1. Nagnino o mpanompo i Jehovah-o ro va’e hahatsapa ho irerike kindraike?

MAHATSAPA ho irerike ty ankamaroantikagne kindraike. Ty ila’e tsy maharetse ty aze. Fa ty ila’e va’e ho elaela vaho tsy hahatsiaro ho irerike sasa. Va’e hahatsiaro ho irerike aza tika ndra tie maro ty ndaty magnodidigne antika. Ino iaby ty anto’e va’e hahavy izay? Nifindra fiangonagne ty ila’e, le va’e sarotse ama’e ty hahazo namagne amy i fiangonagne vaovao misy azey. Ty ila’e zatse niarake nanao raha tamy ty keleia’e, le va’e hahatsiaro ho irerike reke naho fa misarake amy i keleia’e rey. Misy ty manigne i fotoagne niaraha’e tamy ty longo’e ndra ty nama’e tsy foe’e fa nimate rey. Va’e hahatsapa ho irerike ka ty Kristiana ila’e, lohotsie fa i aze vaho tsy ela ty nahatreava’e ty hamarenagne rey, satria enjehe ty longo’e naho ty nama’e tsy vavolombelogne.

2. Ino iaby ty fagnonteneagne ho valeantikagne ato?

² Tsy misy tsy ony i Jehovah ze kila raha manjò antika, sady taka’e soa zay. Naho fa itika mahatsiaro ho irerike, le tsapa’e soa zay, sady vognogne reke hanao raha mba hagnampeagne antika. Akore ty fomba agnampea’e antika? Ino ty azontika atao mba hahavy antika tsy hahatsapa ho irerike? Le ino ty azontika atao mba hagnampeagne ty hafa amo o fiangonagneo eo tsy hahatsiaro ho irerike? Andao hodinehentika reo.

3. Akore ty nampisehoa i Jehovah tie nihevetse ty fihetseham-po i Elia reke?

³ Tea i Jehovah ho fale o mpanompo’eo iaby. Tsy lavitse antika tsikiraidraike reke, le voamare’e naho fa malahelo tika ndra kivy. (Sal. 145:18, 19) Tena nihevetse ty fihetseham-po i Elia mpaminany ohatse ty Jehovah. Tsy mora ty raha niaigna o Israelitao tamy ty andro’e. Nenjehegne mafe ze ndaty nanompo i Jehovah tamy izay. Nanohetse i Jehovah ka ty ndaty nanagne fahefagne tagne tamy izay, le nitea iareo hovonoegne ty Elia.  (1 Mpanj. 19:1, 2) Va’e nieretseretse ka ty Elia tie i reke raike avao ty sisa ty mpaminany nanompo i Jehovah. Va’e tena ho nahakivy aze zay. (1 Mpanj. 19:10) Le avy le nanao raha malaky areke ty Jehovah mba hagnampeagne i Elia. Nagnirake anjely raike reke mba hagnomey toky o mpaminani’e tsy nivalike iohoe tie tsy irerike reke, satria mbe nisy Israelita maro tsy nivalike tamy i Jehovah.​—1 Mpanj. 19:5, 18.

4. Nagnino ty Marka 10:29, 30 ro mampiseho fa tena mikarakara i ndaty tsy le darea ty longo’e naho ty nama’e rey ty Jehovah?

⁴ Nijobogne ty hanompo i Jehovah tika. Tsy maintsy namoe raha maro ty ila’e amantika naho fa nanao izay. Agnisa izay ty fagnampea ty longo naho ty namagne tsy manompo i Jehovah. Ony i Jehovah soa i raha nafoentikagne rey. Va’e ninekoneko ty apostoly Petera, le izay ty nahavy aze nagnontane i Jesosy tie indraike tie: “Izahay fa nahafoe ze kila raha sady nagnorike azo, inogne areke ty ho azo’ay?” (Mat. 19:27) Nagnomey toky i mpiana’e rey taman-kasoa fagnahy ty Jesosy fa hahazo keleiagne ara-pagnahy maro iareo. (Vakio ty Marka 10:29, 30.) Magnomey toky ka ty Jehovah, i Babantika an-dagnitse agney, fa hagnampe ze ndaty magniry hanompo aze reke. (Sal. 9:10) Misy raha tsiampeampe azo’o atao mba hahavy azo hahazo ze fagnampeagne boake amy i Jehovah zay. Tsy hahatsiaro ho irerike rehe naho manao izay.

