Trea tie nanjare Mpisorom-bey ty Jesosy naho fa natao badisa reke tamy ty taogne 29. Akore ty ahafantarantika izay? Naho fa natao badisa ty Jesosy, le naseho’e fa vognogne hanao ty zoton’arofon’Andrianagnahare reke. Midika zay tie vognogne hanolotse ty fiai’e hatao sorogne reke. Oharegne amy ty alitara o zoton’arofon’Andrianagnahare iohoe. (Gal. 1:4; Heb. 10:5-10) Nanomboke nisy o alitara agn’ohatse iohoe naho fa natao badisa ty Jesosy. Azo antoke areke fa tamy izay ka ro nanomboke nisy i tempoly ara-pagnahy lahibeỳ satria raha tsy afake misarake reo. O tempoly ara-pagnahy iohoe, le ty fandaharagne natao mba hanompoagne i Jehovah, mioregne amy ty solovoigne nanoe i Jesosy.—Mat. 3:16, 17; Heb. 5:4-6.

Nila mpisorom-bey ka i tempoly ara-pagnahy lahibeỳ. Tinendre i Jehovah tamy ty alala ty “fagnahy masigne” naho “hery” areke ty Jesosy mba hanjare mpisorom-bey. (Asa. 10:37, 38; Mar. 1:9-11) Taloha ty nimateza i Jesosy naho ty namelomagne aze indraike reke ro tinendre ho Mpisorom-bey. Akore ty ahafantarantikagne izay? Andao tika handineke ty tantara i Arona naho ty mpisorom-bey nandimbe aze.

Rehafe ty Lalà i Mosesy tie o mpisorom-beio avao ro mahazo mizilike amy i Masigne Vata’ey ao, ndra tamy i tragnolay masigney ao zay ndra tamy i tempolỳ tao. Rido ty nagnefetse i Masigne Vata’ey tamy i Masigney, le tamy ty Andro Fandrakofam-pahotagne avao o mpisorom-beio ro nahazo nandalo teo. (Heb. 9:1-3, 6, 7) Fa tinendre ho mpisorom-bey ty Arona naho ty nandimbe aze, vaho izay afake nandalo tamy i ridò tamy i tragnolay masigney tao. Tsy maintsy taloha ty nimateza’e ka areke ty Jesosy ro fa tinendre ho Mpisorom-bey. Naho tsy izay, le tsy ho niafake nandalo ‘agnivo i ridoy mbeo ndra ty nofo’e’, le nandeha mban-dagnitse mbeo. (Heb. 10:20) Izay ty nahavy i apostoly Paoly hirehake tie fa “mpisorom-bey” ty Jesosy, naho fa niavy tamy “i tragnolay fara’e bey naho fara’e voririke sady tsy namboaren-tagnagney”, ndra tan-dagnitse agne.—Heb. 9:11, 24.

Ombia ro nanomboke nanan-kery i fifagnekeagne vaovaoy? Misy dingagne telo mila atao mba hampanan-kery o fifagnekeagne iohoe. Inogne iaby zay?

Voaloha’e, nila niseho tagnatreha i Jehovah eo ty Jesosy. Faharoe, nila nangatake tamy i Jehovah reke mba hagneke i sorogne nanoe’ey. Fahatelo, nila nagneke i sorogney ty Jehovah. Ie vita iaby o dingagne rehoe vaho izay nanan-kery i fifagnekeagne vaovaoy.

Tsy rehafe ty Baiboly tie ombia ty Jehovah ro nagneke i sorogne nanoe i Jesosỳ. Tsy afake mirehake date mazava areke tikagne tie ombia ro nanomboke nanan-kery i fifagnekeagne vaovaoy. Fa ty haintikagne le tihoe niakatse an-dagnitse agne ty Jesosy, folo andro taloha i Pentekostay. (Asa. 1:3) Tagnate ze fotoagne fohe zay areke ty Jesosy ro nangatake tamy i Jehovah mba hagneke i sorogne nanoe’ey, le nagneke ty Jehovah. (Heb. 9:12) Trea nibaribary tie nanomboke nanan-kery i fifagnekeagne vaovaoy naho henteagne ty raha nisy tamy i Pentekostay. (Asa. 2:​1-4, 32, 33) Fa nanan-kery areke i fifagnekeagne vaovaoy tamy izay.

Naho boriboriegne le izao, naho fa neké i Jehovah i sorogne nanoe i Jesosỳ, le tamy izay ro nanomboke nanan-kery i fifagnekeagne vaovaoy. I Jesosy Mpisorom-bey ty Mpagnelagnelagne amo o fifagnekeagne iohoe.—Heb. 7:25; 8:1-3, 6; 9:13-15.