saintsaigno ka ty fomba namonjea i Jehovah ty mpanompo’e taloha naho ty fomba nagnampea’e azo mba hahavita hiatreke raha sarotse vaho ty nagnomea’e hery azo mba hahavita’o hiova. Eretsereto tie i Andrianagnahare nitarike ty vahoa’e nandeha tamy i Riake Menay teoy ro mampitamà fa hagnampe azo mba hanjare ho mpiana i Kristy! (Eks. 14:13) Naho misaintsaigne izay rehe, le hatoky i Jehovah manahake ty mpanao salamo toy. Hoe reke: “I Jehovah ty manohagne ahy, le tsy hatahotse raho. Ino moa ty raha azo o ndatio atao amako?”​—Sal. 118:6.

14. Ino ty ianara’o boake amy ty tantara o rahavaventikagne roe rehoe?

¹⁴ Hanagne herim-po ka rehe naho mandineke ty fomba nagnampea i Jehovah ty ndaty saro-kegnatse mba ho sahy hitory. Nisaro-kegnatse ohatse ty rahavaventikagne raike, le nieretseretse tie tsy ho vita’e ze o hitory zao, lohotsie fa amy ty ndaty tsy fanta’e. Manahake o manda abo beio ty fieretsereta’e izay, le tsy ho vita’e ty hanganike ama’e. Ino ty nagnampe aze handrese izay? Nikezake mafe reke mba hampitombo ty hatea’e i Jehovah naho ty ndaty magnodidigne aze. Natao’e an-tsaigne ka tie meke ty asa fitoriagne sady nangatake hery tamy i Jehovah ka reke mba hampitombo ty fagniria’e hitory. Nanjare tsy natahotse sasa areke reke sady nanao mpisava lalagne maharetse. Magnampe o mpitory vaovaò mba hanagne herim-po ka ty Jehovah. Mampiseho izay ty tantara ty rahavaventikagne raike hafa toy. Tamy ireke nitory isan-tragno, le nikorakorahe ze ampela nitoria’e voaloha’e zay tie: “Izaho tsy te hirehake ama’areo Vavolombelo i Jehovah-o!”, sady nakarato’e i lala’ey. Faie tsy mba natahotse reke. Izao aza ty nirehafe’e tamy i nama’ey: “Ino ty raha nivoamare’o teo? Tsy nirehake tama’e ndra inogn’inogne raho faie nifanta’e tie Vavolombelo i Jehovah. Fa mahafale ahy ty fahafantara’e izay!” Mpisava lalagne maharetse o rahavaventikagne iohoe amy izao.

15. Nagnino o mpagnaratò ro mila mifehe tegna, le nagnino ka tika ro tena mila o toetse iohoe?

¹⁵ Mila managne fifehezan-tegna ka o mpagnaratò naho te hahazo fiagne maro. Rehafegne tihoe mahafehe tegna ty ndaty raike naho fa ‘mahavita mamolake ty vata’e mba hanao ty raha toko’e hatao’e.’ Tsy maintsy mikezake mifoha maraindray bey ohatse o mpagnaratò. Tsy mijanogne ka iareo naho tsy vita i asay sady miaretse ey avao ka iareo naho miova tampoke i androy. Mila mifehe tegna ka tika naho te hahavita hiaretse sady te hamita o asa fitoriagneo hatrake am-para’e.—Mat. 10:22.

16. Ino ty hagnampe antika hanagne fifehezan-tegna?

¹⁶ Vaho aterake avao tika le fa mahay mifehe tegna? Aha’a, tsy izay. Itika aza mateteke naho fa misy raha toko’e hatao, le ze fomba hahamoramora aze avao ro paliantikagne. Faie kindraike, le tsy mora ty manao ty raha lahibey ila’e takégne amantikagne. Izay ty mahavy antika mila managne fifehezan-tegna. Afake magnomey antika ty fagnahi’e masigne ty Jehovah mba hagnampeagne antika hanagne o toetse iohoe.​—Gal. 5:22, 23.

17. Ino ty raha nirehafe i Paoly tie nila natao’e mba hahavita’e hifehe tegna, arake ty 1 Korintianina 9:25-27?

 ¹⁷ Nanagne fifehezan-tegna ty apostoly Paoly faie nagneke ka reke tie nila “nasia’e mafe” ty vata’e mba hahavita’e manao raha soa avao. (Vakio ty 1 Korintianina 9:25-27.) Nandrisike ty hafa ka reke mba hifehe tegna mba hahavità iareo hanao raha amim-pahamendrehagne naho amim-pilaminagne amy ze kila raha. (1 Kor. 14:40) Mila mikezake mafe ka tika mba hifehe tegna, le hanao raha ara-pagnahy isan’andro, agnisa izay ty fandrambesagne anjara amy ty asa fitoriagne naho ty asa fampianaragne.​—Asa. 2:46.

18. Ino ty raha mila ataontika naho teantika ty ho hevere i Jehovah ho mpitory mamokatse?

¹⁸ Ty hamaro ty fiaigne azo o mpagnaratò ty amaritagne tie mahay reke ndra tsy mahay. Faie o mpitorio tsy hoe izay. Tsy ty hamaro ty ndaty nampea’e mba hanjare ho Vavolombelo i Jehovah ty irehafagne tie mamokatse reke. (Lioka 8:11-15) Amy i Jehovah, le mamokatse tika naho fa mikezake manohy avao ty asa fitoriagne naho ty asa fampianaragne ndra tie miatreke raha sarotse aza. Ty anto’e, asehontika amy izay fa mankatò aze naho i Ana’ey tika.​—Mar 13:10; Asa. 5:28, 29.

19-20. Nagnino tika ro toko’e hagnararaotse hitory amy hinane zao?

¹⁹ Voafetra avao ty volagne azo ty mpagnarato agnaratoagne amy ty tane ila’e agne. Tena hararaote iareo soa areke o fotoagne iohoe, lohotsie naho fa hay iareo tie fa marine ho tapetse. Haintikagne ka tie fa marine ty hifaragna ty tontolo toy. Tena fa kidikidy sisa ty fotoagne azontikagne anoagne o asa mamonje aigne iohoe. Vao mainke areke mila magnararaotse mitory tika amy izao. Ko mangatake andro ndra mieretseretse tie: ‘Ndra aleo naho fa milamindamigne ty fiaignako vaho izay hanao o asa lahibey iohoe raho.’​—Mpito. 11:4.

²⁰ Ampitombò areke ty fagniria’o hitory i talily soay naho ty fahafantara’o ty hafatse agnate Baiboly ao. Managna ka herim-po naho fifehezan-tegna. Miaraha ka miasa amy i mpagnarato ndaty miiake valo tapetrisa mahery magneran-tane rey, amy izay rehe hanagne ty fifaleagne boake amy i Jehovah manahake iareo ka. (Neh. 8:10) Lonike rehe mba ho tapa-kevetse handrambe anjara amo o asa iohoe, sady hanohy hanao aze avao amparake ty hisaontsia i Jehovah tie: “Vita hinane zay!” Hodinehentika amy ty lahatsoratse magnarake ty raha telo hagnampe antika ho tapa-kevetse hanohy hanao o asa iohoe avao.