1. Nagnino ty 2 Korintianina 3:1-3 ro magnampe antika hahatakatse fa tombotsoa lahibey ty magnampe o ndatio mba ho vita badisa? (Henteo ty sare amy ty fogno ty gazete toy.)

AZO ANTOKE fa fale rehe naho fa mahatrea mpianatse Baiboly raike atao badisa. (Mat. 28:19) Naho ihe aza ty nampianatse Baiboly i ndaty natao badisay, le azo antoke fa tena ho ambonembone izay ty hafalea’o. (1 Tes. 2:19, 20) Tena mahatsiaro ho afa-po ka tika naho fa mahatrea i ndaty vaho vita badisa rey satria iareo ty “taratasy fideragne” ho antika naho hoahy i fiangonagney iaby.​—Vakio ty 2 Korintianina 3:1-3.

2. a) Ino ty fagnonteneagne lahibey mila eretseretentika, le nagnino? b) Ino ty atao tihoe mitarike fampianaragne Baiboly? (Henteo ty fagnamarehagne ambane peje.)

² Mahafale antika ty mahafantatse tie ndaty 10 000 000 eo hoe eo ty nampianarentika Baiboly * isam-bolagne tagnate ze efatse taogne lasa zay. Tagnate ze taogne zay avao ka, le 280000 mahery ty isa ty ndaty natao badisa isan-taogne, le nanjare Vavolombelo i Jehovah naho mpiana i Kristy. Faie akore ty azontikagne agnampeagne ty ankamaroa o ndaty an-tapetrisa’e rehoe mba ho vita badisa? Mila mikezake mafe tikagne amy izao mba hagnampe iareo handroso malaky, le hatao badisa. Ty anto’e, mbe mey i Jehovah fotoagne naho fahafahagne hanjare ho mpiana i Kristy iareo amy hinane zao sady fa kedekede ty sisa o fotoagne iohoe.​—1 Kor. 7:29a; 1 Pet. 4:7.

3. Ino ty hodinehentikagne ato?

³ Tena asa meke ty fanoagne mpianatse amy izao. Izay ty nahavy i Filan-keve-pitantanagne nandrisike o birò i sampagneo handineke ty raha azo atao mba hagnampeagne o mpianatse  Baibolio handroso, le hatao badisa. Ho treantika amy ty lahatsoratse toy naho amo o magnarakeo areke tie ino ty raha azontika ianaragne boake amo o mpisava lalagne za-drahao, o misionerao naho o mpiandraikitse faritseo. * (Ohab. 11:14; 15:22) Hatoro iareo antika tie ino ty raha azontikagne atao naho fa mampianatse Baiboly mba hahavy i ndaty rey hanao fandrosoagne. Izao tika le handineke raha dime mila atao o mpitorio mba hagnampeagne o mpianatse Baibolio handroso, le hatao badisa.

4. Ino ty raha toko’e ho tadidientika naho ohatse tena fohe avao ty fotoagne ianara ty ndaty raike Baiboly?

⁴ Maro amo o mpitorio ro le avy le mitarike fampianaragne Baiboly ndra tie an-dalan-tragno i ndaty itoria iareoy eo aza. Maregne fa tena magnampe o ndatio mba ho liagne amy ty Baiboly zay. Faie mateteke ro tsy afake miarake midineke maharetse amy i ndatỳ tika sady va’e tsy ho vitantika ty hanao izay isan-keregnandro. Ty mpitory ila’e ka mangatake ty nimerò telefony i ndatỳ naho tsy mampagnino aze zay. Le mandefa mesaze ndra miantso aze i mpitorỳ mba hirehafagne raha boake amy ty Soratse Masigne ao ama’e amy izay mitombo ty fahaliagna’e. Faie ndra tie manao izay agnate ty volagne maromaro tika, le va’e mbe tsy hagnampe aze hanao fandrosoagne zay. Tsy tena azo antoke tie handroso ty mpianatse Baiboly raike, le hanokan-tegna naho hatao badisa naho tsy mikezake manokagne fotoagne mba hianaragne ty Soratse Masigne.

5. Ino ty raha nirehafe i Jesosy amy Lioka 14:27-33 ao? Nagnino zay ro azontikagne ampiasaegne mba hagnampeagne o mpianatse Baibolio?

