1. Ino ty fanapaha-kevetse fara’e soa azo ty ndaty tsikiraidraike rambesegne?

MATETEKE ro misy voka’e maharetse amo o ajajao ty fanapaha-kevetse rambese ty rae aman-drene’e. Naho raty ty fanapaha-kevetse rambese iareo, le va’e hahatrea olagne ty ana iareo. Fa naho soa, le hagnampe ty ana iareo ho sambatse amy ty fiaignagne zay. Faie ndra tie eo zay, le mila mahay manao safidy ka ty ana iareo. Azo ty ndaty tsikiraidraike atao zao ty mijobogne ty hanompo i Jehovah, i Babantikagne bey hateay. Tsy misy fanapaha-kevetse soa mandikoatse izay!​—Sal. 73:28.

2. Ino ty safidy soa natao i Jesosy naho o rae aman-drene’eo?

² Nitea i Josefa naho i Maria hanompo i Jehovah i ana iareo rey. Trea tamy ty safidy natao iareo fa izay ty raha tena lahibey tamy iareo. (Lioka 2:40, 41, 52) Nahavita ty raha nitea i Jehovah hampanoegne aze ka ty Jesosy satria nanao safidy soa. (Mat. 4:1-10) Nisoa fagnahy naho bey herim-po sady tsy nivalike tamy i Jehovah ty Jesosy naho fa nibey. Azo antoke fa ho fale ty rae aman-drene tea i Jehovah naho managne toetse soa hoe ireo ka ty ana iareo.

3. Ino ty hodinehentikagne ato?

³ Handineke ty fagnonteneagne retoagne tika amy ty lahatsoratse toy: Akore ty natao i Jehovah naho fa nijobogne ty ndaty hiteza i Jesosy? Ino ty raha azo ty rae aman-drene ianaragne boake amy i Josefa naho i Maria? Ino ka ty raha azo o tanorao ianaragne boake amy ty safidy natao i Jesosy?

4. Rae aman-drene manao akore ty nijobogne hiteza i Ana’ey?

⁴ Rae aman-drene nanagne toetse fanjaka ty nijobogne i Jehovah hiteza i Jesosy. (Mat. 1:18-23; Lioka 1:26-38) Naho henteagne  ohatse ty raha nirehafe i Maria agnate Baiboly ao, le trea tie tena tea i Jehovah naho ty Saontsi’e reke. (Lioka 1:46-55) I Josefa ka zao le avy le nankatò naho fa nimey i Jehovah toromareke. Trea amy izay fa ndaty natahotse an’Andrianagnahare reke sady te hampifale aze.​—Mat. 1:24.

5-6. Ino ty raha nengà i Jehovah hiareta i Ana-dahi’ey?

⁵ Mareho fa tsy ndaty mpagnarivo ty nijobogne i Jehovah hiteza i Jesosy. Naho henteagne ohatse ty fagnatetse natao i Josefa naho i Maria tafara ty niterahagne i Jesosy, le trea tie ndaty nahantra iareo. (Lioka 2:24) Mpandrafitse ka ty niasa i Josefa. Va’e ho nanagne tragno kedekede narine i tragno iareo ta Nazareta taoy areke reke, le tao ty niasa’e. Azo antoke ka fa nitsotra ty fiaigna iareo, satria eo hoe eo amy ty fito farafahakede’e ty ana iareo.​—Mat. 13:55, 56.

⁶ Maregne fa niaro i Ana-dahi’ey ty Jehovah naho fa nisy loza ho nanjò aze. Faie nisy raha avao nengà’e hiareta i Jesosy. (Mat. 2:13-15) Tsy nino i Jesosy ohatse ty ila’e tamy ty longo’e. Azo antoke fa nidiso tamà reke naho fa tsy nagneke aze ho Mesia o rahalahi’e niharo troke tama’e reo. (Mar 3:21; Jaona 7:5) Va’e mbe tanora ka ty Jesosy, le fa nimate ty Josefa, i rae’e niteza azey. Tsy maintsy ho i Jesosy areke ro nanao ty asan-drae’e mba hamelomagne ty keleia’e satria ie ty tale iareo. (Mar 6:3) Tsy maintsy ho nianatse nikarakara ze raha nilae o keleia’eo ka ty Jesosy naho fa nibey. Nila niasa mafe ohatse reke mba hanohagnagne iareo. Tena tsapa i Jesosy soa areke tie manao akore ze o rokake zao naho fa boake miasa.

