1-2. Ino ty mahavy o mpanompo i Jehovah-o ho sambatse? (Jakoba 1:22-25)

 TEA i Jehovah naho i Ana-dahi’ey ho sambatse tikagne. Hoe ty mpanoratse ty Salamo 119:2 tie: “Sambatse ze magnorike ty faniahia’e, le ze mipay aze amy ty fo’e iaby.” Nagnomey toky hoe izao ka ty Jesosy: “Ze mitsanogne ty saontsin’Andrianagnahare naho mankatò aze ro sambatse!”​—Lioka 11:28.

² Sambatse o mpanompo i Jehovah-o. Fa nagnino? Maro ty anto’e fa ty tena lahibey, le noho itika mamaky tsy tapake ty Saontsin’Andrianagnahare naho mikezake mampihatse ze raha ianarantika.​—Vakio ty Jakoba 1:22-25.

3. Ino ty soa rambesentika naho fa mampihatse ty Saontsin’Andrianagnahare tikagne?

³ Maro ty soa rambesentika naho ‘mankatò ty saontsy’ tikagne. Naho mampihatse ze raha nianarantika boake amy ty Saontsin’Andrianagnahare ao ohatse tikagne, le hahatsiaro sambatse satria fantantika tie mampifale i Jehovah zay. (Mpito. 12:13) Naho magnorike ty torohevetse mey ty Saontsin’Andrianagnahare ka tika, le hifandrambe soa amy ty keleiantikagne naho amo o mpiara-manompo. Azo inoagne fa mahatsapa izay rehe. Ankoatse izay le afake misoroke ty ankamaroa ty olagne atrehe o ndaty tsy magnorike ty fitsipy i Jehovah-o ka tikagne. Naho fa avy nirehake miomba ty lily i Jehovah naho ty fitsipi’e vaho ty lilim-pitsarà’e ty Davida, le izao ty namaragna’e aze: “Bey ty valesoa hoazo ze magnorike irey.” (Sal. 19:7-11) Magneke izay ka tikagne.

4. Nagnino ro tsy mora ty mankatò ty Saontsin’Andrianagnahare?

 ⁴ Naho te ho mpankatò ty Saontsin’Andrianagnahare tikagne, le mila mamaky naho mianatse Baiboly mba hahafantarantika ty raha také i Jehovah amantikagne. Faie tsy tihoe lava mora avao ty manao izay satria maro ty raha ataontikagne. Faie tsy maintsy manokagne fotoagne mba hamakiagne naho hianaragne Baiboly tika. Hodinehentikagne areke ty raha ila’e hagnampe antika hahavita hamaky Baiboly tsy tapake. Hodinehentika ka ty raha hagnampe antikagne hahavita hisaintsaigne naho hampihatse ze raha ianarantikagne amy ty fiaignantika.

MANOKÀGNA FOTOAGNE HAMAKIAGNE TY SAONTSIN’ANDRIANAGNAHARE

5. Ino iaby ty ataontikagne amy ty ankamaroa ty fotoantika?

⁵ Maro raha atao ty ankamaroa o vahoa i Jehovah-o. Anoantikagne andraikitse ara-pagnahy ohatse ty ankamaroa ty fotoantika. Miasa mafe ka ty ankamaroantikagne mba hahazoagne ze raha ilaentika naho ty keleiantikagne. (1 Tim. 5:8) Maro ka ty Kristiana mikarakara ty keleia’e marare ndra bey taogne. Mitake fotoagne ka ty fikarakaragne ty fahasalamantika manokagne. Ankoatse ireo, le mbe misy raha lahibey tsy maintsy ataontikagne ka ty amy i fiangonagne eo. Mila manao ze azo atao ohatse tikagne mba hitoriagne i talily soay. Akore areke ty hahatreavantika fotoagne hamakiagne Baiboly naho hisaintsaignagne vaho hampiharagne ze nivakientika, ie amy izao mbe misy raha maro hafa ka tsy maintsy ataontikagne?

