1-2. Ino ty raha tsy maintsy ataontika naho te hahatrea tika tie soa ty Jehovah, arake ty Salamo 34:8?

ALAO sare an-tsaigne tie igne misy ndaty raike magnomey hanegne azo. Mbe lia’o naho nihinagne o hanegne iohoe. Azo antoke aloha fa hisy raha kedekede ho hai’o miomba i hanegney naho fa magnente aze rehe, magnantsogne aze, magnontane ty fomba namboaragne aze, ndra magnontane ty heve ty ndaty hafa miomba aze. Faie naho fa magnandragne aze avao rehe vaho izay ho hai’o soa tie manao akore ty tsiro’e.

² Akore ty hahatsapantika ty hasoa i Jehovah? Mahatsapa izay tika naho fa mamaky Baiboly naho ty tantara ty ndaty hafa nimea i Jehovah fitahiagne rehafegne amo o boke naho o gazetentikagneo ao vaho maharey ty raha tantarae ty ndaty hafa miomba izay. Faie tena hahatsapa ty hasoa i Jehovah vata’e tika naho ty vatan-tegnantikagne ro magnandragne aze. (Vakio ty Salamo 34:8.) Intoy misy ohatse raike azontikagne anoagne izay. Andao hatao tihoe te hanompo marain-tsy hariva tika. Faie mba hahatratrarantika ze tanjogne zay, le mila magnatsotra fiaignagne tika. Va’e fa nivakientika mateteke i fampitamà i Jesosy tihoey naho itika manao voalohan-draha i Fanjakagney, le homea i Jehovah antika ze raha tena paliaentikagne. Va’e mbe liantika naho nahatrea i Jehovah nanao izay tamantikagne. (Mat. 6:33) Faie noho itika matoky i fampitamà i Jesosỳ, le nikezake nitsitsy vola, nagnegne ty lera i asantikagne, sady nifantoke tamy ty fanompoantikagne. Naho fa nanao ireo tika, le nitreantika fa nagnomey ze raha paliaentikagne vata’e ty Jehovah. ‘Magnandragne’ ty hasoa i Jehovah tika naho manao izay.

3. Ia ty mea i Jehovah fitahiagne, arake ty Salamo 31:19?

³ “Soa fagnahy amy ze kila ndaty” ty Jehovah, agnisa izay o ndaty tsy mahafantatse azeo. (Sal. 145:9; Mat. 5:45) Faie ze ndaty tea naho manompo aze amy ty fo’e ro tena mea’e fitahiagne  tsiefa. (Vakio ty Salamo 31:19.) Andao tika handineke ty raha soa ila’e fa natao i Jehovah ho antikagne.

4. Akore ty ampisehoa i Jehovah ty hasoa’e amy ze ndaty manomboke miharine aze?

⁴ Isake tie mampihatse ty raha ianarantika miomba i Jehovah tika, le mahatrea tie mahasoa antika rey. Naho fa nitombo ohatse ty raha fantantika miomba i Jehovah sady nanjare nitea aze ka tika, le nampea’e tika mba tsy hieretsere-draty naho tsy hanao i raha raty tsy mampifale aze rey. (Kol. 1:21) Faie vao maike nahatrea ty hasoa i Jehovah tika naho fa nanokan-tegna ho aze sady natao badisa. Nimea’e feo ty fieretseretagne malio naho nirambese’e ho ragne’e maifitse aze tika.​—1 Pet. 3:21.

5. Akore ty hahatreavantika ty hasoa i Jehovah naho fa manao fanompoagne tika?

⁵ Hahatrea ty hasoa i Jehovah ka tika naho fa manompo. Ndaty sakoly vao rehe? Maro ka ty mpanompo i Jehovah mitovy ama’o. Taloha ty naha Vavolombelo i Jehovah azo, le va’e tsy nieretserete’o ze o handeha hagnonkogne an-dalatragno ty ndaty tsy fanta’o zao sady hagnambara ama’e ze raha rehafe ty Baiboly. Faie amy izao rehe, manao izay tsy tapake. Nagnampe azo ty Jehovah, le nanjare nahatrea tsiro’e amy ty fanompoagne rehe. Nahatsapa ka rehe fa maro ty raha natao i Jehovah mba hanohagnagne azo. Nagnampe azo tsy ho taitaitse ohatse reke naho fa nitendreke fanoheragne rehe tamy i fanompoagney ey. Nagnampe azo ka reke mba hitadidy andinin-teny horehafegne amy ze ndaty liagne. Nimea’e hery aza rehe mba hahafaha’o manohy ty fanompoagne aze avao ndra tie tsy vognogne hitsanogne ty ndaty amy i fanompoagney ey.​—Jer. 20:7-9.

