1-2. Nagnino tika ro magnatreke Fahatsiarovagne isan-taogne?

 FA ho 2000 taogne zay ty Jesosy ro nagnomey ty fiai’e ho antika mba hahavy antika hahazo i havelogne nainai’ey. Tamy i halegne taloha ty nimateza’ey reke, le nandily o mpanonjohy ty lia’eo mba hahatsiaro i sorogne nanoe’ey. Faie tsotra avao ty hanoagne ze fankalazagne zay, satria mofo naho divay avao ty ilaegne ama’e.​—1 Kor. 11:23-26.

² Mankatò o lily i Jesosy iohoe tika satria tena teantika reke. (Jaona 14:15) Atorontika fa mankasitrake ty raha natao’e ho antikagne tika naho fa vanim-potoa i Fahatsiarovagney. Manokagne fotoagne hisaintsaignagne naho hivavahagne miomba ty anto’e nahafate aze tika amy io. Mahafale antikagne ka ty mampitombo ty fanompoantika, le manasa ndaty fara izay ty maro tika mba hagnatreke o fandaharagne manokagne iohoe. Azo antoke ka, fa tsy hisy raha hengantikagne hikalagne antika tsy hagnatreke Fahatsiarovagne.

3. Ino ty hodinehentika amy ty lahatsoratse toy?

³ Amy ty lahatsoratse toy tika le handineke ty kezake mafe natao o vahoa i Jehovah-o mba hankalazagne ty Fahatsiarovagne ty nimateza i Jesosy. Hodinehentika tie akore ty natao iareo mba: 1) hitovy amy ty fomba nankalazà i Jesosy aze i Fahatsiarovagney, 2) hanasagne ndaty hafa hagnatreke aze, le 3) hagnatrehagne Fahatsiarovagne avao ndra tie miatreke raha sarotse.

4. Ino iaby ty raha valeagne amy i Fahatsiarovagney, le nagnino ro toko’e ho sarobily amantika ty vale irey? (Lioka 22:19, 20)

⁴ Misy lahajaka Ara-baiboly mamale fagnonteneagne maro reintika naho fa Fahatsiarovagney. Valeagne amy io ohatse tie nagnino tika ro soloam-boigne, le nagnino ty fate ty ndaty raike ro mahavita magnafake ty fahotà ty ndaty iaby. Tiahivegne antikagne ka ty dika i mofoy naho i divaỳ, naho tihoe ia ty mahazo mihinagne naho minogne ama’e. (Vakio ty Lioka 22:19, 20.) Misaintsaigne ty fitahiagne fanjaka ho azo ze ndaty mitamà hiaigne nainai’e an-tane etoa ka tika amy io. (Isaia 35:5, 6; 65:17, 21-23) Toko’e hoheverentikagne ho sarobily o hevetse reo. Ty anto’e, tena maro ty ndaty tsy mahay ireo, sady tsy mba mankasitrake i solovoigne nanoe i Jesosỳ iareo. Tsy mitovy amy ty fomba nanoa i Jesosy i Fahatsiarovagney ka ty fomba ankalazà iareo ty nimateza’e. Ino ty nahavy izay?

5. Naho fa nimate iaby ty ankamaroa i apostoly rey, nanao akore ty fomba nankalazà o ndatio ty nimateza i Jesosy?

⁵ Nisy Kristiana sandoke nizilike tamo o fiangonagneo eo, tafara kede ty nimateza ty ankamaroa o apostoly i Jesosio. (Mat. 13:24-27, 37-39) ‘Nampianatse hevetse diso iareo mba hitaonagne o mpianatseo hagnorike’ iareo. (Asa. 20:29, 30) Agnisa ty hevetse diso nampianare o Kristiana sandoke rehoe zao tihoe tsy ‘indraike avao ty Jesosy ro nanolotse ty fiai’e mba hindesagne ty fahotà ty ndaty maro.’ Mila aherenkeregne, hoe iareo, i solovoigne nanoe’ey. Ie amy izao mifanipake amy izay ty ampianare ty Baiboly. (Heb. 9:27, 28) Maro ty ndaty mino o fampianaran-diso io amy izao. Mandeha miangogne iareo isan-keregnandro, misy fotoagne aza isan’andro, mba hankalaza i raha rehafe iareo tihoey tie “Eokaristy.” b Misy fivavahagne ila’e tsy le mankalaza mateteke, faie tsy hay ty ankamaroa ty mpivavake ao ty anto’e nahavy i Jesosy nanao sorogne ty fiai’e. Va’e hisy ndaty hagnontane tie: ‘Tena magnafake ty fahotako vao i sorogne natao i Jesosỳ?’ Nagnino iareo ro magnontane izay? Satria nisy ndaty nampianatse iareo tie tsy vita i sorogne nanoe i Jesosỳ ty magnafake ty fahotantikagne. Akore ty natao o mpanonjohy ty lia i Jesosio mba hagnampeagne o ndatio amo o raha rehoe?

