1. Nagnino tika ro mirehake fa tea antika tsikiraidraike ty Jehovah?

NITAONE i Jehovah mba hiharine aze tika tsikiraidraike. (Jaona 6:44) Midika zay tie nahavazoho raha sarobily tama’o tao ty Jehovah naho fa nandineke ty ndaty agn’arivo’e tapetrisa amy ty tontolo toy eto. Vazoho i Jehovah tie tso-po rehe, sady afake mampitombo ty hatea’o aze. (1 Tan. 28:9) Fohy i Jehovah soa rehe. Taka’e soa ka ty raha tsapa’o, sady tea’e rehe. Tena mampahery ty mahafantatse izay!

2. Ino ty natao i Jesosy mba hagnampeagne antika hahatakatse tie ikokoa i Jehovah ty agnondri’e tsikiraidraike?

² Tena koko azo ty Jehovah, le hoe izay ka o rahalahi’o naho o rahavave’ò iaby. Magnampe antika hahatakatse izay ty fagnohara i Jesosy miomba i mpiarake agnondrỳ. Managne agnondry 100 o mpiarake iohoe. Naho montso ty raike amy i agnondri’e rey, le ino ty hatao i mpiarake agnondrỳ? “Enga’e am-bohitse eo i agnondry 99 rey, le mandeha reke mipay i raike nimontsoy.” Ie naho fa trea’e i agnondrỳ, le tsy iboseha’e. I reke aza fale. Ino ty lesogne ho antika? Nampitovie i Jesosy amo o mpiarake agnondry iohoe ty Jehovah. Trea amo o fagnoharagne iohoe areke fa sarobily amy i Jehovah ty agnondri’e tsikiraidraike. Hoe ty Jesosy: “Hoe izay ka fa tsy misy tea i Raeko an-dagnitse agney hisy ho montso ty raike amy i madineke rey.”​—Mat. 18:12-14.

3. Ino ty hodinehentikagne ato?

³ Azo antoke fa tsy teantika tihoe itika ty ifotora ty raha mahaboseke o rahalahio naho o rahavaventikagneo. Ino ty hagnampe antika tsy hanao raha hahaboseke ty hafa? Le ino ty azontikagne atao naho misy ndaty manao raha mahaboseke antika? Hovaleagne amy ty lahatsoratse toy o fagnonteneagne rehoe. Faie aloha izay, le andao heike hofantarentikagne tie ia ty tea i Jesosy horehafegne  amy tihoe “i madineke rey”, amy Matio toko faha–​18 aoy.

4. Ia “i madineke rey”?

⁴ O mpiana i Jesosio iaby ty tea’e horehafegne amy tihoe “i madineke rey”, ndra fire taogne iareo ndra fire taogne. Manahake o “ajajao” iareo satria vognogne handrambe ty fampianara i Jesosy. (Mat. 18:3) Sambe mino i Kristy iaby iareo, ndra tie sambe hafa aza ty fiavia iareo naho ty kolontsay iareo vaho ty toetse iareo. Izay ty mahavy i Jesosy ho tea iareo ka.​—Mat. 18:6; Jaona 1:12.

5. Ino ty tsapa i Jehovah naho fa misy ndaty manao raha mahaboseke ndra mampalahelo o vahoa’eo?

⁵ Tena sarobily amy i Jehovah “i madineke rey” iaby. Ino ty hagnampe antika hahatakatse izay? Dineho ty raha tsapantika miomba o ajajao. Tena teantika o ajajao. Teantika harovagne iareo, satria tsy ampe hery naho tsy le mahafanta-draha fire ndra mbe tsy vory hilala. Itika zao malahelo naho fa mahatrea ndaty misy mampijale. Faie tsy vita tihoe malahelo avao tika naho fa mahatrea ajaja misy mampijale, fa le vata’e boseke amy i ndaty mampijale azey. Hoe izay ka ty Jehovah. Te hiaro antikagne ty Jehovah, le malahelo reke naho fa misy ndaty manao raha mahaboseke ndra mampalahelo o vahoa’eo. Tena vignetse amy ze ndaty manao izay aza reke.​—Isaia 63:9; Mar 9:42.

6. Akore ty fihevera ty tontolo toy o mpiana i Jesosio, arake ty 1 Korintianina 1:26-29?

⁶ Nagnino ka o mpiana i Jesosio ro atao tihoe “madineke”? Ndaty manao akore moa ty hevere ty tontolo toy ho managne ty maha ie aze? Ndaty mpagnarivo, malaza, naho managne fahefagne. Faie tsy le hoe izay iaby o mpiana i Jesosio amy ty ankapobei’e. Tsy mahagaga areke naho hevere ty tontolo toy ho tsy misy dika’e naho “madineke” iareo. (Vakio ty 1 Korintianina 1:26-29.) Faie tsy hoe izay ty fivazohoa i Jehovah iareo.

