1-2. a) Akore ty fivazohoa i Jehovah ty ndaty mieretseretse tie tsy magnino ty manota? b) Ino ty teà i Jehovah hatao o ndaty nanotao?

 TSY ZE kila findesam-batagne, le hotea i Jehovah. Heje’e ohatse ty fahotagne. (Sal. 5:4-6) Mitamà ty Jehovah tie hankatò ty fitsipi’e agnate Baiboly ao tikagne, faie tsy mitake ty hanoantika izay amy ty fomba voririke reke. (Sal. 130:3, 4) Ndra tie izay aza, le tsy milefetse amy ty ndaty ‘tsy matahotse aze ty Andrianagnahare.’ Ty anto’e “mieretseretse iareo tie, tsy magnino ndra tie managne findesam-batagne tsy misy hegnatse aza satria soa fagnahy i Andrianagnaharentikagney.” (Joda 4) Mirehake ty Baiboly tie, ‘hanjamagne ze tsy matahotse aze’ ty Andrianagnahare amy i aly Haramagedonay.​—2 Pet. 3:7; Apok. 16:16.

² Faie tsy teà i Jehovah hisy hozamagne o ndatio. Nianarantikagne tamy i lahatsoratse taloha itoy rey, fa mirehake mazava ty Baiboly tie, ‘tea’e [i Jehovah] hibebake iaby o ndatio.’ (2 Pet. 3:9) Manam-paharetagne manahake i Jehovah o androanavi-pagnahio naho fa mikezake magnampe o ndaty nanotao hibebake sady hiharine Aze indraike. Faie tsy ze kila ndaty nanota ro hibebake. (Isaia 6:9) Mbe manohy ty raha raty atao’e avao ty ila’e, ndra tie fa nikezake nagnampe aze mateteke aza o androanavi-pagnahio. Ino areke ty toko’e hatao o androanavi-pagnahio naho fa miseho zay?

 “ASINTAHO TSY HO AMA’AREO EO I MPANAO RATỲ”

3. a) Arake ty Baiboly, toko’e hatao akore ze ndaty tsy mibebake? b) Nagnino tika ro mirehake tie mifily ty hasintake tsy ho amo o fiangonagneo eo i ndaty nanao ratỳ naho ohatse reke tsy magneke hibebake?

³ Naho fa tsy mibebake ty ndaty raike nanao fahotagne lahibey, le tsy maintsy magnorike ty toromareke amy 1 Korintianina 5:13 ao toy o androanavi-pagnahio: “Asintaho tsy ho ama’areo eo i mpanao ratỳ.” Naho ty maregne, le ireke ty nifily ty hasintake amy i fiangonagney eo. Mijinja ze nitongise’e reke. (Gal. 6:7) Nagnino tika ro mirehake izay? Satria tsy nagneke ty fagnampeagne mateteke natao o androanavi-pagnahio mba hahavy aze hibebake reke. (2 Mpanj. 17:12-15) Natoro’e amy ty raha atao’e tie, tsy te hankatò ty fitsipy i Jehovah reke.​—Deot. 30:19, 20.

4. Nagnino ro atalily i fiangonagney naho fa misy ndaty asintake tsy ho amo o fiangonagneo eo?

⁴ Naho fa asintake tsy ho amo o fiangonagneo eo ty ndaty raike nanao raty tsy mibebake, le hatalily i fiangonagney tie tsy agnisa ty Vavolombelo i Jehovah a sasa reke. Tsy tihoe ty hanalaragne aze ty tanjo i fitaliliagney, fa ty hahavy i fiangonagney hagnorike ty lily amy Baiboly ao tihoe toy tie, tsy toko’e “hifandrambe” naho “hiharo fihinagne ama’e.” (1 Kor. 5:9-11) Misy anto’e soa kanao ty Jehovah mandily izay. Izao ty nisorate i apostoly Paoly: “Lalivay kede avao, le fa mampitombo i kobay iaby.” (1 Kor. 5:6) Hanimba ze mikezake magnorike ty fitsipy i Jehovah ty ndaty nanao fahotagne lahibey tsy mibebake, naho tsy asintake tsy ho amo o fiangonagneo eo.​—Ohab. 13:20; 1 Kor. 15:33.

