1. Nagnino ro azo antoke ty raha nitamae i Abrahama?

 NAMPITAMÀ i Abrahama ragne’e ty Jehovah fa hahazo fitahiagne amy ty alala ty tarana’e ty firenena iaby. (Gen. 15:5; 22:18) Satria ty Abrahama tena naneho finoagne an’Agnahare, le nirese lahatse reke fa ho tanterake ze raha nampitamae’e aze. Ndra tie fa ni-100 taogne aza ty Abrahama, le ni-90 taogne ty vali’e le mbe tsy nanagne anake avao iareo. (Gen. 21:1-7) Hoe ty Baiboly: “Mbe nitamà avao ty Abrahama ndra tie hoe tsy nisy raha tamaegne sasa aza, le nino tie hanjare rae ty firenena maro reke.” (Rom. 4:18) Haintika fa nitanterake ze raha nitamae’e zay. Nanjare niterake Isaka, i anadahi’e nitamae’e tagnate ty taogne maroy reke. Ino ty nahavy i Abrahama hatoky i fampitamagney?

2. Nagnino ty Abrahama ro nirese lahatse fa tsy maintsy ho tanterake ze raha nampitamae i Jehovah?

² Satria reke nifandrambe maifitse tamy i Jehovah, le “tena nirese lahatse fa vitan’Andrianagnahare ty magnatanterake ze raha nampitamae’e.” (Rom. 4:21) Nankasitraha i Jehovah ty Abrahama le nitokave’e tihoe ndaty maregne noho ty finoa’e. (Jak. 2:23) Rehafe ty Romanina 4:18 fa nanagne finoagne naho fanantenagne ty Abrahama. Andao tika handineke ty raha nirehafe i Paoly miomba ty fanantenagne amy Romanina 5 ao.

3. Ino ty raha nirehafe i Paoly miomba ty fanantenagne?

 ³ Nihazavae i Paoly fa afake matoky tika fa ty ‘raha tamaentika tsy minday fahadisoam-panantenagne.’ (Rom. 5:5) Nampea’e ka tika hahatakatse tie akore ty hampitomboantika ty fanantenantika. Naho fa mandineke ty Romanina 5:1-5 tika, le dineho tie akore ty hampitomboantika isan’andro i fanantenantika miomba ty hoavỳ. Hotreantika ka tie akore ty hahafahantika mampitombo o fanantenantika iohoe mihoatse ty amparake izay. Andao areke hodinehentika voaloha’e i fampitamagne fanjaka nirehafe i Paoly tie tsy ombia handiso tamà antikay.

4. Ino ty raha rehafegne amy Romanina 5:1, 2 ao?

⁴ Vakio ty Romanina 5:1, 2. Nanoratse hoahy ty fiangonagne ta Roma tagne ty Paoly. Nianatse ty miomba i Jehovah naho i Jesosy ty rahalahy tagne, naneho finoagne le nanjare Kristiana. “Nitokavegne tihoe ndaty maregne [iareo] noho ty finoa iareo,” le nihosoran’Andrianagnahare ty fagnahi’e. Tena azo antoke ze fampitamagne soa ho azo iareo zay.

5. Ino ty raha tamae ty Kristiana voahosotse?

⁵ Tafara izay, le nanoratse hoahy ty Kristiana voahosotse ta Efesosy tagne miomba ty fampitamagne nimean’Andrianagnahare iareo ty Paoly. Nampitamaegne iareo fa hahazo “lova hoahy ty ndaty masigne.” (Efes. 1:18) Nirehafe i Paoly tamo o Kolosianao ka tie aia iareo ty hahazo i raha tamae iareoy. Nitokave’e tihoe “fanantenagne nitamiriegne hoahy iareo an-dagnitse agne” zay. (Kol. 1:4, 5) Mitamà o Kristiana voahosotseo fa hatsangagne mba hiaigne nainai’e an-dagnitse agne iareo le hiarake manjaka amy i Kristy.​—1 Tes. 4:13-17; Apok. 20:6.

