1. Ino ty hatao i Jesosy tsy ho ela?

 MIOVAOVA ze o fotoagne iaignantika zao! Tsy ho ela ty Jesosy, le hitsara ze ndaty iaby ambone tane etoy. Nampahafantare i Jesosy antikagne tie fa mihamarine o fotoagne hitsara’e iohoe. Nirehake “famantaragne” miomba “ty fifaragna ty tontolo toy” tamy i mpiana’e rey ka reke. (Mat. 24:3) Trea amy Matio toko 24 naho 25, vaho amy Marka toko 13 naho amy Lioka toko 21 ao o famantaragne rehoe.

2. Ino ty hodinehentikagne amy ty lahatsoratse toy, le nagnino zay ro hagnampe antikagne?

² Nampiasa fagnoharagne telo ty Jesosy mba hagnampeagne antika hiomagne naho hitao. Nirehake fagnoharagne miomba ty agnondry naho ty ose, virjiny mahimbagne naho minegne vaho miomba ty talenta reke. Asongady ty tsikiraidraike amo o fagnoharagne reo tie, miankigne amy ty raha ataontikagne avao ty hitsaràgne antikagne. Hodinehentikagne amy ty lahatsoratse toy ty lesogne rambesentikagne boake amo o fagnoharagne rehoe, naho ty fomba hampiharantikagne aze. Ty fagnoharagne miomba i agnondry naho i osey ty hodinehentika voaloha’e.

TY AGNONDRY NAHO TY OSE

3. Ombia ty Jesosy ro hitsara o ndatio?

³ Nasongady i Jesosy tamy i fagnoharagne miomba i agnondry naho i osey, fa miankigne amy ty fandrambesa o ndatio i talily soay naho ty fanohagna iareo i rahalahi’e voahosotse rey  ty hitsaràgne iareo. (Mat. 25:31-46) Amy i “haoreagne lahibeỳ,” zane hoe aloha i Haramagedonay ty hitsara’e tie agnondry ndra ose ty ndaty raike. (Mat. 24:21) Manahake ty atao ty mpiarake magnambake ty agnondry amy ty ose ty hatao i Jesosy. Hagnambake ze ndaty nanohagne o rahalahi’e voahosotseo amy ze tsy nanohagne iareo reke.

4. Arake ty Isaia 11:3, 4, nagnino tikagne ro matoky tie hanao ty rare’e ty Jesosy naho fa hitsara o ndatio? (Henteo i sare amy i fogno’ey.)

⁴ Rehafe ty faminaniagne amy Baiboly ao fa tinendre i Jehovah ho Mpitsara ty Jesosy. Azo antoke fa hanao ty rare’e lognandro reke naho fa hitsara. (Vakio ty Isaia 11:3, 4.) Mandineke ty findesam-bata o ndatio, ty toe-tsai’e vaho ty raha rehafe’e areke ty Jesosy. Tafilitse amy izay ty fomba indesa iareo i rahalahi’e voahosotse rey. (Mat. 12:36, 37; 25:40) Ho fanta’e soa ty amy izay ze ndaty nanohagne o rahalahi’e voahosotse reo naho ty asa natao iareo. a Manohagne o rahalahy i Kristy reo ty ndaty raike naho fa magnampe iareo amy i asa fitoriagney. Hanjare ho agnisa ty “ndaty maregne” sady hahazo i “havelogne nainai’e” ambone tane etoỳ ze manao izay. (Mat. 25:46; Apok. 7:16, 17) Tena fanjaka ty valesoa mandigne iareo! Ho amy i “boke i fiaignagney” ao avao ty agnara iareo naho fa tsy mivalike iareo amy i haoreagne lahibeỳ naho afara izay.​—Apok. 20:15.

5. Ino ty lesogne ianarantikagne boake amy i fagnoharagne miomba i agnondry naho i osey, le ia ty mandrambe soa boake amy io?

⁵ Atorò tie tsy mivalike rehe. Ty ndaty mitamà hiaigne an-tane etoy ty tena ifantoha i fagnohara i Jesosy miomba i agnondry naho i oseỳ. Atoro iareo tie manam-pinoagne iareo naho fa magnampe o rahalahy Kristy reo amy ty asa fitoriagne naho magneke ty tari-dalagne boake amy ty mpanompo azo atokisagne naho mahimbagne. (Mat. 24:45) Mila magnorike i fampitaoagne trea amy i fagnoharagne miomba i agnondry naho i osey ka ze mitamà hiaigne an-dagnitse agne. Ino ty anto’e? Satria mandineke ty findesam-bata iareo, ty toe-tsay iareo vaho ty raha rehafe iareo ty Jesosy. Tsy maintsy mampiseho ka iareo tie tsy mivalike. Noho izay le nirehake fagnoharagne roe hafa ty Jesosy mba ho fampitaoagne o voahosotseo. Amy Matio toko 25 ao ty ahatreavantikagne o fagnoharagne rehoe. Andao areke tika handineke i fagnoharagne miomba i virjiny mahimbagne naho i virjiny minegne rey.

