1. Magnino tika ro mila magnorike ty tari-dala i Jehovah? Magnomeza ohatse.

 ERETSERETO tie nimontso agnate ala agne rehe. Mampatahotse ty agne satria misy biby hako masiake naho hatae misy poizigne vaho biby kedekede mitifatse. Va’e ho tonta agnate ty lavake agne ka rehe. Azo antoke fa ho azo’o ty fiai’o naho ohatse misy ndaty mahay soa i toeragney mitarike azo! Manahake ty ala ty tontolo toy. Feno raha mampatahotse naho hanimba ty ara-pagnahintika ty etoy. Faie managne Mpitarike voririke tikagne, le i Jehovah. Mitarike antika amy ty toeragne lavitse i loza rey naho mba ho avy amy ty toeragne handehanantikagne agne, zane hoe amy i tontolo vaovaoy agne reke.

2. Akore ty fomba itariha i Jehovah antika?

² Akore ty fomba itariha i Jehovah antika? Voaloha’e, mampiasa ty Saontsi’e reke, le ty Baiboly. Faie mampiasa ndaty hisolontegna aze ka reke. Mampiasa ty “mpanompo mahihitse naho mahimbagne” ohatse zao reke mba hagnomey antika hanegne ara-pagnahy hagnampe antika handrambe fanapahan-kevetse soa. (Mat. 24:45) Mampiasa lahilahy hafa mahay ka ty Jehovah mba hitarihagne antika. Ohatse zao mampahery naho magnomey torohevetse hagnampe antika hiatreke fotoan-tsarotse o mpiandraikitse faritseo naho o androanavi-pagnahio. Tena ankasitrahantika ty Jehovah noho ireke mitari-dalagne antika amy ze o andro fara’e fa ho tapetse zao! Magnampe antika hahazo ty fankasitraha i Jehovah naho handeha amy i lalagne mbamy i havelogney mbeo avao zay.

3. Ino ty hodinehentika amy ty lahatsoratse toy ato?

³ Faie va’e hisy fotoagne hoe sarotse amantikagne ty magnorike ty tari-dala i Jehovah, lohotsie naho fa o lahilahy tsy voririke reo ty magnomey aze. Nagnino? Va’e tsy hifagnarake amy ze mete amantikagne i toromareke rey. Ndra ka va’e hahatsapa tika tie hoe tsy mete zay i toromarekey, le va’e tsy boake amy i Jehovah hoe tika. Amy ze fotoagne zay, le mila matoky tika tie  mitarike ty vahoa’e ty Jehovah sady hahazoagne fitahiagne ty fagnorihagne ty tari-dala’e. Mba hagnamafesagne ze fatokisantikagne zay, le hodinehentikagne amy ty lahatsoratse toy 1) ty fomba nitariha i Jehovah o vahoa’eo tamy ty andro ty Baiboly, 2) ty fomba itariha’e antika amy izao, 3) ty soa ho azontikagne naho fa magnorike ty tari-dala’e.

TY FOMBA NITARIHA I JEHOVAH TY FIRENE O ISRAELIO

4-5. Akore ty natao i Jehovah mba hanoroagne tie nampiasa i Mosesy reke mba hitarihagne o Israelio? (Henteo ty sare amy ty fogno ty gazete toy.)

⁴ Nanendre i Mosesy mba hitarike o Israelitao hiala boake a Ejipta agne ty Jehovah. Nagnomey famantaragne o Israelitao ty Jehovah mba hagnaporofoa’e tie mitarike iareo amy ty alala i Mosesy Reke. Nagnisy andry rahogne ohatse Reke naho fa atoandro, le andry afo naho fa halegne. (Eks. 13:21) Nagnorike ze nombà i andry rahogney ty Mosesy satria igne ty nitarike aze naho o Israelitao ho mbamy i Riake Menay mbeo. Faie nagneagne o Israelitao o Ejipsianao, le natahotse iareo satria nieretseretse tie hamono iareo o Ejipsianao. Nirehake areke iareo tie tsy toko’e ho nitarihe i Mosesy mbamy i Riake Menay mbeo. Faie mete ty natao i Mosesy. Nampiasa i Mosesy ty Jehovah ty teo, mba hitarike i vahoa’ey. (Eks. 14:2) Nagnavotse iareo amy ty fomba mahagaga ty Andrianagnahare naho fa niavy eo.​—Eks. 14:26-28.

⁵ Efapolo taogne tafara izay, le mbe niantehetse tamy i andry rahogney ty Mosesy mba hitarihagne o vahoan’Agnahareo tamy iareo tam-patrambeỳ agne. a Nisy fotoagne natao i Jehovah tambone i tragnolay i Mosesỳ eo i andry rahogney mba hotrea o Israelitao. (Eks. 33:7, 9, 10) Nisaontsy tamy i Mosesy boake amy i andry rahogney eo ka ty Jehovah, le avy eo nampitae i Mosesy tamy i vahoakey zay. (Sal. 99:7) Nisy famantaragne mazava soa areke nagnampe o Israelitao hahatrea tie i Mosesy ty nampiasae i Jehovah mba hitari-dalagne iareo.