6. Ino ty toko’e hatao’o mba hahavy azo hamaky Baiboly tsy tapake? (Henteo i sarey.)

⁶ Tsy maintsy ataontika voalohan-draha ty famakiagne Baiboly satria tena “raha lahibey” amantikagne Kristiana. (Fil. 1:10) Izao ty rehafe ty Salamo voaloha’e miomba ty ndaty sambatse: “Ty lalà i Jehovah ro mahafinaritse aze sady ty lalà’e ro vakie’e naho saintsaigne’e handro halegne.” (Sal. 1:1, 2) Mazava areke fa toko’e hanokagne fotoagne hamakiagne Baiboly  tikagne. Fotoagne manao akore areke ty mete soa mba hamakiagne Baiboly? Va’e sambe hanagne ty fotoagne mete ama’e tikagne tsikiraidraike. Fa ty tena lahibey le tihoe fotoagne hahafahantika mamaky Baiboly tsy tapake ty toko’e hofilientikagne. Hoe ty rahalahy raike atao tihoe Victor: “Ndra tie tsy tea mifoha maraindraigne aza raho, le teako ty mamaky Baiboly maraindraigne satria tsy misy magnelengelegne loatse ty amy igne. Misokake soa ka ty saiko ty amy igne le afake mifantoke soa raho.” Va’e mahatsapa hoe izay ka rehe. Dineho zao: ‘Fotoagne manao akore ty tena mete amako mba hamakiagne Baiboly?’

SAINTSAIGNO ZE VAKIE’O

7-8. Ino ty va’e hikalagne antika tsy handrambe soa amy ty raha vakientikagne? Hazavao.

⁷ Izao ty raha misy, va’e misy fotoagne tika mamaky faie tsy militse an-dohantikagne ao i raha vakientikagney. Fa nisy fotoagne vao ohatse rehe namaky raha raike, faie fotoagne kede tafara izay le nihaligno’o i raha nivakie’oy? Sambe fa niazo izay iaby tikagne. Mampalahelo fa va’e hiseho ka zay naho fa mamaky Baiboly tikagne. Va’e magniry hamaky toko maromaro amy Baiboly ao isan’andro ohatse tika. Fagneva ty hoderaegne zay. Toko’e hametrake tanjogne tikagne, le hagnatratse izay. (1 Kor. 9:26) Faie naho tena te handrambe soa amy ty famakiagne Baiboly tika, le tsy ampe avao tihoe mamaky.

⁸ Intoy misy ohatse: Mila oragne o raha mitirio mba hovelogne. Faie naho avy bey loatse ka o oragneo, le ndra handranovohitse avao fa tsy hilitse agnate o taneo agne. Naho izay ty raha misy, le ndra tsy mahasoa ka i oragney. Mila fotoagne hisihagne ze oragne mirotsake ama’e o taneo, mba hampitombo o raha mitirio. Manahake izay avao ka fa tsy toko’e ho memeke tikagne naho fa mamaky Baiboly fa hanokagne fotoagne hisaintsaignagne mba ho tadidintika ze raha vakientikagne.​—Jak. 1:24.

9. Ino ty toko’e hataontika naho tsapantikagne tie memeke tika naho fa mamaky Baiboly?

⁹ Ino ty toko’e hatao’o naho tsapa’o tie memeke rehe naho fa mamaky Baiboly? Mamakia  miadagne amy izay rehe afake misaintsaigne ze vakie’o ndra manokàgna fotoagne hisaintsaignagne naho fa avy namaky. Tsy sarotse ty manao izay. Va’e mila mampitombo ty fotoagne ianara’o rehe mba hahafaha’o hisaintsaigne. Ndra va’e hifily ty hamaky andine’e tsiampeampe avao rehe amy izay mba hisy fotoagne hisaintsaigna’o. Hoe ty Victor, i nirehafegne taloha teoy: “Tsy ataoko lava ty vaky Baiboliko, fa toko raike avao ty vakieko. Afake misaintsaigne ze nivakieko raho agnate i androy satria maraindraigne ty famakiako Baiboly.” Afake mifily ty hamaro ze andine’e hovakie’o rehe faie tena lahibey tihoe mamaky miadagne amy izay rehe afake misaintsaigne.​—Sal. 119:97; henteo ty efajoro tihoe “ Fagnonteneagne Hosaintsaignegne.”

