1-2. Ino iaby ty raha sarotse va’e hanjò ty mpanompo i Jehovah tsy mivalike?

 VA’E hiova tampoke ty fiaignantika naho fa misy loza miseho. Misy rahalahy tsy mivalike atao tihoe Luis a zay zao ohatse nivoa ty kansera. Nirehake tama’e i dokoteray fa ho mate reke afake volagne tsiampeampe. Bey atao amy ty fanompoagne ty Monika mirovaly sady androanavi-pagnahy ty vali’e. Indraike andro, le nifanta i Monika tie kay nampirafe aze avao ty vali’e tagnate ty taogne maro. Rahavave ampelatovo ty Olivia, faie tsy maintsy niala i tragno’ey satria nisy tsikolony ho avy. Naho fa niheregne reke, le nitrea’e tie nirava i tragno’ey. Tagnate ty fotoagne fohe avao, le niova ty fiaigna o ndaty reo iaby. Nisy raha nanjò azo ka vao nagnova tampoke ty fiaigna’o?

² Ndra tie mpanompo i Jehovah tsy mivalike aza tika, le miatreke raha sarotse manahake o ndatio iaby avao. Tsy vita izay fa mbe miaretse fanoheragne ndra fagnenjehagne ka tika noho ty raha atao o ndaty malaigne antikagneo. Ndra tie tsy miaro antika tsy ho azon-draha sarotse aza ty Jehovah, le nampitamà reke fa hagnampe antika. (Isaia 41:10) Noho ty fagnampea’e, le mbe afake ty ho fale avao tika, handrae fanapahan-kevetse soa naho afake ty tsy hivalike ama’e ndra tie agnate ty raha tena sarotse aza. Amy ty lahatsoratse toy, le handineke ty fomba efatse agnampea i Jehovah antika naho fa agnate ty raha sarotse tika. Hodinehentika ka ty raha toko’e hataontika mba hahazoagne ty fagnampea’e.

 HIAMBEGNE AZO TY JEHOVAH

3. Ino ty raha va’e tsy ho vitantika naho fa misy loza miseho?

³ Raha sarotse. Va’e sarotse ty hisaigne soa naho hahay handrambe fanapahan-kevetse naho fa miatreke raha sarotse tika. Nagnino? Satria va’e ho tsemboke ty fontika sady va’e hivali-doha iaby tikagne. Va’e hahatsapa hoe montso zay tika, le tsy haintika ty toko’e hatao. Mareho moa ty nitsapa i rahavave roe nirehafegne taloha teo rey. Hoe ty Olivia: “Tafara ty nandravà i tsikolony i tragnokoy, le nahatsapa ho irerike raho sady nivali-doha.” Hoe ka ty Monika, i nivaliha ty vali’ey: “Tsy tihoe nidiso tamà avao raho, fa le hoe tinomboke mesa zay ty foko. Hoe tsy ho vitako iaby ty hanao ty raha fataoko. Tsy nampino ty raha nahazo ahy.” Ino ty nampitamae i Jehovah fa hatao’e naho fa mivali-doha tikagne?

4. Arake ty Filipianina 4:6, 7; ino ty nampitamae i Jehovah antika?

⁴ Ty raha hatao i Jehovah. Nampitamà reke fa hagnomey antika i atao ty Baiboly tihoe ‘fiadanan’Andrianagnaharey.’ (Vakio ty Filipianina 4:6, 7.) O fiadanagne iohoe, le manondro ty filaminan-tsaigne naho ty fahatoniagne tsapantika noho itika managne fifandrambesagne soa amy i Jehovah. ‘Mihoatse lavitse ze taka ty say o ndatio’ o fiadanagne iohoe sady mbe soa lavitse mandikoatse ty fahatsapantikagne aze. Fa nisy fotoagne vao rehe nahatsapa ho tony tafara ty nivavaha’o? Izay atao tihoe ‘fiadanan’Andrianagnahareo.’

5. Akore ty fomba iambena ty fiadanan’Andrianagnahare ty fontika naho ty saintika?

⁵ Rehafe’e ao ka tie “hiambegne” ndra hiaro “ty fo’areo naho ty sai’areo” ty fiadanan’Andrianagnahare. Ty rehake tam-boaloha’e tagne nadika tihoe “miambegne”, le irehafagne maramila raike miambegne tanàgne mba tsy hisy hanafike. Miroro soa ty ndaty agnate i tanàgney ao satria fanta’e fa misy miambegne iareo. Hoe izay ka fa naho fa miambegne ty fontika naho ty saintika ty fiadanan’Andrianagnahare, le ho tony tika satria fantatikagne fa voaro. (Sal. 4:8) Ndra tie tsy miova eo naho eo aza ty raha iaignantika, le afake ty hilamin-tsaigne avao tika manahake i Hana. (1 Sam. 1:16-18) Naho fa tony tika, le mateteke ro mora amantika ty misaigne soa naho mandrambe fanapahan-kevetse soa.

