Misy ty nitezaegne amy ty kolontsaigne magnambanembane o ampelao. Hoe ty Hans, mpiandraikitse faritse raike a Bolivia agne tie: “Ty ila’e amo lahilahio le nibey tamy ty toeragne managne kolontsaigne magnambanembane o ampelao.” Hoe ka ty androanavi-pagnahy raike atao tihoe Shengxian a Taiwan agne: “Ama’ay atoy, le maro ty lahilahy mihevetse tie tsy toko’e hagnomey soso-kevetse iareo o ampelao. Naho magnorike ty soso-keve ty ampela ty lahilahy raike, le manjare tsy hajae ty hafa.” Misy lahilahy ila’e ka mitsaratsara o ampelao ndra tie tsy misy anto’e mazava soa aza zay. Ohatse zao va’e hanao somonga magnambanembane o ampelao iareo.

Mahafale fa azo o lahilahio atao tihoe tsy ho fehe ze toe-tsaigne zay. Afake mandrese ze toe-tsaigne mihevetse o ampelao ho ambane zay o lahilahio. (Efes. 4:22-24) Hahavita izay iareo naho manahake i Jehovah. Amy ty lahatsoratse toy, le hodinehentika ty fomba findesa i Jehovah o ampelao naho ty azo ty rahalahy anahafagne aze vaho ty fomba hampisehoa o androanavi-pagnahio tie magnaja o rahavaveo iareo.

TY FOMBA FINDESA I JEHOVAH O AMPELAO

I Jehovah ty ohatse voririke amy ty fomba findesagne o ampelao. Noho ireke Rae mitretré le tena tea’e o ana’eo. (Jaona 3:16) Sarobily ama’e manahake ty anak’ampela’e o rahavave tsy mivalikeo. Dineho ty fomba nanoroa i Jehovah hatea naho fagnajagne o ampelao retoa.

Tsy magnavakavake iareo Reke. Niforogne i Jehovah hitovy vintagne ama’e o lahilahy naho o ampelao. (Gen. 1:27) Tsy natao’e mahihitse ndra mahay raha ambone o ampelao o lahilahio sady  tsy tihoe tea’e ambone o ampelao ka. (2 Tan. 19:7) Niforogne’e sambe afake hahatakatse ty hamarenagne agnate Baiboly ao naho sambe afake manahake ty toetse’e iareo. Sambe sarobily amy i Jehovah ty finoa iareo, le sambe nimea’e fanantenagne hiaigne nainai’e an-tane etoy naho fanantenagne ho mpanjaka vaho ho mpisorogne an-dagnitse agne ka iareo. (2 Pet. 1:1, f.a.p.) Mazava areke fa tsy magnambane o ampelao ty Jehovah.

Mijanjigne iareo Reke. Tea i Jehovah ho fantatse ty raha tsapa o ampelao naho ty olagne atrehe iareo. Nijanjigne naho namale ty vavake natao i Rahely naho i Hana ohatse ty Jehovah. (Gen. 30:22; 1 Sam. 1:10, 11, 19, 20) Nasae’e nisorategne agnate Baiboly ao ka ty tantara ze lahilahy nitsanogne o ampelao. Nagnomey toromareke i Abrahama ohatse ty Jehovah tie tsanogno ty Saraha vali’o, le nagnorike izay reke. (Gen. 21:12-14) Nitsanogne i Abigaila ka ty Davida Mpanjaka. Voka’e le nitsapa’e tie i Jehovah ty nagnirake i Abigaila hirehake tama’e. (1 Sam. 25:32-35) Tena nanahake ty toetse soa i Rae’ey ka ty Jesosy le nitsanogne i Maria rene’e. (Jaona 2:3-10) Asongady o ohatse rehoe fa agnisa ty fomba raike anoroa i Jehovah fagnajagne o ampelao ty fijanjigna’e iareo.

