1-2. Ino ty ohatse magnampe antika hahatakatse ty rehake amy 1 Petera 2:21 ao?

ERETSERETO tie handeha amy ty tane raike mbe lia’e naho nandehana’o agne rehe. Maro nareo ty ho mbeo. Magnoho-doza sady le faseke avao ty lalagne mbeo. Faie misy ndaty raike fa zatse o lalagne iohoe mitari-dalagne anareo. Le naho fa mandeha reke, le trea’areo amy i fasekey eo ty lia tombo’e. Tampoke teo, le tsy nitrea’o sasa i ndaty mpitari-dalagney. Faie tsy natahotse rehe. Ty anto’e, trea’areo i lia tombo i ndatỳ, le igne avao ro kezahe’areo orihegne soa.

² Manahake o ndaty maro mandeha amo o lalagne magnoho-doza sady le faseke avao iohoe tika Kristiana tie amy ty tontolo raty toy eto. Faie fale tika, satria nimey i Jehovah Mpitari-dalagne tena fanjaka, le i Jesosy Kristy, i Ana-dahi’ey. Azontika atao ty magnorike soa ty lia’e. (1 Pet. 2:21) Nampitovie i Petera amy ty mpitari-dalagne raike ty Jesosy tie teo, arake ty rehafe ze boke raike zay. Tena mete soa zay, satria nagnenga ty lia tombo’e mba horihentikagne reke. Ino ty dika tihoe magnorike ty lia i Jesosy? Nagnino tika ro toko’e hagnorike ty lia’e? Le akore ty fomba hanoagne izay? Andao tika handineke ty vale o fagnonteneagne telo rehoe.

3. Ino ty dika tihoe magnorike ty lia tombo ty ndaty raike?

³ Ino ty dika tihoe magnorike ty lia tombo ty ndaty raike? Amy Baiboly ao tihoe “mandeha” naho “tomboke” kindraike, le te hirehake ty raha atao ty ndaty raike amy ty fiaigna’e. (Gen. 6:9; Ohab. 4:26) Le va’e ho azo ampitoviegne amy ty lia tombo ty ndaty raike ty fomba fiaigna’e. Tihoe magnorike ty lia tombo ty ndaty raike areke, le midika tihoe mitsikombe ty raha atao i ndatỳ.

4. Ino ty dika tihoe magnorike ty lia i Jesosy?

 ⁴ Ino areke ty dika tihoe magnorike ty lia i Jesosy? Naho boriboriegne, le mitsikombe ty raha natao’e. Amy i andinin-teny fototse ty fianaragne toỳ ty Petera, le mirehake miomba ty modely soa nenga i Jesosy, agnisa izay ty fiareta’e. Faie mbe maro ty raha azontika anahafagne i Jesosy. (1 Pet. 2:18-25) Tena azontika tsikombegne ze raha iaby nirehafe i Jesosy naho ty natao’e tamy ty fiaigna’e.

5. Vitantika ndaty tsy voririke vao ty tena hitsikombe ty raha natao i Jesosy? Hazavao.

⁵ Ho vitantika vao ty ‘hagnorike soa ty lia i Jesosy’, ie amy izao tika tsy voririke? Ie. Maregne fa tsy ho vitantika ty hagnorike ty lia’e amy ty fomba voririke. Faie naho itika magnorike soa ty lia’e, arake ze vitantika ndaty tsy voririke, le mankatò ty reha i apostoly Jaona toy tika. Hoe reke: ‘Mandenà lognandro manahake ty lia i Jesosy.’​—1 Jaona 2:6.

6-7. Nagnino ty fagnorihagne ty lia i Jesosy ro magnampe antika hifandrambe marine amy i Jehovah?

⁶ Magnampe antika hifandrambe marine amy i Jehovah ty fagnorihagne ty lia i Jesosy. Fa nagnino? Izao ty anto’e voaloha’e: Trea amy ty modely i Jesosy tie akore ty hanagnagne fomba fiaignagne mampifale an’Agnahare. (Jaona 8:29) Naho magnorike ty lia i Jesosy areke tika, le hampifale i Jehovah. Afake matoky ka tika fa hiharine ze ndaty mikezake hiragnetse ama’e i Babantikagne an-dagnitse agney.​—Jak. 4:8.

