1. Ino ty raha mahafale antika, arake ty 3 Jaona 3, 4?

AZO’O sare an-tsaigne vao ty hafaleagne nitsapa i apostoly Jaona naho fa naharey tie mbe manompo i Jehovah avao sady tsy mivalike ama’e i ndaty nampianare’e ty hamarenagne rey? Niatreke olagne maro i ndaty rey, le izay ty nahavy i Jaona nikezake mafe hagnatanjake ty finoa iareo satria nirambese’e manahake ty ana’e iareo. Fale ka tika naho fa manokan-tegna hoahy i Jehovah sady tsy mivalike ama’e ty anantikagne ndra ty ndaty ampianarentikagne Baiboly.—Vakio ty 3 Jaona 3, 4.

2. Ino ty tanjo i taratasy telo nisorate i Jaona rey?

² Va’e ta Efesosy agne ndra narine o tane iohoe ty nipetraha i Jaona tamy taogne 98. Va’e tafara ty namotsoragne aze tamy ireke nigadra tamy ty tokonose i Patmo agney ro nifindra tagne. Tamy izay ty fagnahy masy i Jehovah ro nandrisike aze hanoratse taratasy telo. Ty handrisike ty Kristiana tsy mivalike mba hampitombo ty finoa iareo i Jesosy naho handeha lognandro amy ty hamarenagne ty tanjo o taratasy rehoe.

3. Ino iaby ty fagnonteneagne hodinehentikagne?

³ I Jaona ty apostoly nivelogne fara’e. Tena nampinekoneko aze ty raha natao ty mpampianatse sandoke tagnivo fiangonagne eo tamy izay. * (1 Jaona 2:18, 19, 26) Nanao ty vata’e ho mahafantatse an’Andrianagnahare o mpivadi-pinoagne reo, faie tsy nankatò ty lily i Jehovah. Andao tika handineke ty toro hevetse nimey i Jaona, le hamale ty fagnonteneagne telo retoa: Ino ty dika tihoe mandeha amy ty hamarenagne? Ino ty  va’e hisakagne antika tsy handeha amy ty hamarenagne sasa? Akore ty hagnampeagne ty hafa mba handeha amy ty hamarenagne lognandro?

4. Ino ty raha mila ataontika naho te handeha amy ty hamarenagne tika, arake ty 1 Jaona 2:3-6; 2 Jaona 4, 6?

⁴ Mila mahafantatse ty hamarenagne agnate Baiboly ao tika naho te handeha amy ty hamarenagne. Tsy maintsy “miambegne” ndra mankatò ty lily i Jehovah ka tika. (Vakio ty 1 Jaona 2:3-6; 2 Jaona 4, 6.) Tena modely ho antika ty Jesosy satria lava nankatò i Jehovah avao reke. Naho te hahavita hankatò i Jehovah areke tikagne, le tsy maintsy mitsikombe ty raha natao i Jesosy arake ze fara herintikagne.—Jaona 8:29; 1 Petera 2:21.

5. Mila rese lahatse amy ty inogne tika?

⁵ Naho te handeha amy ty hamarenagne lognandro ka tika, le mila rese lahatse fa Andrianagnahare ty hamarenagne ty Jehovah. Maregne ze kila raha saontsie’e agnate Baiboly ao sady i Jesosy i Mesia nampitamaegney. Maro ty ndaty tsy mahay tie fa tinendre ho mpanjaka ty Fanjakan’Andrianagnahare ty Jesosy. Nampitao ty Jaona tie hisy “mpamitake maro” hitaogne ze ndaty tsy tena mino ty hamarenagne miomba i Jehovah naho i Jesosy. (2 Jaona 7-11) Hoe ty Jaona: “Ia moa ty mpavande, naho tsy ze mandietse fa i Jesosy ro Kristy?” (1 Jaona 2:22) Tsy ho voafita o ndaty mpamitakeo tika naho mianatse ty Saontsin’Andrianagnahare. Izay avao ka ty hagnampe antika hahafantatse i Jehovah naho i Jesosy. (Jaona 17:3) Ho rese lahatse tika amy izay tie tena maregne ty raha nianarantikagne.