6. Ino ty raha nirehafe ty rahalahy voahosotse raike miomba ty raha tamae’e?

⁶ Mankasitrake ze fampitamagne zay o Kristiana voahosotseo. Nirehake ty raha tsapa’e hoe izao ty rahalahy Frederick Franz agnisa ty voahosotse tie: “Tena azo antoke i raha tamaentikay, le sambe hahazo izay iaby  tika agnisa ty 144 000. Tena soa mandikoatse ty eretseretantikagne aze ze fitahiagne zay.” Nanompo tagnate ty taogne maro ty rahalahy Franz le izao ty nirehafe’e tamy 1991: “Mbe sarobily amantika avao i raha tamaentikay ... Ndra tie mandigne agnate ty fotoagne maro aza tika le vao mainke mankasitrake izay. Vognogne avao tika handigne izay ndra tie ho lignisagne agnate ty an-tapetrisa’e taogne aza. Vao mainke sarobily amako mihoatse ty taloha ze raha tamaeko zay ty amy izao.”

7-8. Ino ty raha tamae ty ankamaroa ty vahoa i Jehovah? (Romanina 8:20, 21)

⁷ Misy raha hafa ka tamae ty mpanompo i Jehovah amy izao. I raha nitamae i Abrahamay zay, le tihoe hiaigne nainai’e ambone tane etoy ambane fahefà i Fanjakan’Andrianagnaharey eo. (Heb. 11:8-10, 13) Nanoratse miomba ze fampitamagne soa zay hoahy ze mitamà aze ty Paoly. (Vakio ty Romanina 8:20, 21.) Ino amy fampitamagne miomba ty hoavy rey ty tena nahaliagne azo tamy tie irehe vaho nanomboke nianatse Baiboly? Ty fotoagne hahavy azo ho voririke le tsy hisy ota sasa vao? Sa rehe fale naho fa nianatse tie hovelomegne indraike i longo’o tena tea’o nimate rey le hiaigne amy i paradisay ao? Arakarake ty nitohiza i fianara’oy avao ty nampitombo ze “raha tamae’o zay.”

⁸ Ndra mitamà ty hiaigne nainai’e an-dagnitse agne tika ndra an-tane etoy, le tena mahavy antika ho fale o raha tamaentika reo. Afake mampitombo ze raha tamaentika zay tika. Nihazavae i Paoly magnarake tie akore ty fomba hanoantika izay. Andao tika handineke ty raha nisorate’e miomba i fampitamagney. Hagnampe antika vao mainke hatoky zay tie ho tanterake ty raha tamaentika amy ty hoavy.

9-10. Naho henteagne ty ohatse nengà i Paoly le afake mitamà ino tika? (Romanina 5:3) (Henteo i sarey.)

⁹ Vakio ty Romanina 5:3. Mareho tihoe mahavy antika vao mainke hatoky ty raha  tamaentika o haoreagneo. Va’e ho hafahafa amantika ty maharey izay. Fa hay ze ndaty manonjohy ty lia i Kristy tie hiatreke raha sarotse reke. Dineho ty ohatse nengà i Paoly toy. Hoe reke tamo o Tesalonianao: “Tamy zahay tama’areo teoy, le mateteke zahay ro nirehake mialoha tama’areo tie tsy maintsy miaretse haoreagne tika.” (1 Tes. 3:4) Izao ty nisorate’e tamo o Korintianao: “Tea’ay ho fanta’areo zao ry rahalahy ty raha sarotse natrehe’ay ... Tsy nagnampò ty ho velogne sasa zahay.”​—2 Kor. 1:8; 11:23-27.

¹⁰ Mitamà ka ty Kristiana amy hinane zao tie hiatreke raha sarotse sambe hafa. (2 Tim. 3:12) Enjehegne vao rehe amy hinane zao satria maneho finoagne i Jesosy sady manomboke manonjohy ty lia’e? Va’e hikizake azo zao ty nama’o naho ty longo’o, le halaigne azo iareo. Heje ty mpiara-miasa ama’o vao rehe satria manao ty maregne? (Heb. 13:18) Manohetse azo ka vao o fanjakagneo noho irehe mitory i talily soay amy ty hafa? Ndra inogn’ino ty karaza ty haoreagne atrehentika, le nirehake ty Paoly fa toko’e ho fale avao tikagne. Fa nagnino?