6. Nagnino ty fampiofagnagne mey i Jehovah antikagne ro ahatreavagne ty toetse soa’e?

⁶ Trea amy ty fomba ampiofagna i Jehovah antika amy ty fanompoagne ka ty toetse soa’e. (Jaona 6:45) Atoro antika amy i fivoriagne andavanandroy ohatse ty hevetse azo rehafegne naho fa manompo, sady tena tsy lignentikagne ty hampiasa aze. Va’e hatahotse kedekede tika amy ty voaloha’e naho misy raha vaovao ampanoegne antika amy i fanompoagney ey. Faie mikezake manao aze avao tika, le treantika tie tena misy voka’e soa ty fagnorihagne aze. Risihegne ka tika naho fa am-pivoriagne agne naho amo o havoriambeio agne mba hagnandragne ze karazam-panompoagne mbe tsy nataontikagne. Agnisa izay ohatse tihoe magnitatse faritane. Va’e hampatahotse antika zay. Faie hotahie i Jehovah tika naho mikezake manao irey sady magnomey ze fara’e soa ho aze, ndra manao akore ndra manao akore ty raha iaignantika. Andao tika handineke ty ila’e amy i fitahiagne rey naho ty azontika atao mba hagnatratraragne ty tanjontikagne.

7. Ino iaby ty fitahiagne azontikagne naho mikezake mampitombo ty fanompoantikagne tika?

⁷ Vao maike hifandrambe marine amy i Jehovah tika. Dineho ohatse ty raha niaigna ty androanavi-pagnahy atao tihoe Samuel * toy naho i vali’e. Manompo a Kolombia agne iareo. Nitea iareo ty nanao mpisava lalagne tamy i fiangonagne nisy iareo talohay agne. Faie nagniry hampitombo ty fanompoa’e iareo mba hahafaha iareo magnampe ze fiangonagne mipay mpitory maro. Mba hahafaha iareo magnatratse ze tanjo iareo zay, le maro ty raha tsy maintsy nafoe iareo. Hoe ty Samuel: “Nampihatse ty Matio 6:33 zahay, le tsy nivily ze raha tsy tena nipaliave’ay. Faie ty nienga i tragno’aỳ ro tena nimafe tama’ay, satria anay am-bata’ay io fa tsy nahofa. Izahay avao ka ty namboatse ty pilany i tragnoy.” Tsy maro ty vola nipaliave iareo tamy i toeragne nifindrà iareoy agne naho oharegne  amy ty vola nipaliave iareo taloha. Hoe indraike ty Samuel: “Nitsapa’ay tie tena nitari-dalagne anay avao ty Jehovah sady namale ty vavake nanoe’ay. Nitsapa’ay ka tie tena fale ama’ay ty Jehovah sady vao maike nitrea’ay tie tena tea’e zahay.” Afake mampitombo ty fanompoa’o ka vao rehe? Naho manao izay rehe, le tena hifandrambe marine amy i Jehovah sady hokarakarae’e.​—Sal. 18:25.

8. Ino ty ianara’o boake amy ty raha nirehafe Ivan naho i Viktoria?

⁸ Hahatrea hafaleagne amy ty fanompoagne tikagne. Mareho ty raha nirehafe Ivan naho i Viktoria, mpivaly mpisava lalagne a Kirghizistan agne. Nagnatsotra fiaignagne iareo mba hahafaha iareo manao asa an-tsitrapo amy ze azo iareo andrambesagne anjara, agnisa izay ohatse ty asa fagnoregnagne. Hoe ty Ivan: “Mikezake miasa mafe arake ze vita’ay zahay amy ze asa atao’ay. Ndra tie rokake aza zahay naho fa boake niasa, le mahatsapa ho fale satria fanta’ay tie ty asa i Fanjakagney ro nandania’ay ty heri’ay. Fale ka zahay satria nahazo namagne naho fahatsiarovagne maro.”​—Mar 10:29, 30.

