1-2. Niforogne i Jehovah ho fale tika naho fa magnomey hoahy ty hafa. Nagnino zay ro mahasoa antikagne?

 NAHO fa namorogne antika ty Jehovah, le natao’e ze hahavy antika hahatrea hafaleagne naho fa magnomey hoahy ty hafa. (Asa. 20:35) Midika vao zay tie tsy ho sambatse tikagne naho fa mea o ndatio raha? Oho’o. Fale zao tikagne naho fa mey o ndaty fagnomezagne. Faie mandikoatse ty hafaleagne tsapantikagne naho fa mandrambe, ty hotsapantikagne naho fa magnomey. Naho ty maregne, le tena mahasoa antikagne ze fomba namorogna i Jehovah antikagne zay. Ino ty anto’e?

² Noho ze fomba namorogna i Jehovah antikagne zay, le azontikagne atao ty mampitombo ty hafaleantikagne. Vao mainke hofale tika naho mipay fomba hagnomezagne hoahy ty hafa sady manao izay. Trea tie tena fanjaka ty fomba namorogna i Jehovah antikagne!​—Sal. 139:14.

3. Nagnino ty Jehovah ro rehafegne tie “Andrianagnahare falefale”?

³ Rehafe ty Baiboly tie mahasambatse ty magnomey. Tsy mahagaga areke naho atao tihoe “Andrianagnahare falefale” ty Jehovah. (1 Tim. 1:11) Ireke ty voaloha’e nagnomey sady tsy misy mahavita magnomey mihoatse ty raha omea’e. Noho ireke ty mahavy antikagne ho “velogne naho mihetseke sady misy” arake ty nirehafe i apostoly Paoly. (Asa. 17:28) Naho ty maregne, le boake amy i Jehovah ze “fagnomezagne soa naho ze fagnomezagne voririke iaby.”​—Jak. 1:17.

4. Ino ty hagnampe antikagne vao mainke ho fale?

⁴ Sambe te hahatsapa i fifaleagne azo naho fa magnomeỳ itikagne iaby. Hahatsapa izay tikagne naho fa matarike manahake i Jehovah. (Efes. 5:1) Hodinehentikagne amy ty lahatsoratse toy ty ohatse fanjaka nimea i Jehovah. Hohenteantikagne ka ty raha azontikagne atao naho tsy mankasitrake ty raha ataontikagne ho aze ty hafa. Handrisike antika hazoto magnomey  sady ho fale avao naho fa manao izay o faniahiagne reo.

MIKEZAHA HATARIKE MANAHAKE I JEHOVAH

5. Inogne iaby ty raha mey i Jehovah antikagne?

⁵ Inogne iaby ty mampiseho tie matarike ty Jehovah? Dineho ty ohatse retoagne. Magnomey ze raha ilaentikagne ty Jehovah. Ndra tie tsy manao ze hahavy antikagne hieragneragne aza ty Jehovah, le atao’e azo antoke tie mahazo ze raha ilaentikagne tika. Mea’e hanegne, akanjo naho tragno hitobohagne ohatse tikagne. (Mat. 6:31-33; 1 Tim. 6:6-8) Tsy maintsy magnomey o raha ilaentikagne reo vao ty Jehovah? Oho’o, tsy voatere manao izay reke! Faie nagnino reke ro manao izay amantika?

