1. Ino ty tombotsoa anagnantika?

TOMBOTSOA tsy misy hoe’e tihoe agnisa ty fiangonagne. Tena fale naho mahatsiaro ho sambatse tika satria manompo i Jehovah miarake amo o rahalahy naho rahavaveo. Fa nagnino rehe ro tena ilaegne agnivo fiangonagne eo?

2. Ino ty fagnoharagne nirehafe i Paoly trea amy ty ankamaroa ty taratasy nisorate’e?

² Trea amy ty fagnoharagne raike nirehafe i apostoly Paoly ty anto’e mahavy antika ho sarobily agnivo fiangonagne eo. Nohare’e amy ty vata o ndatio ohatse o fiangonagne eo, le ty ndaty tsikiraidraike agnivo’e eo nohare’e amy ty ratsam-batagne. Maro amy ty taratasy nisorate i Paoly ro ahatreavagne o fagnoharagne iohoe.​—Rom. 12:4-8; 1 Kor. 12:12-27; Efes. 4:16.

3. Ino ty lesogne lahibey telo hodinehentikagne amy ty lahatsoratse toy?

³ Tsy mitovy ty tane naho ty foko niaviantikagne, ty kolotsaintikagne, vaho ty fahaiantikagne. Misy ka ty mahantra, le misy manan-karena. Faie sambe sarobily amy i Jehovah tika tsikiraidraike sady sambe afake mampahery ty hafa agnivo fiangonagne eo. Hodinehentikagne amy ty lahatsoratse toy ty lesogne lahibey telo azontika ianaragne boake amy i fagnoharagne nirehafe i Paolỳ. Voaloha’e, hianarantika fa sambe managne anjara asa tika agnivo fiangonagne eo. Faharoe, hodinehentikagne ty raha azontika atao mba hahavy antika ho rese lahatse fa tena sarobily tika. Fahatelo, hianarantikagne tie nagnino tika ro  tena mila mikezake mba hamita ty anjara asa nimey i Jehovah antika tsikiraidraike.

4. Ino ty lesogne ianarantikagne boake amy ty Romanina 12:4, 5?

⁴ Izao ty lesogne voaloha’e ianarantika amy i fagnoharagne nirehafe i Paolỳ: Managne anjara asa lahibey tika tsikiraidraike agnivo fiangonagne eo. Izao ty nanomboha i Paoly i fagnohara’ey: “Managne ratsam-batagne maro o vatantikagneo ndra tie raike avao, faie tsy mitovy ty asa o ratsam-batagne reo iaby. Hoe izay ka, fa ndra tie maro aza tikagne, le raike avao amy i Kristy ao, sady ratsam-batagne mifampiankigne.” (Rom. 12:4, 5) Ino ty tea i Paoly horehafegne? Te hirehake reke tie ndra tie tsy mitovy aza ty anjara asantika, le tena sarobily tika tsikiraidraike.

5. Ino ty nimey i Jehovah o fiangonagne eo?

⁵ Mateteke naho fa mirehake miomba ty ndaty managne anjara asa agnivo fiangonagne eo tika, le o rahalahy mitarikeo ro avy an-tsaintikagne ao. (1 Tes. 5:12; Heb. 13:17) Tsy diso zay satria nagnomey “lahilahy ho fagnomezagne” tamy ty alala i Kristy ty Jehovah. (Efes. 4:8) Agnisa izay ty rahalahy agnisa o Filan-keve-pitantanagneo, ty rahalahy tinendre hagnampe iareo, ty Komity ty Sampagne, ty mpiandraikitse faritse, ty rahalahy mampianatse amo o sekoly isan-karaza’eo, ty androanavi-pagnahy, naho ty mpagnampe amy ty fanompoagne. Sambe tinendre ty fagnahy masigne iaby o rahalahy rehoe mba hikarakara ty agnondry i Jehovah naho hagnatanjake iareo satria tena sarobily ama’e iareo.​—1 Pet. 5:2, 3.

