Niterake tamy 1955 raho sady iraho ty fara’e zai’e ama’ay telo lahy. Nibey tamy ty tanàgne amoron-driake atimo i Failandy agne raho, amy ty tanàgne atao tihoe Vantaa.

Natao badisa tamo o Vavolombelo i Jehovah-o ty reneko, taogne tsiampeampe taloha ty niterahagne ahy. Faie nanohetse ty hamarenagne ty baba, le nikalagne i nene tsy hampianatse anay ty hamarenagne ndra hinday anay hagnatreke ty fivoria o fiangonagneo. Naho fa tsy teo ty baba vaho izay reke niafake nampianatse anay ty hamarenagne fototse agnate Baiboly ao.

Nandietse ty hampanoegne ze raha heje i Jehovah raho nanomboke ty naha ajaja ahy hatrake amy izao. Tamy tie raho nifito taogne ohatse, le nanjare niboseke amako ze ramose’ay zay naho fa nihai’e tie tsy nihinagne verilättyjä (Gatô mifangaro lio) raho. Ty tagna’e raike nampipognake i vavakoy, le ty raike nampilitse foresety nisy gatô kidikidy agnate vavako ao. Faie nivitako avao ty nagnafake i foresetey boake an-tagna’ey.

Nimate ty babako tamy tie raho ni-12 taogne. Tafara izay raho vaho niafake nagnatreke ty fivoria o fiangonagneo. Tena nisoa fagnahy tamako o rahalahy tam-pivoriagne tagneo, le tena nandrisike ahy handroso ara-pagnahy ze raha zay. Nanomboke namaky Baiboly isan’andro ka raho sady nazoto nianatse i boke aman-gazete natao ho antikagne rey. Noho iraho nanagne o fahazaragne soa reo, le afake natao badisa raho tamy 8 Aogositra 1969 naho fa ni-14 taogne.

 Nanomboke nanao mpisava lalagne maharetse raho naho vaho nivita ty fianarako. Heregnandro tsiampeampe tafara izay, le nifindra tamy ty toeragne nipay mpitory maro raho, le ta Pielavesi, marine ty rova i Failandy agne.

Ta Pielavesi agne ty nahatreavako i Sirkka, i ampela nanjare valikoy. Tena teako reke satria miambane sady matanjake ara-pagnahy soa. Tsy mba nipay harena ndra nitea vola reke. Sambe te hampiasa ty fiaigna’ay hanompoagne i Jehovah zahay roe, le vognogne hagneke ze fanendreagne boake Ama’e. Nifanambaly zahay tamy 23 Marsa 1974. Nandeha amy ty tanàgne atao tihoe Karttula, toeragne ilaegne mpitory i Fanjakagney maro zahay tafara ty mariaze’ay fa tsy nitsangatsangagne.

Natoro i Jehovah anay tamy ty fanomboha i fanambalia’aỳ tie hikarakara ze raha ilae’ay ara-nofo reke naho i Fanjaka’ey ro atao’ay voalohan-draha. (Mat. 6:33) Tsy nanagne tobile ohatse zahay tamy zahay ta Kartulla agney, le bisikileta ty nampiasae’ay. Faie tena nanintsy ty tagne tamy i asotrỳ. Tena nipay tobile zahay naho fa hitory amy ty faritane mivelatse ahy i fiangonagney. Faie tsy nanam-bola mba hivilianagne tobile zahay.

Tsy nampoize’ay fa naho fa nitilike anay i zokeko voaloha’ey, le nagnomey tobile anay. Fa vita voatse iaby ndra ty taratasi’e. Le fa esansy avao ty sisa niviliane’ay. Nanagne tobile avao zahay tamy ty fara’e.

Natoro i Jehovah tie nanao ty andraiki’e reke mba hikarakaragne ty raha nilae’ay. Ty manao voalohan-draha i Fanjakagney avao areke ty mila atao’ay.