6. Ino ty raha raike va’e hahavy ty tanora tsy handeha amy ty hamarenagne sasa?

⁶ Mila mitao ty Kristiana, lohotsie fa o tanorao mba tsy ho voafita ty heve-diso ampianare o ndatio. (1 Jaona 2:26) Hoe ty Alexia, * rahavave 25 taogne a Frantsa agne: “Tamy izaho mbe nianatse, le nahavy ahy hisalasala miomba ty hamarenagne ty fampianaragne miomba ty evolisiona naho ty hevetse hafa ampianare o ndatio. Nisy fotoagne i raha rey nahaliagne ahy. Faie tsapako ka tie tsy soa ty tsy midare ty raha ampianare ty Baiboly, sady hino i heve-diso rey.” Nianatse ty boke tihoe Akore ty Nampisy ty Fiaignagne? Tamy ty alala ty Evolisiona sa Nisy Namorogne? (Anglisy) areke ty Alexia. Nanjare tsy nisalasala sasa reke heregnandro tsiampeampe tafara izay. Hoe reke:  “Rese lahatse raho tie tena maregne ty raha rehafe ty Baiboly. Tsapako ka tie tsy ho sambatse raho naho tsy magnorike ty fitsipike agnate’e ao.”

7. Ino ty raha tsy toko’e hataontikagne, le ino ty anto’e?

⁷ Naho tsy mitao amy i heve diso rey tika, ndra antetse zay ndra tanora, le va’e hanao raha raty faie hanao sare manompo i Jehovah avao ka. Nirehake ty Jaona fa tsy ho vitantika ty handeha amy ty hamarenagne ro sady hanagne fomba fiaignagne raty. (1 Jaona 1:6) Naho te hahazo sitrake amy i Jehovah tika, le mila mieretseretse avao tie: ‘Misy mahatrea anio ty raha ataoko toy io!’ Naho ty maregne, toe mibaribary agnatreha i Jehovah eo ty fahotagne atao o ndatio ndra tie tsy misy mahatrea aza reke.—Heb. 4:13.

8. Ino ty raha tsy maintsy toherentikagne?

⁸ Mila manohetse ty toe-tsay ty tontolo toy miomba ty atao tihoe fahotagne tikagne. Hoe ty apostoly Jaona: “Naho manao tihoe tikagne tie: ‘Tsy manan-tahigne tika’, le mamita-tegna.” (1 Jaona 1:8) Nirehake i mpivadi-pinoagne tamy ty andro i Jaona rey, fa mbe afake ty ho ragnen’Andrianagnahare avao ty ndaty raike ndra tie mandika ty lili’e. Maro ka ty ndaty managne toe-tsaigne hoe izay amy izao. Mirehake iareo tie nao zao mino an’Andrianagnahare faie tsy eké iareo ze raha saontsie i Jehovah tie fahotagne ty manao aze, lohotsie fa ty miomba ty firaisagne. Misy raha zao hevere i Jehovah ho fahotagne faie rehafe iareo tie: ‘Miankigne amy ty tsikiraidraike avao zay sady fa izay ka ty lamody amy izao.’

9. Nagnino ro mahasoa o tanora ty magnorike ty raha rehafe ty Baiboly?

⁹ Tena tsy mora hoahy ty tanora Kristiana ty magnorike ty fitsipy ty Baiboly miomba ty firaisagne satria tsy midare izay ty mpiara-mianatse ndra ty mpiara-miasa ama’e. Nahatsapa izay ty Aleksandar. Hoe reke: “Nitaogne ahy hanao firaisagne ama’e ty ampela ila’e tan-dakilasi’ ay agne. Nirehafe iareo tie lahilahy manahake ahy avao ty teako hilàgne satria tsy nanagne sipa raho.” Va’e hanjò azo ka ty raha hoe izay. Faie naho magnorike ty raha rehafe ty Baiboly rehe, le tsy hahatsiaro ho megnatse, ho salama soa, tsy harare fo sady tsy ho simba ka ty fifandrambesa’o amy i Jehovah. Ko haligno fa ho mora ama’o ty hankatò ty lily i Jehovah amy ty hoavy naho mahavita manohetse tsapa hevetse rehe amy izao. Tadidio ka fa boake amy i Satana ty heve-diso anagna o ndatio miomba ty firaisagne. “Mandrese i ratỳ” areke rehe naho tsy magneke hoveove ty tontolo toy.—1 Jaona 2:14.

