1. Ino iaby ty raha nampianaregne azo miomba i Mpamorogney?

NAHO nitezaegne tagnate ty hamarenagne ao rehe, le azo antoke tie fa nahay i Jehovah amparake ty nahakede azo. Nampianaregne azo ohatse tie i reke ty namboatse ze kila raha, managne toetse fanjaka maro reke, sady tea’e hovagne ho paradisa ty tane toy.​—Gen. 1:1; Asa. 17:24-27.

2. Akore ty fihevera ty ndaty ila’e ze ndaty mino i Mpamorogney?

² Faie tsy mino ty ankamaroa o ndatio tie misy ze o Andrianagnahare zao, sady i reke ty namboatse ze kila raha. Mino iareo fa nisy hoaze avao ze kila raha, sady raha miaigne kedekede tsotra tamy ty voaloha’e ro nivoatse erike, le nanjare karazan-draha miaigne maro pitsopitso’e. Ndaty nahatrea fianaragne ty ila’e amo o ndaty rehoe. Nao ka tasa iareo tsy mifagnarake amo o siansao o Baibolio, sady ndaty tsy nianatse, gege, ndra mora fitahegne ty mino ze o fisia ty Mpamorogne zao.

3. Nagnino ro tena ilaegne ty mampitombo ty finoantika?

³ Hampihegne ty finoantika i Jehovah, i Mpamorogne bey hateay vao ty raha rehafe o ndaty nahatrea fianaragne rehoe? Miankigne amy ty anto’e nahavy antika hino i Jehovah ho Mpamorogne ty vale izay. Noho itika nisy nirehake tie misy o Andrianagnahare zao vao ty nahavy antika mino aze? Sa noho itika nanokagne fotoagne handinehagne ty porofo miomba ty fisia’e? (1 Kor. 3:12-15) Ndra fa ela tika ro nanjare Vavolombelo i Jehovah ndra vaho tsy ela, le sambe mila mampitombo ty finoantika iaby. Naho manao izay tika, le tsy ho voafita ty “filozofia naho ty famitahagne poakate” ampianare o ndaty manohetse ty raha rehafe ty Baibolio. (Kol. 2:8; Heb. 11:6) Mba hagnampeagne antika amy izay, le misy raha telo hodinehentikagne amy ty lahatsoratse toy ato: 1) Nagnino ty ankamaroa o ndatio ro tsy mino ty fisia i Mpamorogney? 2) Akore ty hampitomboa’o ty finoa’o i Jehovah, i Mpamorogne azoy? 3) Ino ty azo’o atao mba hagnamafesagne ty finoa’o?

4. Ino ty atao tihoe finoagne, arake ty Hebreo 11:1?

⁴ Misy mihevetse tie managne finoagne ty ndaty raike naho mino raha raike ndra tie tsy misy porofo aza. Faie tsy izay ty atao tihoe tena finoagne, arake ty Baiboly. (Vakio ty Hebreo 11:1.) Hazavae’e fa mioregne amy ty porofo mazava ty finoagne. Izay ty mahavy antika hino i Jehovah, i Jesosy naho i Fanjakàn’Andrianagnaharey, satria misy porofo magnamaregne ty fisia ireo. (Heb. 11:3) Hoe ze manam-pahaiagne raike nanjare Vavolombelo i Jehovah zay: “Tsy tihoe minomino fahatane avao tika, le tsy midare ty porofo trea amo o siansao.”

5. Nagnino ty ankamaroa o ndatio ro mino tie nisy hoaze avao ze kila raha?

⁵ Nagnino ty ankamaroa o ndatio ro tsy mino tie Andrianagnahare ty namorogne ze kila raha, ie amy izao maro ty porofo magnamaregne izay? Satria mbe lia ty ila’e naho mba nandineke i porofo rey. Hoe ty Robert: “Mbe lia’ay naho nirehafagne ze o Mpamorogne zao tan-dakilasi’ay agne, le nieretseretse raho tie tsy misy reke. Faie naho fa nifampirehake tamo o Vavolombelo i Jehovah-o raho tamy i raho ni-22 taogne, le nitreako fa magnomey porofo marem-pototse miomba ty famorognagne ty Baiboly.” * Fa Vavolombelo i Jehovah ty Robert tie amy izao.—Henteo ty efajoro tihoe “ Hafatse Lahibey Hoahy ty Rae Aman-drene.”

