1. Ino ty raha nirehafe i Davida miomba ty fiambanea i Jehovah?

TENA mahaliagne ty raha nirehafe i Davida miomba i Jehovah tie indraike. Hoe reke: “Hagnomey ahy i fikalagnam-bala fagnavota’oy rehe, sady ty fiambanea’o ro nampisondrotse ahy.” (2 Sam. 22:36; Sal. 18:35) Nandeha tan-tragnon-drae i Davida agne ty Samoela tie indraike mba hanendre aze ho mpanjaka o Israelio handimbe i Saoly. Va’e o raha niseho iohoe ty nahavy aze nirehake o rehake amy Samoela faharoe aò. Fa nagnino? Satria ie ty jinobo i Jehovah ho mpanjaka, ie amy izao ireke ty fara’e zai’e amy iareo valo mirahalahy.​—1 Sam. 16:1, 10-13.

2. Ino ty hodinehentikagne ato?

² Tena mitovy amy ty raha nitsapa ty mpanao salamo raike toy ty raha nitsapa i Davida. Hoe o mpanao salamo iohoe: “Miondreke hivazoho ty an-dagnitse agne naho ty an-tane etoy reke. Ongahe’e hiala amo o debokeo ty ndaty ambane. Le ongahe’e... ty ndaty mahantra, mba hiarake mipetrake amy ty ndaty ambone.” (Sal. 113:6-8) Hodinehentika amy ty lahatsoratse ty fomba nampisehoa i Jehovah fa miambane reke, le handrambe lesogne boake amy izay tikagne. Handineke ty tantara i Saoly Mpanjaka, i Daniela mpaminany naho i Jesosy ka tika, le handrambe lesogne boake amy izay.

3. Akore ty fomba ifandrambesa i Jehovah amantikagne, le ino ty treantika boake amy izay?

³ Trea amy ty fomba ifandrambesa i Jehovah amo o mpanompo’eo fa miambane reke. Nagnino tika ro mirehake izay?  Ndra tie tsy voririke iareo, le eké’e hanompo aze sady rambese’e ho nama’e. (Sal. 25:14) Faie tsy ho niafake ninamagne tama’e tika naho tsy nagnomey i Ana-dahi’ey mba hanao sorogne ty fiai’e hagnavotagne antika amy ty ota reke. Tena mitretré antika naho soa fagnahy vata’e ty Jehovah!

4. Ino ty raha nimey i Jehovah antika? Nagnino reke ro nagnomey izay?

⁴ Misy fomba hafa ka ampisehoa i Jehovah fa miambane reke. Naho fa namorogne antika zao reke, le natao’e ho afake mifily ze teantikagne hatao amy ty fiaignagne tika. Niforogne’e mba ho afake hanahake ty toetse’e ka tika. Tena lahibey amy i Jehovah ty safidy ataontika ndra tie kedekede tika naho oharegne ama’e. Tea’e naho ty hateantikagne aze ro mandrisike antika hanompo aze sady noho itika rese lahatse fa tena mahasoa ty magnorike ty lili’e. (Deot. 10:12; Isaia 48:17, 18) Fale tika satria Andrianagnahare miambane ty Jehovah!

5. Nagnino ty Jehovah ro modely amy ty fiambaneagne? (Henteo ty sare amy ty fogno ty gazete toy.)

⁵ Naho mitsikombe ty fomba ifandrambesa i Jehovah amy ty mpanompo’e tika, le miambane manahake aze. Tsy misy mahilala mandikoatse i Jehovah faie vognogne handrambe soso-kevetse boake amy ty hafa reke. Naho fa namorogne ze kila raha ohatse reke, le nengà’e hiara-miasa ama’e i Ana-dahi’ey. (Ohab. 8:27-30; Kol. 1:15, 16) Andrianagnahare mahery fara tampo’e ka ty Jehovah. Faie ndra tie eo zay, le tea mizara andraikitse reke. Tinendre’e ho Mpanjaka i Fanjaka’ey ohatse ty Jesosy. Faie tsy i Jesosy avao ty tinendre’e fa mbe misy ndaty 144000 ka nimei’e fahefagne hiara-manjaka ama’e. (Lioka 12:32) Tsy maintsy ho nampiofagne i Jehovah ka ty Jesosy mba hanjare ho Mpanjaka naho ho  Mpisorombey. (Heb. 5:8, 9) Ampiofagne i Jehovah ka i hiara-manjaka amy i Jesosy rey mba hahafaha iareo hahavita soa ty andraiky iareo. Faie tsy hilitse laleke amy ty fomba agnatanteraha iareo ty asa iareo reke. Ty anto’e, tena matoky reke fa hanao raha mifagnarake ty zoton’arofo’e iareo.​—Apok. 5:10.

