TAMY LAROBIA 8 Janvie 2023, le nisy vaovao niseho tamy jw.org ao nirehake tie voatendre ho agnisa ty Filan-keve-pitantana ty Vavolombelo i Jehovah ty Rahalahy Gage Fleegle naho i Jeffrey Winder. Sambe fa nanompo i Jehovah tagnate ty taogne maro iareo roe lahy.

Nibey ta Pennsylvania, a Etazonia agne ty Rahalahy Fleegle sady mpanompo i Jehovah ty rae aman-drene’e. Tamy tie ireke mbe nikede, le nifindra tamy ty tanagne ambanevolo iareo satria nipay mpitory maro ty tagne. Tafara kede izay, le natao badisa reke tamy 20 Novambra 1988.

Nandrisike aze hanao fanompoagne marain-tsy hariva ty rae aman-drene i Rahalahy Fleegle. Mateteke nandrambe mpiandraikitse faritse naho Betelita an-tragno iareo agne iareo, le niafake nahatrea ty fifalea iareo ty Rahalahy Fleegle. Tsy ela tafara ty badisa’e, le nanao mpisava lalagne maharetse reke tamy 1 Septambra 1989. Roe taogne tafara izay, le nitratse’e i tanjo’e tamy ireke mbe ni-12 taogney, le ty hanompo amy i Betela ao. Nanomboke ty fanompoa’e tamy i Betela i Brooklyn ao reke tamy Oktobra 1991.

Niasa tamy ty fagnamboaragne boke tamy i Betela tao tagnate ty valo taogne ty Rahalahy Fleegle, le tafara izay nafindra tamy ty Sampan-draharaha ty Fanompoagne. Tagnate o fotoagne iohoe, le nanompo tamy ty fiangonagne mampiasa rehake rosiana tagnate ty taogne tsiampeampe reke. Nanambaly i Nadia reke tamy 2006 sady niarake nanompo tamy i Betela tao iareo. Niarake nanompo tamy ty faritane ty fiangonagne Portigey naho tamy ty faritane ty fiangonagne Espaniola tagnate ty 10 taogne mahery iareo. Tafara izay, le nasaegne niasa tamy ty Birò ty Komity ty Fampianaragne tao ty Rahalahy Fleegle, le avy eo tamy ty Birò ty Komity ty Fanompoagne. Tamy Marsa 2022, le tinendre mba ho mpagnampe ty Komity ty Fanompoagne amo o Filan-keve-pitantanagneo eo reke.

 Nibey ta Murrieta, a California, a Etazonia agne ty Rahalahy Winder. Nitezae ty rae aman-drene’e tagnate ty hamarenagne tao reke sady natao badisa tamy 29 Marsa 1986. Vola’e raike tafara izay, le nanao mpisava lalagne mpagnampe reke. Nitea’e ty nanao izay hafara’e reke nanohy avao. Nanomboke nanao mpisava lalagne maharetse reke tamy 1 Oktobra 1986.

Tamy tie i Rahalahy Winder mbe nikede, le nitilike ty zoke’e roe lahilahy niasa tamy i Betela ao reke. Nahavy aze hagniry hanompo amy i Betela agne ze raha zay naho fa bey reke. Tamy Mey 1990, le nasaegne mba hanompo tamy ty Betela i Wallkill agne reke.

Niasa tamy ty sampan-draharaha sambe hafa ty Rahalahy Winder tamy tie ireke tao. Agnisa izay ty Sampan-draharaha ty Fagnaliovagne, Sampan-draharaha ty Famboleagne naho tamy ty Birò i Betela. Nanambaly i Angela reke tamy 1997 sady niarake nanompo tamy i Betela tao iareo nanomboke teo. Tamy 2014, le nafindra ta Warwick agne iareo sady nagnampe tamy ty fagnoregnagne i foibeỳ tagne reke. Tamy 2016, le nafindra tamy ty Foibeim-pampianara ty Tilikambo Fiambenana a Patterson agne ty Rahalahy Winder, le niasa tamy ty Sampan’asa ty Feo naho ty Video tao. Efatse taogne tafara tatoy, le naheregne ta Warwick agne indraike iareo, le tinendre mba hiasa tamy ty Birò ty Komity ty Mpiasa tao ty Rahalahy Winder. Tamy Marsa 2022, le tinendre mba ho mpagnampe ty Komity ty Mpiasa agnivo ty Filan-keve-pitantanagne teo reke.

Mivavake tikagne mba hitahy o “lahilahy fagnomezagne” reo ty Jehovah naho fa manao ty asa i Fanjakagney iareo.​—Efes. 4:8.