1. Ino ty raha také i Jehovah amantika?

 AGNISA ty fotoagne mahafale o mpivalio ty fotoagne iteraha iareo ty ana iareo. Faie ndra tie teà o rae aman-dreneo manao akore aza i ana’ey amy ireke mbe menamenay, le tsy irie iareo lelia’e ho menamena avao reke. Naho ty maregne, le mivalike ty loha iareo naho fa tsy mitombo i ajajay. Manahake izay ka fa fale ty Jehovah naho fa itika manomboke mianatse ty miomba aze. Faie tsy irie’e lelia’e hijanogne eo avao tika. (1 Kor. 3:1) Ireke aza mandrisike antika mba “ho ndaty bey” Kristiana.​—1 Kor. 14:20.

2. Ino ty raha hodinehentikagne ato?

² Ndaty manao akore ty atao tihoe Kristiana matotse? Ino ty hagnampe antika ho Kristiana matotse? Nagnino ty venten-kanegne ara-pagnahy ro magnampe antika ho Kristiana matotse, le nagnino tika ro tsy toko’e hatoky tegna? Hamale o fagnonteneagne rehoe tika amy ty lahatsoratse toy ato.

NDATY MANAO AKORE TY ATAO TIHOE KRISTIANA MATOTSE?

3. Ino ty dika tihoe ndaty bey Kristiana?

³ Amy Baiboly ao ty rehake Grike nadika tihoe “ndaty bey”, le azo adika tihoe ka tie “matotse, voririke, feno.” a (Efes. 4:13, f.a.p.) Manahake ty ajaja mihamitombo avao amparake ty haha ndaty bey aze, le toko’e hikezake hampitombo ty fifandrambesantika amy i Jehovah ka tika. Hanjare Kristiana matotse tika naho manao izay. Faie ndra tie fa matotse aza tikagne, le toko’e  mbe hikezake handroso amy ty lafi’e ara-pagnahy avao. (1 Tim. 4:15) Afake ty ho matotse ara-pagnahy iaby tika, agnisa izay o tanorao. Faie akore ty ahafantarantika tie matotse tika?

4. Ino ty amantaragne ty Kristiana matotse?

⁴ Ty Kristiana matotse le miaigne mifagnarake amy ty fitsipin’Andrianagnahare fa tsy manao ze raha tea’e hatao avao. Satria reke tsy voririke le azo antoke fa hanao hadisoagne. Faie aseho’e amy ty fomba fiaigna’e isan’andro fa manao raha mifagnarake amy ty zoton’arofon’Agnahare reke. Mikezake hanagne toetse vaovao naho hanagne ty fomba fisaigna i Jehovah reke. (Efes. 4:22-24) Magnazatse ty vata’e reke mba handrambe fanapahan-kevetse mioregne amy ty fitsipy i Jehovah naho ty toro lala’e. Tsy mipay lalàna amy ze raha toko’e hatao’e areke reke. Naho fa mandrambe fanapahan-kevetse reke, le mikezake mafe magnorike izay.​—1 Kor. 9:26, 27.

5. Ino ty loza ara-pagnahy va’e hahazo ze Kristiana tsy matotse? (Efesianina 4:14, 15)

⁵ Mifanohetse amy izay fa ty Kristiana raike tsy matotse, le ‘mora voafita o ndatio’ naho ‘voafita o heve-disò.’ Va’e hino ty vaovao tsy maregne aparita o ndatio reke, ndra hevetse namboamboaregne ndra ka tantara tsy maregne amy ty tele. Va’e ho voafita o mpivalim-pinoagneo ka reke. b (Vakio ty Efesianina 4:14, 15.) Va’e hialogne ty hafa, hotea aly, tea mamale fate naho ho mora rese ty tsapa hevetse reke.​—1 Kor. 3:3.