⁷ Faharoe, nanahake tanterake an-dRae’e ty Jesosy. Izay ty nahavy aze afake nirehake tie: “Ze nahatrea ahy, le nahatrea an-dRaeko ka.” (Jaona 14:9) Naho mitsikombe ty toetse i Jesosy naho ty fomba nifandrambesa’e tamy ty hafa tika, le hanahake i Jehovah ka. Niferenaigne i ndaty bokay ohatse ty Jesosy, nisoa  fagnahy tamy i ampela nijale mafe noho ty aretegne nahazo azey, naho niara-ore tamy ty ndaty mate longo. (Mar 1:40, 41; 5:25-34; Jaona 11:33-35) Arakarake ty anahafantikagne i Jehovah ty vao mainke hahavy antika hifandrambe marine ama’e.

8. Nagnino ty fagnorihagne ty lia i Jesosy ro magnampe antika “handrese” ty tontolo toy?

⁸ Magnampe antika tsy ho tondregne amy ty tontolo raty toy eto ty fagnorihagne ty lia i Jesosy. Afake nirehake hoe izao ty Jesosy tamy i halegne fara’e taloha ty nimateza’ey: “Izaho fa naharese ty tontolo toy.” (Jaona 16:33) Te hirehake reke tie tsy nenga’e hisy voka’e ama’e ty toe-tsaigne, ty tanjogne, naho ty raha atao ty tontolo toy. Natao i Jesosy an-tsaigne avao ty anto’e nagnirahagne aze an-tane etoy, le tihoe hagnamasigne ty tahina i Jehovah. Akore ty amantika? Maro ty raha va’e hahatondregne antika amy ty tontolo toy eto. Faie naho manahake i Jesosy tika, ty dika izay, mifantoke avao amy ty fanoagne ty zoton’arofo i Jehovah, le hahavita “handrese” ty tontolo toy ka.​—1 Jaona 5:5.

9. Ino ty raha tsy maintsy ataontika naho tsy te hiala amy i lalagne mbamy i havelogne nainai’ey mbeoy?

⁹ Ho velogne nainai’e tika naho magnorike ty lia i Jesosy. Naho fa nagnontane i Jesosy ze lahilahy tanora mpagnarivo zay tie, ino ty toko’e hatao’e mba hahazoa’e havelogne nainai’e, le hoe ty Jesosy: “Andao hanonjohy ty liako.” (Mat. 19:16-21) Hoe ka ty Jesosy tamo o Jiosy ila’e tsy nino aze tie ie o Kristiò: “Ty agnondriko ... magnorike ahy. Le meako havelogne nainai’e iareo.” (Jaona 10:24-29) Nitovy amy ireo ka ty raha nirehafe i Jesosy tamy i Nikodemosy, agnisa ty Fitsaragne Ambone Jiosy, sady niliagne tamy ty fampianara’e. Hoe ty Jesosy tama’e: ‘Hahazo havelogne nainai’e ze maneho finoagne ahy.’ (Jaona 3:16) Maneho finoagne i Jesosy tika naho mampihatse ze raha nampianare’e sady mitsikombe aze. Tsy hiala amy i lalagne mbamy i havelogne nainai’ey mbeoy tika naho manao izay.​—Mat. 7:14.

10. Ino ty dika tihoe “mianatse hahafantatse” i Jesosy, arake ty Jaona 17:3?

¹⁰ Tsy maintsy “mianatse hahafantatse” i Jesosy tika naho te hagnorike ty lia’ e. (Vakio ty Jaona 17:3.) Trea amy ty rehake tihoe “mianatse hahafantatse”, fa raha mitohy zay. Tsy maintsy mampitombo ty fahafantarantika i Jesosy avao tika, agnisa izay ty toetse’e, ty toe-tsai’e naho ze fitsipike norihe’e. Ndra fa ela tika ro tagnate ty hamarenagne ao ndra vaho tsy ela, le mila “mianatse hahafantatse” i Jehovah naho i Ana-dahi’ey avao.

11. Ino ty trea amy i Filazantsara efatse rey ao?

¹¹ Bey hatea ty Jehovah, le nampanorate’e amy ty Saontsi’e ao i Filazantsara efatse rey mba hagnampeagne antika hahafantatse i  Ana-dahi’ey. Trea amy i boke rey ao ty tantaram-piaigna i Jesosy naho ty fanompoa’e tan-tane etoy. Trea ao ka ty raha nirehafe i Jesosy, ty raha natao’e naho ty fihetseham-po’e. Magnampe antika “handineke soa” ty modely i Jesosy, ndra ty lia’e o boke rehoe. (Heb. 12:3) Naho mianatse i Filazantsara rey areke tika, le hitombo ty fahafantarantika i Jesosy. Ho afake hagnorike soa ty lia’e tika amy izay.