6. Akore ty natao o Israelitao naho fa nagnomey tari-dalagne iareo ty Jehovah? (Nomery 14:2, 10, 11)

⁶ Faie mampalahelo fa maro ty Israelita tsy nagneke tie i Mosesy ty nampiasae i Jehovah mba hisolontegna Aze. (Vakio ty Nomery 14:2, 10, 11.) Mateteke iareo ro tsy nagneke ty fahefà i Mosesy. Voka’e, tsy nengagne mba hilitse tamy i Tane Nampitamaegney ao ze Israelita nanao izay.​—Nom. 14:30.

7. Ia iaby ty ndaty nagnorike ty tari-dala i Jehovah? (Nomery 14:24) (Henteo i sarey.)

⁷ Faie nisy Israelita ila’e nagnorike ty tari-dala i Jehovah. Izao ohatse ty fagnamareha i Jehovah: “I Kaleba ... nagnorike ahike tamy ty fo’e iaby.” (Vakio ty Nomery 14:24.) Namale soa i Kaleba ty i Jehovah, le nagnenga aze hifily ze tea’e hitobohagne ta Kanana tao. (Jos. 14:12-14). Ze Israelita nengagne hilitse tamy i Tane Nampitamaegney tao ka, le nifitsikombe soa tamy ty fagnorihagne ty tari-dala i Jehovah. Naho fa tinendre hisolo i Mosesy mba hitarike o Israelitao ty Josoa, le “nihajae iareo tagnate ty androm-piaigna’e” reke. (Jos. 4:14) Voka’e nitahie i Jehovah iareo sady nimea’e i tane nampitamaegney.​—Jos. 21:43, 44.

8. Hazavao ty fomba nitariha i Jehovah o vahoa’eo tamy ty andro o mpanjakao. (Henteo i sarey.)

⁸ Taogne maro tafara atoy, le nanendre mpitsara mba hitarike o vahoa’eo ty Jehovah. Tafara izay, zane hoe tamy ty andro o mpanjakao le nanendre mpaminany ty Jehovah mba hitari-dalagne iareo. Ze mpanjaka tsy nivalike le nagnorike ty toroheve o mpaminanio. Niambane ohatse ty Davida Mpanjaka le nagneke ty fagnanaragne boake amy i Natana  mpaminany. (2 Sam. 12:7, 13; 1 Tan. 17:3, 4) Niantehetse tamy ty tari-dalagne nimea i Jahaziela mpaminany ka zao ty Josafata Mpanjaka, le nandrisike o vahoa i Jodao mba ‘hino o mpaminanin’Andrianagnahareo.’ (2 Tan. 20:14, 15, 20) Nangatake fagnampeagne tamy Isaia mpaminany ka ty Hezekia Mpanjaka naho fa nisy raha nanahiragne aze. (Isaia 37:1-6) Isake tie nagnorike ty tari-dala i Jehovah o mpanjakao, le nahazo fitahiagne iareo sady nivoaro ty firene iareo. (2 Tan. 20:29, 30; 32:22) Nazava soa tamy iareo iaby areke fa nampiasa o mpaminanio ty Jehovah mba hitarihagne o vahoa’eo. Faie ty ankamaroa o mpanjakao naho o Israelitao le tsy nitsanogne o mpaminany i Jehovah-o.​—Jer. 35:12-15.

TY FOMBA NITARIHA I JEHOVAH O KRISTIANA VOALOHA’EO

9. Ia ty nampiasae i Jehovah mba hitarike o Kristiana tamy ty taonjato voaloha’eo? (Henteo i sarey.)

⁹ Namorogne o Fiangonagne Kristianao ty Jehovah tamy ty taonjato voaloha’e. Akore ty fomba nitariha’e iareo? Nanendre i Jesosy ho loha o fiangonagneo reke. (Efes. 5:23) Tsy tihoe nirehake mivantagne amy ty tsikiraidraike amy iareo ty Jesosy amy ze raha toko’e hatao iareo. Nampiasa o apostolio naho o androanavi-pagnahy ta Jerosalema tao reo reke mba hitarike iareo. (Asa. 15:1, 2) O androanavi-pagnahio ka ty nagnomey tari-dalagne hoahy o fiangonagneo.​—1 Tes. 5:12; Tit. 1:5.