6. Ino ty raha kezahe o rahalahy tinendre ty fagnahy masigne rehoe atao, arake ty 1 Tesalonianina 2:6-8?

⁶ Sambe hafa ty andraikitse anoe o rahalahy tinendre rehoe. Sambe hafa ohatse ty asa anoe o ratsam-batantikagneo. Tsy mitovy ty raha anoe o tagnagneo naho o tombontikagneo faie sambe mahasoa ty vatantika ty raha atao iareo. Sambe miasa mafe ka o rahalahio mba hahasoa o fiangonagneo. Tsy mipay voninahitse hoahy ty tegna’e iareo. Iareo aza mikezake mafe mba hampahery o mpiara-manompò. (Vakio ty 1 Tesalonianina 2:6-8.) Tena misaotse i Jehovah tika noho ireke nagnomey o lahilahy tena mihevetse ze hahasoa ty hafa reo.

7. Ino iaby ty fitahiagne azo o mpanompo marain-tsy harivao?

⁷ Ty ndaty ila’e agnivo fiangonagne eo ka zao tinendre ho misionera, mpisava lalagne manokagne ndra maharetse. Naho ty maregne, le maro amy ty rahalahy naho rahavave magneran-tane ro nanapa-kevetse ty hanompo marain-tsy hariva. Voka’e, maro ty ndaty nanjare mpanonjohy ty lia i Kristy naho fa nampea iareo. Maregne fa tsy le manan-draha fire iareo faie tena maro ty fitahiagne mey i Jehovah iareo. (Marka 10:29, 30) Tena sarobily amantika o rahalahy naho rahavaventikagne reo, le tena fale tika managne iareo agnivo fiangonagne eo.

8. Nagnino ty mpitory tsikiraidraike ro sarobily amy i Jehovah?

⁸ Midika vao zay fa o rahalahy tinendre ty fagnahy masigneo naho o mpanompo marain-tsy harivao avao ro tena ilaegne agnivo fiangonagne eo? Aha’a, tsy izay. Tena sarobily amy i Jehovah ty mpitory tsikiraidraike sady tena ilaegne ty fisia iareo. (Rom. 10:15; 1 Kor. 3:6-9) Ty anto’e, ty hagnampe o ndatio mba hanjare mpiana i Kristy ro asa lahibey anoe o mpitorio. (Mat. 28:19, 20; 1 Tim. 2:4) Sambe toko’e hikezake hanao voalohan-draha o asa iohoe areke ty mpitory iaby, ndra vita badisa reke ndra tsy vita badisa.​—Mat. 24:14.

9. Nagnino o rahavaveo ro toko’e ho heverentika ho sarobily?

 ⁹ Nimey i Jehovah andraikitse lahibey ka ty rahavave agnivo fiangonagne eo. Misy amy iareo ty manambaly, ty managn’anake, ty vantotse, naho ty ampela tovo. Sambe sarobily amy i Jehovah iareo satria tsy mivalike ama’e. Maro ty ampela rehafe ty Soratse Masigne fa nanao raha nampifale i Jehovah. Nideraegne iareo satria nahilala, nanam-pinoagne, nafana fo, bey herim-po, natarike sady nanao asa soa maro. (Lioka 8:2, 3; Asa. 16:14, 15; Rom. 16:3, 6; Fil. 4:3; Heb. 11:11, 31, 35) Tena mankasitrake i Jehovah tika noho ireke nagnomey antika rahavave managne toetse soa manahake i mpanompo’e taloha rey.