5. Ino ty soa ho azo’o naho misaintsaigne ty fomba agnampea i Jehovah azo rehe?

⁵ Saintsaigno ty fomba agnampea i Jehovah azo. (Sal. 55:22) Hagnampe azo tsy hahatsiaro ho irerike ty fanoagne izay. Hoe ty Carol *, rahavave raike tsy manambaly sady i reke raike avao ka ty agnate ty hamarenagne ao amy ty keleia’e: “Naho fa mandineke ty raha atao i Jehovah mba hagnampeagne ahy hahavita hiaretse i raha sarotse atreheko rey raho, le tsapako tie tsy irerike raho. Magnomey toky ahy ka rey tie mbe ho eo avao reke hagnampe ahy amy ty hoavy.”

6. Nagnino ty 1 Petera 5:9, 10 ro mampahery ze ndaty mahatsiaro ho irerike?

⁶ Saintsaigno ty fomba agnampea i Jehovah i mpiara-manompo miatreke olagne rey. (Vakio  ty 1 Petera 5:9, 10.) I Hiroshi raike avao ka ty manompo i Jehovah amy ty keleia’e fa an-tao’e maro zay. Hoe reke: “Sambe magneke tika iaby tie tsy misy ndaty tsy managne olagne zao ty amo o fiangonagneo eo. Faie mampahery i ndaty tsy manompo i Jehovah ty keleia’e rey ty mahafantatse tie manao ze azontika atao tika iaby mba hanompoagne i Jehovah.”

7. Nagnino ty vavake ro magnampe azo?

⁷ Manoa raha ara-pagnahy tsy tapake. Agnisa izay ty vavake. Naho fa mivavake rehe, le voraho amy i Jehovah ze raha am-po’o ao. (1 Pet. 5:7) Hoe ty Massiel: “Agnisa ty raha raike lahibey nagnampe ahy tsy hahatsiaro ho irerike ty fanoako vavake amy ty fo.” Nahatsiaro ho irerike o rahavave tanora iohoe, satria ie raike avao ty manompo i Jehovah amy ty keleia’e. Hoe indraike reke: “Tena nihevereko ho Babako ty Jehovah, le nivavake ama’e mateteke raho isan’andro, sady nirehafeko ama’e iaby ty raha tsapako.”

8. Nagnino ty famakiagne naho ty fisaintsaignagne ty Saontsin’Andrianagnahare ro magnampe azo?

⁸ Vakio tsy tapake ty Saontsin’Andrianagnahare, le saintsaigno ze tantara mampiseho tie tea azo ty Jehovah. Niaretse ty rehake raty natao o keleia’eo aze ty rahavave raike atao tihoe Bianca. Hoe reke: “Tena nagnampe ahy hahavita hiaretse ty famakiagne naho ty fisaintsaignagne ty tantara ty mpanompo i Jehovah amy Baiboly ao naho ty mpanompo’e amy izao, satria niatreke raha mitovy amy ty olagne atreheko iareo.” Ty Kristiana ila’e ka mikezake mitadidy i andinin-teny tena mampahery rey, agnisa izay ty Salamo 27:10 naho ty Isaia 41:10. Ty ila’e ka mirehake tie nagnampe iareo tsy hahatsiaro ho irerike ty fitsanognagne i raha nalaem-peo amy i tragnom-porarontikagne ao rey naho fa magnomagne fivoriagne ndra mamaky Baiboly.

