1-2. Ino ty fanasagne omey i Jehovah ty mpanompo’e tsy mivalike?

 AKORE ty fihevera’o i Jehovah? Va’e hamale rehe tie: ‘Babako ty Jehovah, Andrianagnahareko sady Ragneko.’ Va’e misy fomba hafa ka itokava’o aze. Faie hevere’o ho Mpampiantragno azo ka vao reke?

² Nampitovie i Davida Mpanjaka tamy ty fifandrambesa ty mpampiantragno amy ty vahini’e, ty fifandrambesa i Jehovah amo o mpanompo’e tsy mivalikeo. Nagnontane reke tie: “O Jehovah, ia ty hiambahiny an-tragnolai’o ao? Ia ty hitoboke amy i vohi’o masigney ao?” (Sal. 15:1) Ianarantika boake amo o andine’e iohoe fa ze nama i Jehovah ro rambese’e ho ambahini’e. Tena voninahitse lahibey zay!

TEA I JEHOVAH HO AMBAHINI’E TIKA

3. Ia ty ni-ambahiny i Jehovah voaloha’e, le ino ty nitsapa i Jehovah naho o ambahini’e iohoe?

³ Mbe i Jehovah raike avao ty teo taloha ty namorogna’e ze kila raha. Faie namorogne i Ana-dahi’e voaloha’ey reke naho fa niavy eo. Io ty ni-ambahini’e voaloha’e le tena nifale reke. Rehafe ty Baiboly tie “ikokoa’e” o Ana-dahi’e iohoe sady “falefale avao tie agnatreha’eo.”​—Ohab. 8:30.

4. Ia ka ty nasae i Jehovah hiambahiny an-tragnolai’e ao naho fa tafara tatoy?

⁴ Namorogne anjely maro hafa ka ty Jehovah tafara izay, le nasae’e ho ambahini’e iareo. Tokavegne tihoe “anan’Andrianagnahare” iareo sady mahafale iareo ty miarake amy i Jehovah. (Joba 38:7; Dan. 7:10) Ze niarake tamy i Jehovah tan-dagnitse agne avao hey ty ni-ambahini’e ndra niragne’e tagnate ty taogne maro. Namorogne o ndatio reke tafara tatoy,  le afake ty ho ambahini’e ka iareo. Agnisa ty ni-ambahini’e ohatse ty Enoka, i Noa, i Abrahama vaho i Joba. Natao tihoe naman’Andrianagnahare iareo satria nankatò aze sady “niarake nandeha taman’Andrianagnahare” arake ty rehafe Baiboly.​—Gen. 5:24; 6:9; Joba 29:4; Isaia 41:8.

5. Ino ty ianarantika boake amy ty faminaniagne amy Ezekiela 37:26, 27 ao?

⁵ Mbe nanasa ty nama’e ho ambahini’e avao ty Jehovah taonjato maro tafara tatoy. (Vakio ty Ezekiela 37:26, 27.) Treantika boake amy ty faminania i Ezekiela ohatse fa tena tean’Andrianagnahare hifandrambe maifitse ama’e o mpanompo’e tsy mivalikeo. Nampitamà reke fa “hanao fifagnekeam-pilongoagne amy iareo.” Rehafe o faminaniagne iohoe fa hisy fotoagne “hiharo raike” agnate i tragnolay i Jehovah agn’ohatsey ao, ze mitamà ty hiaigne an-dagnitse agne naho ze mitamà ty hiaigne an-tane etoy. (Jaona 10:16) Izay vata’e ty raha misy amy izao!

MIKARAKARA ANTIKA TY JEHOVAH NDRA AIA NDRA AIA TY MISY ANTIKA

6. Akore ty hahavy ty ndaty raike hiambahiny an-tragnolay i Jehovah ao, le aia ty misy o tragnolai’e iohoe?

⁶ Toeragne fitofatofàgne naho fiarovagne amy ty toets’andro o tragnolaio, tamy ty andro ty Baiboly. Mitamà ze ambahiny ampandrosoegne an-tragnolay tie ho voakarakara soa. Manomboke miambahiny amy i tragnolay i Jehovah agn’ohatsey ao tika naho fa manokan-tegna ho aze. (Sal. 61:4) Mahazo hanegne ara-pagnahy maro tika sady afake miarake amy ty ambahiny i Jehovah hafa. Faie tsy amy ty toeragne raike avao ty misy o tragnolai’e agn’ohatse iohoe. Va’e fa nandeha an-tane hafa agne rehe mba hagnatreke havoriambey, le nahatrea ndaty hafa tena fale satria agnate i tragnolay i Jehovah-y ao. Naho tsy mivalike amy i Jehovah rehe, le afake hiambahiny amy i tragnolai’ey ao avao ndra aia ndra aia ty misy azo.​—Apok. 21:3.

7. Nagnino tika ro afake mirehake tie mbe miambahiny an-tragnolay i Jehovah ao i ndaty tsy nivalike fa nimate rey? (Henteo i sarey.)