7. Ino ty tea i Jehovah ho tsapantika amo o rahalahy naho o rahavaventikagneo?

⁷ Sambe tea i Jehovah iaby o mpanompo’eo, ndra fa ela ty nanompoa iareo aze ndra vaho tsy ela. Sambe sarobily amy i Jehovah iaby o rahalahy naho o rahavaventikagneo, le toko’e ho sarobily amantika ka. Toko’e ho ‘teantika iaby areke ze rahalahy amy ty finoagne ao’, fa tsy ty ila’e amy iareo avao. (1 Pet. 2:17) Toko’e hataontika tsapa iareo fa teagne iareo, sady mila mitao tika mba tsy hanao raha hampalahelo iareo. Naho mahatsapa areke tika tie nanao raha nahaboseke ndra nampalahelo ty hafa, le tsy toko’e hieretseretse tie: ‘Ino ka igne naho hahaboseke aze! Tsy toko’e hitagne am-po ka reke.’ Ino ty va’e hahavy ty ndaty ila’e ho boseke? Noho ty fomba nitezagne iareo, le va’e mieretseretse iareo tie ambane. Ty ila’e ka vaho tsy ela ro nahatrea ty hamarenagne, le mbe tsy hay iareo tie akore ty fomba hiatrehagne ty tsy fahavoririha ty hafa. Ndra inogn’ino anto’e nahavy antika ndra ty hafa ho boseke, le toko’e hataontika avao ze hampilongo antika amy ty hafa. Toko’e hikezake ka i ndaty mateteke boseke amy ty raha atao ty hafa rey mba hahatsapa tie mila miova amy ze toetse’e tsy ela boseke zay reke. Mila manao izay reke naho te hilamin-tsaigne naho hilongo soa amy ty hafa.

8. Ino ty toe-tsaigne nanagna ty ndaty tamy ty andro i Jesosy, le nisy voka’e tamo o mpiana’eo?

⁸ Ino ty nahavy i Jesosy nirehake miomba “i madineke rey”? Nisy fotoagne i mpiana’e rey nagnontane aze tie: “Ia ty fara’e lahibey amy i Fanjakà i lagnitsey ao?” (Mat. 18:1) Nihevetse ty ankamaroa o Jiosio tamy izay tie ty toeragne tana’o ty mahavy azo ho ambone noho ty hafa. Hoe ze manam-pahaiagne raike zay: “Ty hahazo voninahitse boake amy ty hafa naho ty halaza ty raha fara’e tena lahibey amo o ndatio.”

9. Ino ty raha nila natao i mpiana i Jesosy rey?

 ⁹ Nihay i Jesosy tie nila nikezake mafe o mpiana’eo mba hagnombotse am-po iareo ao i toe-tsaigne te ho ambone noho ty hafa nanagna ty Jiosy maro tamy izaỳ. Hoe reke tamy iareo: “Fa ze fara’e lahibey ama’areo eo, le ie ro toko’e ho fara’e zai’e, sady ze mitarike hanahake o mpanompò.” (Lioka 22:26) Hihevetse ty tegnantika “ho fara’e zai’e” tika naho “mihevetse ty hafa ho ambone” noho itika. (Fil. 2:3) Arakarake ty ikezahantikagne hanagne ze toe-tsaigne zay ty hahavy antika tsy hanao raha hahaboseke ty hafa.

10. Ino ty toroheve i Paoly toko’e horambesentikagne am-po?

¹⁰ Maro ty anto’e mahavy o rahalahy naho o rahavaventikagneo ho ambone noho itikagne. Ho mora amantika ty hahatrea izay naho mifantoke amy ty toetse soa iareo tika. Toko’e ho rambesentikagne am-po ty toroheve i apostoly Paoly hoahy o Korintianao toy: “Fa inogne ty mahavy azo tsy hitovy amy ty hafa? Inogne moa ty raha anagna’o tsy nimeagne azo? Fe naho mba nisy nagnomey avao rehe, nagninogne ro mirehareha mitovy amy tihoe tsy nisy nagnomey?” (1 Kor. 4:7) Mila mitao tika mba tsy hanao raha hahavy ty hafa hitsiriry antika ndra hihevetse ty vatantikagne ho ambone noho iareo. Naho misy rahalahy raike ohatse tena mahay manao lahajaka, ndra misy rahavave raike tsy sarotse ama’e ty manomboke fampianaragne Baiboly, le i Jehovah avao ro toko’e ho dera iareo.