Matoky iareo Reke. Natoky i Eva ohatse ty Jehovah fa hikarakara ty tane toy reke. (Gen. 1:28) Naho fa nanao izay reke, le tsy nihevetse i Eva ho ambane noho i Adama vali’e fa nihevetse aze ho mpiara-miasa ama’e. Natoky i Debora mpaminanivave naho i Holda ka ty Jehovah naho fa nanoro hevetse o vahoa’eo iareo, agnisa izay ty mpitsara naho ty mpanjaka. (Mpits. 4:4-9; 2 Mpanj. 22:14-20) Amy izao, le matoky o ampela Kristianao ty Jehovah naho fa manao ty asa’e iareo. Mitory, manao mpisava lalagne ndra misionera o rahavave tsy mivalike reo. Magnampe amy ty fanoagne pilany, fagnoregnagne naho amy ty fikojakojagne i Anjomba i Fanjakagney ndra birò sampagne iareo. Ty ila’e manompo amy Betela ao, le ty hafa ka manompo amy ty birò fandikan-drehake mitokagne. Hoe tafike lahibey ampiasae i Jehovah hagnatanterake ty zoton’arofo’e o rahavaveo. (Sal. 68:11) Mazava areke fa tsy mihevetse o ampelao ho maleme ndra tsy misy raha vita’e ty Jehovah.

INO TY RAHA AZO O RAHALAHIO IANARAGNE BOAKE AMY TY FOMBA INDESA I JEHOVAH O AMPELAO?

Mila mandineke ty eretserentika naho ty raha ataontika tika ry rahalahy mba hahafahantika hanahake i Jehovah. Mba hahavitagne izay le mila fagnampeagne tika. Mampiasa fitaovagne o dokoterao mba hahaia’e tie marare ndra salama ty fo ty ndaty raike. Ty namagne soa naho ty Baiboly, le afake magnampe antika hahafantatse tie mitovy fomba fihevetse amy i Jehovah miomba o ampelao vao tika ndra tsy izay. Akore ty ahafahantika mahazo ze fagnampeagne zay?

Mirehafa amy ty namagne soa. (Ohab. 18:17) Afake magnontane ty namagne atokisagne naho soa fagnahy vaho misaigne soa tika tie: “Akore ty fahatreava’o ty fomba findesako o rahavaveo? Mahatsapa vao iareo tie magnaja iareo raho? Ino ty raha mbe mila ataoko mba hagnasoako ty fomba findesako iareo?” Naho fa rehafe i nama’oy ty raha ila’e mbe mila hasoae’o le ko boseke. Toko’e ho vognogne hanao fagnitsiagne rehe.

Ianaro ty Saontsin’Agnahare. Afake magnampe antika hamantatse ty toetsentika naho ty raha ataontika amo o rahavaveo ty fampiasagne ty Saontsin’Agnahare. (Heb. 4:12) Naho fa mianatse Baiboly tika, le azontika atao ty mianatse miomba ty lahilahy ninday soa o ampelao naho ty tsy nanao izay. Azontika atao ka ty mampitaha ty raha atao iareo amy ty antika. Naho fa ampitahaentika amy ty andine’e hafa ka ty andine’e treantika amy Baiboly ao, le tsy hanagne heve-diso tika fa ho azontika soa ty fomba fihevera i Jehovah o ampelao. Ohatse zao, mirehake ty 1 Petera 3:7 fa toko’e “hagnomey voninahitse ty vali’e manahake ty fanake maleme” o lahilahio. b Midika vao zay tie ambane ndra tsy mahay noho i lahilahỳ reke? Tsy izay! Azo’o ampitahaegne amy ty Galatianina 3:26-29 o raha nirehafe i Petera iohoe. Rehafegne ao tie nifily ampela manahake ty nifiliana’e lahilahy mba hiarake hanjaka amy  i Jesosy an-dagnitse agne ty Jehovah. Naho fa mianatse ty saontsin’Agnahare naho magnontane namagne soa ndra mitsanogne ty raha rehafe iareo miomba ty findesa’o o ampelao rehe, le ho hai’o ty fomba hanoroa’o fa magnaja o rahavaveo rehe.