6. Ino ty ianarantikagne boake amy ty Matio 6:25, 26?

⁶ Noho ty hatea i Jehovah antikagne, le magnomey ze raha ilaentikagne ara-nofo reke. Mareho ty raha nirehafe i Jesosy amy Matio 6:25, 26 ao. (Vakio.) Nampiasa ohatse boake amo o raha finorogneo ty Jesosy. Izao ty nirehafe’e naho fa nirehake miomba o vorogneo reke: “Tsy mitongy ndra mandrofotse ndra mamory an-driha iareo.” Mareho ty reha’e magnarake toy: “Faie mea i Rae’areo an-dagnitse agney hanegne.” Nagnontane hoe izao ty Jesosy tafara izay: “Tsy mihoatse irey vao ty hasarobili’areo?” Ino ty lesogne ho antikagne? Sarobily amy i Jehovah mandikoatse o bibio ty mpanompo’e tsy mivalike. I Jehovah aza magnomey ze raha ilae o bibio, somandrake vao tikagne tsy hokarakarae’e! Manahake ty atao o raeo, le noho ty hatea ty mahavy i Jehovah magnomey ze raha ilae ty keleia’e.​—Sal. 145:16; Mat. 6:32.

7. Ino ty fomba raike anoroantikagne tie matarike manahake i Jehovah tikagne? (Henteo i sarey.)

⁷ Manahake i Jehovah, le noho ty hatea ty mahavy antikagne magnomey hoahy ty hafa. Mahafantatse rahalahy ndra rahavave toko’e homeagne hanegne ndra akanjo vao ohatse rehe? Afake mampiasa azo mba hagnomey aze ze raha ilae’e zay ty Jehovah. Tena matarike o vahoa i Jehovah-o naho fa misy loza miseho. Tamy ty arete-manjamagne COVID-19 ohatse, le nagnomey hanegne, akanjo vaho ze raha hafa hoahy ze ndaty nila izay o rahalahy naho o rahavaveo. Maro ka ty nanao fagnomezagne hoahy ty asa magneran-tane. Nahafahagne nanohagne ze rahalahy niazom-boigne magneran-tane zay. Nampihatse ty Hebreo 13:16 toy o rahalahy matarike reo: “Ko haligno ty manao ty soa naho ty mizara amy ty hafa, fa mahafale an’Andrianagnahare ty sorogne hoe izay.”

8. Ino ty vitantikagne noho i Jehovah magnomey hery antikagne? (Isaia 40:29)

 ⁸ Magnomey hery ty Jehovah. Managne hery lahibey ty Jehovah sady tena mahafale aze ty magnomey o mpanompo’e tsy mivalikeo o heri’e iohoe. (Vakio ty Isaia 40:29.) Fa nisy fotoagne vao rehe nangatake hery tamy ty alala ty vavake mba hahavy azo hahatohetse tsapa hevetse ndra mba hiareta’o raha sarotse? Va’e fa nivavake mba hahazo hery hahavita’o ty raha hatao agnate ty andro raike ka rehe. Naho fa trea’o tie nivale i vavake natao’oy, le azo antoke fa hitovy hevetse amy i apostoly Paoly rehe. Hoe reke: “Managne hery hiatrehagne ze raha miseho raho, fa misy magnomey hery ahy.”​—Fil. 4:13.

9. Inogne iaby ty fomba azontikagne ampiasaegne ty herintikagne mba ho fanahafantikagne i Jehovah? (Henteo i sarey.)

⁹ Ndra tie tsy voririke aza tikagne, le afake magnomey ty herintikagne hoahy ty hafa manahake i Jehovah ka. Tsy midika zay tie homeantikagne ty hafa ara-bakiteny ty herintikagne. Faie azontikagne atao ty mampiasa ty herintikagne mba hagnampeagne ty hafa. Magnampe ze fa antetse ndra o rahalahy naho o rahavave marareo ohatse tikagne, naho fa mikarakara ty tragno iareo ndra manao bezara hoahy iareo. Afake manolo-tegna an-tsitrapo mba hagnampe amy ty fagnaliovagne naho ty fikojakojagne ty Anjomba i Fanjakagney ka tikagne naho afake manao izay. Naho ampiasaentikagne mba hanoagne o raha reo ty herintikagne, le tena handrambe soa o rahalahy naho o rahavaveo.