7. a) Ino ty fagnonteneagne mila dinehe ty mpivaly mieretseretse ty hiterake ndra ze fa managne anake? b) Toko’e hampianare ty rae aman-drene hanao inogne ty ana’e, naho ty Ohabolana 2:1-6 ro henteagne?

⁷ Saintsaigno zao naho manambaly rehe sady mieretseretse ty hiterake nareo: ‘Ndaty miambane naho tea raha ara-pagnahy vao zahay? Va’e ho agnisa ty ndaty jobogne i Jehovah ho rae aman-drene hahay hiteza ajaja vao zahay?’ (Sal. 127:3, 4) Saintsaigno ka zao naho managn’anake rehe: ‘Ampeako vao o anakò hahatsapa tie tena ilaegne ty miasa mafe?’ (Mpito. 3:12, 13) ‘Manao ze fara heriko vao raho mba hiarovagne ty anako amy ze raha va’e hanimba aze amy ty tontolo i Satana  toy?’ (Ohab. 22:3) Maregne fa tsy afake hiaro aze amy ze kila raha sarotse va’e hanjò aze nareo. Tsy ho vita’areo ty hanao izay. Faie afake magnampe ty ana’areo tsikedetsikede nareo mba ho vognogne hiatreke ty raha va’e hiseho amy ty fiaigna’e sady ampianaro hiantehetse amy ty Saontsin’Andrianagnahare reke. (Vakio ty Ohabolana 2:1-6.) Naho misy longo’areo ohatse misintake amy i Jehovah, le ampeo amy ty alala ty Baiboly iareo mba hahatakatse tie tena ilaegne ty tsy mivalike amy i Jehovah. (Sal. 31:23) Ndra naho misy longo’areo mate, le atoro iareo ze andinin-teny afake magnampe aze hahavita hiatreke ty alahelo’e.​—2 Kor. 1:3, 4; 2 Tim. 3:16.

8. Inogne amy ty tari-dalagne amy Deoteronomia 6:6, 7 aoy ty norihe i Josefa naho i Maria?

⁸ Tena afake nagnampe i Jesosy hahazo sitrake amy i Jehovah ty raha natao i Josefa naho i Maria naho fa nibey reke. Ty anto’e, nagnorike ty tari-dalagne nimey i Jehovah hoahy ty rae aman-drene iareo. (Vakio ty Deoteronomia 6:6, 7.) Tena nitea i Jehovah iareo, le tsy mahalatsa naho nilahibey tamy iareo ty fagnampeagne i ana iareo rey ho tea i Jehovah ka.

9. Ino ty raha lahibey nikezaha i Josefa naho i Maria natao tsy tapake?

⁹ Nanao raha ara-pagnahy tsy tapake niarake tamy i ana iareo rey ty Josefa naho i Maria. Nandeha tamy i Synagoga ta Nazareta taoy ohatse iareo isan-keregnandro, le namonje Pasake ta Jerosalema agne ka isan-taogne. (Lioka 2:41; 4:16) Va’e nihararaote iareo aza o lia iareo mba Jerosalema agne iohoe mba hampianaragne i Jesosy naho o zai’e reo ty tantara ty vahoa i Jehovah. Va’e ho nitilike i toeragne maromaro rehafegne amy ty Soratse Masigne ao rey ka iareo. Azo antoke fa tsy ho nimora tamy i Josefa naho i Maria ty ho nanagne ze fahazaragne zay avao satria saveregne iareo. Faie nikezake avao iareo mba hanao voalohan-draha ty fanompoagne i Jehovah. Voka’e, nanjare nifandrambe soa tamy i Jehovah iareo keleian-draike.

10. Ino ty lesogne azo ty rae aman-drene Kristiana ianaragne boake amy i Josefa naho i Maria?

¹⁰ Ino ty azo ty rae aman-drene Kristiana ianaragne boake amy i Josefa naho i Maria?  Asehò’areo amy ty raha rehafe’areo naho amy ty raha atao’areo fa tea’areo vata’e ty Jehovah. Ko haligno fa ty fagnampea’areo iareo ho tea i Jehovah ro fagnomezagne fara’e fanjaka azo’areo meigne iareo. Ampianaro’areo ka iareo mba ho zatse manao raha ara-pagnahy. Ohatse, hianatse Baiboly tsy tapake, hivavake, hivory, hitory naho hampianatse. (1 Tim. 6:6) Tena sarobily o raha rehoe. Faie mila magnomey ze raha ilae iareo ara-nofo ka nareo. (1 Tim. 5:8) Faie izao, ty hagnampe ty ana’areo hifandrambe soa amy i Jehovah ro tena lahibey fa tsy ty fagnomeagne iareo vola ndra fanagnagne. Ty anto’e, tsy hahavonje iareo o volao naho o harenao naho fa horavagne ty tontolo i Satana toy.​—Ezek. 7:19; 1 Tim. 4:8.