Tamy zahay nagnatreke ty Sekoly Fanompoa ty Mpisava Lalagne tamy 1978, le nandrisike anay hameno fangatahagne hagnatreke ty Sekoly i Gileada ty raike amy i mpampianatse anaỳ. Tsy ia zay fa i Raimo Kuokkanen a. Nanomboke nianatse Angilé areke zahay, amy izay ho afake hagnatratse o tanjogne iohoe. Faie tamy 1980, taloha ty hamenoa’ay i fangatahagney, le tinoka hanompo amy ty birò sampa i Failandy zahay. Tsy afake nameno fangatahagne hagnatreke ty sekoly i Gileada o Betelitao tamy izay. Faie ty hanompo amy ze toeragne tea i  Jehovah hanompoa’ay ty tea’ay fa tsy amy ze tea’ay. Neké’ay areke i fanasagne anay hanompo amy i Betela agney. Nitohize’ay avao ka ty fianara’ay Angilé, kera ho afake hagnatreke ty sekoly i Gileada avao zahay.

Taogne tsiampeampe tafara tatoy, le nanapa-kevetse o Filan-keve-pitantanagneo fa afake magnatreke ty sekoly i Gileada ka o Betelitao. Le avy le nameno fangatahagne areke zahay. Tsy tihoe tsy tea’ay ty fanompoa’ay amy i Betela ao satria nanao izay zahay. Mifanohetse amy izay fa tea’ay ty ho azo ampiasaegne amy ze toeragne mila fagnampeagne naho ohatse zahay mahafeno fepetse. Nekegne hagnatreke ty sekoly i Gileada zahay, le nahazo diploma tamy ty kilasy faha-79 tamy Septambra 1985. Tinendre hanompo a Kolombia agne zahay.

Tinendre amy ty birò i sampagne ao heike raho naho fa niavy ta Kolombia agne. Nikezake nanao ze fara’e soa vitako raho tamy ty fanendreagne ahy tao, faie tao’e raike tafara tatoy, le nitsapako fa mila manao fiovagne zahay. Sambako tamy ty fiaignako nangatake fanendreagne hafa sady tamy izay avao ty nanoako izay. Tinendre ho misionera tamy ty tanàgne atao tihoe Neiva, distrike i Huila areke zahay.

Tena nahafinaritse ahy ty nanompo amy i faritaney ey. Tamy iraho mbe nidogalahy nanao mpisava lalagne ta Failandy tagney ohatse, le nanomboke nitory maraindray bey hatrake takariva. Tamy izahay amy i Sirkka vaho nifanambalỳ ka, le tena nitea’ay ty niarake nitory nanomboke amy ty maraindraigne hatrake hariva. Le naho fa nanompo amy ty faritane lavitse i tragno’ay ka zahay, le kindraike niroro tagnate tobile ao avao. Nitsitsy fotoagne ze raha zay sady afake nanomboke alohaloha zahay naho fa nimaray igne.

Nafana fo manahake ty natao’ay taloha zahay tamy zahay nanao ty asa ty misionera. Nitombo i fiangonagne nisy anaỳ sady magnaja naho bey hatea vaho mahay mankasitrake ka ty rahalahy naho ty rahavave ta Kolombia agne.

Nisy tanàgne maromaro tsy mba nisy Vavolombelogne ty agnila i Neiva, i toeragne nanendreagne anaỳ. Nandineke avao raho tie akore ty hahavy i talily soay ho avy amo o toeragne rehoe agne. Faie noho ty fisia ty aly agne, le tsy soa hoahy ty ndaty tsy boake ao ty miheo agne. Nivavake areke raho amy izay hisy ndaty boake amy ty raike amo o tanàgne rehoe hanjare Vavolombelogne. Nieretseretse raho tie toko’e hipetrake a Neiva ao hey o ndaty iohoe mba hianatse ty hamarenagne. Mbe nivavake ka raho mba ho matotse ara-pagnahy reke naho fa vita badisa, le hiheregne amy tanendraza’ey agne mba hitory. Faie naho ty maregne, le nanagne vahaolagne soa mandikoatse ty nieretsereteko ty Jehovah.

Tsy ela tafara izay, le nanomboke nampianatse Baiboly ze lahilahy atao tihoe Fernando González zay raho. Boake a Algeciras, raike amy i tanàgne tsy misy Vavolombelogney agne reke. Tsy maintsy nandeha 50 kilometatse mahery ty Fernando mba hiasa a Neiva agne. Nagnomagne soa reke isake tie hianatse sady le avy le nanomboke nagnatreke ty fivoriagne iaby. Nanomboke tamy ty heregnandro voaloha’e nanomboha i Fernando nianatse, le navori’e iaby ze ndaty tamy i tanàgne nisy azey agne, le nampianare’e iareo ze raha nianara’e tagnate Baiboly ao.