10. Magnomeza ohatse amy ty fomba fipaliavagne lesogne hampiharegne. (1 Tesalonianina 5:17, 18)

¹⁰ Naho fa mamaky andine’e tsiampeampe amy Baiboly ao rehe, le dineho ty fomba hampihara’o aze. Saintsaigno zao naho fa mamaky rehe: ‘Akore ty azoko ampiharagne ty fagnazavagne toy amy hinane zao ndra amy ty hoavy?’ Eretsereto ohatse tie mamaky ty 1 Tesalonianina 5:17, 18 rehe. (Vakio.) Naho fa avy namaky o andine’e roe reo rehe, le mitofà hey sady dineho tie mivavake mateteke naho amy ty fo vao rehe. Dineho ka ty raha azo’o isaoragne i Jehovah. Va’e hahatrea raha telo voafaritse soa hisaoragne aze ohatse rehe. Ndra tie minitra kede avao aza ty isaintsaigna’o ty raha nianara’o boake amy Baiboly ao, le hagnampe azo hahatakatse naho ho mpankatò ty Saontsin’Andrianagnahare zay. Naho mampihatse ze raha vakie’o boake amy Baiboly ao rehe isan’andro, le hahavita hanompo i Jehovah amy ty fomba ankasitraha’e. Faie akore naho mahatsapa rehe tie maro ty raha mbe mila hasoae’o?

MAMETRAHA TANJOGNE AZO TRATRAREGNE

11. Nagnino rehe ro va’e ho kivy kindraike? Magnomeza ohatse.

¹¹ Naho fa mamaky Baiboly rehe, le va’e hokivy kindraike satria voamare’o tie mbe maro ty raha mila hasoae’o. Eretsereto ohatse tie mamaky Baiboly rehe ty androany, le mahatrea tie tsy soa ty magnavakavake. (Jak. 2:1-8) Voamare’o tie mila magnasoa ty fomba indesa’o ty hafa rehe. Tapa-kevetse ty hanao fagnovàgne areke rehe. Fanjaka zay! Ie maray igne rehe namaky andine’e magnasongadigne ka tie tena lahibey ty mifily ty raha horehafegne. (Jak. 3:1-12) Tsapa’o tie misy fotoagne tsy mampahery ty raha rehafe’o. Tapa-kevetse ty hanao rehake mampahery areke rehe naho fa mirehake amy ty hafa. Mampitao ka ty vaky Baiboli’o amy ty andro magnarake  igne tie tsy toko’e hiragnetse amy ty tontolo toy tika. (Jak. 4:4-12) Voamare’o fa mila mahay mifily soa ty fihisagne atao’o rehe. Kivy rehe amy ty andro magnarake izay satria trea’o tie mbe maro ty raha mila ikezaha’o.

12. Nagnino rehe ro tsy toko’e ho kivy naho trea’o amy ty vaky Baiboly atao’o tie mbe maro ty mila ova’o? (Henteo ty fagnamarehagne ambane peje.)

¹² Ko kivy ndra tie maro aza ty fagnasoagne mila atao’o. Matoa rehe mahatsapa izay, le midika zay tie miambane rehe sady managne anto’e manoseke soa. Naho miambane vaho manao ty maregne amy ty tegna’e ty ndaty raike, le hipay ze raha mbe mila hasoae’e naho fa mamaky Baiboly. a Tadidio ka fa mila kezake mitohy ty fiakanjoagne ty “toetse vaovao.” (Kol. 3:10) Ino ty hagnampe azo ho mpankatò ty Saontsin’Agnahare lognandro?