6-7. Ino ka ty azontika ianaragne boake amy i Jehovah naho fa misy andraikitse ampanoentikagne ty hafa?

⁶ Tea mizara andraikitse i Raentika an-dagnitse agney, ie amy izao tsy misy anto’e toko’e hanoa’e izay. Tena toko’e ho tea mizara andraikitse ka areke tika, agnisa izay ty loha ty keleiagne naho ty androanavi-pagnahy. Le naho fa mizara andraikitse ohatse nareo, le tsy toko’e hilitse laleke amy ty fomba anoa i ndatỳ i andraikitse nimei’areo azey. Naho tena manahake i Jehovah nareo, le tsy ty hahavita i asay avao ka ro tena toko’e ho tanjo’areo. Toko’e hampiofagne ty hafa nareo amy izay hatoky tegna ze ndaty mei’areo andraikitse. (Isaia 41:10) Ino ka ty raha hafa azo ze ndaty managne andraikitse ianaragne boake amy i Jehovah?

⁷ Aseho ty Baiboly fa mahaliagne i Jehovah ty mijanjigne ty heve o anjelio. (1 Mpanj. 22:19-22) Ry rae aman-drene, akore ty azo’areo anahafagne i Jehovah? Naho misy asa ampanoe’areo ty ana’areo, le agnonteneo’areo ty heve’e amy ty fomba hanoagne aze naho trea’areo tie ilaegne ty mahafantatse izay. Oriho’areo i heve’ey naho soa.

8. Akore ty ahatreavagne fa nanam-paharetagne ty Jehovah naho fa nifandrambe tamy i Abrahama naho i Saraha?

⁸ Trea ka tie miambane ty Jehovah satria manam-paharetagne. Manam-paharetagne ohatse reke naho fa magnontane miomba ty fanapaha-kevetse nirambese’e ty mpanompo’e. Nijanjigne’e ohatse ty Abrahama naho fa nirehake ty raha tsapa’e miomba ty fanapaha-keve’e handrava i Sodoma naho i Gomoray. (Gen. 18:22-33) Nampitamà i Saraha ka ty Jehovah tie hanagne anake reke. Faie nihehe reke satria fa antetse tamy izay. Ndra tie teo zay, le tsy nivignetse tama’e ty Jehovah. (Gen. 18:10-14) Tsy natao’e hampiova ty fomba nifandrambesa’e tamy i Saraha ka zay.

9. Ino ty azo ty rae aman-drene naho ty androanavi-pagnahy ianaragne boake amy i Jehovah?

⁹ Ino ty azo ty rae aman-drene naho ty androanavi-pagnahy ianaragne boake amy i Jehovah? Akore ohatse ty atao’areo naho tsy magneke ty fanapaha-kevetse nirambese’areo ty ana’areo ndra ty ndaty agnivo fiangonagne eo? Le avy le magnitsy iareo vao nareo? Sa mikezake mahatakatse ty anto’e mahavy iareo hanao izay? Azo antoke fa hifandrambe soa ty keleia’areo naho ty ndaty agnivo fiangonagne eo naho manahake i Jehovah nareo. Treantika teo fa tena miambane ty Jehovah sady maro ty azontika ianaragne boake ama’e. Andao ka tika handrambe lesogne boake amy ty ndaty tantaraegne amy Baiboly ao.