⁵ Nirehafe i Jesosy fa misy raha mila atao ty ndaty raike te ho mpiana’e. Trea amy i fagnoharagne nirehafe’e miomba ty lahilahy raike te hagnoregne tragnoy naho ty mpanjaka raike hialy amy ty fahavalo’ey zay. Nihazavae’e fa ‘nila nitoboke hey i lahilahỳ, le nikalikily ty vola ho lany’ hagnamboaragne i tragnoy. ‘Nila nitoboke hey ka i mpanjakay, le nipay torohevetse’ mba hahafantara’e naho ho vita’e ndra tsy ho vita’e ty hialy amy i fahavalo’ey. (Vakio ty Lioka 14:27-33.) Te hirehake ty Jesosy tie mila mandineke soa hey ty ndaty raike te ho mpiana’e. Mila fantare’e tie ino iaby ty raha mila atao’e naho fa lasa Kristiana reke. Izay ty mahavy antika toko’e handrisike iareo hianatse Baiboly tsy tapake isan-keregnandro. Akore ty azontikagne anoagne izay?

6. Ino ty raha mila ataontika mba hagnampeagne o mpianatse Baibolio handroso?

 ⁶ Ampitombò ty halava ty fotoagne ianara’areo amy inareo an-dalan-tragno’e eoy. Naho fa mianatse ohatse nareo, le azo’o atao ty mirehake hevetse roe ama’e boake amy Baiboly ao fa tsy hevetse raike avao. Naho trea’o fa tsy mampagnino aze inareo mirehake lavalavay, le agnonteneo reke kera misy toeragne azo’areo itobohagne mba hanohiza’areo i fianaragney. Ho trea’o amy ty toin-dreha’e naho tena lahibey ama’e i fianaragney. Agnonteneo ka reke kera afake mianatse indroe isan-keregnandro nareo. Hagnampea aze handroso malaky ka zay. Faie ndra tie fa manao izay aza reke, le mbe misy raha hafa ka mila atao’o.

7. Ino ty raha mila ataontikagne mba ho voaomagne soa ty fampianaragne Baiboly hataontikagne?

⁷ Amy ty maha mpampianatse azo, le mila magnomagne soa rehe isake tie hampianatse Baiboly. Vakio mialoha ty raha hianara’areo, le henteo ze andinin-teny agnate’e ao. Fantaro ty hevetse lahibey. Dineho ty lohaheve i fianaragney, ty lohahevetse kedekede, ty fagnonteneagne mifandrambe amy i fehentsoratsey, i andinin-teny misy “vakio” rey, ty sare, naho ty video afake magnampe i mpianatsey hahazo ty foto-kevetse ianara’areo. Eretsereto ka ty miombamiomba i mpianatsey. Saintsaigno mialoha ty fomba hagnazava’o i fianaragney ama’e amy ty fomba tsotra sady mazava. Ho mora ama’e amy izay ty hahatakatse i fianaragney naho ty fomba hampihara’e aze.​—Neh. 8:8; Ohab. 15:28a.

8. Nagnino ty reha i Paoly amy Kolosianina 1:9, 10 ao ro mampiseho amantika tie ilaegne ty mivavake hoahy ty ndaty ampianarentika Baiboly?

⁸ Naho fa magnomagne ka rehe, le mivavaha miomba i mpianatsey naho ze raha ilae’e. Mivavaha amy i Jehovah mba hagnampe azo hahavita hanohigne ty fo’e. (Vakio ty Kolosianina 1:9, 10.) Kezaho fantaregne ty raha va’e ho sarotse ama’e ty hahatakatse aze ndra ty raha va’e tsy ho eké’e. Ko haligno fa ty hagnampe aze handroso naho hatao badisa ty tanjo’o.

9. Hazavao tie nagnino o mpianatse Baibolio ro mila magnomagne soa?

⁹ Tena misy voka’e soa amo o mpianatseo ty fianara’e Baiboly tsy tapake. Hanjare hankasitrake ty raha natao i Jehovah naho i Jesosy reke sady hagniry hampitombo ty fahalala’e ka. (Mat. 5:3, 6) Mba hahavy i mpianatsey handrambe soa feno amy i fianaragney ka, le ampeo reke mba hifantoke soa. Akore ty azo’o atao? Hazavao ama’e fa tena mila magnomagne  reke isake tie hianatse nareo. Mila mamaky mialoha ty lesogne hianara’areo areke reke, le misaintsaigne ty fomba hampihara’e aze. Misy fomba azo’o atao retoagne mba hampianaragne aze hagnomagne. Miaraha magnomagne ama’e lesogne raike mba hanoro’o aze ty toko’e hatao’e. * Atorò aze ty fomba hahatreava’e ty vale’e i fagnonteneagney mivantagne, le rehafo ama’e fa ze rehake ndra ze fehezanteny magnasongadigne hevetse lahibey avao ro mila tsipihegne. Ho mora ama’e amy izay ty hitadidy ty vale i fagnonteneagney. Risiho ka reke mba hamale amy ty fomba fireha’e fa tsy hamaky avao ze amy i bokey ao. Ho trea’o amy izay tie tena azo’e soa i fianaragney ndra tsy azo’e. Misy raha hafa ka toko’e hagnampeantikagne i mpianatsey. Inogne zay?