10. a) Akore ty natao ty ankamaroa ty Kristiana tamy ty taonjato voaloha’e naho fa nahazo tari-dalagne? (Asan’ny Apostoly 15:30, 31) b) Nagnino ty ndaty ila’e tamy ty andro ty Baiboly ro tsy nagneke ty ndaty tinendre i Jehovah mba hitarike iareo? (Henteo ty efajoro tihoe “ Nagnino ty Ila’e ro tsy Nagneke i Famantaragne Mazava Soa Rey.”)

¹⁰ Nagneke ze tari-dalagne zay vao o Kristiana voaloha’e reo? Ty ankamaroa iareo le nifale noho i toromareke nampahery nimeagne iareoy sady nivognogne hampihatse izay. (Vakio ty Asan’ny Apostoly 15:30, 31.) Akore ka ty fomba itariha i Jehovah ty vahoa’e amy izao?

TY FOMBA ITARIHA I JEHOVAH TY VAHOA’E AMY IZAO

11. Magnomeza ohatse manoro tie mitari-dalagne i ndaty tinendre’e hitarike amy izao rey ty Jehovah.

¹¹ Mbe mitarike o vahoa’eo avao ty Jehovah ty amy izao. Manao izay amy ty alala ty Saontsi’e naho i Ana-dahi’e loha ty fiangonagney reke. Mbe mampiasa ndaty hisolontegna aze avao vao reke ty amy izao? Eka. Dineho moa ty  fandrosoagne nisy nanomboke tamy ty taogne 1800 tagne ho agne. Nanomboke nahatakatse ty Charles Taze Russell naho i nama’e rey fa amy ty taogne 1914, le hioregne ty Fanjakàn’Andrianagnahare. (Dan. 4:25, 26) Nahatrea izay iareo naho fa nikaroke faminaniagne tagnate Baiboly ao. Nitari-dalagne iareo vao ty Jehovah naho fa nanao fikarohagne tagnate Baiboly ao iareo? Azo antoke zay. Ty raha niseho tamy 1914 le nagnaporofo fa nanomboke ninday i Fanjakàn’Andrianagnaharey. Agnisa izay ohatse i Aly Lahibey Voaloha’ey, ty arete manjamagne, ty horohoron-tane vaho ty hakeregne. (Lioka 21:10, 11) Nampiasa o mpianatse Baiboly reo ty Jehovah mba hagnampe o vahoa’eo.

12-13. Ino ty fandaharagne natao mba hampandrosoagne ty asa fitoriagne naho fampianaragne tagnate i Aly Lahibey Faharoey?

¹² Dineho ka ty raha niseho tamy i Aly Lahibey Faharoey. Naho fa avy nandineke ty Apokalypsy 17:8 o rahalahy mpiandraikitse tamy i Foibey ao reo, le nitaka iareo fa tsy hitarike amy i Haramagedonay i Aly Lahibey Faharoey. Nifanta iareo fa hisy fotoagne hilamindamigne ty afara i alỳ, le ho afake hampitomboegne ty asa fitoriagne. Ndra tie hoe tsy ho tanterake aza zay tamy zay, le nandamigne Sekoly hampiofagnagne ty misionera iareo mba hitory naho hampianatse magneran-tane. Nalefa tamy ty firenena hafa agne o misionerao ndra tie mbe tagnate i alỳ aza. Fagnampe izay, le nandamigne Fianaragne ty Fanompoagne Kristiana b ty fandaminagne mba hampiofagnagne ty mpitory iaby tamo o fiangonagneo eo hahay hitory naho hampianatse. Noho ze raha iaby rezay, le nanjare nivognogne tamy ty asa nandigne iareo o vahoa i Jehovah-o.

¹³ Naho fa mandineke ty raha niseho taloha tikagne, le mahatrea fa nitarike o vahoa’eo ty Jehovah tagnate ty fotoan-tsarotse. Nanomboke tamy i Aly Lahibey Faharoey, le niafake nitory malalake ty vahoa i Jehovah tamy ty tane maro. Nandroso areke i asa fitoriagney.

14. Nagnino tika ro afake matoky ty tari-dalagne mea i Jehovah amy ty alala ty fandamina’e naho o androanavi-pagnahio? (Apokalypsy 2:1) (Henteo i sarey.)

¹⁴ Amy izao, le mbe manohy mipay ty tari-dala i Kristy avao o Filan-keve-pitantanagneo.  Tea iareo naho mba ahatreavagne ty fomba fiheve i Jehovah ty toromareke mey iareo o rahalahio. Le avy eo o mpiandraikitse faritseo naho o androanavi-pagnahio ty mampìta izay amo o fiangonagneo. c ‘An-tagna-kavana’ i Kristy ey o androanavi-pagnahy voahosotseo. (Vakio ty Apokalypsy 2:1.) Mazava ho aze fa tsy voririke iareo sady mete hanao hadisoagne. Nisy fotoagne zao ty Mosesy naho i Josoa nanao raha tsy mete manahake ty natao o apostolio. (Nom. 20:12; Jos. 9:14, 15; Rom. 3:23) Faie mbe mitarike o mpanompo mahihitseo naho o androanavi-pagnahio avao ty Kristy sady hanao izay avao reke “amparake ty hifaragna ty tontolo toy.” (Mat. 28:20) Managne anto’e maro hatokisagne ty tari-dalagne mea’e amy ty alala o lahilahy voatendre rehoe areke tika satria iareo ty ampiasae’e mba hitarike antika.