6. Ino ty raha nitaka o Mpianatse Baibolio tamy 1872?

⁶ Tamy 1870, le nisy mpianatse Baiboly nanomboke nianatse soa ty Soratse Masigne. I Charles Taze Russell ty nitarike iareo. Nitea iareo ho fantatse ty anto’e nanoa i Jesosy sorogne ty fiai’e naho ty fomba toko’e hanoagne i Fahatsiarovagney. Nitaka iareo tamy 1872 fa tena nanao sorogne ty fiai’e hoahy ty ndaty iaby ty Jesosy. Faie tsy nitana iareo hoahy iareo avao ze raha nihay iareo zay. Nambara iareo o ndatio zay tamy ty alala ty boke naho gazete. Tsy ela tafara izay iareo, le nankalaza i Fahatsiarovagney indraike isan-taogne manahake ty natao i Kristiana tamy ty taonjato voaloha’e rey.

7. Ino ty soa rambesentika boake amy ty fikarohagne natao o mpianatse Baiboly voalohandoha’eo?

⁷ Andrambesantika soa ty fikarohagne natao o lahilahy kristiana rehoe tagnate ty taogne maro. Noho ty fagnampea i Jehovah, le nanjare takantikagne ty maregne miomba i sorogne nanoe i Jesosỳ naho ty soa rambesentika boake ama’e. (1 Jaona 2:1, 2) Nanjare haintikagne ka fa mirehake fampitamàgne roe hoahy  ty ndaty mampifale an’Andrianagnahare ty Baiboly. Ty ila’e hiaigne nainai’e an-dagnitse agne, fa ty ankamaroa’e hiaigne nainai’e an-tane etoa. Manjare mifandrambe marine amy i Jehovah tika naho fa misaintsaigne tie tena tea antika reke sady mahasoa antika tsikiraidraike i solovoigney. (1 Pet. 3:18; 1 Jaona 4:9) Mitsikombe o rahalahintika taloha rehoe areke tika, le manasa ndaty mba hagnatreke Fahatsiarovagne miarake amantika manahake amy ty fomba nanoa i Jesosy aze.

8. Ino ty natao o vahoa i Jehovah-o mba hanasagne ty ndaty hafa hagnatreke Fahatsiarovagne? (Henteo i sarey.)

⁸ Fa ela o vahoa i Jehovah-o ro nanasa ndaty mba hagnatreke Fahatsiarovagne. Tamy ty voalohandoha ty taogne 1881, le nasaegne mba hiarake hivory an-tragno ze rahalahy a Allegheny, Pennsylvania agne zay ty rahalahy naho ty rahavave ta Etazonia agne mba hanao Fahatsiarovagne. Tafara tatoy, le natao isake fiangonagne i Fahatsiarovagney. Tamy Marsa 1940, le nirehafegne o mpitorio mba hanasa ze ndaty liagne amy i faritaney ey hagnatreke Fahatsiarovagne. Tamy 1960 ty nanoa i Betela pirinty fanasagne Fahatsiarovagne voaloha’e hoahy o fiangonagneo. Nanomboke tamy izay, le an-tapetrisa’e ty fanasagne nizaraegne. Nagnino tika ro manokagne fotoagne mba hikezahagne hanasagne o ndatio?

9-10. Ia ty mandrambe soa amy ty kezake ataontika naho fa itika manasa o ndatio hagnatreke Fahatsiarovagne? (Jaona 3:16)

⁹ Ty anto’e raike mahavy antika manasa ndaty hagnatreke Fahatsiarovagne miarake amantika,  le teantika ze vaho samba’e magnatreke hahafantatse ty raha natao i Jehovah naho i Jesosy ho antika iaby. (Vakio ty Jaona 3:16.) Mitamà tika fa handrisike iareo hianatse ty miomba i Jehovah naho hanompo aze ty raha trea iareo naho rey iareo amy i Fahatsiarovagney. Faie misy ndaty hafa ka mandrambe soa amy io.