10. Akore ty hagnatanjahantikagne ty hafa amy ty alala ty raha rehafentikagne?

¹⁰ Ko haligno fa afake magnatanjake ty hafa amy ty alala ty raha rehafentikagne ka tika. Ia zao ty ndaty fanta’o tie mila anoagne rehake fideragne? Mahafantatse ndaty mila fampaherezagne vao rehe? Nagnino naho ampahafantare’o ze ndaty zay tie tena te hagnampe aze rehe? Afake mitilike aze rehe, miantso aze, ndra mandefa karatse misy rehake mampahery, e-mail, ndra sms. Ko le minekoneko miomba ty raha horehafe’o. Va’e ho rehake tsotra boake amy ty fo avao ty ilae o rahalahy naho o rahavaveo mba hahavy iareo tsy hivalike ndra mba hahavy iareo hanan-draha tamaegne.​—Ohab. 12:25; Efes. 4:29.

11. Akore ty atao i Jehovah naho fa magnomey ty fahendrea’e hoahy ty hafa reke?

¹¹ Magnomey fahendreagne ty Jehovah. Hoe ty Jakoba mpianatse: “Naho misy ama’areo mbe tsy ampe fahendreagne, le mangataha lognandro aman’Andrianagnahare fa matarike amy ze kila ndaty reke sady tsy magnomey tsiny.” (Jak. 1:5; f.a.p.) Atoro o andine’e iohoe fa  tsy tana i Jehovah ho aze raike avao i fahendrea’ey. Tena matarike reke, le mizara io amy ty hafa. Rehafe i Jakoba eo ka fa naho fa magnomey fahendreagne ty Jehovah, le “tsy magnomey tsiny.” Tsy atao’e ze hahavy antikagne ho megnatse naho fa mangatake ty tari-dala’e tikagne. Ireke aza mandrisike antikagne hangatake io ama’e.​—Ohab. 2:1-6.

12. Akore ty fomba azontikagne izaràgne ty raha fantantika amy ty hafa?

¹² Akore ty amantikagne? Afake mizara ty fahendreantikagne manahake i Jehovah ka vao tikagne? (Sal. 32:8) Maro ty fomba azo o mpanompo i Jehovah-o izaràgne amy ty hafa ze raha nianara iareo. Mampiofagne ze mpitory vaovao ohatse tikagne naho fa amy i fanompoagney ey. Manam-paharetagne ka o androanavi-pagnahio naho fa magnampe ty mpagnampe amy ty fiangonagne naho ty rahalahy vita badisa hanao ty andraiky iareo amo o fiangonagneo eo. Ze rahalahy naho rahavave managne traikefa amy ty fagnamboaragne ndra fikojakojagne o tragnò ka, le mampiofagne ty hafa mba hahay hamboatse ndra hikojakoja ze tragno ampiasaegne amy ty fanompoagne i Jehovah.

13. Akore ty azontikagne anahafagne i Jehovah naho fa mampiofagne ty hafa?

¹³ Mikezaha hanahake i Jehovah naho fa mampiofagne ty hafa. Ko haligno fa matarike ty Jehovah naho fa magnomey fahendreagne. Afake mizara maimaim-poagne ze raha fantantikagne amy ty hafa ka tika. Tsy toko’e hieretseretse tikagne tie, ke ndra hampanoegne ty ndaty ampiofagneko toy i asakoy. Va’e hahavy antikagne tsy hazoto hampiofagne ty hafa ze raha zay. Tsy hanao hoe izao ka tikagne tie: ‘Engao ka reke hampianatse ty vata’e avao. Iraho aia tsy nisy nampiofagneo!’ Tsy toko’e hanagne eretseretse hoe izay o vahoa i Jehovah-o. Tsy izay ty hataontikagne, fa hanao ze azontikagne atao tika mba hizaràgne ze raha fantantikagne amy ze ndaty ampiofagnentikagne. (1 Tes. 2:8) Teantikagne iareo naho mba “hahay hampianatse ty hafa” ka. (2 Tim. 2:1, 2) Naho sambe tea mizara ty raha fantantikagne tika iaby, le sambe hanagne fahendreagne naho sambe ho fale.