9. Nagnino rehe ro handrambe soa naho magnatreke fivoriagne?

⁹ Mikezaha hagnatreke fivoriagne tsy tapake. Hampahery azo ty fandaharagne atao amy i fivoriagne rey, sady hahafantatse o rahalahio naho o rahavaveo ka rehe naho fa agne. (Heb. 10:24, 25) Hoe ty Massiel, i rahavave nirehafegne taloha teoy: “Nanapa-kevetse raho fa hagnatreke i fivoriantikagne rey iaby sady hagnomey toin-drehake, ndra tie ndaty sakoly aza. Nagnampe ahy hahatsapa ho agnisa ty fiangonagne ty fanoako izay.”

10. Nagnino ro tena ilaegne ty miragnetse amy ty rahalahy naho ty rahavave amo o fiangonagneo eo?

¹⁰ Mikezaha hiragnetse amy ty Kristiana tsy mivalike. Mipaliava ragnetse azo’o atao modely amo o fiangonagneo eo, ndra fire taogne reke ndra fire taogne sady ndra inogn’ino kolontsai’e. Mirehake ty Baiboly tie ‘manan-kilala o ndaty fa beio.’ (Joba 12:12) Faie ndra tie eo zay, le afake miana-draha amo o tanora tsy mivalikeo  ka o ndaty fa beio. Zay i Jonatana lavitse zao ty Davida, faie tsy nikalagne iareo tsy ho mpiragnetse maifitse zay. (1 Sam. 18:1) Ndra tie maro aza ty raha sarotse natrehe i Davida naho i Jonatana, le nifagnampe iareo mba hahafaha iareo manompo i Jehovah avao. (1 Sam. 23:16-18) Nikezake ohatse ty rahavave raike atao tihoe Irina toy mba hiragnetse amo o mpiara-manompò. Vaho tsy ela ty nahatreava’e ty hamarenagne sady ie avao ka ty manompo i Jehovah amy ty keleia’e. Hoe reke: “Tena afake ty hanjare ho rae aman-drenentikagne naho rahalahy vaho rahavaventika ara-pagnahy o mpiara-manompo amantikagneo. Iareo ty ampiasae i Jehovah hagnampe antika naho fa itika mipay fagnampeagne.”

11. Ino ty raha tsy maintsy atao’o naho tea’o ty ho mpiragnetse maifitse amy ty hafa?

¹¹ Va’e tsy ho mora ty miragnetse ama o ndaty, lohotsie naho sakoly rehe. Nianatse ty hamarenagne avao ty Ratna, rahavave raike sakoly zay, ndra tie nenjehegne aza. Hoe reke: “Nila nagneke raho tie mipay ty fagnampea o rahalahy naho o rahavave amo o fiangonagneo eò.” Va’e ho sarotse ama’o ty hirehake amy ty hafa ty raha tsapa’o. Faie naho ihe manao izay, le hanjare ho mpiragnetse amy ty hafa. Te hampahery naho hanohagne azo o nama’o rehoe, faie mila ampahafantare’o iareo ze raha azo iareo atao mba hagnampeagne azo.

12. Ino ty soa ho azo’o naho mandeha manompo rehe?

¹² Fomba raike tena soa hagnampe azo hiragnetse amy ty hafa ty fiarahagne manompo amo o rahalahio naho o rahavaveo. Hoe ty Carol, i nirehafegne taloha tagney: “Nahazo ragnetse soa maro raho naho fa niarake nanompo tamo o rahavaveo naho nanao raha hafa mifandrambe amy ty fanompoagne i Jehovah. O namako rehoe ty nampiasae i Jehovah hanohagne ahy tagnate ze taogne maro zay.” Mahasoa antika areke ty miragnetse amo o rahalahio naho o rahavaveo. Ty anto’e, iareo ty ampiasae i Jehovah mba hampahery azo naho fa kivy rehe, ndra mahatsiaro ho irerike.​—Ohab. 17:17.