6. Ino ty azontika atao mba hahazoagne ty fiadanan’Andrianagnahare? (Henteo i sarey.)

⁶ Ty raha toko’e hataontika. Angataho ty Jehovah mba “hiambegne” azo. Amy ty fomba akore? Mivavaha avao amparake ty hahatsapa’o i fiadanan’Andrianagnaharey. (Lioka 11:9; 1 Tes. 5:17) Nihazavae i Luis, i nirehafegne taloha teoy ty raha natao iareo amy i Ana vali’e, naho fa nifanta iareo  tie ho mate reke afake volagne tsiampeampe. Hoe reke: “Amy ty raha hoe izao, le tsy mora ty handrambe fanapahan-kevetse soa miomba ty fitsaboagne naho ty raha hafa. Faie nagnampe anay ho tony avao ty vavake tamo o fotoagne iohoe.” Nivavake mateteke avao hoe reke ty Luis naho i vali’e mba hagnomea i Jehovah iareo filaminan-tsaigne naho fahatoniagne vaho fahendreagne, amy izay iareo afake mandrambe fanapahan-kevetse soa. Nahatsapa ty fagnampea’e iareo. Naho miatreke raha sarotse areke rehe, le mivavaha mafe mba hahazoa’o filaminan-tsaigne boake amy i Jehovah, le hiambegne ty fo’o naho ty sai’o ze raha zay.​—Rom. 12:12.

HATAO I JEHOVAH ZE TSY HAHATAITAITSE AZO

7. Ino ty va’e ho tsapantika naho fa misy raha sarotse?

⁷ Raha sarotse. Naho fa miatreke raha sarotse tika, le mateteke ro tsy manahake ty mahazatse ty fihetseham-pontika, ty eretserentika naho ty fihetsentika. Va’e manahake ty sambo apaipay ty onja ty raha tsapantika. Nirehake ty Ana, i nirehafegne taloha teoy tie, nikorontagne ty fihetseham-po’e tafara ty nimateza i Luis vali’e. Hoe reke: “Manomboke magnamelo-tegna raho naho fa mahatsapa ho irery. Boseke ka raho satria reke nimate.” Misy fotoagne ty Ana naho fa mahatsapa ho irery, le manjare malahelo noho ty fitsaboagne natao mba hikarakaragne i vali’e. Tsapa’e tie hoe agnate ty riake mivalitaboake ey zay reke. Akore ty hagnampea i Jehovah antika naho fa mikorontagne hoe izay ty fihetseham-pontika?

8. Arake ty Isaia 33:6, ino ty toky mey i Jehovah antika?

⁸ Ty raha hatao i Jehovah. Nagnomey toky reke fa hatao’e ze tsy hahataitaitse antika. (Vakio ty Isaia 33:6.) Naho fa misy tiobey ty an-driakey, le va’e hiezegnezegne o sambò. Noho izay areke, le nisiagne raha hoe fivey hagnampe aze tsy hihetseketseke loatse ty ankamaroa o sambò. Amy i vata’e agnate rano aoy ty misy aze sady amo o sisi’e roe reo. Manjare voaro areke ze agnate i samboy ao sady milamigne avao ty lia iareo. Faie vao mainke miasa soa i raha rey naho ohatse mandeha mafe i samboy. Hoe izay ka fa hatao i Jehovah ze tsy hahataitaitse antika naho fa manohy manompo aze avao tika ndra tie miatreke raha sarotse aza.