⁷ A manao akore i ndaty tsy nivalike nimate rey? Afake mirehake vao tika tie mbe miambahiny amy i tragnolay i Jehovah-y ao avao iareo? Ie! Nagnino tika ro mirehake izay? Satria tadidy i Jehovah iareo, le mbe velogne ty ama’e. Hoe ty Jesosy tie: “Ndra i Mosesy aza nampahafantatse amy i fitantaragne miomba i roimemỳ ao tie hatsangagne ty mate, naho fa nitoka i Jehovah tihoe ‘Andrianagnahare  i Abrahama naho Andrianagnahare i Isaka vaho Andrianagnahare i Jakoba.’ Tsy Andrianagnahare ty mate reke fa ahy ty velogne satria ama’e, le velogne iaby o ndaty reo.”​—Lioka 20:37, 38.

MANAGNE TOMBOTSOA NAHO ANDRAIKITSE TIKA

8. Ino ty soa hoazontika naho miambahiny an-tragnolay i Jehovah ao tikagne?

⁸ Natao hitofatofàgne naho hialofagne amy ty andro raty o tragnolay ara-bakitenio. Miaro ty ambahiny i Jehovah amy ty raha hanimba ty fifandrambesa iareo ama’e naho magnomey raha tamaegne iareo ka i tragnolay i Jehovah-y. Naho mifandrambe maifitse amy i Jehovah avao tika, le tsy afake hanao raha hanimbagne antika nainai’e ty Satana. (Sal. 31:23; 1 Jaona 3:8) Mbe hiaro ty mpanompo’e amy ze raha hanimba ty finoa’e avao ty Jehovah amy i tontolo vaovaoy ao sady hagnafake iareo amy ty fahafatezagne.​—Apok. 21:4.

9. Ino ty raha tea i Jehovah hatao ze ndaty miambahiny an-tragnolai’e ao?

⁹ Tena voninahitse lahibey ty miambahiny amy i tragnolay i Jehovah-y ao. Afake ty ho mpiragnetse maifitse ama’e nainai’e tika. Ino ty raha toko’e hataontika naho te ho ambahini’e avao tika? Naho misy ndaty manasa azo ho an-tragno’e agne zao ohatse, le tea’o ho fantatse tie ino ty raha tea’e hatao’o naho fa avy an-tragno’e ao rehe. Va’e tea’e ohatse naho magnafake kapa rehe aloha ty hidira’o an-tragno ao, le azo antoke fa hanao izay rehe. Teantika ho fantatse ka tie ino ty raha také i Jehovah amy ze ndaty te hiambahiny amy i tragnolai’ey ao lognandro. Teantika ty Jehovah le te hanao ze azo atao tika mba “hampifaleagne aze tanterake.” (Kol. 1:10) Maregne fa Ragnentika ty Jehovah, faie Andrianagnaharentika naho Raentika ka reke, le fagneva ty hohajaentika. (Sal. 25:14) Naho tadidientikagne zay, le lava hagnaja aze avao tika. O fagnajagne iohoe ty hikalagne antika tsy hanao raha hahavignetse aze. Azo antoke fa te ‘hiambane tika naho miharo lia aman’Andrianagnahare.’​—Mika 6:8.

TSY NAGNAVAKAVAKE TY JEHOVAH TAM-PATRAMBEY AGNE

10-11. Akore ty fomba nindesa i Jehovah o Israelitao tamy i fatrambey i Sinaỳ agne, le nagnino zay ro magnaporofo tie tsy magnavakavake reke?

¹⁰ Mitovy iaby ty fomba indesa i Jehovah ty ambahini’e. (Rom. 2:11) Ahatreavantika izay ty fomba nindesa’e o Israelitao tamy iareo tam-patrambey i Sinay agney.

¹¹ Nanendre mpisorogne hanompo amy i tragnolaỳ ao ty Jehovah tafara ty nagnafaha’e o vahoa’eo boake a Ejipta agne. Nanendre o Levitao hanao asa hafa amy i tragnolay masigney ao ka reke. Nikarakarà i Jehovah soa mandikoatse ty hafa vao ze nanompo tamy i tragnolaỳ ao ndra ze nitoboke marine aze? Oho’o! Tsy magnavakavake ty Jehovah.

12. Nagnino ty fomba nindesa i Jehovah o Israelitao tam-patrambey agne ro ahatreavagne tie tsy magnavakavake reke? (Eksodosy 40:38) (Henteo i sarey.)

