1. Ino ty vazoho i Jehovah amo o vahoa’eo?

‘TEA i Jehovah Andrianagnahare ty vahoa’e.’ (2 Tan. 2:11) Tena mahafale antika zay! Vazoho i Jehovah ty toetse soa anagnantika. Oni’e ka ty raha soa ho vitantikagne, le taone’e mba ho ragne’e tika. (Jaona 6:44) Faie naho tsy mivalike ama’e avao tika, vaho izay ka reke tsy hivalike amantika nainai’e.

2. Nagnino ro va’e ho sarotse amy ty mpanompo i Jehovah ila’e ty mino tie teà i Jehovah iareo?

² Va’e hisy hirehake tie: ‘Haiko tie tea i Jehovah o vahoa’eo. Faie amy ty fitambara’e zay, fa tsy iareo tsikiraidraike. Akore ty hahazoako antoke fa tea ahy manokagne reke?’ Faie ino ty va’e hahavy ty ndaty raike hirehake izay? Nijale mafe ty Oksana * tamy i reke mbe niajaja. Hoe reke: “Tena nifale raho naho fa nivita badisa, le nanomboke nanao mpisava lalagne. Faie, ie 15 taogne tafara izay, le niheregne tan-tsaiko ao iaby indraike i raha nanjò ahy tamy mbe niajajay. Hafarako nanomboke nieretseretse tie tsy ankasitraha i Jehovah sady tsy fagneva ty ho tea’e sasa.” Niatreke olagne maro ka ty Yua, rahavave mpisava lalagne raike zay, tamy i reke mbe niajaja. Hoe reke: “Nanokan-tegna hoahy i Jehovah raho, satria te hampifale aze. Faie tsy nino raho tie tena tea ahike reke.”

3. Ino ty hodinehentikagne ato?

³ Azo antoke fa tena tea’o ty Jehovah, manahake i rahavave roe nirehafegne teo rey. Faie va’e hisalasala rehe naho tea azo vata’e reke. Nagnino rehe ro mila rese lahatse fa tena tea azo ty Jehovah? Ino ty azo’o atao naho fa mieretseretse rehe tie tsy tea azo reke? Andao tika handineke ty vale ireo.

4. Nagnino ro magnoho-doza ty fisalasalagne miomba ty hatea i Jehovah antika?

⁴ Ino ty ho voka’e naho mino tika tie tena tea antika ty Jehovah? Hanompo aze amy ty fontika tika, ndra tie miatreke raha  sarotse aza. Fa naho itika misalasala, le ‘hihegne ty herintika.’ (Ohab. 24:10) Le naho fa kivy tika sady manomboke mieretseretse tie tsy tea antika ty Jehovah, le tsy ho vitantika ty hanohetse ty fanafiha i Satana.​—Efes. 6:16.

5. Ino ty voka’e tamy ty Kristiana ila’e naho fa nisalasala iareo naho tena tea iareo ty Andrianagnahare?

⁵ Misy Kristiana tsy mivalike amo o ze androntika zao misalasala naho tena tea aze ty Jehovah. Ty voka’e, nanjare nihegne ty finoa iareo. Hoe ty James, androanavi-pagnahy: “Ndra tie Betelita aza raho sady teako ty manompo amy ze fiangonagne mampiasa firehake hafa zay, le mbe nisalasala avao raho tie: ‘Tena ankasitraha i Jehovah vao ty fanompoako aze?’ Nisy fotoagne aza raho nisalasala naho tena mijanjigne ty vavake anoeko reke.” Hoe ka ty Eva, mpanompo marain-tsy hariva: “Tsapako tie tena magnoho-doza ty misalasala tie tea antika vata’e vao ty Jehovah. Ty anto’e, misy voka’e raty amy ze raha ataontika mba hanompoagne aze zay. Manjare tsy te hanao raha ara-pagnahy sasa rehe, sady tsy mahatrea hafaleagne amy ty fanompoagne i Jehovah.” Hoe ty Michael, mpisava lalagne maharetse sady androanavi-pagnahy: “Naho ihe tsy mino tie tea azo vata’e ty Andrianagnahare, le ho voatarike hiala ama’e rehe.”