10. Nagnino ty tantara agnate Baiboly ao ro magnampe antika?

¹⁰ Mpagnanatse tena mahay ty Jehovah. Hai’e areke fa tena andrambesantikagne lesogne ty tantara o ndaty nampanorate’e agnate Saontsi’e ao. (Isaia 30:20, 21) Naho fa mandineke i tantara rey tika, le ho treantika fa nisy ndaty nanagne toetse fanjaka, agnisa izay ty fiambaneagne. Ho treantika ka fa raty ty voka’e naho tsy managne i toetse soa rey ty ndaty raike.​—Sal. 37:37; 1 Kor. 10:11.

11. Ino ty lesogne ianarantika boake amy i Saoly?

¹¹ Dineho ohatse ty raha nanjò i Saoly Mpanjaka. Tena niambane reke tamy ireke mbe nitanora.  Nitaka’e fa voafetra avao ty raha vita’e, le nisy fotoagne reke nieretseretse tie tsy fagneva ty hanao ty andraikitse lahibey nimeigne aze. (1 Sam. 9:21; 10:20-22) Faie tafara kede ty naha mpanjaka aze, le nanjare nirehareha reke sady nanao raha tsy nanagna’e fahefagne. Nasae i Jehovah nandigne i Samoela mpaminany ty Saoly tie indraike satria i Samoela ty hanolotse sorogne hoahy i Jehovah. Faie tsy nahalìgne ty niavia i Samoela reke fa le avy le nanolotse sorogne ndra tie tsy nanagne fahefagne hanao izay. Trea tie tsy niambane reke sady tsy natoky i Jehovah. Voka’e, tsy nankasitraha i Jehovah reke sady tsy neké’e ho mpanjaka sasa. (1 Sam. 13:8-14) Hendre areke tika naho mitao mba tsy hanahake i Saoly, le tsy manao ty raha tsy anagnantikagne fahefagne.

12. Akore ty nampisehoa i Daniela fa niambane reke?

¹² Dineho ka ty Daniela mpaminany. Tsy nanahake i Saoly reke, satria lava niambane avao tamy ty fiaigna’e sady nipay ty tari-dala i Jehovah avao. Nisy fotoagne ohatse ty Daniela nampiasae i Jehovah mba hagnazava ty dika ty nofy i Nebokadnezara. Faie i Jehovah ty nimei’e voninahitse naho fa boake nagnazava i nofỳ reke fa tsy ty tegna’e. (Dan. 2:26-28) Ino ty lesogne ho antika? Naho fa misy mpiara-manompo midera antika noho ty lahajaka fanjaka nataontika ndra noho ty itika mahatrea vokatse amy ty fanompoagne, le soa naho i Jehovah ro meintika voninahitse. Toko’e ho tadidientikagne ka fa tsy ho nahavita i raha rey tika naho tsy teo ty Jehovah nagnampe antika. (Fil. 4:13) Manahake i Jesosy ka tika naho manao hoe izay. Nagnino?

13. Ino ty lesogne ianarantika boake amy i Jesosy naho henteagne ty Jaona 5:19, 30?

¹³ Niantehetse tamy i Jehovah avao ty Jesosy, ndra tie voririke aza. (Vakio ty Jaona 5:19, 30.) Rehafe ty Filipianina 2:6 fa “tsy mba nieretseretse ty hialy fahefagne taman-dRae’e reke, le tihoe hitovy aman’Andrianagnahare.” Hay i Jesosy fa misy raha tsy anagna’e fahefagne satria reke anake, le lava nagnaja ty fahefàn-dRae’e avao reke.

14. Akore ty natao i Jesosy naho fa nasaegne nanao raha tsy anagna’e fahefagne reke?

¹⁴ Dineho ohatse ty raha nirehafe i Jesosy tamy i Jakoba naho i Jaona. Nirahe iareo ty rene iareo mba hangatake amy i Jesosy  tie: ‘Apetraho ankavana’o naho ankavia’o eo i anako rey amy i Fanjaka i lagnitsey ao.’ Tsy mba nisalasala ty Jesosy fa le avy le namale tie i Rae’e avao ty managne fahefagne amy izay. (Matio 20:20-23) Naseho i Jesosy teo fa tena niambane reke. Ze raha nandilia i Jehovah aze avao ro natao’e. (Jaona 12:49) Akore ty azontika anahafagne i Jesosy?

15-16. Akore ty azontikagne ampiharagne i torohevetse amy 1 Korintianina 4:6 aoy?