AKORE NAHO TSY MANKASITRAKE TY RAHA NATAONTIKAGNE HOAZE I NDATỲ?

14. Akore ty atao ty ankamaroa o ndatio naho fa manao raha hoahy iareo tikagne?

¹⁴ Naho fa manao raha hoahy ty hafa tikagne, lohotsie fa amo o rahalahy naho o rahavaveo, le mateteke iareo ro misaotse antikagne. Va’e handefa sms iareo le hisaotse antikagne ndra hipay fomba hafa mba hanoroa iareo ty fankasitraha iareo antikagne. (Kol. 3:15) Vao mainke mahatsiaro ho sambatse tikagne naho misaotse antika iareo.

15. Ino ty toko’e ho tadidientikagne naho tsy mankasitrake ty raha ataontikagne hoahy iareo ty hafa?

¹⁵ Faie kindraike le tsy mba mankasitrake ty raha ataontikagne hoahy iareo o ndatio. Va’e tsy ho tsapa’e iaby aza ty fotoagne, ty hery vaho ty vola nilanintikagne mba hanoagne raha hoaze. Naho izay ty miseho, ino ty hagnampe antikagne mba ho fale avao ndra tsy ho diso tamà? Ko haligno i rehake amy i andinin-teny fototse hoahy ty fianaragne toy amy Asan’ny Apostoly 20:35 aoy. Tsy miankigne amy ty havale i ndatỳ ty hafaleagne tsapantikagne naho fa magnomey. Mifily ty hagnomey am-pifaleagne avao tikagne ndra tie tsy mankasitrake aza ty hafa. Ino ty hagnampe antikagne hahavita izay? Dineho retoagne:

16. Ino ty toko’e hifantohantikagne naho fa magnomey raha hoahy ty hafa tika?

¹⁶ Ko haligno fa manahake i Jehovah rehe naho fa magnomey. Magnomey raha soa maro hoahy o ndatio reke ndra mankasitrake iareo ndra tsy mankasitrake izay. (Mat. 5:43-48)  Mampitamà ty Jehovah tie naho magnomey tikagne faie tsy “mitamà vale’e”, le ho ‘lahibey ty valesoantikagne.’ (Lioka 6:35) Va’e ho agnisa o “vale’e” iohoe ty rehake fisaoragne. Ndra tie misy mankasitrake tikagne ndra tsy misy, le hamale soa antikagne ty Jehovah noho itika nagnampe ty hafa sady ‘nagnomey am-pifaleagne.’​—Ohab. 19:17; 2 Kor. 9:7.

17. Ino ty toko’e hataontikagne an-tsaigne avao naho fa magnomey hoahy ty hafa? (Lioka 14:12-14)

¹⁷ Manahake i Jehovah ka tikagne naho fa mampihatse i toro lalagne nirehafe i Jesosy amy Lioka 14:12-14 aoy. (Vakio.) Tsy raty tihoe manasa ty hafa hiarake hihinagne amantikagne ndra maneho hasoa fagnahy amy iareo ndra tie fa haintikagne aza fa hanao hoe izay amantika ka iareo. Faie akore naho mahatsapa tikagne tie, mitamà ty hamalea ty hafa i raha nataontikagne ho azey tika? Naho izay ty raha misy, le mba ampiharo i toro lalagne nirehafe i Jesosỳ. Azontika atao ty manasa ze ndaty haintika tie tsy ho afake hanasa antika. Ho fale tikagne amy izay satria mikezake manahake i Jehovah. Lava ho fale avao tikagne naho fa magnomey sady tsy mitamà vale’e ndra tie tsy mankasitrake i raha natao ho azey aza ty hafa.