¹⁰ Manasa i aze fa ela tsy nanompo i Jehovah sasa rey ka tika. Naho fa manao izay tika, le tiahiventikagne iareo tie mbe tean’Andrianagnahare iareo. Maro ty magneke i fanasantikagney, le tena fale tika naho fa mahatrea iareo. Ty fagnatreha iareo Fahatsiarovagne le maniahy iareo tie tena nifalefale iareo tamy ie mbe nanompo i Jehovah-y. Dineho ohatse ty tantara i Monica. c Niheregne nitory indraike reke tagnate i arete-manjamagne COVID-19. Izao ty rineha’e naho fa boake nagnatreke Fahatsiarovagne reke tamy 2021: “Tena natao ho ahike ty Fahatsiarovagne toy. Sambako raho tagnate ze 20 taogne zay ro nahavita nitory ama o ndaty naho nanasa iareo hagnatreke Fahatsiarovagne. Nanao ze azoko natao raho mba hanasagne iareo, satria tena nankasitrahako ty raha natao i Jehovah naho i Jesosy ho ahy.” (Sal. 103:1-4) Ndra magneke ty fanasantikagne o ndatio ndra tsy magneke, le manao ze azontika atao tika mba hanasagne ndaty hagnatreke Fahatsiarovagne. Ty anto’e, haintika fa mankasitrake ty kezake ataontika ty Jehovah.

11. Akore ty nitahia i Jehovah ty kezake nataontika tamy itika nanasa o ndatio hagnatreke Fahatsiarovagney? (Hagay 2:7)

¹¹ Tena tahie i Jehovah ty kezake nataontika mba hanasagne o ndatio hagnatreke Fahatsiarovagne. Ndra tie teo aza i arete-manjamagne COVID-19, le nisy 21 367 603 ty nagnatreke Fahatsiarovagne tamy 2021. Ie amy izao ty isa ty Vavolombelo i Jehovah magneran-tane 8600000 mahery. Azo antoke fa tsy ty isa o ndaty rehoe avao ro mahaliagne i Jehovah, fa ty vata tegna iareo tsikiraidraike ka. (Lioka 15:7; 1 Tim. 2:3, 4) Matoky tika tie naho fa itika manasa ndaty hagnatreke Fahatsiarovagne, le magnampe antika ty Jehovah mba hahatrea ndaty soa fo.​—Vakio ty Hagay 2:7.

12. Nagnino ro va’e ho sarotse amantika ty hagnatreke Fahatsiarovagne? (Henteo i sarey.)

¹² Nirehake ty Jesosy andro tsy ampeampe taloha i namonoagne azey tie hiatreke raha sarotse maro tika. Agnisa izay ty fanohera o keleiagneo, o fagnenjehagneo, aly, arete-manjamagne naho ty maro hafa. (Mat. 10:36; Mar. 13:9; Lioka 21:10, 11) Kindraike o raha rehoe magnasarotse ty fankalazantika ty nimateza i Jesosy. Ino ty natao o rahalahintikagneo mba handreseagne ty raha sarotse hoe ireo, le akore ty nagnampea i Jehovah iareo?