I VIRJINY MAHIMBAGNE NAHO I VIRJINY MINEGNE REY

6. Akore ty nampisehoa i virjiny dime rey tie mahimbagne iareo? (Matio 25:6-10)

⁶ Amy i fagnoharagne miomba i virjinỳ, le nirehake miomba ty virjiny folo niakatse hitsena mpagnenga vao ty Jesosy. (Mat. 25:1-4) Sambe nitamà ty hiarake amy i mpagnenga vaoy amy i fete beỳ ao iareo iaby. Nirehafe i Jesosy fa ty dime amy iareo “mahimbagne”, le ty dime ambi’e “minegne.” Niomagne sady niambegne avao i virjiny mahimbagne rey. Vognogne handigne i mpagnenga vaoy avao iareo ndra tie halem-bey aza ty hiavia’e. Izay ty nahavy iareo ninday menake amy izay velogne avao i jiro iareoy amy i halegney. Ninday menake mihoatse avao ka iareo ke ndra ho tara i mpagnenga vaoy. Fa niomagne areke iareo mba hovelogne avao i jiro iareoy. (Vakio ty Matio 25:6-10.) Naho fa niavy i mpagnenga vaoy, le niarake ama’e amy i fete beỳ ao i virjiny mahimbagne rey. Hoe izay avao ka fa ze Kristiana voahosotse mampiseho tie miambegne naho tsy  mivalike amparake ty iavia i Jesosy, i Mpagnenga vaoy, le hiarake ama’e amy i Fanjakà’e an-dagnitse agney. b (Apok. 7:1-3) A manao akore ty miomba i virjiny dime minegne rey?

7. Ino ty nanjò i virjiny dime minegne rey, le ino ty anto’e?

⁷ Tsy nivognogne nanahake i virjiny mahimbagne rey i virjiny minegne rey naho fa niavy i mpagnenga vaoy. Fa milirelire i jiro iareoy faie tsy ninday menake fagnampe’e iareo. Naho fa nirey iareo tie fa marine ho avy i mpagnenga vaoy, le nandeha malaky iareo nivily menake. Ie nandeha iareo niavy i mpagnenga vaoy. Tamy ze fotoagne zay, le “niarake amy i mpagnenga vaoy nizilike amy i tragno misy i fete beỳ agne, i ampela virjiny fa nivognogne soa rey, le narindrigne i lalagney.” (Mat. 25:10) Niavy i virjiny minegne rey tafara izay sady nite hilitse faie hoe i mpagnenga vaoy tamy iareo: “Tsy fantako nareo.” (Mat. 25:11, 12) Tsy nivognogne handigne i mpagnenga vaoy hatrake amy ty fara’e o virjiny rehoe. Ino ty azo o voahosotseo ianaragne boake amy izay?

8-9. Ino ty lesogne rambese o voahosotseo boake amy i fagnoharagne miomba i virjinỳ? (Henteo i sarey.)

⁸ Atorò tie vognogne sady miambegne rehe. Tsy nirehake ty Jesosy tie hisy fizarà’e roe o voahosotseo, le ty raike hahaligne amparake ty hifaragna ty tontolo toy fa ty raike tsy hoe izay. Te hagnazava amantikagne ty raha hanjò o Kristiana voahosotseo avao reke naho tsy miomagne hiaretse hatrake am-para’e iareo. Naho izay ty miseho, le tsy hahazo ty valesoa’e iareo. (Jaona 14:3, 4) Tsy solesole zay! Ndra mitamà ty hiaigne an-dagnitse agne tikagne ndra an-tane etoy, le toko’e sambe hagnorike soa i fampitaoagne amy i fagnoharagne miomba i virjinỳ aoy. Mila miambegne sady miomagne vaho vognogne ty hiaretse hatrake am-para’e areke tikagne tsikiraidraike.​—Mat. 24:13.

⁹ Nasongady i Jesosy tamy i fagnoharagne miomba i virjinỳ fa tena ilaegne ty miomagne  naho miambegne lognandro. Tafara izay reke, le nirehake fagnoharagne miomba ty talenta. Asongady o fagnoharagne iohoe fa tena ilaegne ty mazoto miasa.