13. Ino ty andraiky ty ndaty tsikiraidraike amo o fiangonagneo eo?

¹³ Managne andraikitse ty ndaty tsikiraidraike amo o fiangonagneo eo mba hampisy filongoagne naho haneho hatea amy ty ndaty iaby, amy izay tsy hisy hahatsapa ho irerike. (Jaona 13:35) Tena afake mampahery ty hafa ty raha ataontika naho rehafentikagne. Hoe ty rahavave raike toy: “Nanjare hoe keleiako o fiangonagneo naho fa nanomboke nandroso ara-pagnahy raho. Tsy ho nanjare Vavolombelo i Jehovah raho naho tsy teo iareo nagnampe ahy.” Ino ty azo’o atao mba hagnampeagne i ndaty tsy manompo i Jehovah ty keleia’e rey hahatsapa tie teagne iareo?

14. Ino ty azontika atao mba hahavy antika hanjare ho ragne o ndaty vaovaò?

¹⁴ Manoa raha voaloha’e mba hiragnetagne amo o vaovaò. Azontika rambesegne soa o ndaty vaovao amo o fiangonagneo eò, agnisa izay o ndaty vaho manomboke mivorio, o rahalahy naho o rahavave nifindra fiangonagneo ndra i aze vaho vita badisa vaho tsy ela rey. (Rom. 15:7) Faie tsy ampe avao tihoe manalama iareo. Mila mikezake tika mba hiragnetse amy iareo. Atorò areke fa soa fagnahy naho tena mihevetse iareo rehe. Ko magnontane miomba ty fiaigna’e manokagne, faie mikezaha hahatakatse ty olagne atrehe’e. Va’e ho sarotse amy ty ila’e ka ty hirehake ty fihetseham-po’e, le mitaoa mba tsy hamoresé iareo hirehake. Naho fa magnontane aze rehe, le mikezaha ho soa fagnahy naho hahay hanahatsahatse sady managna faharetagne. Azo’o atao ohatse ty magnontane iareo tie akore ty nahatreava iareo ty hamarenagne.

15. Ino ty azo o Kristiana matotseo atao mba hagnampeagne ty ndaty hafa amo o fiangonagneo eo?

 ¹⁵ Handroso ara-pagnahy ty ndaty tsikiraidraike amo o fiangonagneo eo, naho misy Kristiana matotse, lohotsie fa o androanavi-pagnahio mampiseho tie mihevetse iareo. Ty rene i Melissa avao ty niteza aze tamy ty hamarenagne tao. Hoe reke: “Tsy haiko ze hirehafagne ty hafaleako, fa tena misaotse o rahalahy nirambeseko manahake ty babako ara-pagnahy reo raho satria nanokagne fotoagne ho ahy naho nihevetse ahy iareo tagnate ze taogne maro zay. Naho fa nipay ndaty hirehafagne raho, ndra ombia zay ndra ombia, le lava nisy ndaty avao vognogne hitsanogne ahike.” Nalahelo naho nahatsapa ho irerike ka ze rahalahy tanora raike atao tihoe Mauricio zay naho fa nanjare tsy nitory sasa i mpitory nampianatse aze Baibolỳ. Hoe reke: “Natoro o androanavi-pagnahio tie nihevetse ahy iareo. Nifampirehake tamako tsy tapake iareo, niarake nanompo tamako, sady nirehafe iareo tamako ty hevetse mampahery nitrea iareo tamy ty fianaragne raike natao iareo. Niarake nanao sporo tamako ka iareo. Tena nagnampe ahy ty fanoa iareo ireo.” Sambe nanjare mpanompo marain-tsy hariva ty Melissa naho i Mauricio.

16-17. Ino ka ty raha azontikagne atao mba hagnampeagne ty hafa?

¹⁶ Manoa raha hagnampeagne aze. (Gal. 6:10) Hoe ty Leo, misionera amy ty tane lavitse ty keleia’e agne: “Mateteke, le hasoa fagnahy kedekede aseho amy ty fotoagne mete ro tena paliae’o. Tadidiko fa nisy fotoagne raho nitratse ty aksidà. Tena nikivy raho naho fa niavy tan-tragnoko agne. Faie nisy mpivaly zay nitaogne ahy hihinagne amy iareo agne. Tsy tsiaroko ty raha nihane’ay tamy izay. Faie tena tsy halignoko ty nifitsanogna iareo ahy taman-kasoa fagnahy. Nanjare tsy nikivy sasa raho tafara izay.”