9. Nagnino ro hagnampe antika i fitaovagne fanoagne fikarohagne rey? (Henteo i sarey.)

⁹ Ty toko’e hataontika. Naho fa mikorontagne ty fihetseham-po tsapa’o, le anò ze azo’o atao mba hivavahagne avao, hagnatrehagne fivoriagne naho hitoriagne. Ie aloha rehe tsy ho afake hahavita bey amo o raha reo, faie tadidio fa ony i Jehovah ty raha  misy azo. (Ampitahao amy ty Lioka 21:1-4.) Anò fahazaragne ka ty manokagne fotoagne hianaragne raike naho hisaintsaignagne. Ino ty anto’e? Satria magnomey antika fagnazavagne ara-pagnahy amy ty alala ty fandamina’e ty Jehovah, mba hagnampeagne antika hahay hifehe ty fihetseham-pontika naho fa miatreke raha sarotse. Mba hahatreava’o ze raha ilae’o, le ampiasao ze fitaovagne fikarohagne misy amy ty fireha’o, ohatse zao ty JW Library^®, Fanondroagne Boke ty Vavolombelo i Jehovah naho ty Fitaovagne Fikarohagne Hoahy ty Vavolombelo i Jehovah. Nirehake ty Monika, i nirehafagne taloha teoy tie nampiasa o fitaovagne reo reke, mba hagnampe aze naho fa niheregne indraike i raha nitsapa’e rey. Nikaroke ty rehake tihoe “habosehagne” ohatse reke. Nisy fotoagne ka reke nikaroke tihoe “famitahagne” ndra “tsy fivalihagne.” Nivakie’e avao i raha rey amparake ty hahatony aze. Hoe reke: “Le hoe raha namihigne ahy mafe zay ty Jehovah naho fa nanohy namaky i raha rey avao raho. Nitsapako tie azo i Jehovah soa iaby ty raha sambe hafa nitsapako sady nagnampe ahy reke.” Hagnampe antika hahay hifehe ty fihetseham-pontika ty fagnampeagne boake amy i Jehovah.​—Sal. 119:143, 144.

HANOHAGNE AZO AVAO TY JEHOVAH

10. Ino ty va’e ho tsapantika afara ty loza raike?

¹⁰ Raha sarotse. Afara i raha raty niseho rey, le va’e hisy fotoagne tika hahatsapa ho maleme ara-batagne naho ara-pihetseham-po. Va’e hahatsapa manahake ty mpanao korsa raike mahalay tika faie amy izao reke mampiasa fitognogne. Va’e ho sarotse amantika ty hanao ndra ty raha nimora tamantika aza sady va’e tsy hanagne hery hanoagne ty raha nahafale antika taloha sasa tika. Manahake i Elia, le va’e nainantika hiroro avao fa tsy hifoha. (1 Mpanj. 19:5-7) Ino ty nampitamae i Jehovah fa hatao’e naho fa mahatsiaro ho maleme tika?

11. Ino ty fomba hafa agnampea i Jehovah antika? (Salamo 94:18)

¹¹ Ty raha hatao i Jehovah. Nampitamà reke fa hanohagne antika. (Vakio ty Salamo 94:18.) Manahake i mpanao korsa mipay fanohagnagne naho fa mandehay, le mipay fagnampeagne ka tika mba hahafahantika manao ty fanompoagne i Jehovah. Izao ty toky mey i Jehovah: “Fa izaho Jehovah Andrianagnahare’o ro mitantagne azo amy ty tagna’o havana, eka, I mirehake ama’o tihoey: ‘Ko matahotse fa hagnampe azo raho.’” (Isaia 41:13) Nahatsapa izay ty Davida Mpanjaka.  Naho fa niatreke raha sarotse reke noho ty raha natao ty fahavalo’e, le hoe reke tamy i Jehovah: “Manohagne ahy ty fità’o havana.” (Sal. 18:35) Faie akore ty anohagna i Jehovah antika?

12. Ia ty afake ampiasae i Jehovah mba hagnampeagne antika?

¹² Manohagne antika ty Jehovah, le mandrisike ty hafa mba hagnampe antika. Naho fa nahatsapa ho maleme ohatse ty Davida, le nitilike aze ty Jonatana nama’e sady nanohagne aze le nanao rehake nampahery aze. (1 Sam. 23:16, 17) Hoe izay ka fa nandrisike i Elisa mba hagnampe i Elia ty Jehovah. (1 Mpanj. 19:16, 21; 2 Mpanj. 2:2) Amy izao ka ty Jehovah, le va’e hampiasa ty keleiantika, ty namantika ndra o androanavi-pagnahio mba hanohagne antika. Faie naho fa kivy tika, le tsy te hiharoharo ama o ndaty fa te ho irery. Ara-dalàna zay. Ino areke ty toko’e hataontika mba hahazoagne ty fanohagna i Jehovah?