10. Nagnino o mpianatse Baibolio ro tena mila mamaky Baiboly isan’andro, le ino ty mila atao’e mba hahavy aze handrambe soa feno boake amy izay?

¹⁰ Handrambe soa ka i mpianatsey naho misy raha atao’e manokagne isan’andro ankoatse ty fianara’e Baiboly isan-keregnandro. Mila mifandrambe amy i Jehovah reke. Amy ty fomba akore? Mila mitsanogne i Jehovah naho mirehake ama’e reke. Mitsanogne i Jehovah zao reke naho mamaky Baiboly isan’andro. (Jos. 1:8; Sal. 1:1-3) Atorò aze ty fampiasagne i “Fandaharagne Famakiagne Baiboly” amy jw.org^® aoy. * Mba hahavy aze handrambe soa amy i famakiagne Baiboly atao’ey, le risiho reke mba hisaintsaigne ty raha azo’e ianaragne miomba i Jehovah naho ty fomba azo’e ampiharagne ze nianara’e tao.​—Asa. 17:11; Jak. 1:25.

11. Akore ty azo agnampeagne ty mpianatse Baiboly raike hahay hivavake, le nagnino reke ro tena mila mivavake isan’andro?

¹¹ Risiho ty ndaty ampianare’o Baiboly mba hirehake amy i Jehovah isan’andro amy ty alala ty vavake. Naho fa mivavake rehe aloha ndra afara i fianara’areoy, le mivavaha amy ty fo’o. Mivavaha hoahy i mpianatsey, le tognono amy i vavakey ao ty agnara’e. Ho trea’e boake amy izay tie manao akore ze o mivavake amy ty fo zao. Ho hai’e ka amy izay tie i Jehovah avao ro toko’e hivavahagne, le angatahegne amy ty agnara i Jesosy. (Mat. 6:9; Jaona 15:16) Vao mainke hifandrambe maifitse amy i Jehovah i mpiana’o Baibolỳ naho mamaky Baiboly isan’andro sady mivavake ama’e. (Jak. 4:8) Naho  manao ireo isan’andro reke, le hanjare hagniry hanokan-tegna naho hatao badisa. Ino ka ty raha hafa mila ataontikagne mba hagnampeagne aze?

12. Ino ty azontikagne atao mba hagnampeagne ty mpianatse Baiboly raike hifandrambe maifitse amy i Jehovah?

¹² Tsy ty hampita fahalalagne avao ty tanjontika naho fa mampianatse fa ty hanohigne ty fo i mpianatsey ka. Ty anto’e, izay ty handrisike aze hampihatse ty raha ianara’e. Tafilitse amo o fo rehafegne etò, ty fagniriagne, naho ty eretseretse vaho ty fihetseham-po. Nampianatse raha maro o ndatio ty Jesosy sady nitea iareo ty nitsanogne ty fampianara’e. Faie noho ireke nahay nanohigne ty fo o ndaty rehoe ty nahavy iareo hanonjohy ty lia’e. (Lioka 24:15, 27, 32) Ampeo areke i mpiana’o Baibolỳ mba hino fa tena misy ty Jehovah sady afake mifandrambe maifitse ama’e reke. Ampeo reke hihevetse i Jehovah ho Baba’e naho ho Andrianagnahare’e vaho ho Ragne’e. (Sal. 25:4, 5) Akore ty azo’o anoegne izay? Asongadìgno mateteke ty toetse i Jehovah ndra ino ndra ino foto-kevetse ianara’areo. (Eks. 34:5, 6; 1 Pet. 5:6, 7) Ampeo reke hankasitrake ty toetse agnisa ty mampiambake i Jehovah retoagne: bey hatea, soa fagnahy naho mitretré. Nirehafe i Jesosy fa “ty lily lahibey sady voaloha’e” le tihoe: ‘Teao amy ty fo’o ty Jehovah Andrianagnahare’o.’ (Mat. 22:37, 38) Ampeo ho tea i Jehovah areke ty ndaty ampianare’o Baiboly.