11. Ino ty lesogne tea i Jesosy hampianaregne antika naho fa nirehake i fagnoharagne miomba ty mpanjaka raike naho ty mpanompo’ey reke?

¹¹ Nirehake fagnoharagne miomba ty mpanjaka raike naho ty mpanompo’e ty Jesosy, tafara ty nampitaoa’e o mpanonjohy azeo mba tsy hanao ze hahaboseke ty hafa. Nifoagna i mpanjakay ty trosa’e tamy i mpanompo’ey, satria hai’e tie tsy ho vita i mpanompo’ey ty handoa aze fa bey loatse. Faie tafara izay, le tsy nimete hamoagne ty trosa’e tamy ty mpanompo hafa o mpanompo iohoe, ie amy izao kedekede avao ty trosa’e tamy i mpanompo hafay. Ginadra i mpanjakay tamy ty fara’e o mpanompo raty fagnahy iohoe. Ino ty lesogne ho antika? Hoe ty Jesosy: “Hoe izay ka ty hatao i Raeko an-dagnitse agney ama’areo, naho tsy mamela ty helo ty rahalahi’areo amy ty fo’areo nareo tsikiraidraike.”​—Mat. 18:21-35.

12. Ino ty ho voka’e naho tsy mamela ty hafa tika?

¹² Nisy voka’e raty tama’e naho tamy ty hafa ty raha natao i mpanompo raty fagnahỳ. Voaloha’e, tsy namindra fo tamy i mpanompo hafay reke, fa ndra ginadra’e reke amparake ty andoava’e i trosa’ey. Faharoe, nalahelo ty mpanompo hafa nahatrea ze raha natao’e zay. Rehafe ty Baiboly fa “nalahelo mafe o mpanompo hafao naho fa nahatrea ze raha zay.” Hoe izay ka fa misy voka’e amy ty hafa ty raha ataontika. Ino ohatse ty raha hiseho naho misy ndaty manao raha mahaboseke antika faie tsy mamela aze tikagne? Voaloha’e, halahelo i ndatỳ, satria tsy mamela aze tika. Va’e hanjare tsy hidare naho tsy haneho hatea aze ka tika. Faharoe, ho soregne ty ndaty amo o fiangonagneo eo naho voamare iareo tie tsy malio fo amy i ndatỳ tikagne.

13. Ino ty ianara’o amy i rahavave raike mpisava lalagney?

¹³ Naho itika mamela o rahalahy naho o rahavaventikagneo, le handrambe soa tika naho ty hafa. Mampiseho izay zao ty raha niaigna i Crystal, mpisava lalagne raike toy. Nisy rahavave raike zay nanao raha nahaboseke aze. Le ino ty nitsapa i Crystal? Hoe reke: “Le hoe tinomboke mesa raho naho fa mea’e tsipeha’e kindraike. Tsy te hiarake ama’e iaby aza raho naho fa nanompo. Nanomboke tsy le nazoto nanompo naho tsy nifalefale areke raho.” Nieretseretse ty Crystal fa rare’e naho boseke reke. Faie tsy nitagne am-po reke ndra nifantoke tamy ty raha nitsapa’e manokagne. Niambane reke, le nampihatse ty torohevetse nitrea’e amy ty lahatsoratse manao tihoe “Mamelà Heloka Amin’ny Fonao” tamy ty Fitalakesan-davitse  15 Oktobra 1999. Namela ty helo i rahavavey ty Crystal. Hoe reke: “Tsapako hinane izao tie sambe mila mikezake tika iaby mba hiakanjo i toetse vaovaoy, amy izay ty Jehovah ho vognogne hamela ty helontikagne isan’andro. Naho fa nanao izay raho, le hoe nisy raha mavesatse nitarazoeko zay nafahagne an-tsoroko eo. Nanjare nifalefale iaby indraike raho.”

14. a) Ino ty raha va’e nitsapa i apostoly Petera, arake ty Matio 18:21, 22? b) Ino ty hagnampe antika naho mahatsapa hoe izay ka tika?

