1. Ino iaby ty atao ty ankamaroantikagne mba hampitomboagne ty fanompoa’e i Jehovah?

 MIHAMITOMBO avao ty asa anoentikagne arakarake ty agnarinea ty fara ty tontolo toy. (Mat. 24:14; Lioka 10:2; 1 Pet. 5:2) Teantika iaby ty hanompo i Jehovah arake ze fara herintikagne. Izay ty mahavy ty ankamaroantikagne mampitombo ty fanompoa’e. Ty ila’e ohatse manao mpisava lalagne. Ty ila’e manompo amy i Betela agne ndra manao fagnoregnagne. Ty ila’e ka mikezake mafe mba hahafeno fepetse ho mpagnampe amy ty fanompoagne ndra ho androanavi-pagnahy. (1 Tim. 3:1, 8) Azo antoke fa tena mahafale i Jehovah ty mahavazoho o vahoa’eo mazoto manao ty asa fanompoagne aze.​—Sal. 110:3; Isaia 6:8.

2. Ino ty va’e ho tsapantikagne naho tsy mete tratsentikagne ty tanjogne ara-pagnahy irientika?

² Faie va’e ho kivy tika naho tsy mete tratsentikagne ty tanjogne ara-pagnahy irientika, ie amy izao fa tagnate ty taogne maro tika ro nikezake nagnatratse aze. Ndra va’e ho kivy ka tika satria tsy ho afake hahazo ty tombotsoam-panompoagne ila’e noho itika fa mihantetse ndra noho ty raha iaignantikagne. (Ohab. 13:12) Izay zao ty nitsapa i Melissa. * Te hanompo amy i Betela agne reke ndra hagnatreke Sekoly ty Mpitory i Fanjakagney. Faie izao ty rineha’e: “Fa antetse loatse raho, le tsy afake manao ireo sasa. Kivy areke raho kindraike.”

3. Ino ty raha va’e mila atao ty ila’e mba hahavy iareo hahafeno fepetse hahazo tombotsoam-panompoagne ila’e?

³ Mila mikezake mba ho matotse naho haneho i toetse Kristiana rey ty tanora ila’e mba hahavy aze hahafeno fepetse hahazo tombotsoam-panompoagne fagnampe’e. Va’e ho tena mahiratse ohatse iareo, mahavita mandrambe fanapaha-kevetse malaky, sady mazoto miasa. Faie va’e mila mikezake iareo mba hanam-paharetagne, hitao soa naho fa manao ty asa  iareo, sady hagnaja ty ndaty hafa. Naho mifantoke amy ty toetse mila ikezaha’o hanagnagne rehe, le hahazo i tombotsoam-panompoagne irie’oy amy ty fotoagne tsy ampoize’o. Dineho ohatse ty tantara i Nick. Tena nidiso tamà reke satria tsy nivoatendre ho mpagnampe amy ty fanompoagne, tamy i reke ni-20 taogney. Hoe reke: “Nieretseretse raho tamy izay tie kera nisy raha tsy nimete nataoko!” Faie nikezake avao reke mba hahafeno fepetse ho mpagnampe amy ty fanompoagne. Nanao ze fara heri’e reke mba hagnampeagne o fiangonagneo sady nanao ze fara heri’e tamy ty fanompoagne ka. Agnisa ty Komity i Sampagne reke amy izao.

4. Ino ty hodinehentikagne ato?

⁴ Kivy vao rehe satria tsy mete tratse’o ty tanjogne ara-pagnahy irie’o? Naho izay, le voraho amy i Jehovah amy ty alala ty vavake ze raha tsapa’o. (Sal. 37:5-7) Mangataha ka torohevetse amo o rahalahy za-drahao hagnampe azo hagnasoa ty fanompoa’o, le ikezaho ampiharegne ty torohevetse mey iareo azo naho fa avy eo. Naho ihe manao izay, le va’e ho tratse’o i tanjogne ara-pagnahy irie’oy. Faie manahake i Melissa, le va’e tsy ho afake hagnatratse ty tanjogne ara-pagnahy irientikagne tika. Ino ty hagnampe antika ho fale avao ndra tie eo zay? Mba hamaleagne izay, le handineke ty fagnonteneagne retoa tika amy ty lahatsoratse toy: 1) Akore ty hahavy azo ho fale? 2) Akore ty hampitomboa’o ty hafalea’o? 3) Ino ty tanjogne azo’o tratraregne mba hampitomboagne ty hafalea’o?