6. Azo ampitoviegne amy ty ino tihoe mihamatotse? (Henteo i sarey.)

⁶ Nitreantika taloha teo fa ampitovie ty Baiboly amy ty fitomboa ty ajaja ho ndaty bey ty fandrosoagne ara-pagnahy mba hanjare Kristiana matotse. Maro ty raha tsy hay o ajajao sady mipay ty fiarovagne naho ty tari-dala o ndaty beio reke. Naho fa hanapake amy ty lalagne zao ohatse ty ajaja ampela raike, le tanan-drene’e ty tagna’e. Naho fa mihabey reke, le engan-drene’e irery hanapake amy i lalagney eo faie mbe tiahive’e avao mba hagnente soa hey vaho manapake. Naho fa ndaty bey i ajajay, le fanta’e ty raha toko’e hatao mba tsy ho azon-doza reke. Manahake ty ajaja mipay fagnampeagne amy ty ndaty bey mba tsy ho azon-doza, le mateteke ro  mipay ty fagnampea ty Kristiana matotse ka ze tsy matotse mba tsy ho azon-doza amy ty lafi’e ara-pagnahy naho mba handrambesagne fanapahan-kevetse mete soa. Faie naho fa ireke manjare matotse le mandineke ty toro lala ty Baiboly mba hahafantaragne ty fomba fivazohoa i Jehovah ty raha raike. Avy eo reke manao raha mifagnarake amy izay naho fa handrambe fanapahan-kevetse.

7. Mipay ty fagnampea ty hafa vao ty Kristiana matotse?

⁷ Midika vao zay fa tsy mipay ty fagnampea ty hafa ty Kristiana matotse? Oho’o. Mila mangatake fagnampeagne amy ty hafa o Kristiana matotseo kindraike. Faie ty ndaty tsy matotse ara-pagnahy, le mitamà ty hafa avao hanoro aze ty raha toko’e hatao’e ndra ty fanapahan-kevetse toko’e horambese’e. Tsy hoe izay o Kristiana matotseo. Mipay fagnampeagne amy ty hafa reke mba hahavy aze hanagne fahendreagne naho fahaiagne, faie fanta’e soa tie ireke ty tompon-andraikitse amy ty fanapahan-kevetse rambese’e sady ‘sambe hinday ty enta’e ty tsikiraidraike.’​—Gal. 6:5.

8. Ino ty tsy mampitovy ty ndaty matotse amy ty ndaty hafa?

⁸ Ty toe-bata’e ty amantaragne ty ndaty raike tie fa bey reke. Faie ty toetse arake ty fagnahy anagna’e ty amantaragne ty ndaty raike tie Kristiana matotse reke. Agnisa izay ty fahendreagne, herim-po, fatarihagne vaho fitretrézagne. Ankoatse izay ka naho fa miatreke raha raike mitovy ty Kristiana matotse roe, le va’e tsy hitovy ty fanapahan-kevetse rambese iareo faie sambe mifagnarake amy ty toro lala ty Baiboly. Izay mateteke ty raha miseho naho fa miankigne amy ty feo ty fieretseretagne ty fanapahan-kevetse horambesegne. Noho izay le tsy mifampitsara iareo fa manao ze hampisy firaisan-tsaigne.​—Rom. 14:10; 1 Kor. 1:10.

INO TY HAGNAMPE ANTIKA HO KRISTIANA MATOTSE?

9. Mandeha hoaze avao vao ty fitomboagne amy ty lafi’e ara-pagnahy? Hazavao.

⁹ Mitombo ho asa’e avao o ndatio, faie tsy mandeha hoaze hoe izay ty fitomboagne amy ty lafi’e ara-pagnahy. Nagneke i talily soay ohatse ty rahalahy naho ty rahavave ta Korinto tagne le natao badisa, nahazo fagnahy masigne sady nandrambe soa boake amy ty toromareke nimea i apostoly Paoly. (Asa. 18:8-11) Faie taogne maro tafara ty badisa iareo le mbe maro ty tsy nimatotse. (1 Kor. 3:2) Ino ty azontikagne atao mba hahavy antika tsy hanahake izay?

10. Ino ty raha tsy maintsy ataontika naho te ho matotse? (Joda 20)

¹⁰ Mba hahavy antika ho matotse, le mila managne ze fagniriagne te ho matotse zay hey tikagne. Ty ndaty mbe “tsy nandia fiaignagne” ndra ty ndaty te hijanogne ho ajaja ara-pagnahy avao le tsy ombia ho matotse. (Ohab. 1:22) Tsy teantika ty hanahake ty ndaty raike fa bey faie miantehetse amy ty rae aman-drene’e avao hirehake aze ty raha toko’e hatao’e. Teantika areke naho itika avao ty tompon’andraikitse amy ty fitomboa ty ara-pagnahintika. (Vakio ty Joda 20.) Naho mbe agnate ty mikezake ho matotse rehe, le mivavaha amy i Jehovah mba hahavy azo hanagne “fagniriagne naho hery hanoagne” izay.​—Fil. 2:13.