11. a) Nagnino ty toro hevetse amy 1 Timoty 6:17-19 ao ro magnampe ty rae aman-drene hanao safidy soa naho fa miteza ty ana iareo? b) Ino ty tanjogne eretserete’areo keleian-draike ho tratraregne, le ino ty fitahiagne ho azo’areo naho magnatratse izay? (Henteo ty efajoro tihoe “ Ino Iaby ty Tanjogne Azo’areo Tratraregne?”)

¹¹ Tena mampahery ty mahatrea rae aman-drene Kristiana mikezake mafe magnampe ty ana’e mba hifandrambe maifitse amy i Jehovah. Manao fotoam-pivavaha ty keleiagne tsy tapake ohatse iareo sady magnatreke fivoriagne naho havoriambey. Miarake manompo ka iareo keleian-draike. Ty keleiagne ila’e aza manokagne fotoagne mba hitoriagne amy ty faritane tsy le iasagne mateteke. Ty ila’e ka mitilike Betela ndra mandrambe anjara amy ty tetik’asa fagnoregnagne. Va’e tsy ho mora amy ty keleiagne ila’e ty hanao izay satria ilagne vola. Faie homey i Jehovah valesoa maro iareo naho manao izay. (Vakio ty 1 Timoty 6:17-19.) Mateteke ro manjare managne fahazaragne soa avao ty ajaja nitezagne hoe izay ndra tie fa bey aza. Tena hankasitrake ty kezake natao ty rae aman-drene’e ka iareo. *​—Ohab. 10:22.

12. Inogne ty raha nila natao i Jesosy naho fa nibey reke?

¹² Tena nimete soa ty fanapaha-kevetse nirambese i Jehovah miomba i Jesosy amparake izay. Hoe izay ka ty Josefa naho i Maria, i nasae’e hiteza i Jesosỳ. Faie nila nanao ty safidi’e manokagne ka ty Jesosy naho fa nibey. (Gal. 6:5) Ty anto’e, nanagne fahafahagne hijobogne ze tea’e hatao reke, manahake antikagne iaby avao. Azo’e natao ohatse ty nanao ze hahametemete ty fiaigna’e. Faie ndra aleo’e nanao raha hahavy aze hifandrambe maifitse amy i Jehovah. (Jaona 8:29) Akore ty azo o tanorao anahafagne aze?

13. Ino ty safidy soa natao i Jesosy ndra tie mbe nikede aza reke?

 ¹³ Mbe nikede ty Jesosy, le fa nifily ty hankatò i rae aman-drene’e niteza aze rey. Tsy nieretseretse reke tie nanam-pahalalagne ambone iareo, le tsy nila nankatò iareo. Hoe ty Baiboly: “Le nagnorike ty fagnanara iareo lognandro reke.” (Lioka 2:51) Azo antoke fa tena nanao soa ty andraiki’e amy ty maha zoken’anake aze ty Jesosy. Tsy maintsy ho niasa mafe zao reke mba hahay i asa nampianare i Josefa azey, amy izay reke afake manohagne soa ty keleia’e.

14. Akore ty ahafantarantika fa nazoto nianatse ty Saontsin’Andrianagnahare ty Jesosy?

¹⁴ Azo inoagne fa nirehafe i Josefa naho i Maria tamy i Jesosy ty fahagagagne nisy tamy i andro niterahagne azey naho ty raha nirehafe i anjely i Jehovah rey miomba aze. (Lioka 2:8-19, 25-38) Faie ndra tie teo zay, le nazoto nianatse soa ty Soratse Masigne reke fa tsy nionogne tamy izay avao. Nagnino tika ro mirehake izay? Satria tamy ireke mbe nikedey, le fa ‘nilatsà o mpagnanatse ta Jerosalema taò noho ty fahaian-draha’e naho ty valen-dreha’e.’ (Lioka 2:46, 47) Tamy ireke ni-12 taogne aza, le fa nahatrea porofo boake amy ty raha nianara’e tamy ty Soratse Masigne tao fa i Jehovah ty tena Baba’e.​—Lioka 2:42, 43, 49.