10. Nagnino o rahalahy naho o rahavave bey taogneo ro toko’e ho heverentika ho sarobily?

¹⁰ Tena mahafale antika ka ty fisia o rahalahy naho o rahavave bey taogneo. Misy amy iareo zao ty nampiasa ty fiaigna’e mba hanompoagne i Jehovah tagnate ty taogne maro sady tsy mivalike ama’e. Fa ty ila’e ka vaho tsiela ty nahafantatse ty hamarenagne. Faie ndra fa ela iareo ty nanompo i Jehovah ndra vaho tsiela, le tsy mora ty fiaigna iareo satria tsy salama mateteke iareo noho iareo fa antetse. Va’e tsy le hahavita bey amy ty fanompoagne i Jehovah sasa areke iareo. Faie ndra tie eo zay, le mikezake manao ze vita’e iareo amy ty asa fitoriagne sady mbe mikezake mampahery naho mampiofagne ty hafa agnivo fiangonagne eo. Maro ka ty raha azontika ianaragne boake amy ty raha niaigna iareo. Tena sarobily amy i Jehovah areke o bey taogneo sady tena ilaentika ka!—Ohab. 16:31.

11-12. Nagnino o tanora agnivo fiangonagne eo ro mampahery azo?

¹¹ Akore ka ty amo o tanorao? Maro ty olagne atrehe iareo sady mialy mafe ka iareo mba tsy ho voafita ty heve-diso ty tontolo fehe i Satana toy. (1 Jaona 5:19) Faie tena mahatsiaro ho velombelogne tika naho fa maharey ty toin-drehake mampahery mey iareo. Mampahery antika ka ty mahatrea iareo mandrambe anjara amy ty fanompoagne naho ty herim-po anagna iareo mba hiarovagne ty finoa’e. Ry tanora, tena ilaegne ty fisia’areo agnivo fiangonagne eo!​—Sal. 8:2.

 ¹² Faie misy rahalahy naho rahavaventikagne ila’e tsy tena rese lahatse tie tena sarobily iareo agnivo fiangonagne eo. Ino ty hagnampe antika hahatsapa tie tena ilaegne tika tsikiraidraike? Andao tika handineke izay.

13-14. Nagnino ty ndaty ila’e ro mieretseretse tie tsy tena sarobily iareo agnivo fiangonagne eo?

¹³ Magnampe antika hahatsapa ty olagne atrehe o rahalahy naho rahavaveo ty lesogne faharoe hodinehentika amy i fagnohara i Paolỳ. Maro amy iareo ty tsy tena rese lahatse tie tena ilaegne iareo. Mampiseho izay ty raha nirehafe i Paoly toy tie: “Naho manao izao ty tomboke tie: ‘Tsy agnisa ty vatagne raho satria tsy tagnagne’, le tsy izay ro mahavy aze tsy ho agnisa ty vatagne. Le naho manao hoe izao ka ty sofy tie: ‘Tsy agnisa ty vatagne raho satria tsy maso’, le tsy izay ro mahavy aze tsy ho agnisa ty vatagne.” (1 Kor. 12:15, 16) Ino ty azontika ianaragne boake amy io?

¹⁴ Naho mampitaha ty tegna’o amy ty hafa rehe, le va’e hahatsapa tie tsy ilaegne ty fisia’o agnivo fiangonagne eo. Ty ndaty ila’e zao va’e mahay mampianatse, mahay mandamin-draha, ndra mahay mampahery ty hafa. Naho fa mahatrea izay rehe, le va’e hieretseretse tie: ‘Izaho aloha tsy hahavita ty vita iareo!’ Naho izay ty tsapa’o, le trea tie miambane rehe. (Fil. 2:3) Faie mila mitao ka rehe satria naho lava mampitaha ty tegna’o amy ty hafa avao rehe, le ho kivy amy ty fara’e. Va’e hieretseretse aza rehe tie: ‘Tsy ilaegne ty fisiako agnivo fiangonagne eo.’ Ino ty hagnampe azo tsy hieretseretse hoe izay?