10. Nagnino ty 1 Jaona 1:9 ro magnampe antika hanompo i Jehovah amy ty feo ty fieretseretagne malio?

¹⁰ Ekentika fa i Jehovah avao ty fagneva ty hamaritse tie fahotagne ty manao raha raike ndra tsy fahotagne. Mikezake mafe areke tika mba tsy hanao ty raha saontsie’e fa raty. Faie naho manota tika, le mila mieke ty fahotantikagne amy i Jehovah amy ty alala ty vavake. (Vakio ty 1 Jaona 1:9.) Mila mipay fagnampeagne amo o androanavi-pagnahio tika naho nanao fahotagne lahibey satria iareo ty tinendre i Jehovah hikarakara antika. (Jak. 5:14-16) Tsy toko’e ho lava hagnamelo-tegna avao tika satria afake mamela heloke antikagne i Raentika bey hateay noho ty sorogne natao i Ana-dahi’ey. Naho tena mibebake tika, le hamela antika vata’e ty Jehovah satria fa izay ty nisaontsie’e. Tsy misy raha afake mikalagne antika tsy hanompo i Jehovah amy ty feo ty fieretseretagne malio.—1 Jaona 2:1, 2, 12; 3:19, 20.

11. Ino ty hagnampe antika ho voaro amy ty fampianara o mpivadi-pinoagneo?

¹¹ Mila manohetse ty fampianara o mpivadi-pinoagneo tika. Fa nampiasa o ndaty mpampianatse sandokeo ty Satana nanomboke tamy ty nioregna o fiangonagne Kristianao. Ty hampihegne ty finoa ty mpanompo i Jehovah  tsy mivalike ty tanjo’e. Mila haintika areke ty magnambake ty maregne naho ty vande. * Va’e hampiparitake vande amy Internet ao ndra amy ty telé ndra ty radio ndra amy ty gazete ty ndaty malaigne antika amy izay mihegne ty finoantika i Jehovah naho ty hateantikagne o mpiara-manompò. Ko mino i vande rey fa boake amy i Satana rey!—1 Jaona 4:1, 6; Apok. 12:9.

12. Nagnino tika ro mila mampitombo ty finoantika ty hamarenagne nianarantikagne?

¹² Ho vitantika ty hanohetse i Satana naho mampitombo ty finoantika i Jesosy naho ty anjara asa’e tika. O mpanompo mahihitse naho mahimbagneo avao ro toko’e hatokisantikagne satria io ty ampiasae i Jehovah hitarike ty fandamina’e. (Mat. 24:45-47) Hitombo ty finoantika naho mianatse ty Saontsin’Andrianagnahare tsy tapake tika. Hanahake ty hatae raike mamahatse soa ty finoantika amy izay. Nirehake raha mitovy amy izay ty Paoly naho fa nanoratse hoahy o Kolosianao. Nirehake reke fa toko’e ‘hiharo lia amy i Kristy Jesosy Tompo lognandro naho hamahatse soa vaho hioregne ama’e eo lognandro iareo sady tsy ho voaezegnezegne amy ty finoagne.’ (Kol. 2:6, 7) Tsy ho vita i Satana naho ty mpanohagne aze ty hisakagne antika tsy handeha amy ty hamarenagne naho mikezake mafe magnatanjake ty finoantikagne tika.—2 Jaona 8, 9.

13. Ino ty raha fa ampoizentikagne, le ino ty anto’e?

¹³ Fa ampoizentikagne tie halaigne antika ty tontolo toy. (1 Jaona 3:13) Hoe ty Jaona: “Ty tontolo toy fehe i ratỳ.” (1 Jaona 5:19) Vao mainke boseke ty Satana satria fa mihamarine avao ty fara ty tontolo toy. (Apok. 12:12) Maro ty fitake ampiasa’e, agnisa izay ty fitaonagne antika ho raty findesan-tegna naho ty vande o mpivadi-pinoagneo. Faie tsy izay avao ty atao’e fa mbe magnenjeke antika mivantagne ka reke. Hay i Satana fa kede sisa ty fotoagne anagna’e, le mikezake mafe reke mba hisakagne o asa fitoriagneo ndra manao raha mba hanimbagne ty finoantikagne. Tsy mahagaga antika areke naho voarara ty asantika amy ty tane ila’e agne. Faie ndra tie eo zay, le miaretse ty rahalahy naho ty rahavaventika amy i toeragne rey agne. Porofoe iareo amy izay fa afake ty handrese tika ndra inogn’ino atao i Satana amantika.