13. Akore ty nitahia i Jehovah ty kezake natao i Artem mba hagnatrehagne Fahatsiarovagne tamy ireke tam-pirizò agney?

¹³ Gadraegne. Manao ze azo’e atao i rahalahintikagne gadraegne rey mba hankalazagne ty nimateza i Jesosy. Dineho ohatse ty tantara i Artem. Tamy ty vanim-potoa i Fahatsiarovagne tamy 2020 reke, le nigadraegne tamy ze efetse kedekede raike zay. Gadra efatse ndra dime ty ampiarahegne amo o tragno iohoe ao. Ndra tie nigadra aza reke, le nampiasa ze raha nisy teo mba hatao’e mofo naho divay amy i Fahatsiarovagney. Nanapa-kevetse ka reke fa hanao lahajaka Fahatsiarovagne ho aze. Faie nifoke sigara ty gadra naharo tama’e tao sady nanao rehake raty avao. Le ino ty natao i Artem? Niangavia’e iareo mba tsy hanao rehake raty naho tsy hifoke sigara heike tagnate ty  lera’e raike. Nigaga ty Artem fa nagneke tsy hifoke sigara naho tsy hanao rehake raty iareo tagnate i Fahatsiarovagney. Hoe ty Artem: “Afake nirehake tamy iareo ty miomba i solovoigney raho.” Ndra tie nirehake aza iareo tie tsy te hiraharaha ty miomba i Fahatsiarovagney, le nagnontane ty miomba i solovoigney iareo naho fa nahatrea naho naharey i Artem nagnatreke i Fahatsiarovagney.

14. Ino ty kezake nataontika mba hahavy antika hagnatreke Fahatsiarovagne avao ndra tie teo aza ty arete-manjamagne COVID-19?

¹⁴ Arete-manjamagne COVID-19. Tsy afake nagnatreke Fahatsiarovagne mivantagne o vahoa i Jehovah-o naho fa niparitake o aretegne iohoe. Faie tsy nikalagne iareo tsy hagnatreke Fahatsiarovagne zay. d Ze fiangonagne afake nampiasa Internet le nagnatreke tamy ty alala ty vidéoconference. Faie akore ty amy i ndaty an-tapetrisa’e tsy nanagne Internet rey? Nanao fandaharagne ty komity i sampagne tamy ty tane ila’e agne mba hahafaha o ndatio hagnorike i lahajakay amy ty tele ndra radio. Fagnampe izay, nalaegne video mialoha ka i  lahajakay amy izay afake magnatreke i Fahatsiarovagney ze mpiara-manompo mitoboke amy ty tanàgne mitokagne agne, le nisy rahalahy nanese i videoy tamy i tanàgne rey agne. Nisy amy ty firehake 500 mahery o video iohoe.

15. Ino ty ianara’o boake amy i Sue?

¹⁵ Enjehe ty keleiagne. Tena tsy mora amy ty ila’e ka ty magnatreke Fahatsiarovagne noho ty fagnenjeha ty keleia’e iareo. Dineho ohatse ty raha niaigna ty mpianatse Baiboly raike toy. I Sue ty agnara’e. Nirehake tamy i rahavave nampianatse azey ty Sue, andro raike taloha i hanoagne i Fahatsiarovagne tamy 2021, tie tsy ho afake hagnatreke Fahatsiarovagne reke satria heje ty keleia’e. Le nivakie i rahavavey ty Lioka 22:44. Nihazavae’e tamy i Sue naho fa niavy eo tie naho fa miatreke raha sarotse tika, le toko’e hitsikombe ty raha natao i Jesosy. Nivavake tamy i Jehovah reke sady tena natoky Aze tanterake. Ie nimaray igne ty Sue le nagnomagne mofo naho divay sady nagnente i Fotoam-pivavahagne maraindraigne manokagne tamy i jw.org aoy. Ie naho fa nihariva, le nitsanogne i Fahatsiarovagney tamy i telefoni’ey reke irerike, tamy i efetse nisy azey ao. Izao ty nisorate i Sue tamy i rahavave nampianatse azey tafara izay: “Tena nampahery ahy i raha rineha’o omaley. Nanao ze azoko natao raho mba hagnatrehako i Fahatsiarovagney, le tena natao i Jehovah ty ambi’e. Tena fale raho sady tena mankasitrake Aze.” Naho ty heve’o, afake magnampe azo ka vao ty Jehovah naho miatreke olagne hoe io rehe?

16. Nagnino tika ro matoky fa hitahy ty kezake atao mba hagnatrehagne i Fahatsiarovagney ty Jehovah? (Romanina 8:31, 32)

¹⁶ Tena ankasitraha i Jehovah ty kezake ataontika mba hankalazagne ty nimateza i Jesosy. Matoky tika fa hitahy ty kezake ataontika reke naho fa atorontikagne tie mankasitrake ty raha natao’e ho antikagne tika. (Vakio ty Romanina 8:31, 32.) Lonike areke tika ho tapa-kevetse hagnatreke Fahatsiarovagne amy ty taogne toy, sady hampitombo ty fanompoantika aze amy ty vanim-potoa i Fahatsiarovagney.