9. Ino ty natao i Mirreh mba hampitomboagne ty fanompoa’e ndra tie miatreke raha sarotse aza? Le ino ty voka’e?

⁹ Afake hahatrea hafaleagne amy ty fanompoagne i Jehovah avao tika ndra tie miatreke raha sarotse aza. Mareho ohatse ty raha natao i Mirreh, rahavave raike vantotse mitoboke ahandrefa i Afrika agne. Dokotera ty niasa’e tie taloha. Faie naho fa nireterete reke, le nanomboke nanao mpisava lalagne. Naho fa nandeha ty fotoagne, le nivoa ty aretegne amo o fiforeta taolagneo reke. Ty voka’e, lera raike avao ty nivita’e naho fa nitory isan-tragno reke. Faie afake nitory tagnate ty lera maro reke naho fa nanao fampiratiagne sady nahazo fitilihagne naho fampianaragne Baiboly maro. Ty ila’e amy iareo mifampirehake ama’e an-telefony. Ino ty nandrisike i Mirreh hagnomey ze fara’e soa hoahy i Jehovah? Hoe reke: “Tena teako ty Jehovah naho i Jesosy Kristy. Mivavake amy i Jehovah mateteke raho mba hagnampea’e ahy hanao ze fara’e vitako amy ty fanompoagne aze.”​—Mat. 22:36, 37.

10. Ino ty raha omey i Jehovah ze ndaty mikezake magnatratse tanjogne ara-pagnahy, arake ty 1 Petera 5:10?

¹⁰ Mahazo fampiofagnagne maro boake amy i Jehovah tikagne. Nagneke izay ty Kenny, rahalahy mpisava lalagne a Morisy agne. Najano’e ty fianara’e tamy i oniverisite ey naho fa nahatrea ty hamarenagne reke. Natao badisa reke, le nanomboke nanompo marain-tsy hariva. Hoe reke: “Nikezake nitsikombe Isaia mpaminany raho. Hoe ty Isaia: ‘Intoy raho hirahe’o!’” (Isaia 6:8) Maro ty asa natao i Kenny tamy fagnoregnagne, sady magnampe amy ty fandikagne o boke aman-gazetentikagneo amy ty fireha’e ka reke. Hoe reke: “Nahazo ze fampiofagnagne nilaeko raho mba hahavitako i asa nanendreagne ahikey.” Faie maro ka ty raha nianara’e ankoatse i fampiofagnagne niazo’e rey. Hoe indraike reke: “Nianatse i raha sarotse amako ty manao aze rey ka raho sady nikezake hanagne toetse soa, amy izay ho azo i Jehovah naho o rahalahio ampiasaegne amy ty fomba maro.” (Vakio ty 1 Petera 5:10.) Azo’o atao ka ty mandineke ty raha iaigna’o, le henteo tie kera afake manao fagnovàgne rehe mba hahafaha’o hahazo fampiofagnagne maro boake amy i Jehovah.

11. Ino ty kezake natao ty rahavave a Korea Atimo agne mba hahafaha iareo manompo avao? Le ino ty soa nirambese iareo? (Henteo ty sare amy ty fogno ty gazete toy.)

¹¹ Ndra ty ndaty fa ela nanompoagne i Jehovah aza, le mbe mila fampiofagnagne avao naho fa misy fomba vaovao anoagne i fanompoagney. Hoe ze androanavi-pagnahy raike a Korea Atimo agne zay, tamy i aretegne manjamagne COVID-19: “Taloha ty mpitory ila’e nieretseretse tie tsy afake manao fanompoagne fire amy i faritaney ey satria marare. Faie  amy izao iareo afake manao izay amy ty alala ty videoconférence. Misy rahavave telo fa 80 taogne mahery rezay zao nianatse ty fanoagne izay amy ty ordinatera, le afake manao fanompoagne isan’andro iareo tie amy izao. (Sal. 92:14, 15) Tsy mba te hampitombo ty fanompoa’o ka vao rehe, le hagnandragne ty hasoa i Jehovah? Dineho ty raha ila’e azo’o atao retoagne fa hagnampe azo hahatratse ze tanjogne zay.

12. Ino ty raha ampitamae i Jehovah ze ndaty miantehetse ama’e?

¹² Miantehera amy i Jehovah. Mampitamà reke fa hanao raha soa maro ho antikagne naho miantehetse ama’e tika sady magnomey aze ze fara’e soa vitantikagne. (Mal. 3:10) Nahatsapa izay zao ty rahavave Fabiola, a Kolombia agne. Nite hanao mpisava lalagne maharetse reke tafara kede ty nanoagne badisa aze. Faie tsy maintsy niasa mafe reke mba hamelomagne ty keleia’e. Naho fa nireterete reke, le nivavake mafe tamy i Jehovah mba hagnampe aze. Hoe reke: “Mateteke ro elaela afara ty maha reterete aze ty ndaty raike vaho izay mahazo ty pansio’e. Faie ty ahy, vola’e raike tafara ty naha reterete ahy, le fa niazoko. Tsy le fitrea ty raha hoe izay!” Roe volagne tafara izay, le nanomboke nanao mpisava lalagne reke. Fitopolo taogne mahery reke ty amy izao sady fa 20 taogne mahery zay ty naha mpisava lalagne aze. Ampela valo ty nampea’e mba ho vita badisa tagnate ze fotoagne zay. Hoe reke: “Ndra tie mahatsiaro ho maleme aza raho kindraike, le eo avao ty Jehovah magnampe ahy mba hahavitako ty asa ty mpisava lalagne.”