11. Nagnino tika ro toko’e ho tapa-kevetse ty hiaretse raha sarotse?

¹¹ Afake ty ho fale avao tika ndra tie miatreke raha sarotse satria magnampe antika hagnasoa ty toetse soa fa anagnantika zay. Rehafe ty Romanina 5:3 fa “ty haoreagne mahavy fiaretagne.” Mila managne fiaretagne areke ty Kristiana iaby satria hiatreke haoreagne. Mila tapa-kevetse ty hiaretse tika ndra inogn’ino ty raha sarotse va’e hatrehentika. Hahazo i fitahiagney tika naho miaretse sady manohy manompo i Jehovah avao. Tsy te hanahake i ndaty nampitovie i Jesosy amy ty voa nipoke tamy ty tane feno vatoy tika. Tamy ty voaloha’e, le nifale sady nagneke i raha nirei’ey reke faie naho fa niatreke “haoreagne naho fagnenjehagne” reke le nihemotse. (Mat. 13:5, 6, 20, 21) Maregne fa tsy mora tihoe miatreke fagnenjehagne ndra raha sarotse faie naho fa miaretse sady manohy manompo i Jehovah avao tika le mahazo tombo’e. Amy ty fomba akore?

12. Ino ty soa ho azontika naho fa itika miaretse raha sarotse?

¹² Nasongady i Jakoba mpianatse ty soa ho azontika naho fa miaretse raha sarotse. Hoe reke: “Engao hamita ty asa’e ty fiaretagne amy izay nareo hanjare voririke naho tsy hanan-tsiny amy ze kila raha iaby, le tsy hisy raha tsy ampe ty ama’areo.” (Jak. 1:2-4) Nirehake ty Jakoba fa managne asa ty fiaretagne. Inogne areke ty asa ty fiaretagne? Afake magnampe antika hanagne faharetagne, finoagne naho hiantehetse aman’Andrianagnahare ty fiaretagne. Faie tsy izay avao fa misy tombotsoa lahibey hafa ka ho azontika naho fa itika miaretse.

13-14. Ino ty voka ty fiaretagne, le ino ty ifandrambesa izay amy ty fanantenagne? (Romanina 5:4)

¹³ Vakio ty Romanina 5:4. Nirehafe i Paoly fa mahavy antika “hankasitrahan’Andrianagnahare” ty fiaretagne. Mahavy azo hahazo sitrake amy i Jehovah ty fiareta’o. Tsy midika zay tie fale reke naho fa miatreke olagne naho raha sarotse rehe. Tena fale reke naho miaretse rehe. Ty fiareta’o ty mahavy azo hankasitrahan’Agnahare. Fitahiagne nizao!​—Sal. 5:12.

¹⁴ Ko haligno fa naho fa niaretse raha sarotse ty Abrahama, le nanjare nankasitrake aze ty Jehovah. Nihevere i Jehovah ho ragne’e naho ndaty maregne reke. (Gen. 15:6; Rom. 4:13, 22) Naho ty maregne le afake ty hanao hoe izay ka tika. Tsy ty hamaro ty raha vitantika ndra ty toeragne anompoantikagne aze ty tena mahavy i Jehovah mankasitrake antika  fa noho itika miaretse le tsy mivalike ama’e. Tsy miankigne amy ty taontika ndra ty raha iaignantika vaho ty fahaiantika ty hahafahantikagne miaretse. Miatreke raha sarotse vao rehe ty amy izao? Naho izay, le tadidio avao fa mankasitrake azo ty Jehovah. Naho fa tsapa’o tie mankasitrake azo ty Jehovah, le hanjare hihamafe ty fatokisa’o i raha tamae’oy.

15. Inogne ty raha nirehafe i Paoly amy Romanina 5:4, 5 ao, le ino ty fagnonteneagne va’e ho avy an-tsaintikagne ao?

¹⁵ Nihazavae i Paoly fa hankasitrahan’Agnahare tika naho fa tsy mivalike ama’e sady miaretse raha sarotse. Mareho ty nanohiza i Paoly i reha’ey: “Ty fankasitrahan’Andrianagnahare mahavy raha tamaegne, le ty raha tamaegne tsy minday fahadisoam-panantenagne.” (Rom. 5:4, 5) Va’e tsy ho azontika zay. Nagnino? Satria fa nirehafe i Paoly amy Romanina 5:2 ao tie nanagne fanantenagne ze Kristiana ta Roma tao, le ty “fanantenagne ty voninahin’Agnahare.” Noho izay le va’e hisy ty hirehake tie: Naho fa nanagne fanantenagne o Kristiana rehoe, le ino ty anto’e nahavy i Paoly mbe nirehake miomba ty fanantenagne avao tafara izay?