11. Ino ty raha mea i Jehovah antika mba hagnampeagne antika ho matotse? (Efesianina 4:11-13)

¹¹ Tsy mitamà ty Jehovah tie ho vitantika raike avao ty hanjare ho matotse. Nimea’e mpiarake naho mpampianatse agnivo fiangonagneo tika mba hagnampe antika ho ‘matotse’ ara-pagnahy “amparake ty hahavy antika ho matotse manahake i Kristy.” (Vakio ty Efesianina 4:11-13.) Magnomey ty fagnahi’e masigne ka ty Jehovah mba hagnampe antika  hanagne ty “say i Kristy.” (1 Kor. 2:14-16) Noho izay le nampanoratse i Filazantsara efatse rey ty Jehovah mba hampisehoagne amantika ty fomba fisaigna i Jesosy, ty raha nirehafe’e naho ty raha natao’e tamy ireke tan-tane etoỳ. Naho manahake ty fomba fisaigna i Jesosy naho ty raha natao’e tika le hanjare Kristiana matotse.

MAGNAMPE ANTIKA HO MATOTSE O VENTEN-KANEGNE ARA-PAGNAHIO

12. Ino ty atao tihoe “fampianaragne fototse miomba i Kristy”?

¹² Mba hahavy antika ho matotse, le tsy toko’e hionogne amy ty fampianaragne fototse miomba i Kristy avao tika. Agnisa ze fampianaragne fototse rey zay ty miomba ty fibebahagne, ty finoagne, ty badisa naho ty famelomagne amy ty mate. (Heb. 6:1, 2) Agnisa ty fampianaragne fototse ioregna ty Kristiana iaby reo. Izay ty nahavy i apostoly Petera nirehake miomba izay naho fa nitory tamy i vahoake tamy Pentekostay. (Asa. 2:32-35, 38) Tsy maintsy magneke o fampianaragne fototse reo tika naho te hanjare ho mpiana i Kristy. Nampitao ohatse ty Paoly fa tsy afake ty ho agnisa ty Kristiana ze ndaty mandietse ty fampianaragne miomba ty famelomagne ty mate. (1 Kor. 15:12-14) Ndra tie eo aza zay le tsy toko’e hionogne amy ty fahalalagne fototse miomba ty hamarenagne avao tika.

13. Arake ty rehafe ty Hebreo 5:14, ino ty tsy maintsy ataontika mba handrambesantika soa boake amy ty venten-kanegne ara-pagnahy? (Henteo i sarey.)

¹³ Tsy manahake ty fampianaragne fototse ty venten-kanegne ara-pagnahy satria tsy tihoe ty lalà i Jehovah avao ty tafilitse amy io fa eo ka ty toro lala’e. Magnampe antika hahafantatse ty fomba fiheve i Jehovah io. Mba handrambesantika soa amo o hanegne ara-pagnahy reo le tsy maintsy mianatse, misaintsaigne naho mampihatse soa ze raha agnate ty Saontsin’Agnahare ao tika. Mampiofagne antika mba handrambe fanapahan-kevetse mampifale i Jehovah ty fanoagne izay. c​—Vakio ty Hebreo 5:14.

14. Akore ty nagnampea i Paoly o Korintianao mba ho matotse?

¹⁴ Sahiragne miomba ty fanapahan-kevetse hatao’e ty Kristiana tsy matotse naho fa tsy  misy lalàna mazava soa miomba ty raha raike ty amy Baiboly ao. Noho izay le mieretseretse ty ila’e tie afake manao ze hita’e fa mete avao iareo. Ty hafa zao va’e hangatake lalàna naho fa tsy misy fitsipike mazava soa. Nangatake lalàna tamy i Paoly miomba ty hanegne natolotse hoahy ty sampy zao ohatse o Kristiana ta Korinto agne reo. Tsy nirehake ty raha toko’e hatao iareo ty Paoly fa nampahafantatse iareo tie “managne zo hifily” ty tsikiraidraike mifagnarake amy ze eké ty feo ty fieretsereta’e. Nirehake toro lalagne ila’e boake amy Baiboly ao reke mba hagnampe iareo tsy henjehe ty eretsere iareo naho tsy hanafintohigne ty hafa naho fa hanapa-kevetse. (1 Kor. 8:4, 7-9) Nagnampe o Korintianao ho matotse amy ty lafi’e ara-pagnahy ty Paoly amy izay iareo ho afake hampiasa ty fahaia iareo misaigne fa tsy hiankigne amy ty hafa ndra hipay lalàna avao.