 Natao badisa ty Fernando tamy Janvie 1990, enem-bolagne tafara ty nanomboha’e nianatse Baiboly. Nanao mpisava lalagne maharetse ka reke naho fa tafara izay. Afake nandefa mpisava lalagne manokagne an’Algeciras agne amy izay ty birò i sampagne satria fa misy Vavolombelogne raike mipetrake ty agne. Nisy fiangonagne niforogne ty tagne tamy Fevrie 1992.

Tamy i tanàgne niavia’ey eo avao vao ty nitoria i Fernando? Oho’o! Naho fa nanambaly reke tafara tatoy, le nifindra ta San Vicente del Caguán tanàgne hafa mbe tsy nisy Vavolombelogne iareo mirovaly. Nagnampe tamy ty fiforogna i fiangonagney iareo. Tinendre ho mpiandraikitse faritse reke tamy 2002. Mbe manao ty asa ty faritse avao iareo amy i Olga vali’e hatrake amy izao.

Treako boake amy i raha niseho ignehoe, fa tena ilaegne ty manao vavake voafaritse soa miomba ty fanendreagne niazontikagne. Vita i Jehovah ty raha tsy vitantikagne. Toe ireke ka ty tompo i vokatsey fa tsy itikagne.​—Mat. 9:38.

Tinendre hanao ty asa ty faritse zahay tamy 1990. Ty rova amy ty tanàgne atao tihoe Bogotá ty faritse niasa’ay voaloha’e. Tena natahotse zahay ke tsy ho vita’ay soa o fanendreagne iohoe. Ndaty tsotra avao zahay mirovaly fa tsy tihoe managne talenta miambake. Tsy nizatse ty tao zahay satria enjekenjeke avao ty fiaignagne ao. Faie nagnatanterake i fampitama’e amy Filipianina 2:13 aoy ty Jehovah, le tihoe: “Andrianagnahare ty magnatanjake anareo, arake ze mahafinaritse aze, le mahavy anareo hanagne fagniriagne naho hery hanoagne raha.”

Naho fa tafara tatoy zahay, le tinendre hitilike ty faritse Medellin, amy i tanàgne nirehafeko tam-boaloha’e tagney. Fa tsy nampagnino ty ndaty agne ty nahatrea aly naho vono ndaty an-dalagney satria fa mahazatse iareo zay. Tamy tie iraho nampianatse Baiboly tamy ze tragno zay ohatse, le nisy ndaty nifampitifitse ty ta ivela i tragno nitilihekoy ao. Nihohoke ambane ao tsiela raho fa i mpianatsey tsy nitaitse ndra raike fa nanohy namaky i fehentsoratsey avao. Naho fa nivita’e vaky i fehentsoratsey, le nangatake ty hiakatse heike reke. Niheregne niarake tamy ze ajaja roe rey zay reke naho fa niafake kedekede sady tsy nitaitse fa nirehake tie: “Ajafady fa mbe nangalake ty anako retoagne raho.”

Mbe nisy raha nagnoho-doza hoe igne ka tafara tatoy. Nisy fotoagne zahay nitory isan-tragno, le nilay mbamako mbeo ty valiko sady natahotse. Nirehake reke tie nisy ndaty nitifitse aze. Tsekake raho naho vaho naharey izay. Faie nihai’ay naho fa tafara tatoy fa tsy i Sirkka ty nitea i ndatỳ hotifiregne fa i ndaty nandriogne tagnila’e eoy.

Nikezake hozatse i tifitifitse an-dalagneỳ zahay naho fa tafara tatoy. Nampahery anay ka o vavolombelogne tan-toeragneo reo satria niatreke raha raty manahake ty nanjò anay ka iareo. Natoky areke zahay fa naho nagnampe iareo ty Jehovah, le hagnampe anay ka. Nikezahe’ay norihegne avao ty toroheve ty androanavi-pagnahy tan-toeragneo, le tihoe mila mitao soa avao zahay le engagne am-pità i Jehovah eo ty sisa’e.