13. Ino ty toko’e hataontika mba hahazoagne ty fanohagna i Jehovah? (Henteo i sarey.)

¹³ Ty toko’e hataontika. Mikezaha mba tsy hivibìke. Naho fa mivibìke tika, le manjare mifantoke amy ty tegnantikagne avao naho amy ty olagne mahazo antika. Va’e hisy voka’e amy ty fanapahan-kevetse rambesentika zay. (Ohab. 18:1) Misy fotoagne aloha tika iaby mila mitokagne irery, lohotsie naho fa nisy loza nanjò antika. Faie naho ohatse mitokagne irery agnate ty fotoagne lava bey tika, le hanjare handietse ty fanohagnagne boake amy ty hafa, ie amy izao irey ty ampiasae i Jehovah hanohagnagne antika. Ndra tie miatreke raha sarotse areke rehe, le rambeso soa ty fagnampea ty keleia’o ndra ty nama’o vaho o androanavi-pagnahio. Rambeso manahake tihoe fanohagnagne boake amy i Jehovah iareo.​—Ohab. 17:17; Isaia 32:1, 2.

HAGNOMEY HERY AZO TY JEHOVAH

14. Ino ty raha mampatahotse va’e hanjò antika?

¹⁴ Raha sarotse. Va’e hisy fotoagne tikagne hatahotse. Amy Baiboly ao, le nisy mpanompon’Agnahare tsy nivalike natahotse naho nititike noho ty fahavalo iareo naho ty raha hafa. (Sal. 18:4; 55:1, 5) Manahake izay avao ka fa miatreke fanoheragne tika an-dakilasy agne, ampiasagne agne, amy ty keleiantika ndra boake amo manam-pahefàgneo. Noho ty aretegne, le va’e ho mate ka tika. Agnate o fotoagne reo, le va’e hoe tsy misy raha azontikagne atao zay. Akore ty fomba agnampea i Jehovah antika amy ty fotoagne hoe izay?

15. Ino ty toky omey ty Salamo 94:19?

 ¹⁵ Ty raha hatao i Jehovah. Hampionogne naho hampitony antika reke. (Vakio ty Salamo 94:19.) Naho fa mamaky o salamo iohoe tika, le va’e hoe mahatrea ajaja raike tsy azon-droro satria mangotroke naho magnelatse i androy. Le avy eo ty baba’e mbama’e mbeo sady mamihigne aze amparake ty hiroroa’e. Ndra tie mbe eo avao aza i hotrokey, le mahatsapa ho voaro reke noho ty famihinan-drae’e aze. Naho fa miatreke raha mampatahotse tika, le mipay i Raentika an-dagnitse agney hamihigne antika amparake ty tsy hatahorantika sasa. Akore ty hahazoantika ze fampionogna i Jehovah zay?

16. Ino ty toko’e hataontika mba hahazoagne ty fampionogna i Jehovah? (Henteo i sarey.)

¹⁶ Ty toko’e hataontika. Manokàna fotoagne hivavahagne tsy tapake amy i Jehovah naho hamakiagne ty Saontsi’e. (Sal. 77:1, 12-14) Naho managne ze fahazaragne zay rehe, le avy le hipay ty fagnampea i Rae’o an-dagnitse agney naho fa misy raha mahakivy azo. Ambarao aze ze raha mampatahotse naho mampivali-doha azo. Engao reke hisaontsy naho hampionogne azo amy ty alala ty Saontsi’e. (Sal. 119:28) Va’e hampionogne azo ty famakiagne ty boke ila’e naho fa misy raha mampatahotse azo. Va’e hampahery azo zao ohatse ty boke i Joba, Salamo, Ohabolana naho ty raha nirehafe i Jesosy amy Matio toko 6 ao. Naho fa mivavake amy i Jehovah sady mamaky ty Saontsi’e rehe, le hahatsapa ty fampionogna’e.

17. Ino ty toky anagnantika?

¹⁷ Afake matoky tika fa ho eo avao ty Jehovah naho fa miatreke fotoam-tsarotse tika. Tsy ho irery zao tika. (Sal. 23:4; 94:14) Nampitamà ty Jehovah fa hiambegne, hampitony naho hanohagne vaho hampionogne antika. Hoe ty Isaia 26:3, miomba i Jehovah: “Harova’o ze managne saigne tsy miova mba hanagne fieragneragnagne lognandro fa matoky azo reke.” Matokia i Jehovah areke, le hararaoto ty raha ampiasae’e mba hagnampeagne azo. Naho manao izay rehe, le hahazo hery ndra tie agnate ty raha sarotse aza.