6. Ino ka ty mahavy ty ndaty ila’e tsy hino i Mpamorogney?

⁶ Ty ila’e tsy mino ty fisia i Mpamorogney, satria ze raha trea iareo maso avao ro inoa iareo. Faie naho ty maregne, le maro ty raha tsy trea iareo maso faie inoa iareo, satria misy porofo magnamaregne izay. Agnisa izay, ohatse o tiokeo. Mioregne amy ty porofo mazava miomba  “ty raha misy vata’e faie tsy trea maso” i finoagne rehafe ty Baibolỳ. (Heb. 11:1) Mitake fotoagne naho kezake ty fandinehagne i porofo rey, le izay ty mahavy ty ankamaroa o ndatio tsy mazoto hanao ze raha zay. Ty voka’e, va’e hirehake iareo tie tsy misy ze o Andrianagnahare zao.

7. Ze ndaty nianatse iaby vao le tsy mino tie Andrianagnahare ty namorogne ze kila raha? Hazavao.

⁷ Misy manam-pahaiagne nanjare rese lahatse tie Andrianagnahare ty namorogne ze kila raha, naho fa boake nandineke porofo miomba izay. * Misy ndaty tsy mino ty fisia i Mpamorogney, manahake i Robert, i nirehafegne taloha teoy. Ty anto’e, tsy mba nampianaregne miomba izay iareo tamy i oniverisite ey. Faie ndra tie eo zay, le maro ty manam-pahaiagne nanjare nahafantatse i Jehovah sady tea aze. Mila  mampitombo ty finoantika an’Andrianagnahare ka tika, manahake ty natao o manam-pahaiagne rehoe, ndra manao akore ndra manao akore ty fianaragne nivitantikagne. Tsy misy ndaty afake manao izay ho antika.

8-9. a) Ino ty fagnonteneagne hodinehentikagne hinane zao? b) Nagnino ty fianaragne miomba ty raha magnodidigne azo ro mahasoa azo?

⁸ Ino ty azo’o atao mba hampitomboagne ty finoa’o i Mpamorogney? Andao handineke fomba efatse azo anoagne izay.

⁹ Mianara miomba o raha finorogne magnodidigne azò. Hitombo ty finoa’o i Mpamorogney naho mandineke soa o bibio naho o raha mitirio vaho o vasiagneo rehe. (Sal. 19:1; Isaia 40:26) Vao maike tena ho rese lahatse rehe tie i Jehovah ty Mpamorogne naho mianatse soa miomba ireo rehe. Mateteke ro misy lahatsoratse magnazava o raha finorogneo amy ty pitsopitso’e ty amo o boke naho o gazetentikagneo ao. Ko riognagne avao i lahatsoratse rey ndra tie hoe sarotse takaregne zay aza. Ianaro soa arake ze vita’o ka rey. Aheregno henteagne indraike i video amy i tragnom-porarontikagney ao rey, i aze nihenteantika tamy i havoriambey vaho tsy ela rey.

10. Mirehafa ohatse raike magnaporofo tie misy i Mpamorogney? (Romanina 1:20)

¹⁰ Naho fa mianatse miomba ty raha finorogne magnodidigne azo rehe, le dineho soa ty raha azo ianaragne miomba i Mpamorogney. (Vakio ty Romanina 1:20.) I masoandroy zao ohatse magnomey hafanagne naho hazavagne ilaegne mba hahavelogne ze raha ambone tane etoy. Faie magnoho-doza ka ty tara masoandro ila’e atao tihoe ultraviolet. Mipay fiarovagne areke tikagne. Le ino ty raha miaro antika? Misy gaze mamognogne ty tanentikagne toy mba hiarovagne antika amy ty taratse magnoho-doza boake amy i masoandroy, agnisa izay i ultraviolet-y. Arakarake ty hamaro ty ultraviolet avy ambone tane etoy ro mampitombo ty habey i gaze mamognogne ty tane toỳ. Tsy mampieke azo vao zay tie misy Mpamorogne bey hatea naho mahilala nanao ze raha zay?

11. Aia ty hahatreava’o fagnazavagne hagnampe azo hampitombo ty finoa’o i Mpamorogney? (Henteo ka ty efajoro tihoe “ Loharanon-kevetse Hagnampe Azo Hagnamafe ty Finoa’o.”)

¹¹ Hahatrea fagnazavagne hagnampe azo hampitombo ty finoa’o i Mpamorogney rehe naho mikaroke amy ty Fanondroana Bokin’ny Vavolombelon’i Jehovah ao naho amy jw.org ao. Azo’o atao ty manomboke ze fikarohagne zay amy i andian-dahatsoratse naho video manao tihoey “Nisy Namorona Ve?” Tsy lava ty fagnazavagne ao sady mampiseho raha mahaliagne tsiampeampe miomba o bibio naho o raha mitirio. Trea amy i fagnazavagne rey ao ka fa misy raha namboare o mpikarokeo nitsikombé iareo tamo o bibio naho o raha mitirio.