16. Akore ty hahavy ty fanantenà ty ndaty raike hitombo? (Henteo i sarey.)

¹⁶ Ho azontika soa ty tea i Paoly horehafegne naho fa tadidientika avao tie azo ampitomboegne o fanantenagneo. Toy misy ohatse: Tadidi’o vao tie ombia rehe ro naharey voaloha’e i fampitamagne fanjaka boake agnate Baiboly ao rey? Naho fa naharey miomba i fiaignagne nainai’e amy paradisay aoy rehe, le va’e tsy nino tie tena hisy zay. Faie naho fa nianatse raha maro miomba i Jehovah naho ty fampitamae’e rehe tafara izay le nanjare rese lahatse tie tena maregne i fampitamagney.

17. Akore ty fomba hampitomboa’o ty fanantena’o afara ty badisa’o?

¹⁷ Tafara ty badisa’o, naho fa nihanitombo ty raha fanta’o miomba i Jehovah sady nihanitombo  ka ty hatea’o aze, le nanjare nihanitombo avao i fanantena’oy. (Heb. 5:13–6:1) Manahake i raha rehafegne amy Romanina 5:2-4 aoy ty raha iaigna’o. Miatreke olagne sambe hafa rehe faie miaretse le mankasitrake azo ty Jehovah. Naho fa fanta’o tie tea azo sady mankasitrake azo ty Jehovah, le izay ty anto’e lahibey mahavy azo hitamà i raha nampitamaegne azoy. Vao mainke hitombo mihoatse ty tamy ty voaloha’e i fanantena’oy. Manjare sarobily ama’o ze raha zay. Misy voka’e amy ty fiaigna’o ka zay le manjare miova ty fomba findesa’o ty keleia’o naho ty fomba fandrambesa’o fanapahan-kevetse vaho ty fampiasa’o ty fotoa’o.

18. Ino ty antoke nimea i Jehovah?

¹⁸ Nirehake raha lahibey hafa miomba ty fanantenagne ankoatse tihoe ahazoagne sitrake aman’Agnahare ka ty Paoly. Nagnomey toky reke fa tsy maintsy ho tanterake i raha tamae’oy. Nagnino rehe ro afake matoky izay? Nirehake antoke boake aman’Agnahare hoahy o Kristianao ty Paoly tie: “Ty raha tamaegne tsy minday fahadisoam-panantenagne, satria ty hatean’Andrianagnahare fa natao am-pontikagne ao tamy ty alala ty fagnahy masigne, i fa nimeagne antikagney.” (Rom. 5:5) Managne anto’e maro hatokisagne ze raha tamae’o zay rehe.

19. Ino ty toky anagna’o miomba i raha tamae’o rey?

¹⁹ Eretsereto i fampitamà i Jehovah tamy i Abrahamay naho tihoe akore ty nahavy aze nankasitraha’e naho nanjare nama’e. Tena nisy i raha nitamae i Abrahamay. Hoe ty Baiboly: “Nahazo ze fampitamaegne zay areke ty Abrahama, naho fa boake nampiseho faharetagne.” (Heb. 6:15; 11:9, 18; Rom. 4:20-22) Tsy nidiso tamà reke. Hahazo fitahiagne hoe izay ka rehe naho tsy mivalike avao. Managne anto’e maro hifaleagne rehe satria fanta’o fa tena ho tanterake i raha tamae’oy sady tsy ho diso tamà rehe! (Rom. 12:12) Hoe ty Paoly: “I Andrianagnahare magnomey fanantenagney abey ro hameno fifaleagne naho fiadanagne ty fo’areo satria matoky aze nareo! Amy izay, le vao mainke ho azo antoke ty fanantena’areo noho ty hery ty fagnahy masigne.”​—Rom. 15:13.