HANDRAMBE SOA TIKA NAHO MAGNORIKE TY TARI-DALA I JEHOVAH

15-16. Ino ty ianara’o boake amy i ndaty nagnorike ty tari-dala i Jehovah rey?

¹⁵ Hahazo fitahiagne manomboke amy izao tikagne naho magnorike ty tari-dala i Jehovah. Nampihatse ty torohevetse tihoe manàgna fiaignagne tsotra zao ohatse ty Andy naho i Robyn. (Mat. 6:22.) Voka’e, le afake nagnampe amy ty tetik’asa fagnoregnagne iareo. Hoe ty Robyn: “Nitoboke tamy ty toeragne maifitse sady tsy nisy lakozỳ zahay. Ndra tie niteako aza ty nitifi-tsare, le navaroko iaby i kamerako rey. Nitagny raho naho fa namarotse aze. Faie manahake i Saraha valy i Abrahama, le tapa-kevetse ty hifantoke amy ty raha aloha agne raho.” (Heb. 11:15) Ino ty soa niazo iareo mirovaly? Hoe ty Robyn: “Tena mahafa-po anay ty fahafantara’ay tihoe nimea’ay i Jehovah iaby ze raha nanagna’ay. Naho fa niasa tamy ty fagnoregnagne zahay, le niazo’ay sare an-tsaigne tie hanao akore ty fiaignagne naho fa amy i tontolo vaovaoy ao.” Nagneke izay ka ty Andy, le hoe reke: “Tena afa-po zahay satria nandany ty fotoa’ay naho ty heri’ay mba hanohagnagne i Fanjakagney.”

¹⁶ Ino ka ty soa hafa horambesentika naho fa magnorike ty tari-dala i Jehovah tika? Naho fa nivita ty fianara i Marcia, le nampihatse ty torohevetse mba hanagne tanjogne amy ty fanompoagne i Jehovah reke. (Mat. 6:33; Rom. 12:11) Hoe reke: “Nimeagne fahafahagne hianatse tamy oniverisite ey tagnate ty efatse taogne  raho faie ndra aleoko nanao tanjogne ara-pagnahy. Nifily ty hianatse miomba ty varotse raho mba hagnampe ahike amy ty fanompoagne hataoko. Agnisa ty fanapahan-kevetse soa nirambeseko zay. Tena fale raho fa mpisava lalagne ty amy izao sady ahafahako manompo amy i Betela ao ka i asakoy ro mbe ahafahako manao raha maro hafa hoahy i Jehovah.”

17. Ino ty fitahiagne ho azontika naho fa magnorike ty tari-dala i Jehovah avao tika? (Isaia 48:17, 18)

¹⁷ Amy izao, le miaro antika ty torohevetse mea i fandaminagne. Manjare mitao ohatse tika mba tsy ho tea vola naho hanao raha hafa va’e hahavy antika handika ty lilin’Agnahare. Amy izao ka tika le mandrambe soa naho fa magnorike i tari-dalagne mea i Jehovah rey. Malio ty feo ty fieretseretantika sady ho voaro amy ty olagne maro tika. (1 Tim. 6:9, 10) Voka’e le afake manompo i Jehovah amy ty fontika iaby tika sady hofale naho hilamin-tsaigne vaho ho afa-po.​—Vakio ty Isaia 48:17, 18.

18. Nagnino rehe ro tapa-kevetse hagnorike ty tari-dala i Jehovah avao?

¹⁸ Azo antoke fa mbe hampiasa solontegna avao ty Jehovah mba hitari-dalagne antika amy i haoreagne lahibey ao naho agnate i Fanjakagne Arivo Taogney. (Sal. 45:16) Mbe hagnorike tari-dalagne avao vao tika ty amy izay, ndra tie mifanohetse amy ty raha teantika aza zay? Ho mora amantika ty hanao izay naho fa zatse magnorike ty tari-dala i Jehovah avao tika ty amy izao. Lonike areke tika hagnorike ze tari-dalagne mea i Jehovah boake amy i lahilahy tinendre’e mba hitarike antika rey. (Isaia 32:1, 2; Heb. 13:17) Manao izay tika satria magnampe antika hagnalavitse ze raha va’e hanimba ty fifandrambesantika ama’e zay sady mitarike antika ho mbamy i fiaignagne nainai’ey mbeo.