12. Ino ty raha toko’e hataontika naho fa itika mianatse Baiboly?

¹² Mianara Baiboly. Tsy nino ty fisia i Mpamorogney i manam-pahaiagne nirehafegne taloha tagney tie taloha. Faie niova reke. Hoe reke: “Tsy ty raha nianarako miomba o siansao avao ty nahavy ahy hino ty fisia i Mpamorogney, fa noho ty fianarako Baiboly ka.” Va’e fa mahay soa ty raha rehafe o Baibolio rehe. Faie mbe mila mianatse ty Saontsin’Andrianagnahare avao rehe, amy izay mitombo ty finoa’o i Mpamorogney. (Jos. 1:8; Sal. 119:97) Dineho ty porofo mampiseho fa maregne ty raha tantarae o Baibolio. Dineho ka ze faminaniagne agnate’e ao fa nitanterake naho ty porofo fa tsy mifanohetse ty raha rehafe’e. Naho ihe manao izay, le hitombo ty finoa’o tie misy Mpamorogne bey hatea naho mahilala namboatse  antika, sady ie ty nampanoratse o Baibolio ho antikagne. *​—2 Tim. 3:14; 2 Pet. 1:21.

13. Mirehafa torohevetse raike feno hilala boake amy Baiboly ao.

¹³ Naho fa mianatse Baiboly tika, le mila dinehentika tie nagnino ty torohevetse agnate’e ao ro mahasoa antika. Fa ela ohatse ty Baiboly ro nampitao tie magnoho-doza sady miterake ‘raha maro mampanaintaigne” ty hatea vola. (1 Tim. 6:9, 10; Ohab. 28:20; Mat. 6:24) Mbe maregne vao zay ty amy izao? Hoe ze boke raike mirehake miomba ty toe-tsaigne anagna o ndaty amy izaò zay: “Tsy sambatse sady mora kivy ze ndaty mino fa o volao ty raha lahibey amy ty fiaignagne amy ty ankapobei’e. Ndra ty ndaty magniry ty hampitombo ty vola’e avao aza, le fa tsy sambatse sady managne olagne ara-pahasalamagne.” Tena mahasoa antika areke i toroheve ty Baiboly mandrara antika tsy ho tea volay. Ino ka ty toroheve ty Baiboly trea’o tie nahasoa azo ty nagnorike aze? Naho mandineke i torohevetse fanjaka amy Baiboly ao rey tika, le ho tsapantika fa mahaonigne ze raha hahasoa antika i Mpamorogne bey hateay. Handrisike antika hiantehetse ama’e ka zay. (Jak. 1:5) Ty voka’e, vao maike ho sambatse amy ty fiaignagne tika.​—Isaia 48:17, 18.

14. Ino ty raha ho fanta’o miomba i Jehovah naho mianatse Baiboly rehe?

¹⁴ Anò tanjogne ty hampitombo ty fahafantara’o i Jehovah naho fa mianatse Baiboly. (Jaona 17:3) Naho fa mianatse ty Soratse Masigne rehe, le hitombo ty toetse i Jehovah ho fanta’o. Tsy inogne zay fa i toetse’e nitrea’o naho fa ihe nandineke i raha finorogne magnodidigne azo reỳ. Ty fahafantara’o o toetse rehoe, le hahavy azo ho rese lahatse tie misy vata’e ty Jehovah fa tsy raha niforo-porognegne avao. (Eks. 34:6, 7; Sal. 145:8, 9) Naho fa mihamitombo avao ty fahafantara’o i Jehovah, le hitombo ka ty finoa’o naho ty hatea’o aze sady vao maike hifandrambe marine ama’e rehe.

15. Nagnino ty firehafagne amy ty ndaty hafa miomba an’Andrianagnahare ro mahasoa azo?

¹⁵ Rehafo amy ty ndaty hafa ty raha inoa’o miomba an’Andrianagnahare. Naho manao izay rehe, le hitombo ty finoa’o. Fa akore naho misy ndaty itoria’o misalasala miomba ty fisian’Andrianagnahare, sady tsy hai’o ty havale aze? Mipaliava fagnazavagne mioregne amy ty Soratse Masigne trea amo o boke naho o gazetentikagneo ao, le iharò midineke ama’e. (1 Pet. 3:15) Azo’o atao ka ty mangatake fagnampeagne amo o mpitory za-drahao. Faie ndra magneke ndra tsy magneke ty raha rehafe o Baibolio aza i ndatỳ, le afake mandrambe soa boake amy i fikarohagne natao’oy rehe. Ty anto’e, vao maike hitombo ty finoa’o. Ty voka’e, tsy ho voafita ty ndaty tsy mino ty fisia i Mpamorogney rehe ndra tie hoe managne hilala naho nianatse zay aza iareo.