¹⁴ Toko’e hamela ty hafa tika. Faie va’e tsy ho mora amantika ty manao izay, ndra tie fa haintika aza tie izay ty toko’e hatao. Va’e izay varagne ty raha nitsapa i apostoly Petera tie indraike. (Vakio ty Matio 18:21, 22.) Ino areke ty hagnampe azo hahavita hamela heloke? Voaloha’e, saintsaigno tie impire zay ty Jehovah ro namela heloke azo. (Mat. 18:32, 33) Tsy fagneva izay tika, faie vognogne hamela antika tanterake reke. (Sal. 103:8-10) Sady toe “tsy maintsy mifankatea ka tikagne,” hoe ty Baiboly. Raha tsy maintsy atao areke tihoe mamela heloke fa tsy tihoe safidy. Trosa tsy maintsy aloantikagne amo o rahalahio naho o rahavaventikagneo tihoe mamela heloke iareo. (1 Jaona 4:11) Faharoe, saintsaigno ty ho voka’e naho mamela heloke tika. Va’e ho afake hagnampe i ndaty nanao raha nahaboseke antikagney ohatse tika. Hiharo saigne ka o fiangonagneo, ho voaaro ty fifandrambesantika amy i Jehovah, sady hilamin-tsaigne indraike tika. (2 Kor. 2:7; Kol. 3:14) Fara’e, mivavaha amy i Jehovah, i mandily antika hamela helokey. Ko engagne hanimba ty filongoantika amo o rahalahio naho amo o rahavaventikagneo ty Satana. (Efes. 4:26, 27) Mila mangatake fagnampeagne amy i Jehovah tika naho te hahavita izay.

15. Arake ty Kolosianina 3:13, ino ty raha tsy maintsy ataontika naho nanao raha nandangigne antika ty rahalahy ndra ty rahavave raike?

¹⁵ Akore naho nanao raha nandagigne azo ty rahalahy ndra ty rahavave raike? Ino ty toko’e  hatao’o? Anò ze azo’o atao mba tsy ho simba ty filongoa’areo amy i rahalahi’oy ndra i rahavave’oy. Rehafo amy i Jehovah ze raha tsapa’o. Mangataha amy i Jehovah mba hagnampea’e i ndaty nanao raha nahaboseke azoy naho hagnampea’e azo hahatrea ty toetse soa anagna i ndatỳ, agnisa izay ze toetse tena iteava i Jehovah aze. (Lioka 6:28) Naho tsy vita’o ty magnaligno i raha natao i ndatỳ, le magnatogna aze. Faie eretsereto soa ty raha toko’e horehafe’o ama’e naho ty raha toko’e hatao’o. Soa zao naho tsy mieretseretse rehe tie satrie’e ty nanao raha nahaboseke azo. (Mat. 5:23, 24; 1 Kor. 13:7) Naho fa mirehake ama’e rehe, le anò an-tsaigne avao tie tsy raty ty anto’e nanoseke aze nanao i rahay. Faie akore naho tsy te hilongo ama’o reke? Ko entem-po ndra boseke fa managna faharetagne. Fa ty tena lahibey, le mamelà aze fa ko mitagne am-po, satria va’e hanimba ty fifandrambesa’o amy i Jehovah zay. (Vakio ty Kolosianina 3:13.) Ko misy raha engagne hahaboseke azo. Naho manao izay rehe, le ho trea tie i Jehovah ro tena tea’o fara tampo’e.​—Sal. 119:165.

16. Ino ty andraikitse mila ataontika tsikiraidraike?

¹⁶ Tombotsoa sarobily tihoe manompo i Jehovah am-piraisan-tsaigne, manahake o ‘agnondry miharo raikeo’ satria ‘raike avao ty mpiarake’aze. (Jaona 10:16) Izao ty rehafe ty boke Voalamina mba Hanao ny Sitrapon’i Jehovah amy peje 165 ao: “Tombotsoa tihoe agnisa ty ndaty miharo saigne hoe izay, faie misy andraikitse mila atao’o ka.” Mila “mikezake tika mba hanagne ty fomba fivazohoa i Jehovah o rahalahio naho o rahavaveo.” “Madineke” tika, faie sambe sarobily amy i Jehovah iaby. Hoe izay ka vao ty fahatreava’o o rahalahi’o naho o rahavave’o reo? Vazoho i Jehovah ze kila raha atao’o mba hagnampeagne naho hikarakaragne iareo sady tena sarobily ama’e.​—Mat. 10:42.

17. Tapa-kevetse hanao ino tika?

¹⁷ Teantika o mpiara-manompo amantikagneo. Tapa-kevetse areke tika fa tsy hanao raha hahaboseke iareo. (Rom. 14:13) Heverentika ho ambone noho itika o rahalahy naho o rahavaventikagneo, sady irientika ty hamela iareo amy ty fontikagne. Ko engagne hahaboseke antika ty raha atao ty hafa. Ty raha toko’e hataontika aza, le ty ‘hikezake mafe hampisy filongoagne naho hifampahery.’​—Rom. 14:19.