5. Ino ty raha toko’e hataontikagne naho te ho fale tika? (Mpitoriteny 6:9)

⁵ Hazavae ty Mpitoriteny 6:9 ty raha azontika atao mba hahavy antikagne ho fale. (Vakio.) Afa-po amy ze raha anagna’e sady mifale amy ze raha vita’e ty ndaty raike “mifale amy ze raha trea ty maso.” Faie tsy hoe izay ty ndaty raike “ariorio o fagniriagneo” naho mieretseretse ty raha tsy ho vita’e satria tsy mete afa-po. Ino ty lesogne ho antika? Ho fale tikagne naho afa-po amy ze raha anagnantika fa tsy mieretseretse lava i raha tsy mbia ho azontikagne rey.

6. Fagnoharagne miomba ty inogne zao ty hodinehentikagne ato, le ino ty lesogne hianarantika boake ama’e?

⁶ Tena afake ty ho afa-po amy ze raha fa anagnantika vao tikagne? Mieretseretse ty ankamaroa o ndatio tie tsy ho vitantikagne zay. Ty anto’e, tea mianatse raha vaovao o ndatio. Maregne zay! Faie tena afake ty ho afa-po amy ze raha anagnantikagne tika. Ino ty hagnampe antika amy izay? Andao tikagne handineke ty fagnohara i Jesosy miomba i talentay trea amy Matio 25:14-30 ao. Hianarantikagne amo o fagnoharagne iohoe tie ino ty hagnampe antika hahatrea hafaleagne naho hampitombo ty hafaleagne fa anagnantika noho ty fitahiagne fa azontika amy izao.

7. Fintigno i fagnohara i Jesosy miomba i talentaỳ.

⁷ Nirehake miomba ty lahilahy raike handeha an-tane hafa agne ty Jesosy tamy i fagnoharagne natao’ey. Nitokave i lahilahỳ i mpanompo’e rey taloha ty ho nandehana’e, sady nimea’e talenta iareo tsikiraidraike hatao iareo balike. * Fanta o lahilahy iohoe fa tsy mitovy ty raha hay i mpanompo’e rey, le natao’e mifagnarake amy izay ka ty talenta nimea’e iareo. Ty raike nimea’e talenta dime, le ty raike nimea’e talenta roe, le ty raike nimea’e talenta raike. Niasa mafe ty roe tamy i mpanompo rey mba hampitomboagne i talenta iareoy. Fa ty raike tsy nanao raha mba hampitomboagne i talenta nimeigne azey. Ty voka’e, niroahe i lahilahy sefo’ey reke.

8. Nagnino i mpanompo voaloha’e amy i fagnoharagneỳ ro nifale?

 ⁸ Tsy maintsy nahatsapa ho nanagne tombotsoa lahibey i mpanompo voaloha’ey satria talenta dime ty nankine i sefo’ey tama’e. Trea tie tena natokisa i sefo’ey reke kanao nagnankigna’e ze vola bey zay. Ino ty va’e ho nitsapa i mpanompo faharoey naho fa nahatrea izay? Nikivy vao reke satria tsy nahazo talenta maro manahake i mpanompo voaloha’ey? Aha’a. Fa ino ty natao’e?

9. Ino ty raha tsy nirehafe i Jesosy miomba i mpanompo faharoey? (Matio 25:22, 23)

⁹ Vakio ty Matio 25:22, 23. Tsy nirehake ty Jesosy tie nanjare nilagigne naho tsy nifale i mpanompo faharoey naho fa nimeagne talenta roe. Tsy nirehake ka reke tie nigneogneogne i mpanompo faharoey sady nirehake tie: ‘Le itoy avao vao ty nimeigne ahy? I raho ka nio mba miasa mafe manahake i lahy nahazo talenta dimey! Naho eretserete i sefokoy ho tsy mahay raho, le ndra aleo alevegne agne ty talenta toy le hiasa ho ahy avao raho fa tsy hiasa ho aze sasa.’

10. Natao i mpanompo faharoey akore i talenta nimeagne azey?

¹⁰ Nitaka i mpanompo faharoey ka fa tena lahibey i asa nankigne i sefo’ey tama’ey, le niasa mafe reke mba hanompoagne i sefo’ey. Ty voka’e, nanjare nitombo ho efatse i talenta roe nimeigne azey. Nimea i sefo’ey valesoa areke o mpanompo’e iohoe satria tena niasa mafe. Tsy tihoe nifale avao i sefo’ey fa nampitomboe’e ka ty andraikitse nankine’e tamy i mpanompo’ey.