13. Akore ty fomba mete soa hampihara’o ty raha nianara’o? (Henteo i sarey.)

¹³ Ko le avy le miarake ampiharegne indraike iaby ze vakie’o fa raike ndra roe avao hey ro ampiharo. (Ohab. 11:2) Andramo toy: Anò lisita ze raha iaby mila hasoae’o, le mifiliana raike ndra roe hampihare’o voaloha’e amy irey, le amy ty afara ka ty ila’e. Ino areke ty hanomboha’o aze?

14. Tanjogne manao akore ty ho tratsere’o voaloha’e?

¹⁴ Va’e tanjogne mora tratraregne hey ty hanomboha’o aze. Ndra va’e ze raha tena mila ikezaha’o malaky ty ho filiane’o. Naho fa trea’o amy izay ty raha hikezaha’o voaloha’e, le manoa fikarohagne amo o bokentikagneo. Azo’o atao ty mampiasa ty Fanondroagne Boke ty Vavolombelo i Jehovah ndra ty Fitaovagne Fikarohagne Hoahy ty Vavolombelo i Jehovah. Mivavaha amy i Jehovah mba hagnampe azo “hanagne fagniriagne naho hery”  hagnatratraragne ty tanjo’o. (Fil. 2:13) Afara izay le mikezaha hampihatse ze raha nianara’o. Naho trea’o tie nivita’o ty nagnatratse i tanjo’o voaloha’ey, le handrisike azo hagnatratse i ila’e rey zay. Hanjare ho mora ama’o ty hanao ze fagnovàgne hafa mbe mila atao’o.

ENGAO ‘HISY VOKA’E AMA’O TY SAONTSIN’ANDRIANAGNAHARE’

15. Ino ty tsy mampitovy ty vahoa i Jehovah amy ty ankamaroa ty ndaty mamaky Baiboly? (1 Tesalonianina 2:13)

¹⁵ Mirehake ty ndaty ila’e tie fa nahavita namaky o Baibolio mateteke. Faie tena mino ty raha ampianare ty Baiboly vao iareo? Nampihare iareo ndra nenga iareo hisy voka’e amy ty fomba fiaigna iareo vao zay? Mampalahelo fa tsy izay ty raha misy. Faie tsy hoe izay o vahoa i Jehovah-o! Magneke manahake ty Kristiana tamy ty taonjato voaloha’e tikagne tie “Saontsin’Andrianagnahare” o Baibolio “sady izay ka ty toe ie.” Tsy vita izay fa mikezake mampihatse ty raha rehafe ty Baiboly amy ty fiaignantikagne ka tika.​—Vakio ty 1 Tesalonianina 2:13.

16. Ino ty hagnampe antika ho mpankatò ty Saontsy?

¹⁶ Tsy tihoe lava mora avao ty mamaky naho mampihatse ty Saontsin’Andrianagnahare. Va’e mila mikezake mafe tika vaho mahatrea fotoagne hamakiagne Baiboly. Ndra va’e memeke tikagne ty mamaky le tsy misaintsaigne. Ndra ka va’e ho kivy tika naho fa mahatrea tie maro ty raha mbe mila hasoaentikagne. Faie ndra inogn’ino olagne va’e atrehe’o, le hovita’o ty hiatreke izay noho ty fagnampea i Jehovah. Lonike abey tika mba ho tapa-kevetse ty hagneke ty fagnampea’e sady ho mpankatò ty Saontsy fa tsy ho mpitsanogne magnaligno. Tsy isalasalagne fa arakarake ty amakiantika naho ampiharantikagne ty Saontsin’Andrianagnahare amy ty fiaignantika ty vao mainke hahavy antikagne ho sambatse.​—Jak. 1:25.