¹² Ty Israelita iaby ro nanagne fahafahagne ty ho mpiragnetse maifitse amy i Jehovah ndra nanompo tamy i tragnolaỳ ao reke ndra tsy nanompo ao. Hoe izay avao ka ndra nitoboke marine i tragnolaỳ reke ndra lavitse aze. Natao i Jehovah azo antoke ohatse tie o Israelitao iaby ro afake nahita i fahagagagne miomba i rahogne naho afo tambone i tragnolaỳ teoy. (Vakio ty Eksodosy 40:38.) Naho fa nanomboke niala ohatse i rahogney mba hitarike iareo, le afake nahatrea izay  ndra ze nitoboke lavitse aza. Nangorogne ty enta’e naho ty tragnolai’e iareo, le afake niarake nandeha amy i maro rey. (Nom. 9:15-23) Naho fa nagneno ka i trompetra volafotsy roe magnambara tie fa toko’e hifindra tobey, le sambe naharey iaby iareo. (Nom. 10:2) Mazava areke, fa tsy tihoe naho mitoboke marine i tragnolaỳ eo ty ndaty raike le mifandrambe maifitse amy i Jehovah zay, fa ze lavitse aze tsy hoe izay. Ty Israelita tsikiraidraike le sambe niafake ty ho ambahiny i Jehovah, le hahazo ty fitariha’e naho ty fiarova’e. Tsy magnavakavake ka ty Jehovah ty amy izao ndra aia ndra aia ty misy antika, fa tea naho mikarakara sady miaro antika reke.

TSY MAGNAVAKAVAKE TY JEHOVAH TY AMY IZAO

13. Nagnino tika ro mirehake tie tsy magnavakavake ka ty Jehovah ty amy izao?

¹³ Mitoboke marine ty foibey ndra ty birò ty sampa ty Vavolombelo i Jehovah ty ila’e amo o vahoan’Andrianagnahareo. Misy ka ty manompo ao, le afake miara-miasa mivantagne amy ze mitarike ao. Ty hafa ka manao ty asa ty mpiandraikitse faritse ndra fanompoagne marain-tsy hariva manokagne karaza’e hafa. Faie ndra tie tsy agnisa ireo rehe, le matokia fa mbe ambahiny i Jehovah avao sady tea ze ambahini’e iaby reke. Oni’e soa ty miomba azo naho ty raha paliae’o le homei’e azo zay. (1 Pet. 5:7) Sambe mahazo hanegne ara-pagnahy boake amy i Jehovah iaby ty mpanompo’e tsikiraidraike sady mahazo ty fitariha’e naho ty fiarova’e.

14. Akore ka ty fomba hafa nanoroa i Jehovah tie tsy magnavakavake reke?

¹⁴ Trea ka tie tsy magnavakavake ty Jehovah satria natao’e afake mamaky Baiboly ze kila ndaty magneran-tane. Tamy ty voaloha’e, le tamy ty firehake telo retoa avao ty nandikagne ty Soratse Masigne: Hebreo, Aramiana naho Grike. Ze afake mamaky ty Baiboly amo o firehake reo avao vao zane ty mifandrambe maifitse amy i Jehovah fa  ty hafa tsy hoe izay? Oho’o, tsy izay.​—Mat. 11:25.

15. Akore ka ty ahatreavagne tie tsy magnavakavake ty Jehovah? (Henteo i sarey.)

¹⁵ Tsy miankigne amy ty fianaragne ambone nataontika ndra ty fahaiantika o firehake telo nandikagne o Baibolio reo ty hahavy antika ho nama’e i Jehovah. Ty ndaty iaby magneran-tane ty nampahafantare i Jehovah ty fahendreagne amy ty Saontsi’e ao fa tsy ze ndaty nanao fianaragne ambone avao. Nadika amy ty firehake agn’arivo’e areke o Baibolio, le ndaty maro magneran-tane ty afake mandrambe soa boake amy ty fampianaragne agnate’e ao, agnisa izay ty toko’e hatao mba hanjare ragne i Jehovah.​—2 Tim. 3:16, 17.

ANÒ ZE HAHAVY AZO ‘HANKASITRAHA’ I JEHOVAH LOGNANDRO

16. Arake ty Asan’ny Apostoly 10:34, 35, akore ty hahavy antika hankasitraha i Jehovah avao?

¹⁶ Tena tombotsoa lahibey tihoe rambese i Jehovah ho ambahini’e amy i tragnolai’e agn’ohatsey ao. Fara izay ty soa fagnahy, bey hatea sady tea mandrambe ambahiny reke. Tsy vita izay fa tsy magnavakavake reke, le rambese’e iaby ze kila ndaty ndra aia ndra aia ty misy aze, le ndra inogn’ino ty fiavia’e, ty fianaragne natao’e, ty karaza’e, ty foko’e, ndra lahilahy reke ndra ampela. Faie ze mankatò aze ro rambese’e ho ambahini’e.​—Vakio ty Asan’ny Apostoly 10:34, 35.

17. Aia ka ty hahatreavantika fagnazavagne fagnampe’e miomba ty raha hagnampe antika ho ambahiny i Jehovah lognandro?

¹⁷ Nagnontane hoe izao ty Davida amy Salamo 15:1 ao tie: “O Jehovah, ia ty hiambahiny an-tragnolai’o ao? Ia ty hitoboke amy i vohi’o masigney ao?” Ireke avao naho fa niavy eo ty nampanorate i Jehovah ty vale o fagnonteneagne reo. Hodinehentika amy ty lahatsoratse magnarake ty raha ila’e toko’e hataontika mba hampifaleagne i Jehovah naho ty hahavy antika ho ragne’e lognandro.