TY FOMBA ANOROA O ANDROANAVI-PAGNAHIO TIE MAGNAJA O RAHAVAVEO IAREO

Afake mianatse boake amy ty fomba indesa o androanavi-pagnahio o rahavaveo ka o rahalahio. Akore ty anoroa o androanavi-pagnahio fa voaloha’e iareo amy ty fagnajagne o rahavaveo? Dineho ty raha lahibey ila’e retoa.

Toko’e hidera o rahavaveo iareo. Nagnomey modely soa azo o androanavi-pagnahio tsikombegne ty apostoly Paoly. Nidera o rahavaveo tagnatreha ty maro teo reke tamy ty taratasy nisorate’e hoahy ty fiangonagne ta Roma tagne. (Rom. 16:12) Alao sare an-tsaigne moa ty hafaleagne nitsapa i rahavave rey naho fa nivakiegne tagnivo o fiangonagneo i taratasy nisorate i Paolỳ. Manahake izay avao ka fa midera o rahavaveo noho ty toetse soa iareo naho ty asa mafe atao iareo hoahy Jehovah ty androanavi-pagnahy soa fagnahy. Magnampe o rahavaveo hahafantatse zay tie tena magnaja naho mankasitrake iareo o fiangonagneo. Ty rehake mampahery boake amo androanavi-pagnahio, le va’e ilae o rahavaveo mba hahavy iareo hanohy hanompo i Jehovah avao.​—Ohab. 15:23.

Toko’e ho soa fagnahy o androanavi-pagnahio sady toko’e ho voafaritse soa ty raha rehafe iareo naho fa midera o rahavaveo. Ino ty anto’e? Hoe ty rahavave raike atao tihoe Jessica: “Tena soa naho fa misy rahalahy mirehake tie ‘Misaotse azo e.’ Faie tena mampahery naho fa misy rahalahy manao rehake fideragne voafaritse soa. Ohatse midera anay reke noho izahay nampianatse ty ana’ay hitoboke soa naho fa am-pivoriagne agne ndra noho izahay nalake mpianatse Baiboly mba hivory.” Naho fa manao rehake fideragne voafaritse soa o  androanavi-pagnahio, le manjare mahatsapa ho ilaegne naho sarobily agnivo fiangonagneo eo o rahavaveo.

Toko’e hitsanogne soa o rahavaveo iareo. Ty androanavi-pagnahy miambane le mahafantatse tie tsy iareo avao ro managne hevetse soa. Manasa o rahavaveo hirehake ty heve’e iareo sady mitsanogne soa. Mampahery o rahavaveo zay sady mahasoa iareo. Amy ty fomba akore? Nirehake hoe izao ty Gerardo, androanavi-pagnahy raike manompo amy i Betela ao tie: “Magnontane ty heve o rahavaveo raho satria afake magnampe ahike hagnasoa ty asako iareo. Mateteke le iareo ro mahavita asa naho ampitahaegne amo o rahalahio.” Agnivo fiangonagneo, le maro ty rahavave manao mpisava lalagne. Noho izay le hay iareo soa ty miomba ty ndaty amy ty faritane iareo ey. Hoe ty androanavi-pagnahy raike atao tihoe Bryan: “Managne toetse soa naho fahaiagne maro ilaegne agnivo fandaminagne eo o rahavaveo. Mandrambe soa boake amy ty raha hay iareo tika!”

Ty androanavi-pagnahy hendre le tsy magnambane ty soso-kevetse mey o rahavaveo. Ino ty anto’e? Hoe ty androanavi-pagnahy raike atao tihoe Edward: “Ty soso-kevetse naho ty fahaia o rahavaveo le afake magnampe o rahalahio hahafantatse soa ty olagne naho hahatakatse soa ty raha tsapa ty hafa.” (Ohab. 1:5) Ndra tie tsy afake mampihatse ty soso-kevetse boake amo o rahavaveo aza o androanavi-pagnahio, le azo iareo atao ty mankasitrake iareo amy ty fagnamarehagne ndra ty fahaiagne nizarae iareo.