15. Ino ty raha mila tadidientika ndra tie tsy mitovy aza ty fahaiagne anagnantika, arake ty 1 Korintianina 12:4-11?

¹⁵ Tamy taonjato voaloha’e ohatse, le nanjare afake nanao fahagagagne naho nahavita raha niambake ty Kristiana ila’e naho fa nimey i Jehovah fagnahy masigne. (Vakio ty 1 Korintianina 12:4-11.) Maregne fa sambe hafa ty fahaiagne nimei’e iareo, faie sambe sarobily iaby ty raha natao iareo. Misy lesogne rambesentika boake amy izay ndra tie tsy mahavita manao fahagagagne manahake iareo tika. Va’e  tsy hitovy ty fahaiagne anagnantikagne faie sambe sarobily amy i Jehovah iaby tika.

16. Ino ty toroheve i Paoly mila orihentikagne?

¹⁶ Tsy soa areke ty mampitaha ty tegnantika amy ty ndaty hafa. Mila magnorike ty torohevetse nimey i apostoly Paoly toy tikagne. Hoe reke: “Sambe toko’e handineke ty raha anoe’e ty ndaty tsikiraidraike, amy izay reke hahita fifaleagne amy ty raha atao’e, fa tsy amy ty fampitahagne ty tegna’e amy ty hafa.”​—Gal. 6:4.

17. Ino ty soa ho rambesentika naho magnorike i toroheve i Paolỳ tika?

¹⁷ Naho magnorike o toroheve i Paoly iohoe tika, le ho treantika tie kay misy raha haintikagne avao faie tsy hay ty hafa. Misy androanavi-pagnahy raike ohatse va’e tsy le mahay manao lahajaka faie tena mahay mampianatse Baiboly. Ndra va’e tsy ho tena mahay mandamin-draha reke naho oharegne amy ty androanavi-pagnahy ila’e, faie soa fagnahy naho bey hatea reke, le tsy sarotse amo o mpitorio ty magnatogne aze naho fa iareo mipay torohevetse. Ndra reke va’e malaza ho tea mandrambe ambahiny. (Heb. 13:2, 16) Naho fa haintikagne areke tie misy raha mampiambake antika, le ho rese lahatse tika tie tena ilaegne agnivo fiangonagne eo. Tsy hialogne o mpiara-manompò ka tika, naho ohatse tsy anagnantika ty fahaiagne mampiambake iareo.

18. Akore ty hahavy antika ho mpampianatse mahay?

¹⁸ Ndra ino ndra ino anjara asantika agnivo fiangonagne eo, le sambe toko’e hikezake hampitombo ty fanompoantikagne naho ty fahaiantikagne mampianatse tika. Magnampe antika amy izay ty fampiofagnagne fanjaka mey i Jehovah amy ty alala ty fandamina’e. Magnampe antika hagnasoa ty fanompoantika ohatse ty torohevetse meigne antika amo o fivoriagne andavanandrò. Mikezake mampihatse i raha atoro antikagne agne rey vao rehe?

19. Naho magniry ty hagnatreke ty Sekoly ty Mpitory i Fanjakagney rehe, le ino ty hagnampe azo hagnatratse izay?

¹⁹ Mampiofagne antika ka ty Jehovah amy ty alala ty Sekoly ty Mpitory i Fanjakagney. Afake magnatreke o sekoly iohoe ze mpanompo marain-tsy hariva manomboke amy 23 taogne hatrake amy 65 taogne. Va’e mieretseretse rehe tie tsy ho vita’o ty hagnatratse o tanjogne iohoe. Va’e ho maro ty anto’e mahavy azo hieretseretse hoe izay. Faie nagnino naho atao’o lisita ka ty anto’e mahavy azo hagniry hanao o sekoly iohoe. Naho fa vita’o zay, le dineho tie ino iaby ty raha mila atao’o mba hahavy azo hahatratse o tanjogne iohoe. Naho fa ampea i Jehovah rehe sady manao ze azo’o atao ka, le hahavita ty raha tsy nieretserete’o ho vita’o.

