Nagnino ty Jesosy ro nagneregne nirehake i raha nirehafe i Davida amy Salamo 22:1 aoy taloha kede i nimateza’ey?

Agnisa ty raha nirehafe i Jesosy fara’e taloha ty nimateza’e o rehake amy Matio 27:46 naho amy Marka 15:34 aò. Hoe reke: ‘O Andrianagnahareko, nagnino rehe ro nahafoe ahike?’ Nagnatanterake i raha nirehafe i Davida mpanao salamo amy Salamo 22:1 aoy ty Jesosy naho fa nirehake io. Tsy tihoe nidiso tamà reke, ndra nihegne ty finoa’e an-dRae’e. Ty anto’e, nihay i Jesosy soa tie nagnino reke ro mila manao sorogne ty fiai’e, sady toe nivognogne hanao izay reke. (Mat. 16:21; 20:28) Nihai’e ka tie tsy mila miaro aze ty Jehovah amy i fotoagne hamonoagne azey. (Joba 1:10) Nagnenga i Jesosy hampijalegne naho ho vonoegne areke ty Jehovah tamy io, amy izay ty Jesosy afake magnaporofo tie vita’e ty tsy mivalike amy i Jehovah ndra inogn’ino raha sarotse atrehe’e.​—Mar 14:35, 36.

Nagnino areke ty Jesosy ro nirehake o rehake amo o Salamo iohoe? Maregne fa tsy tena haintika ty anto’e, faie andao tika handineke ty va’e ho anto’e nahavy i Jesosy nirehake io. *

Naho fa i Jesosy nagneregne nirehake o rehake rehoe, le va’e te hampiseho reke tie tsy hikalagne aze mba tsy ho vonoegne ty Jehovah. Mila mandoa i solovoigney ty Jesosy, faie tsy mila ampea i Jehovah reke naho fa manao io. Mila mamoe ty fiai’e ty Jesosy mba hahafaha’e ‘ho mate hoahy ze kila ndaty.’​—Heb. 2:9.

Naho fa i Jesosy nagneregne nirehake o rehake rehoe, le va’e te hanintogne ty say o Jiosio  amy ze andinin-teny amy Salamo 22 ao iaby reke. Fahazara o Jiosio tamy izay ty nitadidy andinin-teny maromaro amy ty boke Salamo ao. Naho vaho maharey andinin-teny raike amy ty salamo raike areke iareo, le avy le tsiaro iareo iaby ze andinin-teny amo o salamo iohoe ao. Naho izay ty tea i Jesosy ho natao, le va’e te hagnampe o Jiosy mpanonjohy ty lia’eo reke mba hahatsiaro i faminaniagne maro amy Salamo 22 ao miomba ty raha hiseho ama’e naho fa amy i reke ho vonoegney. (Sal. 22:7, 8, 15, 16, 18, 24) Ty andine’e fara’e amo o salamo iohoe ka, le naniahy iareo fa fagneva ty ho deraegne ty Jehovah sady Mpanjaka ze kila raha.​—Sal. 22:27-31.

Naho fa nagneregne nirehake o reha i Davida iohoe ty Jesosy, le va’e te hampisongadigne tie ndaty tsy manan-tsiny reke. Taloha ty namonoagne aze, le niaretse fitsaràgne tsy ara-drare’e reke. Nirehafegne reke tie nao zao niteratera an’Andrianagnahare. (Mat. 26:65, 66) Nivory malakilaky o Fitsaràgne Ambone Jiosio tamy i halegne nitsepahagne azey mba hitsara aze. Faie tsy nagnara-dalàna iareo naho fa nitsara aze. (Mat. 26:59; Mar 14:56-59) Naho fa nagneregne nirehake i reha i Davida amy salamo aoy iohoe areke ty Jesosy, le va’e te hirehake reke tie tsy nanao raha raty, le tsy fagneva ty ho vonoegne.

Va’e te hampisongadigne ty Jesosy tie tsy tihoe tsy nankasitraha i Jehovah sasa reke naho fa nirehake o salamo iohoe. Nengà i Jehovah hijale ty Davida, i nanoratse o salamo iohoey, faie tsy midika zay tie tsy nankasitraha i Jehovah reke. O fagnontenea i Davida iohoe ka, le tsy midika tie nihegne ty finoa’e an’Agnahare. Naho fa boake nagnontane io reke, le nirehake tie matoky fa vita i Jehovah ty magnavotse o vahoa’eo, sady mbe nitahie i Jehovah ka reke tafara izay. (Sal. 22:23, 24, 27) Hoe izay ka ty Jesosy, i “Ana i Daviday.” (Mat. 21:9) Ty fijalea’e tamy i hazo fijaleagney teo areke, le tsy midika tie tsy nankasitraha i Jehovah sasa reke.

Mafe ty raha niareta i Jesosy, le va’e te hitaraigne reke, satria tsy niaro aze ty Jehovah tamo o fotoagne iohoe mba hahafaha’e magnaporofo fa tena mahavita tsy mivalike reke. Tsy nisafiry ty hampijaleagne naho hamonoagne i Ana-dahi’ey ty Jehovah tam-boaloha’e tagne. Tafara ty nanotà i Adama naho i Eva ty vaho nipaliagne izay. Tsy nanao raha raty ty Jesosy. Faie nilaegne ty fampijaleagne naho ty famonoagne aze mba hahafahagne mamale i fagnonteneagne naboa i Satanay, sady hagnomeagne i solovoigney mba hahazoagne indraike i raha nafoe i Adamay. (Mar 8:31; 1 Pet. 2:21-24) Faie tsy ho niafake nanao ireo ty Jesosy naho niaro aze ty Jehovah tamy io.

Va’e te hagnampe o mpanonjohy ty lia’eo hisaintsaigne ty anto’e nagnengà i Jehovah aze ho vonoegne amy i hazo fijaleagney teo reke. * Nihay i Jesosy fa ty fipehagne aze tamy i hazo fijaleagney teo manahake ty famonoagne o ndaty ratio, le hikalagne o ndatio tsy hanonjohy ty lia’e. (1 Kor. 1:23) Naho mifantoke amy i tena anto’e namonoagne azey areke o mpanonjohy ty lia’eo, le tsy hihevetse aze ho ndaty raty iareo fa hihevetse aze ho Mpagnavotse.​—Gal. 3:13, 14.

Ndra inogn’ino anto’e nahavy i Jesosy nagneregne nirehake o salamo iohoe, le nihai’e fa nagnatanterake ty zoton’arofo i Jehovah reke naho fa nivonoegne tamy i hazo fijaleagney teo. Tafara kede ty nirehafa’e io ty Jesosy, le nirehake hoe izao: “Vita!” (Jaona 19:30; Lioka 22:37) Ty tsy fagnampea i Jehovah i Jesosy tamo o fotoagne iohoe areke, le nagnenga i Jesosy hagnatanterake iaby ze raha nagnirahagne aze tan-tane etoy naho ze raha nisorategne miomba aze amy ty ‘Lalà i Mosesy naho amy ty Mpaminany vaho amy ty Salamo ao.’​—Lioka 24:44.