12. Ino ty raha mila ataontika naho te handrambe soa naho fa mamaky i Filazantsara efatse rey?

¹² Faie tsy ampe avao ty mamaky i Filazantsara rey naho tena te handrambe soa amy ty tantara ao tika. Mila manokagne fotoagne mba hianaragne soa naho hisaintsaignagne ze vakientikagne ka tika. (Ampitahao amy ty Josoa 1:8.) Andao tika handineke raha roe hagnampe antika hisaintsaigne naho hampihatse ty tantara amy i Filazantsara efatse rey ao.

13. Ino ty azo’o atao naho fa mamaky ty tantaram-piaigna i Jesosy mba hahavy azo hahazo soa i tantaray?

¹³ Voaloha’e, anò hoe eo rehe naho fa mamaky ty tantara ao. Alao sare an-tsaigne i tantaray, le anò rei’o ty feo ao sady anò tsapa’o ty raha tantaraegne ao. Hagnampe antika hahavita izay ty boke naho gazete naboa i fandaminagne. Dineho ty andinin-teny magnodidigne i tantaray, agnisa izay ty raha niseho taloha naho afara o tantara ianara’ò. Manoa fikarohagne miomba ty ndaty naho ty toeragne voarehake amy i tantaray ao. Ampitahao amy ty raha rehafe i Filazantsara ila’e rey i tantaray. Ty anto’e, kindraike misy pitsopitson-draha rehafe ty Filazantsara raike fa tsy rehafe ty ila’e.

14-15. Ino ty raha tsy maintsy ataontika naho teantika ty hahavita hampihatse ty raha nianarantika amy i Filazantsara rey ao?

¹⁴ Faharoe, ampiharo amy ty fiaigna’o ty raha nianara’o amy i tantaray ao. (Jaona 13:17) Saintsaigno areke zao naho fa boake nianatse tantara raike amy i Filazantsara rey ao rehe: ‘Ino ty lesogne azoko ampiharegne boake amy ty tantara toy? Akore ty azoko ampiasagne ty tantara toy mba  hagnampeagne ty hafa?’ Mieretsereta ndaty raike azo’o irehafagne i lesogne nianara’oy. Ie amy ty fotoagne mete, le rehafo ama’e zay, faie anò aman-kasoa fagnahy.

¹⁵ Andao tika handineke ohatse raike mba hampiharantika i hevetse roe rey. Handineke ty tantara i ampela vantotse nitrea i Jesosy tamy i tempolỳ aoy tika.

16. Tantarao ty raha azo’o sare an-tsaigne boake amy ty Marka 12:41?

¹⁶ Anò hoe eo rehe, le mahatrea ty raha miseho amy i tantaray ao. (Vakio ty Marka 12:41.) Raike amby folo Nisana taogne 33, andro tsiampeampe taloha ty namonoagne i Jesosy tamy izay. Nandany ty ankamaroa ty fotoa’e mba hampianaragne tamy i tempolỳ tao reke. Faie nanohetse aze o mpitarike fivavahagneo. Nisy tamy iareo taloha io nagnontane tie fahefàgne boake aia ty ahafaha’e manao o asa’eo. Ty ila’e nametrake fagnonteneagne mba hamandrihagne aze. (Mar 11:27-33; 12:13-34) Nandeha amy ty faritse hafa amy i tempolỳ ao ty Jesosy naho fa niavy eo. Va’e tamy i Kiririsa o Ampelao tao o toeragne nandenà’e iohoe. Afake nahatrea i boate fampipoham-bolay reke tao. Nitoboke reke, le nanomboke nagnente ze ndaty nampijògne vola tagnate i boatey tao. Maro ty ndaty mpagnarivo nampipoke vola madineke maro tao. Va’e narine i boatey teo ty nitoboha’e, le naharey soa ty fikarikarỳ i vola rey reke naho fa najogne tagnate i boatey tao.

17. Ino ty raha natao i ampela vantotse nahantray, arake ty Marka 12:42?

¹⁷ Vakio ty Marka 12:42. Tsy ela tafara izay, le nahatrea ampela ‘vantotse nahantra’ zay ty Jesosy. (Lioka 21:2) Tena tsy mora ty raha niaigna’e, sady va’e tsy le nanam-bola fire ka reke mba hivilianagne ze raha paliae’e. Faie mbe nandeha mbamy i boate fampipoham-bolay mbeo avao reke, le nampipoke vola fara izay tena kidikidy roe zay. Va’e zara’e aza naho nirey ty fagneno i vola’e rey naho fa napo’e tagnate i boatey tao. Nihay i Jesosy tie leptona roe ty napo i ampelay. Io ty vola fara izay tena tsy misy vili’e tamy izay. Ndra foly raike tsy niazo io, ie amy izaò io ty vorogne fara izay ty mora ty vili’e.