13. Ino ohatse ty azontikagne atao mba hagnampeagne ty mpianatse Baiboly raike hahay i toetse i Jehovah fanjaka rey?

¹³ Rehafo amy i mpiana’o Baibolỳ ty anto’e tena iteava’o i Jehovah naho fa mirehake nareo. Ho tsapa’e amy izay fa mila mifandrambe maifitse amy i Jehovah ka reke sady toko’e ho tea aze. (Sal. 73:28) Rehafo ama’e ohatse ze raha nanohigne ty fo’o. Va’e ho ty raha nitrea’o tamo o boke naho gazetentikagneo ao zay ndra andinin-teny magnasongadigne ty hatea i Jehovah, ty hilala’e, ty fanoa’e ty rare’e vaho ty heri’e. Rehafo ama’e fa io ty agnisa ty anto’e raike mahavy azo ho tena tea i Jehovah, i Babantikagne an-dagnitse agney. Faie mbe misy raha hafa ka mila atao’e naho te handroso naho hatao badisa reke.

14. Ino ty raha rehafe ty Hebreo 10:24, 25, le nagnino zay ro hagnampe ty mpianatse Baiboly hanao fandrosoagne?

¹⁴ Teantika naho mandroso ty ndaty ampianarentikagne Baiboly, le atao badisa. Risiho  hagnatreke fivoriagne areke iareo satria io ty agnisa ty tena magnampe iareo hanao fandrosoagne. Rehafe o mpitory za-drahao fa mandroso malaky o mpianatse Baibolio naho fa magnatreke fivoriagne. (Sal. 111:1) Mirehake amy ty ndaty ampianare’e Baiboly ka ty mpitory ila’e fa mila magnatreke fivoriagne iareo satria naho fa manao izay avao iareo vaho hahafantatse raha maro. Vakio ama’e ty Hebreo 10:24, 25, le hazavao ama’e tie ino ty soa ho rambese’e naho fa magnatreke fivoriagne reke. Atorò aze i video tihoey tie Inogne ty Atao amy i Anjomba i Fanjakagney Agne? * Anò tsapa’e fa tena ilaegne ty magnatreke fivoriagne isan-keregnandro.

15. Ino ty azontikagne atao mba handrisihagne o mpianatse Baibolio hivory tsy tapake?

¹⁵ Inogne ty azo’o atao naho mbe lia’e naho nagnatreke fivoriagne ty ndaty ampianare’o Baiboly ndra magnatreke avao fa kindraike? Mirehafa raha vaho nianaragne tam-pivoriagne agne vaho tsiela, le mikezaha hafana fo naho fa mitantara aze. Ty anto’e, vao mainke reke te hivory naho fa trea’e tie mafana fo rehe. Meo Fitalakesan-davitse ndra Tari-dalagne hoahy ty Fivoriagne naho ty Fiaignantika Kristiana nianaragne vaho tsiela ka reke. Atorò aze ka ty raha hianaragne amy ty fivoriagne magnarake, le agnonteneo aze tie aia amy ireo ty tena mahaliagne aze. Anò ze hahavy aze hahatsapa fa tena tsy mitovy amy ty raha nitrea’e amy ty fivavahagne nisy aze ty raha ho trea’e am-pivoriagne agne. (1 Kor. 14:24, 25) Hahatrea ndaty azo’e atao modely ka reke naho fa agne. Hagnampe aze hanao fandrosoagne naho hatao badisa ka zay.

16. Ino iaby ty raha mila ataontikagne mba hagnampeagne o mpianatse Baibolio handroso, le hatao badisa? Ino ty hodinehentika amy ty lahatsoratse magnarake?

¹⁶ Inogne iaby ty raha azontikagne atao mba hagnampeagne ty ndaty ampianarentikagne Baiboly handroso, le hatao badisa? Ampeo reke hahatakatse tie tena ilaegne ty mianatse Baiboly isan-keregnandro. Risiho reke mba hagnomagne isake tie hianatse. Ampeo reke mba hifandrambe amy i Jehovah isan’andro naho hagnasoa ty fifandrambesa’e ama’e. Risiho ka reke mba hagnatreke fivoriagne. (Henteo ty efajoro manao tihoe “ Ino ty Raha Mila Atao o Mpianatse Baibolio mba Hahavy aze Handroso, le Hatao Badisa?”) Faie mbe misy raha dime mila ataontikagne ka mba hagnampeagne o mpianatse Baibolio handroso, le hatao badisa. Izay ty hohazavaegne amy ty lahatsoratse magnarake.