Ie aloha tsy raty manahake ty nieretsereta’ay aze iaby ze raha niseho tagne. Nisy fotoagne raho hoe naharey ampela roe nifamale ivela i tragno nitilihekoy eo. Tsy nite hagnete i fifamalea iareoy  teo raho, faie nandrese lahatse ahy hiboake an-davarangagne eo i tompon-tragnoy. Naho fa niakatse zahay le kay vazagne roe o “mifamaleo” satria mahay mitsikombe ty feo o ndatio iareo.

Tamy 1997, le tinendre ho mpampianatse amy ty Sekoly amy ty Fampiofagnagne amy ty Fanompoagne b raho. Tena nahafale ahy ty nagnatreke sekoly Ara-baiboly. Faie tsy mba nieretsereteko tie ho agnisa ty mpampianatse amy i sekoly rey raho.

Tinendre ho mpiandraikitse vondrom-paritse raho naho fa tafara tatoy. Faie naho fa najanogne o fandaharagne iohoe, le niheregne nanao ty asa ty faritse raho. Tagnate ty 30 taogne mahery ty naha mpampianatse ahy naho ty naha mpiandraikitse faritse ahy. Tena maro ty fitahiagne niazoko boake amo o fanendreagne reo. Faie tsy midika zay tie le nimora tamako iaby ze kila raha. Ao fa hohazavaeko ty anto’e.

Ndaty natoky tegna zay raho. Nagnampe ahy hiatreke raha sarotse maro ze raha zay. Faie nafana fo loatse raho le nahitsiko iaby ze raha tamo o fiangonagneo eo. Nisy fotoagne raho namoresé ty hafa mba ho bey hatea naho hahay hanahatsahatse amy ty ndaty ifandrambesa iareo. Faie naho ty maregne, le iraho ro tena tsy nanagne o toetse rehoe tamo o fotoagne reo.​—Rom. 7:21-23.

Kindraike areke raho nahatsapa ho kivy noho o fahalemeko reo. (Rom. 7:24) Fa nisy fotoagne aza raho nirehake tamy i Jehovah tamy ty vavake tie toko’e holy a Failandy agne raho le hiala tsy ho misionera. Nagnatreke ty fivoria o fiangonagneo raho tamy ty hariva io. Nandrisike ahy hanohy i fanendreagne ahỳ avao ty fampaherezagne niazoko tagne. Ty toko’e hataoko, le mikezake mialy amy i fahalemeko rey. Tena nanohigne ty foko ty fahatreavako ty fomba namalea i Jehovah ty vavake nataoko tamy i andro ignehoe. Tena ankasitrahako ka ty fomba nagnampea’e ahy aman-kasoa fagnahy mba handrese i fahalemeko rey.

Tena mankasitrake i Jehovah amy ty fo’ay noho ty tombotsoa nimea’e anay mba hanompo marain-tsy hariva tagnate ty ankamaroa ty fiaigna’ay zahay amy i Sirkka. Tena misaotse i Jehovah ka raho amy ty fagnomea’e ahy valy tena bey hatea sady tsy mivalike tagnate ze taogne maro zay.

Tsy ho ela raho, le tsy ho afake ty ho mpampianatse amy i tetekey ey naho ho mpiandraikitse faritse sasa satria fa ho feno 70 taogne. Faie tsy mahakivy ahy ze raha zay. Ty anto’e, tena matoky raho fa ty raha tena lahibey amy i Jehovah le tihoe manompo aze am-piambaneagne tikagne sady midera aze amy ty fontikagne noho itikagne tea sady mankasitrake aze. (Mika 6:8; Mar. 12:32-34) Naho te hagnomey voninahitse i Jehovah areke tikagne, le tsy tihoe tsy maintsy managne tombotsoa miambake.

Naho fa mandineke i fanendreagne niazoko tena nahafinaritse ahy rey raho, le tsapako fa tsy tihoe noho iraho sarobily noho ty hafa ndra nanagne fahaiagne miambake ty nahavy ahy nahazo irey. Tena tsy izay! Naneho hasoa fagnahy tsy misy hoe’e tamako ty Jehovah, le mba nimea’e o tombotsoa rehoe raho. Nimea’e o tombotsoa rehoe raho ndra tie managne fahalemegne aza. Tsapako tie noho ty fagnampea i Jehovah ahy avao ty nahavy ahy nahavita o fanendreagne rehoe. Treako areke tie nagnatanjake ahy ty herin’Andrianagnahare naho fa naleme raho.​—2 Kor. 12:9.