I TALENTAY

10. Akore ty nampisehoa i mpanompo roey tie azo atokisagne iareo? (Matio 25:19-23)

¹⁰ Amy i fagnoharagne miomba i talentay, le nirehake mpanompo roe natokisa ty tompo’e naho mpanompo raike tsy natokisa’e ty Jesosy. (Mat. 25:14-18) Trea tie azo atokisagne i mpanompo roe rey naho fa niasa mafe mba hampitomboagne i vola i tompo’ey. Taloha ty nandehana i tompo iareoy an-tane hafa agne, le nagnankigne talenta tamy iareo reke. Tena vola bey o talenta reo. Nazoto niasa sady nampiasa tamy ty fomba soa i volay i mpanompo roe azo atokisagney. Ino ty voka’e? Naho fa nimpoly i tompo iareoy, le nampitomboe’e indroe ty vola nimea’e iareo. Nidera iareo i tompo iareoy sady ‘niara-pale ama’e’ iareo. (Vakio ty Matio 25:19-23.) Faie nanao akore ty miomba i mpanompo fahateloy? Akore ty natao’e tamy i vola nimea i tompo’ey azey?

11. Ino ty nanjò i mpanompo “kamoy,” le ino ty anto’e?

¹¹ Nahazo talenta raike i mpanompo fahateloy faie “kamo.” Nitamà i tompo’ey fa mba hampiasae’e amy ty fomba soa i talentay. Faie tsy izay ty natao’e fa ndra naleve’e i rahay. Naho fa niheregne i tompo’ey, le i talenta raikey avao ty nahere’e ama’e. Tsy nanagne toe-tsaigne soa o mpanompo iohoe. Tsy mba niala tsiny tamy i tompo’ey reke noho ireke tsy nampitombo i volay fa ndra natao’e tihoe “ndaty sarotsarote’e” i tompo’ey. Tsy nankasitraha i tompo’ey o mpanompo iohoe. Tsy vita izay fa nalaegne ama’e i talentay sady rinoake iaby reke.​—Mat. 25:24, 26-30.

12. Manondro an’ia i mpanompo roe azo atokisagney ty amy izao?

¹² Manondro o Kristiana voahosotse tsy mivalikeo i mpanompo roe azo atokisagney. Nanasa iareo ‘hiarake hifale ama’e i tompo [iareoy]’ zane hoe i Jesosy. Hahazo ty valesoa iareo an-dagnitse agne iareo, le ty famelomagne voaloha’e. (Mat. 25:21, 23; Apok. 20:5b)  Faie fampitaoagne hoahy o voahosotseo avao ka i mpanompo kamoy. Nagnino tikagne ro mirehake izay?

13-14. Ino ty lesogne ianara o voahosotseo boake amy i fagnoharagne miomba i talentay? (Henteo i sarey.)

¹³ Atorò tie mazoto rehe. Manahake i fagnoharagne miomba i ampela virjinỳ avao, le tsy tihoe hanjare ho kamo ty ila’e amo o voahosotse reo naho fa nirehake i fagnoharagne miomba i talentay ty Jesosy. Te hagnasongadigne avao reke tie, ino ty raha hiseho naho manjare kamo o voahosotseo. Naho manjare kamo iareo, le tsy “ho tokavegne sady tsy ho voafily.” Tsy hengagne hizilike amy i Fanjakagne an-dagnitse agney ka iareo.​—2 Pet. 1:10.

¹⁴ Trea boake amy i fagnohara i Jesosy miomba i ampela virjiny rey naho i talentay, fa tsy maintsy miomagne sady miambegne lognandro ty Kristiana voahosotse tsikiraidraike sady tsy maintsy mazoto ka. Nirehake raha hafa mba ho fampitaoagne o voahosotseo ka vao ty Jesosy? Ie! Treantikagne amy Matio 24:40, 41 ao ze fampitaoagne zay.

IA TY “HANDESEGNE”?

15-16. Nagnino ty Matio 24:40, 41 ro magnampe o voahosotseo hiambegne lognandro?

¹⁵ Taloha ty nirehafe i Jesosy i fagnoharagne telo rey, le nirehake lilim-pitsaragne fara’e miomba ze voahosotse ankasitrahagne reke. Nirehake lahilahy roe niasa tan-teteke agne naho ampela roe nigosa vare reke. Sambe mitovy ty raha atao i ndaty roe amy i fagnoharagne reỳ ao faie “ty raike handesegne le ty raike hengagne.” (Vakio ty Matio 24:40, 41.) Naho fa niavy eo, le nandrisike o mpanonjohy ty lia’eo reke tie: “Miambena lognandro areke nareo satria tsy fanta’areo ty andro hiavia i Tompo’areoy.” (Mat. 24:42) Nirehake raha mitovy amy izay ty Jesosy naho fa boake nirehake fagnoharagne miomba i ampela virjiny rey. (Mat. 25:13) Mifandrambe vao o fampitaoagne reo? Va’e! Ze tena voahosotse sady tsy mivalike ro “handesegne”, le horambese i Jesosy amy i Fanjakagne an-dagnitse agney.​—Jaona 14:3.