11. Ino ty azontika atao mba hampitomboagne ty hafaleantikagne?

¹¹ Hoe izay ka fa hitombo ty hafaleantika naho miasa mafe arake ze vitantikagne tika  mba hanoagne ze andraikitse mey i Jehovah antika. Mikezaha ‘hifantoke soa’ amy ty asa fitoriagne naho hiara-hiasa amo o fiangonagneo. (Asa. 18:5; Heb. 10:24, 25) Omano soa ka ty fivoriagne iaby, amy izay rehe afake magnomey toin-drehake mampahery. Hevero ho lahibey ze anjara meigne azo amy i fivoriagne andavanandroy. Anò ara-potoagne ka ze asa ampanoegne azo amo o fiangonagneo eo, le mikezaha mba ho azo atokisagne. Ko mieretseretse tie tsy le tena raha lahibey i raha ampanoegne azoy, le tsy voatere mandany fotoagne hanoagne aze rehe. Mikezaha mafe mba hampitombo ty fahaia’o i asay. (Ohab. 22:29) Naho miasa mafe hoahy i Jehovah rehe, le hihasoa ty fifandrambesa’o ama’e, sady tena ho fale rehe. (Gal. 6:4) Naho ndaty hafa ka ro mahazo i andraikitse nirie’oy, le tsy ho boseke rehe fa hiarake hifale ama’e.​—Rom. 12:15; Gal. 5:26.

12. Ino ty nagnampe i Melissa naho i Nick hampitombo ty hafalea iareo?

¹² Tadidi’o vao ty rahavave Melissa, i nagniry hiasa tamy i Betela taoy ndra hagnatreke i Sekoly ty Mpitory i Fanjakagneỳ? Ndra tie tsy afake nanao ireo reke le nikezake nanao soa ty asa ty mpisava lalagne sady nandrambe anjara tamy ty endrem-panompoagne sambe hafa. Izay ty nagnampe aze ho fale. Ino ka ty nagnampe i Nick, naho fa nidiso tamà reke satria tsy nivoatendre ho mpagnampe amy ty fanompoagne? Hoe reke: “Nifantoke tamy ze tombotsoa mbe azoko natao raho, agnisa izay ty fanoagne fanompoagne naho ty fagnomeagne toin-drehake mampahery. Nameno fangatahagne hiasa amy i Betela ao ka raho. Ie tao’e raike tafara tatoy, le nivale i fangatahakoy.”

13. Ino ty ho voka’e naho mikezake mamita soa ty andraikitse anagna’o amy izao rehe? (Mpitoriteny 2:24)

¹³ Naho miasa mafe rehe mba hanoagne ty andraikitse meigne azo amy izao, le hahazo andraikitse mihoatse igne rehe amy ty hoavy. Izay zao ty raha nitreantika tamy i Nick. Faie mbe afake ty ho fale amy ze fanompoagne atao’o hoahy i Jehovah, manahake i Melissa avao ka rehe, ndra tie tsy mahazo i tombotsoam-panompoagne irie’oy. (Vakio ty Mpitoriteny 2:24.) Azo antoke fa vao maike ho fale ka rehe naho fa mahafantatse tie mahafale i Jesosy Kristy, i Tompontikagney, ty kezake atao’o.

14. Ino ty raha toko’e ho tadidientikagne avao naho fa misaintsaigne miomba ty tanjontikagne ara-pagnahy tika?

¹⁴ Maregne fa mila mikezake manao soa ty andraikitse anagnantika amy izao tika. Faie midika vao zay tie tsy toko’e hipay fomba hampitomboagne ty fanompoantika i Jehovah sasa tikagne? Aha’a. Mbe toko’e hikezake hagnatratse tanjogne hagnampe antika ho mpitory mahatrea vokatse amy ty fanompoagne tika sady hikezake hagnampe o rahalahio naho o rahavaveo. Hahatratse ze tanjogne zay tika naho mifantoke amy ty fomba hagnampeagne ty hafa fa tsy mifantoke amy ty tegnantikagne avao.​—Ohab. 11:2; Asa. 20:35.

15. Ino iaby ohatse ty tanjogne afake magnampe azo hampitombo ty hafalea’o?

¹⁵ Ino ty tanjogne ila’e va’e ho azo’o tratraregne? Mivavaha amy i Jehovah mba hahafantara’o ty tanjogne azo’o tratraregne. (Ohab. 16:3; Jak. 1:5) Azo’o atao zao ty magnatratse ty raike amy i tanjogne nirehafegne tamy i  fehentsoratse voaloha’e amy ty lahatsoratse toỳ. Agnisa izay ohatse ty manao mpisava lalagne mpagnampe ndra maharetse, manompo amy i Betela ao ndra mandrambe anjara amy ty asa fagnoregnagne. Azo’o atao ka ty mianatse firehake hafa mba hitoriagne i talily soay ndra mandeha amy ty toeragne hafa ilagne mpitory maro. Hahafantatse raha maro miomba i tanjogne rey rehe naho mandineke ty  toko faha-10 amy ty boke Voalamina mba Hanao ny Sitrapon’i Jehovah sady mirehake amy ty androanavi-pagnahy amy ty fiangonagne misy azo eo. * Naho mikezake magnatratse tanjogne avao rehe, le ho trea ty hafa ty fandrosoagne atao’o sady hitombo ty fifalea’o.