13-14. Ino ty raha afake magnampe antika hatoky i Jehovah naho hagnatratse tanjogne ara-pagnahy?

 ¹³ Mandrambesa fianaragne boake amy ty ndaty natoky i Jehovah. Maro ty ndaty tantarae o Baibolio tie nikezake mafe nanao ty fanompoagne i Jehovah. Nimea i Jehovah fitahiagne miambake iareo naho fa nanao raha mba hampisehoagne tie matoky aze. Izay zao ohatse ty natao’e tamy i Abrahama. Nandily aze mba hienga i tane nisy azey ty Jehovah. Faie “ndra tie tsy fanta’e” aza tie ho aia reke, le nandeha avao reke. Tafara izay ty Abrahama vaho izay nitahie i Jehovah. (Heb. 11:8) Tafara ty nanoa i Jakoba ringa tamy i anjely raikey ka ty Jehovah vaho izay nitahy aze. (Gen. 32:24-30) Naho fa ho nilitse i Tane Nampitamaegney o firene o Israelio, le tafara ty nitsaha i mpisorogne rey i Renerano i Jordanay i vahoakey, vaho izay afake nitsake teo.​—Jos. 3:14-16.

¹⁴ Afake miana-draha amy ty raha natao ty mpanompo i Jehovah amy izao ka rehe. Natoky i Jehovah iareo sady nikezake nagnatratse tanjogne ara-pagnahy. Nitea i rahalahy Payton naho i Diana vali’e ohatse ty namaky ty raha natao o rahalahy naho o rahavave nampitombo ty fanompoa iareo reo. Agnisa izay, i aze tantaraegne amy ty lahatsoratse tihoe rey “Nahafoy Tena Izy Ireo.” * Hoe ty Payton: “Naho fa namaky ty tantara iareo zahay, le hoe mahatrea ndaty mahatrea tsiro’e amy ty hanegne mafiry hane’e zay. Vao maike te ‘hagnandragne sady hagnente ty hasoa i Jehovah’ zahay naho fa nanao izay mateteke.” Tamy ty fara’e, le nifindra tamy ty toeragne ipaliagne mpitory maro ty Payton naho i Diana. Fa namaky i lahatsoratse rey ka vao rehe? Ndra fa nagnente i video amy jw.org ao manao tihoey Fitoriana any Amin’ny Faritany Mitokana: Aostralia naho ty Fitoriana any Amin’ny Faritany Mitokana: Irlandy? Hagnampe azo hahatrea fomba hampitomboagne ty fanompoa’o i video naho i lahatsoratse rey.

15. Nagnino ro mahasoa antika ty miarake amo o ndaty manao voalohan-draha i Fanjakagneio?

¹⁵ Ze ndaty manao voalohan-draha ty fanompoagne i Jehovah ro anò ragnetse. Mora amantika ty magnandragne ty hanegne mbe lia’e naho nihanentikagne naho ohatse miarake amy ty ndaty fa nihinagne aze sady nahatrea tsiro’e tama’e tika. Naho miarake amy ty ndaty manao voalohan-draha ty fanompoagne i Jehovah ka tika, le vao maike te hipay fomba hampitomboagne ty fanompoantikagne aze. Nieke izay ty mpivaly raike atao tihoe Kent naho Veronica toy. Hoe ty Kent: “Nandrisike anay ty nama’ay naho ty keleia’ay mba hagnandragne hanao endrem-panompoagne sambehafa. Naho fa niarake tamo o ndaty manao voalohan-draha i Fanjakagneio zahay, le nanjare natoky fa ho vita’ay ty hagnandragne o endrem-panompoagne vaovaò.” Mpisava lalagne manokagne a Serbia agne ty Kent naho i Veronica amy izao.

16. Naho henteagne i fagnohara i Jesosy amy Lioka 12:16-21 aoy, nagnino tika ro toko’e ho vognogne hahafoe ze raha teantika?