18. Ino ty raha nirehafe i Jesosy miomba ty fagnomezagne nimey i ampela vantotsey, arake ty Marka 12:43, 44?

¹⁸ Vakio ty Marka 12:43, 44. Tena nahafale ty fo i Jesosy ty raha natao i ampela vantotsey. Nitokave’e areke i mpiana’e rey, le hoe reke tamy iareo: ‘O ampela vantotse mahantra iohoe ty nampipoke maro tie amy i ndaty hafa nampipoke teo rey.’ Hoe ka ty Jesosy: “Ty anto’e, boake amy ty ambiamby ty fanagna iareo avao ty napo iareo tao [lohotsie fa i ndaty mpagnarivo rey], fa o ampela vantotse iohoe ndra tie mahantra aza, le nampipoke ze nanagna’e, le ty fiveloma’e iaby.” Naho fa nagnomey i vola sisa mba nanagna’e rey areke o ampela vantotse tsy nivalike iohoe, le trea tamy igne fa nankine’e tamy i Jehovah ty fiaigna’e.​—Sal. 26:3.

19. Ino ty lesogne lahibey azontika ianaragne amy ty reha i Jesosy miomba i ampela vantotse nahantray?

¹⁹ Ampiharo ty raha nianara’o boake amy i tantaray. Saintsaigno zao: ‘Ino ty lesogne azoko ianaragne miomba i ampela vantotse nahantra nirehafe i Jesosỳ?’ Eretsereto hey moa zao! Azo antoke fa nitea i ampela vantotsey naho mba nimaro ty azo’e nimeigne i Jehovah. Faie tsy nanagne maro reke, le ze fara’e soa nanagna’e ro nimei’e. Nihay i Jesosy fa sarobily taman-dRae’e i fagnomeza i ampela vantotseỳ. Izao areke ty lesogne lahibey ianarantika: Fale ty Jehovah naho fa magnomey ze fara’e soa tika sady manompo aze  amy ty fontika. (Mat. 22:37; Kol. 3:23) Vazoho i Jehovah ty kezake ataontika mba hanompoagne aze arake ze vitantikagne. Itika zao manokagne ty fotoantika naho ty herintika mba hanoagne fanompoagne naho hagnatrehagne fivoriagne. Tena mahafale aze ty mahavazoho antika manao ireo!

20. Akore ty azo’o ampiharagne ty lesogne nianaragne boake amy ty tantara i ampela vantotsey? Mirehafa ohatse raike.

²⁰ Akore ty hampihara’o ty lesogne nianara’o boake amy ty tantara i ampela vantotsey? Mieretsereta ndaty raike va’e mila meagne toky tie mahafale i Jehovah ty kezake iaby atao’e. Ohatse, mahafantatse rahavave raike fa bey va’e kivy ndra mahatsiaro ho tsy misy ilagne aze vao rehe, noho ireke marare ndra fa tsy mahavita bey amy ty fanompoagne manahake ty taloha sasa? Sa misy rahalahy raike managne aretegne miteza, sady lava manaintaigne avao, le kivy satria tsy afake mandeha mivory isan-keregnandro? Ampeo reke, le mirehafa raha ‘mampahery’ ama’e. (Efes. 4:29) Rehafo ama’e ohatse ty lesogne mampahery nianara’o boake amy ty tantara i ampela vantotse nahantray. Haniahy aze zay fa fale ty Jehovah naho magnomey ze fara’e soa ho aze tika. (Ohab. 15:23; 1 Tes. 5:11) Naho ihe midera ty hafa noho iareo mikezake magnomey ty fara’e soa hoahy i Jehovah, ndra tie va’e hoe kedekede avao aza ty vita iareo, le trea tie magnorike ty lia i Jesosy rehe.

21. Tapa-kevetse hanao ino rehe?

²¹ Tena fale tika, satria maro ty pitsopitson-draha rehafe i Filazantsara rey miomba ty fiaigna i Jesosy. Magnampe antika hanahake aze naho hagnorike ty lia’e rey! Anò fianaragne raike ndra anò’areo Fotoam-pivavaha ty Keleiagne areke i Filazantsara rey. Faie mba hahavy antika tena handrambe soa naho fa mianatse, le mila mangalake sare an-tsaigne i tantaray naho mampihatse ze lesogne ianarantikagne tika. Faie tsy ty raha natao i Jesosy avao ro mila tsikombentika. Mila tsanognantika ka ty raha nirehafe’e. Hodinehentika amy ty lahatsoratse magnarake ty raha azontika ianaragne boake amy ty raha nirehafe i Jesosy taloha ty nimateza’e.