15. Akore ty nampisehoa i Jesosy fa nijobogne ty hanao ty zoton’arofon-drae’e reke?

¹⁵ Naho fa nihay i Jesosy tie ino ty zoton’arofon-drae’e, le izay ro natao’e. (Jaona 6:38) Fa nihai’e tie ho heje o ndatio reke. Azo antoke fa tsy tea’e ho nanjò aze zay. Faie mbe nijobogne ty hankatò i Jehovah avao reke. Naho fa natao badisa reke tamy taogne 29, le ty fanoagne ty zoton’arofo i Jehovah ro natao’e voalohan-draha tamy ty fiaigna’e. (Heb. 10:5-7) Ndra tie fa nipehegne tamy i hazo fijaleagney tey aza reke, le mbe nitapa-kevetse ty hanao ty zoton’arofon-dRae’e avao.—Jaona 19:30.

16. Ino ty lesogne azo o tanorao ianaragne boake amy i Jesosy?

¹⁶ Oriho ty rehan-drae’o aman-drene’o. Maregne fa tsy voririke ty rae aman-drene’o, manahake i Josefa naho i Maria avao. Faie iareo ty tinendre i Jehovah hiaro naho hampiofagne azo ndra hanoro azo. Naho magnaja ty fahefa iareo rehe sady mankatò ty toro hevetse mey iareo, le ho ‘soa ty fiaigna’o.’​—Efes. 6:1-4.

17. Ino ty fanapaha-kevetse mila rambese o tanorao naho henteagne ty Josoa 24:15?

 ¹⁷ Jobogno ze ho tompoe’o. Fantaro soa tie ia ty Jehovah, ino ty zoton’arofo’e, le anò ze haharese lahatse azo fa maregne ty raha rehafe o Baibolio sady azo’o ampiharegne amy ty fiaigna’o. (Rom. 12:2) Ty anto’e, izay ty hagnampe azo handrambe fanapaha-kevetse soa amy ty fiaigna’o, le ty hanompo i Jehovah. (Vakio ty Josoa 24:15; Mpito. 12:1) Naho mikezake mamaky naho mianatse Baiboly tsy tapake rehe, le vao mainke hitombo ty hatea’o i Jehovah naho ty finoa’o aze.

18. Ino ty safidy mila atao o tanorao, le inogne ty soa ho azo iareo naho manao izay iareo?

¹⁸ Anò voalohan-draha amy ty fiaigna’o ty fanoagne ty zoton’arofo i Jehovah. Mampitamà ty tontolo i Satana toy tie naho ampiasae’o mba hahasoa ty tegna’o ty fahaiza’o, le ho sambatse rehe. Faie naho ty maregne, le hoe ‘mitomboke ty vata’e amy ty raha mampangirifiry’ ze ndaty mifantoke amy ty raha ara-nofo. (1 Tim. 6:9, 10) Fa naho ihe mankatò i Jehovah sady mijobogne ty hanao voalohan-draha ty fanoagne ty zoton’arofo’e, le “hanao raha aman-kilala rehe” sady ho soa ty fiaigna’o.​—Jos. 1:8.

19. Ino ty raha mila tadidie o rae aman-dreneo?

¹⁹ Ry rae aman-drene, anò ze azo’areo atao mba hagnampeagne ty ana’areo hijobogne ty hanompo i Jehovah. Miantehera ama’e, le hagnampe anareo handrambe fanapaha-kevetse soa reke. (Ohab. 3:5, 6) Ko haligno fa ze raha atao’areo ro tena misy voka’e amy ty ana’areo fa tsy ty raha rehafe’areo. Ze fanapaha-kevetse tena hagnampe ty ana’areo hahazo sitrake amy i Jehovah areke ro rambeso’areo.

20. Ino ty fitahiagne ho azo o tanorao naho mijobogne ty hanompo i Jehovah iareo?

²⁰ Ry tanora, tena afake magnampe anareo hahay hanao safidy soa ty rae aman-drene’areo. Faie miankigne amy ze safidy atao’areo avao ro hahazoa’areo sitrake amy i Jehovah ndra tsy hahazoa’areo sitrake ama’e. Tahafo areke ty Jesosy, le mijobogna ty hanompo i Rae’areo bey hateay. Naho izay ty atao’areo, le hisy dika’e ty fiaigna’areo sady hahazo valesoa maro nareo amy izao. (1 Tim. 4:16) Amy ty hoavy ka nareo, le hahazo i fiaignagne fanjaka tsy misy hoe’e, nirie’areo mafe amparake izaỳ!