Toko’e hampiofagne o rahavaveo iareo. Ty androanavi-pagnahy hendre le mipay fomba hampiofagnagne o rahavaveo. Azo iareo atao zao ohatse ty mampiofagne o rahavaveo mba hitarike fivoriagne aloha ty fanompoagne naho ohatse tsy misy rahalahy vita badisa. Azo iareo atao ka ty mampiofagne o rahavaveo mba hahay hampiasa fitaovagne ndra masìna mba hahafaha iareo magnampe amy ty fikojakojagne ndra amy ty tetik’asa fagnoregnagne. Ty mpiandraikitse ty asa amy i Betela ao, le mampiofagne o rahavaveo mba hahay asa sambe hafa agnisa izay ty fikojakojagne, fivilianagne entagne, manao konte, asa mifandrambe amy ty ordinatera naho ty raha hafa. Naho fa mampiofagne o rahavaveo o androanavi-pagnahio, le atoro iareo tie atokisa iareo fa hahavita i asay o rahavaveo.

Rahavave maro ro mampiasa ty fampiofagnagne niazo’e boake amo o androanavi-pagnahio mba hahasoa ty hafa. Mampiasa ty fampiofagnagne niazo’e boake amy ty asa fagnoregnagne ohatse ty ila’e mba hagnampeagne ty hafa amy ty fagnamboaragne ty tragno iareo afara ty loza arake ty natiora. Ty rahavave ila’e ka, le mampiasa ty fahaiagne nianara’e boake amy ty fitoriagne amy ty toeragne maro ndaty mba hampiofagnagne rahavave maro, amy izay iareo mba afake mandrambe anjara ka. Ino ty tsapa o rahavaveo noho o androanavi-pagnahio mampiofagne iareo? Hoe ty rahavave raike atao tihoe Jennifer: “Naho fa niasa tamy ty fagnoregnagne ty Anjomba i Fanjakagney raike raho, le nalake fotoagne hampiofagnagne ahike ty mpiandraikitse raike. Voamare’e ty asa nataoko sady nidera ahike reke. Tena teako ty niarake niasa tama’e satria nahatsapa ho nilaegne naho natokisagne raho.”

TY SOA HO AZONTIKA NAHO MIHEVETSE O RAHAVAVEO HO KELEIANTIKA

Tea o rahavave tsy mivalikeo manahake i Jehovah tika! Manahake ty keleiantika ty fiheverantika iareo. (1 Tim. 5:1, 2) Tena teantika iareo sady tena fale tika miara-miasa amy iareo. Tena fale ka tika naho tsapa iareo tie teantika naho tohagnantika iareo. Hoe ty rahavave raike atao tihoe Vanessa: “Tena mankasitrake i Jehovah raho fa agnisa ty fandamina’e misy rahalahy tena mampahery ahike.” Hoe ka ty rahavave raike a Taiwan agne: “Tena misaotse i Jehovah naho ty fandamina’e raho satria tena tea naho magnaja o ampelao iareo. Magnatanjake ty finoako zay sady mahavy ahike vao mainke hankasitrake ty tombotsoako ho agnisa ty fandamina i Jehovah.”

Tena mirehareha ty Jehovah naho fa mahavazoho o lahilahy Kristiana tsy mivalikeo magnaja naho tea o ampelao manahake Aze! (Ohab. 27:11) Hoe ty androanavi-pagnahy raike atao tihoe Benjamin a Scotland agne: “Tsy magnaja o ampelao ty ankamaroa ty ndaty amy ty tontolo toy eto. Faie ty ampela amy i Anjomba i Fanjakagney agne, le teantika hahatsapa tie tea naho magnaja iareo tika.” Lonike areke tika hanahake i Jehovah le hotea naho hagnaja o rahavaventikagneo.​—Rom. 12:10.