6. Ino ty raha tsy maintsy ataontika naho fa manomboke mieretseretse tika tie tsy tea antika ty Jehovah?

⁶ Treantika boake amo o ohatse rehoe, fa tena manimba ty ara-pagnahintika ty fieretseretagne tie tsy tea antika ty Jehovah. Ino areke ty toko’e hataontika naho manomboke misalasala tika naho toe tea antika vata’e ty Andrianagnahare? Mila afahantika malaky an-tsaintikagne ao ze eretsere-draty zay. Mivavaha amy i Jehovah mba hagnampe azo hanolo ze ‘raha mampivali-doha’ azo zay amy ‘ty fiadanan’Andrianagnahare’, satria mahavita ‘miambegne ty fo’o naho ty sai’o’ io. (Sal. 139:23; Fil. 4:6, 7) Ko haligno fa tsy ihe raike avao ro mieretseretse hoe izay. Misy rahalahy naho rahavave tsy mivalike hafa ka mialy mafe amy izay. Ndra o mpanompo i Jehovah talohao aza nialy mafe tamy izay, agnisa izay ty apostoly Paoly. Andao tika handineke ty raha azontika ianaragne boake ama’e.

7. Ino iaby ty olagne natrehe i Paoly?

⁷ Misy fotoagne vao rehe mahatsapa tie hoe maro loatse zay ty andraiki’o, le tsy vita’o iaby ty raha toko’e hatao’o? Naho izay, le ho taka’o ty raha nitsapa i Paoly. Ninekoneko miomba o  fiangonagneo reke. Faie tsy fiangonagne raike avao, fa ‘o fiangonagneo iaby.’ (2 Kor. 11:23-28) Managne aretegne miteza ka vao rehe, le manjare tsy falefale? Nisy “fatike amy ty nofotse” zay tena nampijale i Paoly mafe. Va’e ho aretegne io, le nitea’e ty hialà io ama’e. (2 Kor. 12:7-10) Ndra fa nisy fotoagne vao rehe nikivy noho ty fahaleme’o? Fa nitratse izay ka ty Paoly kindraike. Hoe reke: ‘Ndaty mahantra raho!’ Ty anto’e, nialy tamy i nofo’e tsy voririkey lognandro reke.​—Rom. 7:21-24.

8. Ino ty nagnampe i Paoly hahavita hiatreke ty olagne nahazo aze?

⁸ Faie ndra tie teo aza o olagne tsiefa natrehe i Paoly rehoe, le nanohy ty fanompoa’e i Jehovah avao reke. Ino ty nagnampe aze hahavita izay? Tena nino i solovoigney reke, ndra tie nihai’e soa aza fa tsy voririke reke. Nihai’e ka ty raha nampitamae i Jesosy toy tie: ‘Ho velogne nainai’e ze manoro ty finoa’e i Jesosy.’ (Jaona 3:16; Rom. 6:23) Agnisa ty ndaty tena nanoro ty finoa’e i solovoigney ty Paoly. Nino reke fa tena vognogne hamela heloke ze ndaty nanao fahotagne lahibey faie mibebake ty Jehovah.​—Sal. 86:5.

9. Ino ty ianarantika boake amy ty raha nirehafe i Paoly amy Galatianina 2:20 ao?

⁹ Nagnampe i Paoly hanohy ty fanompoa’e i Jehovah ka ty finoa’e tie tena tea aze ty Andrianagnahare. Nino izay reke. Ty anto’e, kanao ty Jehovah nandefa i Ana-dahi’ey mba ho mate ho aze, le tea aze zay reke. (Vakio ty Galatianina 2:20.) Magnamaregne izay ty tapa’e fara’e amo o andine’e iohoe. Hoe ty Paoly: ‘Nitea ahy i Ana-dahin’Andrianagnaharey, le nanolotse ty tegna’e ho ahy.’ Tsy mba nieretseretse zao ty Paoly tie tsy ho tea aze ty Andrianagnahare, satria ni-ndaty raty reke taloha. Tsy nirehake ka reke tie: ‘O rahalahikò ro fagneva ty ho tea i Jehovah, fa i raho tsy mba ho tea’e zao ndra ombia ndra ombia.’ Naniahy o Kristiana ta Roma agneo reke tie: “Tamy itikagne mbe nimpanota, le fa mate ho antikagne ty Kristy.” (Rom. 5:8) Tsy misy raha afake mikalagne i Jehovah tsy ho tea antika.