16. Ino ty azo’o atao naho tsy tratse’o ty tanjogne irie’o ho azo amy izao?

¹⁶ Faie akore naho tsy mete tratse’o i tanjogne ara-pagnahy nirehafegne taloha teo rey? Mikezaha hagnatratse tanjogne hafa azo’o tratraregne. Dineho ohatse ty ho rehafegne magnarake retoagne.

17. Ino ty raha azo ty rahalahy raike atao mba hahavy aze ho mpampianatse mahay, arake ty 1 Timoty 4:13, 15?

¹⁷ Vakio ty 1 Timoty 4:13, 15. Naho rahalahy vita badisa rehe, le azo’o atao ty magnasoa ty fahaia’o manao lahajaka, mitarike fivoriagne, ndra mamaky fehentsoratse amy fivoriagney vaho ty fahaia’o mampianatse. Naho ‘imanea’o’ soa ty fanoagne ireo, le handrambe soa ze ndaty mitsanogne azo. Anò tanjogne ty hianatse naho hampihatse ty raha rehafegne amy ty lesogne tsikiraidraike amy ty bokekele Hasoao ty Fahaia’o Mamaky Teny Naho Mampianatse. Manokàgna fotoagne hianaragne ty raike ama’e, le manoa fagnazaran-tegna sady kezaho ampiharegne naho fa manao anjara rehe. Mipaliava torohevetse amy ty mpagnomey torohevetse mpagnampe ndra amy ty androanavi-pagnahy ‘miasa mafe amy ty firehafagne naho ty fampianaragne.’ * (1 Tim. 5:17) Tsy ampe avao tihoe mikezake hahatakatse ty lesogne amy i bokekeley ao. Ilaegne ka ty mifantoke  amy ty fomba hagnampeagne o mpagnatrekeo mba hanagne finoagne matanjake, ndra ty fomba handrisihagne iareo hampihatse ty raha ianara’e. Naho manao izay rehe, le hitombo ty hafalea’o naho ty hafalea i mpagnatrekey.

18. Ino ty hagnampe antika hagnasoa ty fanompoantikagne?

¹⁸ Managne andraikitse hitory naho hampianatse tika iaby. (Mat. 28:19, 20; Rom. 10:14) Tea’o vao ty hagnasoa ty fomba fanoagne o asa lahibey iohoe? Ianaro i bokekele Hasoaoy, le anò tanjogne ty hampihatse ty hevetse ianara’o ao. Misy soso-kevetse afake magnampe ka ty amy Fanompoagne Naho ty Fiaignantika Kristiana: Tari-dalagne Hoahy ty Fivoriagne naho i video misy fomba fitory modely amy i fivoriagne andavanandro rey. Mikezaha hipay hevetse sambe karaza’e, le henteo ze azo ampiharegne amy ty faritane’areo ey. Naho mampihatse i soso-kevetse rey rehe, le hanjare ho mpampianatse mahay sady hitombo ka ty hafalea’o.​—2 Tim. 4:5.

19. Ino ty azo’o atao mba hagnasoagne ty toetse’o?

¹⁹ Misy tanjogne tena lahibey raike tsy toko’e hatao ambanen-draha ty magnatratse aze. Tsy inogne zay fa ty hikezaha’o hanagne i toetse mampifale an’Andrianagnahare rey. (Gal. 5:22, 23; Kol. 3:12; 2 Pet. 1:5-8) Ino ty azo’o atao mba hahavitagne izay? Andao hatao tihoe te hanagne finoagne matanjake rehe. Va’e hipay lahatsoratse amo o boke naho o gazetentikagneo ao mirehake ty fomba hatao mba hanagnagne finoagne matanjake areke rehe. Afake magnampe azo ka i video tapatapa’e amy Tele JW ao rey. Ty anto’e, trea amy i video rey tie akore ty natao ty rahalahy naho ty rahavave ila’e mba hampisehoagne tie manam-pinoagne iareo ndra tie eo aza ty olagne sambe karaza’e atrehe iareo. Dineho amy izay naho fa avy eo tie akore ty fomba azo’o hanahafagne iareo amy ty fiaigna’o.

20. Ino ty azontika atao mba hampitomboagne ty hafaleantikagne sady tsy ho kivy?

²⁰ Azo antoke fa teantika ty hanao ze fara herintikagne amy ty fanompoagne i Jehovah amy hinane zao. Hanompo aze iaby o ndatio amy i tontolo vaovaoy ao. Faie naho itika manao ze fara herintika amparake ty hiavia izay, le tena ho falefale avao fa tsy le ho kivy loatse. Fa ty tena lahibey le tihoe, hagnomey voninahitse naho dera i Jehovah, i ‘Andrianagnaharentikagne falefaley’ tika. (1 Tim. 1:11) Lonike areke tika iaby mba sambe hikezake hifale amy ty tombotsoa anagnantika tsikiraidraike!