15. Akore ty nagnampea i Paoly o Kristiana Hebreo reo mba handroso amy ty lafi’e ara-pagnahy?

¹⁵ Misy lesogne lahibey ka ianarantika boake amy ty raha nisorate i Paoly hoahy o Kristiana Hebreo reo. Tsy nandroso amy ty lafi’e ara-pagnahy ty ila’e “le nanjare manahake o mipay ronono reo fa tsy venten-kanegne [ara-pagnahy].” (Heb. 5:12) Tsy nianatse sady tsy nagneke ty raha vaovao nampianare i Jehovah tamy ty alala o fiangonagneo iareo. (Ohab. 4:18) Maro zao ohatse ty Jiosy mbe nagnorike i Lalà i Mosesỳ avao ndra tie fa 30 taogne tafara ty nagnafoagnagne aze aza noho i solovoigne natao i Kristỳ. (Rom. 10:4; Tit. 1:10) Niampe soa o 30 taogne iohoe mba hahatakara iareo tie fa tsy mila magnorike i lalànay sasa iareo! Nikezake mafe nagnampe iareo areke ty Paoly mba hagneke ty hamarenagne laleke nampianare’e iareo. I taratasi’ey le nagnampe iareo mba hahatrea tie tena soa mandikoatse ty taloha ty fomba vaovao anompoagne i Jehovah amy ty alala i Jesosy. Nandrisike iareo mba hitory avao ka zay ndra tie teo aza ty fagnenjehagne natao o Jiosio.​—Heb. 10:19-23.

KO MATOKY TEGNA LOATSE

16. Mba hahavy antika ho matotse avao, le ino ty raha tsy maintsy ataontika?

¹⁶ Mbe mila mikezake ho matotse avao tika ndra tie fa matotse aza. Tsy toko’e hatoky tegna areke tika le hieretseretse tie fa tsy mila magnasoa ty fifandrambesantika amy i Jehovah sasa satria fa matotse. (1 Kor. 10:12)  Toko’e “handinen-tegna” tika mba hahazoantika antoke naho mbe mandroso ara-pagnahy avao tika.​—2 Kor. 13:5.

17. Nagnino ty taratasy i Paoly hoahy o Kolosianao ro mampiseho fa ilaegne ty mikezake ho matotse avao?

¹⁷ Nasongady i Paoly indraike tamy ty taratasi’e hoahy o Kolosianao fa tena ilaegne ty mikezake ho matotse avao. Ndra tie fa nimatotse aza o Kolosianao, le mbe nirehake ty Paoly tie toko’e hanohetse ty toe-tsay ty tontolo toy iareo. (Kol. 2:6-10) Nahafantatse soa o fiangonagne iohoe ty Epafra, le nivavake mafe mba ho “matotse avao” iareo. (Kol. 4:12) Ino ty azontika ianaragne boake amy izay? Nitaka i Paoly naho i Epafra soa fa mila mikezake mafe ty ndaty raike naho te ho matotse sady mipay ty fanohagnan’Andrianagnahare. Teà iareo naho matotse avao ndra ho ndaty bey ara-pagnahy o Kolosianao ndra tie eo aza ty olagne natrehe iareo.

18. Ino ty raha va’e hahazo o Kristiana matotseo? (Henteo i sarey.)

¹⁸ Nampitao o Hebreò ka ty Paoly fa va’e tsy hahazo ty fankasitrahan’Agnahare sasa ty Kristiana matotse raike. Ty anto’e, va’e hanjare ho mafe fo ty Kristiana raike le tsy ho afake hibebake mba hahavy aze hahazo ty famelan’Andrianagnahare. Mahafale fa tsy nanahake izay o Hebreò. (Heb. 6:4-9) Faie manao akore ty amy i Kristiana fa tsy mivory sasa amy izao rey ndra i nivoaroake faie nibebake tafara tatoy rey? Naho miambane iareo sady mibebake, le mampiseho zay fa tsy manahake i ndaty tsy ankasitrahan’Agnahare sasa nirehafe i Paolỳ iareo. Mazava ho aze fa naho te hiheregne amy i Jehovah iareo le mila ty fagnampeagne boake ama’e. (Ezek. 34:15, 16) Va’e hanendre rahalahy ndra rahavave matotse hagnampe iareo hifandrambe amy i Jehovah indraike o androanavi-pagnahio.

19. Ino ty tanjogne toko’e hanagnantika?

¹⁹ Mikezake mba handroso malaky amy ty fahamatoragne vao areke rehe? Matokia fa hotratse’o ze tanjogne zay! Tohizo avao ty fianara’o ty hamarenagne laleke amy Baiboly ao, le mikezaha hisaintsaigne laleke ty raha tea i Jehovah. Faie naho fa matotse rehe ty amy izao, le anò ze kila raha hagnampe azo ho matotse avao amy izao naho nainai’e.