10. Ino ty ianarantika boake amy Romanina 8:38, 39?

¹⁰ Vakio ty Romanina 8:38, 39. Tena natoky ty Paoly fa mahery vata’e ty hatean’Andrianagnahare. Hoe reke: “Tsy hisy hahasarake antikagne amy ty hatean’Andrianagnahare.” Nihay i Paoly fa tena nanam-paharetagne tamo o Israelitao ty Jehovah. Nihai’e ka tie namindra fo tama’e ty Jehovah. Hoe te hirehake hoe izao areke ty Paoly tie: ‘Ino moa ty toko’e hampisalasala ahike tie tena tea ahy vao ty Jehovah, ie amy izaò i ana-dahi’e bakotokagney nalefa’e an-tane etoy mba ho mate ho ahike?’​—Rom. 8:32.

11. Ndra tie nanao i fahotagne nirehafe’e amy 1 Timoty 1:12-15 aoy aza ty Paoly, le nagnino reke ro natoky fa tea aze ty Andrianagnahare?

 ¹¹ Vakio ty 1 Timoty 1:12-15. Azo antoke fa nisy fotoagne ty Paoly nikivy noho ty raha tsy nimete natao’e taloha. Tsy mahagaga naho nirehake reke tie i reke ty “loha’e” amo o mpanotao. Taloha ty nahafantara’e ty hamarenagne, le nagnenjeke o Kristianao avao ty natao’e. Nigadrae’e ty ila’e, le ty ila’e neké’e ty hamonoagne aze. (Asa. 26:10, 11) Mba fa nalae’o sare an-tsaigne vao tie ino ty nitsapa i Paoly naho fa nahatrea ty raike amy ty ana i ndaty neké’e ty hamonoagne aze rey? Azo antoke fa nanegnegne ty Paoly noho i hadisoagne natao’e rey. Faie nihai’e ka tie tsy afake nagnova irey sasa reke. Nagneke reke fa nimate ho aze ty Kristy, sady tsy nisalasala reke nanoratse tie: “Ty hasoa fagnahy tsy misy hoe’e nasehon’Andrianagnahare ro naha hoe izao ahy.” (1 Kor. 15:3, 10) Ino ty lesogne ho antika? Ekeo tie nimate ho azo ty Kristy, sady nanokake lalagne ho azo mba hahafaha’o hifandrambe marine amy i Jehovah. (Asa. 3:19) Ty raha ataontika amy izao naho amy ty hoavy ro tena ifantoha i Jehovah, fa tsy ty hadisoagne nataontika taloha, ndra fa ni-Vavolombelo i Jehovah tika tamy izay, ndra mbe mboe’e.​—Isaia 1:18.

12. Nagnino ty raha rehafe ty 1 Jaona 3:19, 20 ro magnampe antika naho fa mahatsapa tika tie tsy fagneva ty ho tea i Jehovah?

¹² Va’e hamitake antika o fontika tsy voririkeo kindraike, le atao’e ze hahatsapantika tie tsy misy dika’e tika, ndra tsy fagneva ty ho teagne. (Vakio ty 1 Jaona 3:19, 20.) Ty voka’e, va’e hieretseretse tika tie tsy mahavita mandrongogne ty fahotantikagne i sorogne nanoe i Jesosỳ. Naho fa mahatsapa hoe izay tika, le mila tadidientika tie “lahibey noho ty fontika ty Andrianagnahare.” Ty hatea naho ty famindram-po i Babantikagne  an-dagnitse agney antika, le mahery mandikoatse ze eretsere-draty va’e ho am-pontikagne ao. Mila ataontika ze hahavy antika ho rese lahatse tie tea antika ty Jehovah. Mila mianatse ty Saontsin’Andrianagnahare naho mivavake mateteke, vaho miarake amo o mpiara-manompò tika mba hahavy antika hagneke izay. Nagnino o raha telo rehoe ro tena ilaegne?

13. Nagnino ty fianaragne ty Saontsin’Andrianagnahare ro magnampe antika? (Henteo ty efajoro tihoe “ Akore ty Nagnampea ty Saontsin’Andrianagnahare Iareo?”)

¹³ Mianara ty Saontsin’Andrianagnahare isan’andro. Ho maro ty toetse fanjaka i Jehovah ho hai’o amy izay, sady ho tsapa’o fa tena ikokoa’e rehe. Mila misaintsaigne ka tika. Naho misaintsaigne ty raha rehafe ty Saontsin’Andrianagnahare isan’andro rehe, le hipagnake ty sai’o, sady ho vita’o ty hagnitsy ty hevetse diso anagna’o. (2 Tim. 3:16) Hoe ty Kevin, androanavi-pagnahy raike, nialy mafe mba tsy hieretseretse ty vata’e ho tsy misy dika’e: “Ty famakiako naho ty fisaintsaignako ty Salamo 103, le nagnampe ahy hagnitsy ty toe-tsaiko naho hahatsapa tie tea ahike vata’e ty Jehovah.” Hoe ka ty Eva, i rahavave nirehafegne taloha teoy: “Manokagne fotoagne mba hisaintsaignagne ty fomba fiheve i Jehovah raho isake tie aloha ty hiroro. Nagnampe ahy hilamin-tsaigne naho hanagne finoagne matanjake ty fanoagne izay.”