18. Ino ty raha tsy toko’e hoeretseretentikagne miomba ty hafa, le ino ty anto’e?

¹⁸ Ko mieretseretse tie tsy mahay mankasitrake reke. (1 Kor. 13:7) Dineho zao naho fa misy ndaty tsy mankasitrake azo: ‘Tena tsy mahay mankasitrake vao reke sa nihaligno’e avao ty mba nisaotse?’ Va’e misy anto’e hafa ka varagne nahavy aze tsy nisaotse antikagne. Va’e misy ndaty ila’e tena mahay mankasitrake faie sarotse ama’e ty mirehake izay. Ty ila’e ka va’e ho megnatse naho fa ampeagne satria zatse nagnampe ty hafa reke tie taloha. Faie teantikagne o rahalahy naho o rahavaveo, le tsy hieretseretse tikagne tie tsy mahay mankasitrake iareo. Ho fale hagnomey iareo avao tikagne naho fa tsy mieretseretse izay.​—Efes. 4:2.

19-20. Nagnino tikagne ro toko’e hahaligne naho fa manao raha hoahy ty hafa? (Henteo i sarey.)

¹⁹ Mahalignisa. Izao ty nisorate i Solomona Mpanjaka hendre: “Atoraho ambone rano ey  ty mofo’o, fa ho trea’o indraike reke naho fa afake andro maro.” (Mpito. 11:1) Treantikagne boake amo o rehake reo, fa va’e hanoro ty fankasitraha’e antikagne ty ndaty ila’e “naho fa afake andro maro.” Misy ohatse raike magnamaregne izay toy.

²⁰ Taogne maro lasa zay, le nanoratse taratasy mampahery hoahy ty rahavave vaho vita badisa ty valy ty mpiandraikitse faritse raike. Nirisihe’e i rahavavey mba tsy hivalike amy i Jehovah. Faie valo taogne tafara tatoy reke vaho namale i taratasỳ. Izao ty nisorate’e: “Teako hampahafantaregne azo fa tena nagnampe ahy tagnate ty taogne maro i raha nisorate’oy.” Izao ty natohi’e aze: “Rehake mamy ty nisorate’o tao sady tsy ombia ho halignoko i andinin-teny sinora’oy.” a Nirehake hoe izao reke naho fa boake nagnazava ty raha sarotse natrehe’e: “Kivy raho kindraike, le nainako hengagne iaby ze kila raha agnisa izay ty fanompoagne i Jehovah. Faie tsy niala am-poko ao i andinin-teny nisorate’oy, le izay ty nagnampe ahy hanompo i Jehovah avao. Agnisa ty tena nagnampe ahy tagnate ze valo taogne zay i raha nisorate’oy.” Eretsereto ty nitsapa i valy i mpiandraikitse faritsey naho fa nahavoarae i taratasỳ “andro maro” tafara tatoy. Va’e andro maro afara atoy ka vaho hankasitrake ty raha nataontikagne ho aze o ndatio.

21. Nagnino rehe ro tapa-kevetse ty hatarike manahake i Jehovah?

²¹ Nimea i Jehovah fahaiagne manokagne tikagne arake ty nirehafegne tam-boaloha’e tey. Maregne fa mahafale tihoe mandrambe raha boake amy ty hafa, faie mandikoatse izay ty ho tsapantikagne naho fa itika magnomey. Mahatsapa ho velombelogne tikagne naho magnampe o mpiara-manompò. Tena fale ka tika naho fa mankasitrake antikagne iareo. Faie ndra tie tsy mankasitrake aza iareo, le afake ty ho fale avao tikagne satria manao ty soa. Ko haligno fa ndra inogn’ino raha mea’o ty hafa, le ‘hagnomey azo mandikoatse izay ty Jehovah.’ (2 Tan. 25:9) Bey lavitse mandikoatse ze nimea’o ty hafa areke ty valesoa homea i Jehovah azo. Tsy misy mahafale mandikoatse tihoe, mea i Jehovah valesoa. Andao areke tikagne ho tapa-kevetse hatarike manahake i Babantikagne an-dagnitse agney.