20. Ino ty azontika ianaragne boake amy ty Romanina 12:6-8?

²⁰ Trea amy Romanina 12:6-8 ao ty lesogne fahatelo ianarantikagne boake amy i fagnohara i Paolỳ. (Vakio.) Nirehafe i Paoly indraike amo o andine’e iohoe fa tsy mitovy ty fagnomezagne niazo ty ndaty agnivo fiangonagne eo. Faie nisy nihamafese’e fa sambe toko’e hampiasa ze fagnomezagne niazo’e ty ndaty tsikiraidraike mba hampaherezagne ty hafa.

21-22. Ino ty lesogne azontikagne ianaragne boake amy Robert naho i Felice?

²¹ Dineho ohatse ty raha nanjò i Robert. * Nanompo tan-tane hafa agne reke tie taloha faie tinendre ho Betelita amy ty tane niavia’e agne naho fa tafara tatoy. Ino ty nitsapa’e tamy izay? Hoe reke: “Lava nisoregne avao raho tagnate ty volagne maro satria nieretseretse tie tsy mete amako zane i fanendreagne ahy talohay. Nisy fotoagne aza raho fa te ho  niala tamy Betela ao.” Ndra tie fa nisy rahalahy aza nagnomey toky aze tie tsy noho ireke nanao raha tsy mete ty nahavy aze ho tinendre hanao raha hafa, le mbe nahatsapa hoe izay avao reke. Ino ty nagnampe aze? Nisy androanavi-pagnahy raike naniahy aze tie ty fanendreagne antika taloha, le fomba ampiofagna i Jehovah antika, amy izay tika ho afake hamita ty fanendreagne antika vaovao. Naho fa nitaka i Robert izay, le nifantoke amy ty raha azo’e atao amy izao reke, fa tsy nametsevetse ze raha fa taloha tagne.

²² Niatreke raha mitovy amy izay ka ty Rahalahy Felice Episcopo. Nanao Sekoly i Gileada iareo mirovaly tamy 1956, le nanomboke nanao ty asa ty faritse ta Bolivia agne ka. Faie nanjare nanagn’anake iareo tamy 1964. Hoe ty Felice: “Tena tsy mora tama’ay ty niala tamo o fanendreagne anay iohoe satria tena nitea’ay. Nalahelo avao raho tagnate ty tao’e raike. Faie nampea i Jehovah raho, le afake nagnova ty toe-tsaiko sady nifantoke tamy i fanendreagne vaovao niazo’aỳ, le ty hiteza i ana’aỳ.” Miatreke raha mitovy amy i Robert naho i Felice ka vao rehe? Kivy vao rehe satria niova ty fanendreagne niazo’o? Naho izay ty tsapa’o, le ino ty hagnampe azo? Ho falefale indraike rehe naho magnova ty toe-tsai’o sady mifantoke amy ze raha azo’o atao hoahy i Jehovah amy izao naho hoahy o mpiara-manompò. Mikezaha ho maro raha atao avao, le ampiasao mba hagnampeagne ty hafa ze fahaiagne anagna’o. Vao mainke ho fale ka rehe naho manao izay.

23. Ino ty raha toko’e hataontikagne, le ino ty hodinehentikagne amy ty lahatsoratse magnarake?

²³ Sarobily amy i Jehovah tika tsikiraidraike sady tea’e ho agnisa ty keleia’e. Naho misaintsaigne ty raha azontikagne atao mba hagnampeagne naho hampaherezagne o mpiara-manompò tika sady mikezake manao izay, le tena ho rese lahatse fa tena ilaegne agnivo fiangonagne eo. Faie akore ka ty fiheverantikagne ty ndaty hafa agnivo fiangonagne eo? Akore ty azontikagne ampisehoagne fa teantikagne naho hajaentikagne iareo? Izay ty hodinehentikagne amy ty lahatsoratse magnarake.