14. Nagnino ty vavake ro magnampe antika?

¹⁴ Mivavaha tsy tapake. (1 Tes. 5:17) Naho te ho mpiragnetse maifitse amy ty ndaty raike rehe, le mila mirehake ama’e mateteke sady vorahe’o ama’e ze raha am-po’o ao. Hoe izay ka ty toko’e hataontika naho te hifandrambe amy i Jehovah. Naho rehafentika ama’e ty raha tsapantika, ty eretserentika naho ty raha mampinekoneko antika, le trea tie matoky aze tika, sady mino fa tea antika reke. (Sal. 94:17-19; 1 Jaona 5:14, 15) Hoe ty Yua, i nirehafegne taloha teoy: “Naho fa mivavake raho, le voraheko amy i Jehovah iaby ze raha tena am-poko ao, fa tsy ze raha nataoko tamy i andro ignehoe avao ro rehafeko ama’e. Naho fa nanao izay mateteke raho, le nanjare tsapako tie manahake o Rae koko anakeo reke, fa tsy manahake o sefo mikomandikomandy avaò.”—Henteo ty efajoro tihoe “ Fa Nivakie’o vao o Boke Iohoe?”

15. Akore ty ampisehoa i Jehovah fa tea antika reke?

¹⁵ Miaraha amo o rahalahio naho o rahavaveo. Fagnomezagne boake aman’Andrianagnahare iareo. (Jak. 1:17) Tea antika i Babantikagne an-dagnitse agney, le nimei’e rahalahy naho rahavave ara-pagnahy tika. ‘Koko antika nainai’e’ iareo. (Ohab. 17:17) Nirehafe i Paoly tamy i taratasy nisorate’e hoahy o Kolosianaoy tao ty agnara ty Kristiana ila’e nanohagne aze.  Hoe reke: ‘Nagnampe naho nampahery ahy iareo.’ (Kol. 4:10, 11) Ndra i Kristy Jesosy aza nipay fagnampeagne tamo o nama’eo. Ohatse, tamo o anjelio naho o apostoli’eo. Nankasitraha’e ka ze fagnampea iareo aze zay.​—Lioka 22:28, 43.

16. Nagnino ty Kristiana matotse ro afake magnampe antika hifandrambe soa amy i Jehovah?

¹⁶ Mba mipay fagnampeagne amy ty nama’o amo o fiangonagneo eo vao rehe? Ty firehafantikagne ty raha manahiragne antika amo o Kristiana matotseo, le tsy midika tie maleme ty finoantika. Miaro antika aza ty fanoagne izay. Hoe ty James, i rahalahy nirehafegne taloha teoy: “Tena nagnampe ahy ty finamagnako amo o Kristiana matotseo. Vognogne hitsanogne ahy iareo naho fa i raho mieretsere-draty miomba ty vatako. Mea iareo toky ka raho tie tea ahy iareo. Ty voka’e, manjare tsapako tie tea ahy ty Jehovah sady mikarakara ahy.” Tena ilaentika areke ty magnasoa lognandro ty fifandrambesantika amo o rahalahio naho o rahavaventikagne ara-pagnahy reo.

17-18. Ia ty mila tsanognentika, le ino ty anto’e?

¹⁷ Tea i Satana naho kivy tika, le tsy mikezake hanao ty soa sasa. Tea’e naho mino tika tie tsy tea antika ty Jehovah. Tea’e hino ka tika tie tsy fagneva ty horombahegne. Faie arake ty nitreantika teo, le tsy maregne zay.

¹⁸ Tea azo ty Jehovah. Sarobily agnatreha’e eo ka rehe. Naho mankatò aze rehe, le ‘tsy hiala amy ty hatea’e’ nainai’e, manahake i Jesosy. (Jaona 15:10) Ko tsanognagne areke ze raha rehafe i Satana ndra ty fo’o naho fa magnameloke azo reke. I Jehovah, i Andrianagnahare mahavazoho ty toetse soa anagnantika tsikiraidraikey, ro tsanogno. Matokia rehe fa ‘tea i Jehovah ty vahoa’e’, le agnisa izay rehe.