¹⁶ Miambena lognandro. Ze voahosotse tsy miambegne lognandro amy ty lafi’e ara-pagnahy, le tsy havory reketse o ‘jinobogneo.’ (Mat. 24:31) Faie ndra tie mitamà ty hiaigne nainai’e an-tane etoy aza tika, le mila magnorike i fampitaoa i Jesosy tihoe mila miambegne naho tsy mivalikey.

17. Nagnino tikagne ro tsy toko’e ho latsa naho mifily Kristiana amy izao mba ho voahosotse ty Jehovah?

¹⁷ Tena matoky ty fitsarà i Jehovah areke tikagne satria fa mahafantatse soa ty miomba aze. Tsy toko’e ho latsa tikagne naho mifily Kristiana tsy mivalike mba ho voahosotse ty Jehovah amo o ze androntikagne zao. c Toko’e ho tadidientikagne ty raha nirehafe i Jesosy, amy i mpiasa nilitse niasa amy ty lera faha 11 amy i fagnoharagne miomba i tanem-boalobokeỳ. (Mat. 20:1-16) Ze niavy fara’e tamy i tanem-boalobokey ey, le nitovy karama amy ze niavy tey voaloha’e. Hoe izay avao ka fa ndra ombia ombia ty fotoagne ifilianagne ty voahosotse raike, le handrambe ty valesoa’e an-dagnitse agne avao ka reke naho fa tsy mivalike.

ORIHO I FAMPITAOAGNE REY

18-19. Inogne iaby ty lesogne nianarantikagne boake amy i fagnoharagne rey?

¹⁸ Inogne iaby ty raha nidinehentikagne tato? Nasongady i fagnoharagne miomba i agnondry naho i osey fa ze mitamà ty hiaigne nainai’e an-tane etoy, le mila manam-pinoagne naho tsy mivalike amy i Jehovah, amy izao naho amy i haoreagne lahibey ho avy tsy  ho elay. Amy ze fotoagne zay, le homea i Jesosy i ‘havelogne nainai’ey’ ze ndaty trea’e tie tsy mivalike.​—Mat. 25:46.

¹⁹ Nandineke fagnoharagne roe misy fampitaoagne o voahosotseo ka tikagne. Natoro i virjiny dime mahimbagne, tamy i fagnoharagne miomba i virjiny foloỳ fa tena mahilala iareo. Niomagne sady niambegne lognandro iareo, le nivognogne ty handigne i mpagnenga vaoy avao. Faie tsy niomagne i virjiny minegne rey. Tsy nenga i mpagnenga vaoy hilitse amy i fete beỳ ao areke iareo. Tsy maintsy vognogne handigne ty fotoagne handravà i Jesosy ty tontolo raty toy ka areke tika ndra ombia ndra ombia ty hanoa’e izay. Nandineke mpanompo roe azo atokisagne naho mazoto ka tikagne tamy i fagnohara i Jesosy miomba i talentay. Niasa mafe hoahy i tompo iareoy iareo, hafara’e nahazo ty fankasitraha’e. Faie niroahegne i mpanompo kamoy. Ino ty lesogne ho antikagne? Tsy maintsy bey atao amy ty fanompoagne i Jehovah hatrake am-para’e tikagne. Nidinehentika ka ty fomba ampisehoa o voahosotseo tie miambegne lognandro iareo, amy izay “handese” i Jesosy an-dagnitse agne mba hahazo i valesoa iareoy. Tena fa tsy ligne iareo ty “hamoriagne” iareo mba hiarake amy i Jesosy an-dagnitse agne. Naho fa tapetse i aly Haramagedonay, le hanjare ho valy i Jesosy amy i engavao i Anak’agnondry iareo.​—2 Tes. 2:1; Apok. 19:9.

20. Ino ty hatao i Jehovah amy ze mitsanogne i fampitaoagne nimei’e rey?

²⁰ Ndra tie fa mihamarine aza i fotoagne hitsarà i Jesosỳ, le tsy misy raha toko’e hatahorantikagne. Naho tsy mivalike tikagne, le homea i Babantikagne bey hatea an-dagnitse agney “hery mandikoatse ty ahy o ndatio”, amy izay ho afake “hitsangagne agnatreha i Ana o ndatỳ eo.” (2 Kor. 4:7; Lioka 21:36) Ndra mitamà ty ho an-dagnitse agne tikagne ndra ho an-tane etoy, le hampifale i Babantikagney avao naho magnorike i fampitaoagne amy i fagnoharagne nirehafe i Jesosy rey. Noho ty hasoa fagnahy i Jehovah, le “hovoasoratse amy i boke” i fiaignagney ao ty agnarantikagne.​—Dan. 12:1; Apok. 3:5.