¹⁶ Mikezaha hahafoe ze raha tea’o mba hanoagne ty fanompoagne i Jehovah. Tsy voatere mamoe ze kila raha teantikagne tika mba hampifaleagne i Jehovah. (Mpito. 5:19, 20) Faie, naho itikagne tsy manao voalohan-draha ty fanompoagne i Jehovah, satria tsy foentikagne i raha teantikagne rey, le va’e hanahake i lahilahy tamy i fagnohara i Jesosỳ tika. Tsy nidare an’Andrianagnahare reke fa ndra aleo’e nanao ze hahametemete ty fiaigna’e. (Vakio ty Lioka 12:16-21.) Hoe ty rahalahy Christian, mitoboke a Frantsa agne: “Tsy nimeiko i Jehovah naho ty keleiako ty fara’e soa amy ty fotoako naho ty heriko.” Nanapa-kevetse areke iareo mirovaly fa hanao mpisava lalagne. Faie tsy maintsy niala tamy ty asa’e iareo mba hahatratrara iareo ze  tanjo iareo zay. Le ino ty asa natao iareo mba hahazoa iareo vola? Namafa birò. Nianatse nionogne tamy ze vola kede niazo iareo ka iareo. Nanegnegne vao iareo naho fa nanao izay? Hoe ty Christian: “Mahatrea hafaleagne amy ty fanompoagne zahay sady mahafale anay ty mahatrea o mpianatse Baibolio naho ty fitiliha’ay mianatse ty miomba i Jehovah.”

17. Nagnino ro va’e ho sarotse amantika ty magnandragne i endrem-panompoagne vaovao rey?

¹⁷ Mivognona hanao i endrem-panompoagne vaovao rey. (Asa. 17:16, 17; 20:20, 21) Tsy maintsy nagnova ty endrem-panompoagne natao’e ty Shirley, mpisava lalagne a Etazonia agne, tagnate i aretegne manjamagne COVID-19. Natahotse hitory an-telefony reke tamy ty voaloha’e. Faie naho fa nahazo fampiofagnagne boake amy ty mpiandraikitse faritse nitilike iareo reke, le nanomboke nanao fitoriagne an-telefony tsy tapake tafara izay. Hoe ty Shirley: “Nampatahotse heike ty nanao i rahay tamy ty voaloha’e. Faie amy izao tena teako ty manao aze. Maro ty ndaty tratsentikagne amy ty fitoriagne an-telefony naho oharegne amy ty ndaty tratse amy i fitoriagne isan-tragnoy.”

18. Ino ty hagnampe antika hahavita hiatreke raha sarotse naho fa itika mikezake mampitombo ty fanompoantikagne?

¹⁸ Managna tanjogne le mikezaha hagnatratse aze. Naho miatreke olagne tika, le mila mangatake fagnampeagne amy i Jehovah amy ty alala ty vavake sady mandineke soa ty raha toko’e hatao. (Ohab. 3:21) Mpisava lalagne maharetse amy ty antoko mpitory mampiasa firehake romania a Eoropa agne ty Sonia. Hoe reke: “Teako ty manoratse ty tanjoko amy ty taratasy. Apetako amy ty toeragne mora hita i taratasy rey naho fa avy eo. Misy sare lalagne mizara roe ka ty amy i latabakoy eo. Naho fa misy fanapaha-kevetse rambeseko, le magnente o fizaràn-dalagne iohoe raho sady mieretseretse tie ty aia amy iareo ro toko’e hombako hahatratrarako i tanjokoy.” Mikezake hagnente lafesoan-draha ty Sonia naho fa miatreke olagne. Hoe reke: “Miankigne amy ty toe-tsaiko avao ty hahavy i raha vaovao atrehekoy hanahake o manda mikalagneo ndra hanahake o ragiragio.”

19. Toko’e ho tapa-kevetse hanao ino tika naho tena mankasitrake ty fitahiagne mey i Jehovah antikagne?

¹⁹ Maro ty raha atao i Jehovah mba hitahiagne antikagne. Trea tie tena mankasitrake i fitahiagne rey tikagne naho mikezake manao ze azontikagne atao mba hideragne aze. (Heb. 13:15) Manao izay tika naho mipay fomba hampitomboagne ty fanompoantikagne, sady vao maike hitahy antika ty Jehovah amy izay. Lonike areke tika mba hipay fomba ‘hagnandramagne sady hagnenteagne ty hasoa i Jehovah.’ Amy izay tika hanahake i Jesosy, satria hoe reke: ‘Ty haneko, le ty manao ty zoton’arofo i nagnirake ahỳ naho ty mahavita ty asa’e.’​—Jaona 4:34.