¹⁵ Manahake i Jesosy tika naho magnorike ty toroheve ty Baiboly amy 1 Korintianina 4:6 ao toy. Izao ty voarehake ao: ‘Ko mihoatse ze voasoratse.’ Naho misy ndaty areke mangatake torohevetse amantikagne, le soa naho ty toroheve ty Baiboly ndra ty toro lalagne trea amo o boke naho gazetentikagne ao avao ro rehafentika fa tsy ty heventikagne manokagne ndra ze hevetse avy an-tsaintikagne ao. Miambane tika naho manao izay sady asehontikagne fa ty toroheve i Jehovah ro tena soa mandikoatse ty antika.​—Apok. 15:3, 4.

¹⁶ Magnomey voninahitse i Jehovah tika naho fa miambane. Faie misy anto’e hafa ka mahavy antika toko’e hiambane. Hodinehentikagne amy izao tie nagnino o toetse iohoe ro mahavy antika ho fale naho hifandrambe soa amy ty hafa.

17. Nagnino ty ndaty miambane ro falefale avao?

¹⁷ Ho falefale avao tika naho miambane. Fa nagnino? Satria naho mieke tika tie misy raha tsy vitantika faie vita ty hafa, le ho fale tika mankasitrake ty fagnampeagne mey iareo. Tsiaro’o vao ty raha niseho, tamy i Jesosy nagnasitragne i ndaty folo niazo ty habokagne rey? Ty raike amy iareo avao ty niheregne mba hisaotse i Jesosy. Nanao izay reke satria neké’e fa tsy ho nisitragne tamo areten-draty  iohoe reke naho tsy teo ty Jesosy nagnampe aze. Niambane reke, le nankasitrake ze fagnampeagne zay sady nagnomey voninahitse an’Andrianagnahare.​—Lioka 17:11-19.

18. Nagnino ty fiambaneagne ro magnampe antika hifandrambe soa amy ty hafa? (Romanina 12:10)

¹⁸ Mora ifandrambesagne naho miragnetse soa amy ty hafa ka ty ndaty miambane. Ino ty anto’e? Satria mahafale iareo ty mahafantatse tie managne toetse soa ty hafa sady trea ka tie matoky ty hafa iareo. Fale ka ty ndaty miambane naho fa mahavita soa ty asa anendreagne aze ty hafa sady tsy misalasala midera naho mankasitrake i ndatỳ iareo.​—Vakio ty Romanina 12:10.

19. Nagnino tika ro mila mitao mba tsy hagnambone tegna?

¹⁹ Fa akore indraike ty ndaty magnambone tegna? Tsy mba tea midera ty hafa iareo fa naina’e ty tegna iareo avao ro ho tsiririegne. Tea mampitaha ty tegna’e amy ty ndaty hafa ka iareo sady tea mifaninagne. Tsy mampiofagne ty hafa sady tsy mba mizara andraikitse ka iareo. Nagnino? Satria mieretseretse iareo fa tsy ho vita soa ty asa raike naho tsy iareo ty manao aze. Naina iareo ho ambonégne avao ka iareo sady mora mialogne ty hafa. (Gal. 5:26) Tsy le managne namagne fire ka ty ndaty magnambone tegna. Naho mahatsapa areke tika tie manomboke magnambone tegna, le mila mivavake mafe amy i Jehovah mba hagnampea’e antika ‘hagnavao ty saintikagne.’ Tsy hamahatse an-tsaintikagne ao o toetse raty iohoe amy izay.​—Rom. 12:2.

20. Nagnino tika ro toko’e hiambane avao?

²⁰ Tena mankasitrake i Jehovah tika noho ireke miambane. Trea amy ty fomba ifandrambesa’e amy ty mpanompo’e zay, le te hanahake aze tika. Teantikagne ka ty hanahake i mpanompo’e niambane tantaraegne amy Baiboly ao rey. Lonike tika mba hagnomey voninahitse i Jehovah lognandro satria ireke ty fagneva izay. (Apok. 4:11) Hiambane avao tika naho manao ireo sady ho tea i Raentikagne an-dagnitse agney, le ho afake hiharo lia ama’e nainai’e.