¹⁷ Fale tika naho fa havoriambey faritse naho vondrom-paritse, satria afake miarake amo o mpiara-manompò sady mifampirehake miomba i fandaharagney. Faie izao ty nirehafe i Carol, i nirehafegne taloha teoy: “Tena mahatsapa ho irerike raho naho fa havoriambey faritse naho vondrom-paritse. Ty anto’e, ndra tie an-jato’e naho agn’arivo’e aza ty rahalahy naho ty rahavave magnodidigne azo amy i fotoagne  rey, le mateteke ty keleia iareo ro iaraha iareo naho miarake mitoboke amy iareo. Tena mahatsapa ho irerike raho naho fa mahatrea iareo.” Ty ila’e ka nimate valy. Tsy mora hoahy i ndaty rey ty hagnatreke havoriambey voaloha’e afara ty nimateza i vali’ey. Ihe vao mahafantatse ndaty miatreke olagne hoe ireo? Nagnino reke naho taone’o hiarake ama’o naho amy ty keleia’o amy ty havoriambey magnarake?

18. Akore ty azontika ampiharagne ty 2 Korintianina 6:11-13 naho fa mandrambe ambahiny tika?

¹⁸ Manokàgna fotoagne hiarahagne amy iareo. Naho fa misy fiarahagne ohatse omane’o hatao, le rahalahy naho rahavave sambe hafa ro taono, lohotsie fa i aze mahatsapa ho irerike rey. Ty anto’e, te ‘hagnalalake ty fontika’ amy iareo tika. (Vakio ty 2 Korintianina 6:11-13.) Hoe ty Melissa, i nirehafegne taloha teoy: “Lava fale avao zahay naho fa taone o rahalahio naho o rahavaveo ho an-tragno amy iareo agne, ndra hanao vakansy miarake amy iareo.” Misy ndaty azo’o taonegne ho an-tragno ama’areo agne ka vao ty amy i fiangona’areo eo?

19. Naho fa ombia ro va’e tena ho tea o mpiara-manompò ty anokanantikagne fotoagne hiarahagne amy iareo?

¹⁹ Kindraike le va’e ho tea o mpiara-manompò naho manokagne fotoagne hiarahagne amy iareo tika. Sarotse amy ty ila’e ohatse ty hiarake amy ty keleia iareo tsy vavolombelogne naho fa fete. Va’e tena halahelo ka ty Kristiana ila’e amy ty fotoagne ila’e. Ohatse naho fa miheregne indraike amy ty taogne magnarake, i date nimateza ty ndaty raike tsy foe’ey. Naho manokagne fotoagne hiarahagne amy ty ndaty miatreke raha hoe ireo tika, le mampiseho amy iareo tie ‘tena mikarakara’ iareo.​—Fil. 2:20.

20. Nagnino ty reha i Jesosy amy Matio 12:48-50 ao ro magnampe antika naho fa mahatsiaro ho irerike tika?

²⁰ Maro ty anto’e mahavy ty Kristiana raike hahatsapa ho irerike kindraike. Faie tsy toko’e ho halignontika fa ony i Jehovah soa naho fa mahatsapa hoe izay o mpanompo’eo. Mateteke reke ro mampiasa o mpiara-manompo amantikagneo mba hagnomey ze raha paliaentika. (Vakio ty Matio 12:48-50.) Asehontika amy i Jehovah tie mankasitrake o fandaharagne natao’e iohoe tika naho manao ze azontika atao mba hagnampeagne o rahalahio naho o rahavaveo. Ndra inogn’inogne areke tsapantika, le tsy irerike tika satria lava agnilantikagne eo avao ty Jehovah.