16. Ino ty raha hiseho naho tsy magnamafe ty finoantikagne tika?

¹⁶ Ndra fire taogne ndra fire taogne ty nanompoantikagne i Jehovah, le mila magnamafe ty finoantikagne aze avao tika. Fa nagnino? Satria hihegne ty finoantika naho tsy mitao tikagne. Ko haligno fa mioregne amy ty porofo ty finoagne i raha tsy treantika maso rey. Faie mora haligno ty raha raike naho fa tsy trea maso. Izay ty nahavy i apostoly Paoly hirehake tie “ota mora mamehefehe antikagne” ty tsy fahampeam-pinoagne. (Heb. 12:1) Ino ty azontika atao mba tsy ho tratse izay?​—2 Tes. 1:3.

17. Ino ty hagnampe antika hagnamafe ty finoantikagne avao?

 ¹⁷ Voaloha’e, mangataha fagnahy masigne amy i Jehovah sady anò mateteke zay. Ino ty anto’e? Satria agnisa ty vokatse ty fagnahy ty finoagne. (Gal. 5:22, 23) Tsy ho mafe ty finoantikagne i Mpamorogney naho tsy ampea i fagnahi’e masigney tika. Homea i Jehovah fagnahy masigne tika naho mangatake ama’e lognandro. (Lioka 11:13) Azontika atao aza ty mivavake tie: “Ampitombò ty finoa’ay.”​—Lioka 17:5.

18. Ino ty tombotsoa lahibey anagnantika amy izao, arake ty Salamo 1:2, 3?

¹⁸ Faharoe, ianaro tsy tapake ty Saontsin’Andrianagnahare. (Vakio ty Salamo 1:2, 3.) Tsy ampe avao ty Israelita nanagne ty Lalàn’Andrianagnahare vita an-tsoratse tamy i fotoagne nanoratagne o salamo iohoey. O mpanjakao naho o mpisorogneo avao ro afake nanagne io. Isake fito taogne, le nisy fandaharagne natao mba hitsanogna ty “lahilahy naho ty ampela, ty ajaja, vaho ze ambahiny tamo o Israelio teo” ty famakiagne ty Lalàn’Andrianagnahare. (Deot. 31:10-12) Ndaty tsy ampe avao ka ty nanagne horognam-boke ty Soratse Masigne tamy ty andro i Jesosy sady tamy i Synagogay tao ty nisy ty ankamaroa i horognam-boke rey. Faie amy izao, le afake mamaky ty ampaha’e ama’e ndra i Baibolỳ iaby ty ankamaroa o ndatio. Tombotsoa lahibey zay! Akore ty azontikagne ampisehoagne fa mankasitrake o fagnomezagne iohoe tika?

19. Ino ty raha mila ataontikagne mba hahavy ty finoantika ho mafe avao?

¹⁹ Atorontikagne tie mankasitrake o Baibolio tika naho mamaky aze tsy tapake. Toko’e hanagne fandaharam-potoagne hamakiagne naho hianaragne raike o Baibolio tika, fa tsy tihoe naho fa malalake avao vaho manao izay. Naho itika mamaky Baiboly tsy tapake, le hihamafe ty finoantikagne.

20. Toko’e ho tapa-kevetse hanao ino tika?

²⁰ Mioregne amy ty Saontsin’Andrianagnahare ty raha inoantikagne, fa tsy hoe izay ty raha inoa ty ndaty “mahihitse naho mahilala” amy ty tontolo toy eto. (Mat. 11:25, 26) Noho itika mianatse Baiboly, le manjare haintika tie nagnino ty tontolo toy ro mikorontagne sady ino ty raha hatao i Jehovah amy ty hoavy. Lonike areke tika ho tapa-kevetse ty hampitombo ty finoantika avao naho hagnampe ndaty maro arake ze vitantikagne mba hino i Mpamorogney. (1 Tim. 2:3, 4) Lonike ka tika ho vognogne handigne avao ty hiavia i fotoagne hiderà ty ndaty amy ty tane toy iaby i Jehovah-y. Hirehake ty rehake amy Apokalypsy 4:11 ato toy iareo amy izay: “Magneva handrambe ty voninahitse, ... rehe, Jehovah, eka, ihe ro Andrianagnahare’ay, satria i rehe ro namboatse ze kila raha iaby.”