14. Ino ty azontikagne atao mba hagnampeagne o mpiara-manompò hijanogne amy ty hamarenagne ao avao?

¹⁴ Mila mitretré o rahalahio naho o rahavaventikagneo tika mba hagnampeagne iareo hijanogne amy ty hamarenagne ao avao. (1 Jaona 3:10, 11, 16-18) Mila asehontika fa teantika iareo, lohotsie naho fa misy olagne. Akore ohatse ty atao’o naho misy mpiara-manompo nimate longo, le mila fampaherezagne ndra fagnampeagne hafa? Akore ka ty atao’o naho maharey tie misy mpiara-manompo nimontso iaby ty fanagna’e sady mila amboaregne ty tragno’e naho ty Anjomba i Fanjakagney amy iareo agne, satria nisy tsikolony ndra rano bey, ndra horohoron-tane ty tagne? Asehontika fa tena teantika i rahalahy naho i rahavaventikagney rey naho manao raha hagnampeagne iareo tika fa tsy mitretré an-drehake avao.

15. Ino ty raha mila ataontika arake ty 1 Jaona 4:7,8?

¹⁵ Manahake i Raentikagne bey hateay tika naho maneho hatea ty hafa. (Vakio ty 1 Jaona 4:7,8.) Manao izay tika naho mamela heloke iareo. Naho misy ndaty manao raha mahaboseke antikagne areke, le toko’e hamela aze tika sady hagnaligno i raha tsy mete natao’e tamantikagney. (Kol. 3:13) Nalahelo ohatse ty Aldo naho fa nisy rahalahy raike nirehake raha  tsy le mampahery miomba ty ndaty boake amy iareo agne. Hoe ty Aldo: “Nivavake mateteke tamy i Jehovah raho mba hagnampe ahy tsy hitagne am-po.” Faie nisy raha hafa ka natao i Aldo. Nasae’e hiarake hanompo ama’e i rahalahỳ. Naho fa niarake nitory iareo, le nirehafe i Aldo tama’e ty raha nitsapa’e. Hoe reke: “Niala tsiny tamako reke naho fa nirehafeko tama’e tie tena nalahelo raho noho i raha nirehafe’ey. Tsapako tamy ty gadogado ty reha’e fa tena nanegnegne reke. Nanjare mpiragnetse soa indraike zahay tafara izay, sady nihalignove’ay agne i olagney.”

16-17. Toko’e ho tapa-kevetse ty hanao ino tika?

¹⁶ Tena nitea i apostoly Jaona i mpiara-manompo ama’e rey sady tea’e hanagne finoagne matanjake ka iareo. Trea zay naho henteagne ty toro hevetse nimei’e iareo amy i taratasy nisorate’e rey. Tena mampahery ty mahafantatse tie lahilahy naho ampela bey hatea manahake aze ty hiara-manjaka amy i Kristy.—1 Jaona 2:27.

¹⁷ Lonike abey tika mba handrambe am-po i toro hevetse nidinehentikagne tato rey sady ho tapa-kevetse handeha lognandro amy ty hamarenagne sady hankatò i Jehovah amy ze kila raha. Ianaro ty Saontsi’e, le atokiso ze raha agnate’e ao. Ampitombò ty finoa’o i Jesosy. Liero ty heve-diso ampianare o ndatio naho ty fampianara o mpivadi-pinoagneo. Ko mandika ty lily i Jehovah faie manao sare manompo aze avao. Ko magneke naho misy mitaogne azo hanao raty. Oriho ty fitsipy i Jehovah miomba ty findesan-tegna. Andao tika hagnampe o rahalahintikagneo mba hanagne finoagne matanjake, le hamela heloke ze nanao raha nampanahelo antika sady hagnampe ze mila fagnampeagne. Naho manao ireo tika, le handeha amy ty hamarenagne lognandro ndra inogn’ino olagne va’e hatrehentikagne.