5. Akore ty toko’e ho fiheverantika ze ndaty nasintake tsy ho amo o fiangonagneo eo, le ino ty anto’e?

⁵ Akore ty toko’e ho fiheverantika ze ndaty nasintake tsy ho amo o fiangonagneo eo? Ndra tie tsy mifandrambe ama’e aza tika, le tsy toko’e hieretseretse tie fa tsy tamaegne hiheregne sasa reke. Hoe agnondry montso ty toko’e ho fiheverantikagne aze. Naho montso ty agnondry raike, le mbe tamaegne hiheregne. Tadidio ka tie, fa nanokan-tegna hoahy i Jehovah i ndatỳ. Mampalahelo fa tsy miaigne mifagnarake amy i fanokanan-tegna’ey reke, le magnoho-doza hoahy ty tegna’e. (Ezek. 18:31) Faie noho i Jehovah mamindra fo, le mitamà tika tie mbe hiheregne i ndatỳ. Akore areke ty hatao o androanavi-pagnahio mba hagnampeagne ze ndaty nasintake?

AKORE TY AGNAMPEA O ANDROANAVI-PAGNAHIO ZE NASINTAKE?

6. Inogne iaby ty raha toko’e hatao o androanavi-pagnahio mba hagnampeagne ty ndaty raike nasintake tsy ho amo o fiangonagneo eo?

⁶ Naho nasintake tsy ho amo o fiangonagneo eo ty ndaty raike, le tsy mikezake magnampe aze sasa vao androanavi-pagnahio? Tsy izay! Naho fa asintake tsy ho amo o fiangonagneo eo ty ndaty raike tsy mibebake, le hampahafantare i komity ty androanavi-pagnahỳ aze ty toko’e hatao’e naho fa te hiheregne reke. Faie mbe misy raha hafa ka toko’e hatao iareo. Amy ty ankapobei’e, le hampahafantare o androanavi-pagnahio i ndaty nanotay tie mbe te hihaogne ama’e indraike iareo afake volagne tsiampeampe mba hahatreavagne tie niova reke. Naho magneke hihaogne amy iareo reke amy ze fotoagne zay, le handrisike aze hibebake naho hiheregne o androanavi-pagnahio. Ndra tie mbe tsy miova aza reke amo o fotoagne iohoe, le hikezake hihaogne ama’e indraike iareo amy ty afara.

7. Akore ty ampisehoa o androanavi-pagnahio tie mitretré ty ndaty raike nasintake tsy ho amo o fiangonagneo eo manahake i Jehovah iareo? (Jeremia 3:12)

 ⁷ Mitretré manahake i Jehovah o androanavi-pagnahio naho fa mifandrambe amy ty ndaty nasintake tsy ho amo o fiangonagneo eo. Tsy nandigne o Israelita nigoreveo hibebake hey ohatse ty Jehovah vaho izay nagnampe iareo. Ireke ty nanao raha voaloha’e mba hagnampeagne iareo ndra tie mbe tsy nampiseho fibebahagne aza iareo. Nitreantika tamy i lahatsoratse faharoe amy ty gazete toỳ, fa nampanambalie i Jehovah i vali’ey indraike ty Hosea, ndra tie mbe agnate ty nanao fahotagne lahibey aza i ampelay. Trea boake amo o ohatse iohoe fa tena mitretré o vahoa’eo ty Jehovah. (Hosea 3:1; Mal. 3:7) Manahake i Jehovah ka o androanavi-pagnahio, le tea iareo hiheregne o ndaty nanotao sady atao iareo ze hahavy izay tsy ho sarotse ama’e.​—Vakio ty Jeremia 3:12.

8. Nagnino i fagnohara i Jesosy miomba i anake nimontsoy ro magnampe antika hahatakatse soa ty raha tsapa i Jehovah miomba o ndaty niala ama’eo? (Lioka 15:7)

⁸ Ko haligno i ohatse miomba i anake nimontso nirehafe i Jesosy amy i lahatsoratse faharoe amy ty gazete toỳ. Naho fa nitalake i baba’ey holy i ana-dahi’ey, le ‘nilay mbama’e mbeo reke, le niatsampe am-bozo’e ey sady nagnoroke aze taman-katea.’ (Lioka 15:20) Mareho fa tsy nandigne i ana-dahi’ey hisoloho ama’e ty baba’e, fa ireke ty nanao raha voaloha’e manahake ty atao o rae bey hateao. Hoe izay ka ty toko’e hatao o androanavi-pagnahio amy ty ndaty nasintake tsy ho amo o fiangonagneo eo. Tea iareo hiheregne amy i Jehovah indraike i agnondry nimontso rey. (Lioka 15:22-24, 32) Ndra ty an-dagnitse agne ndra ty an-tane etoy, le sambe fale naho fa misy ndaty raike miheregne!​—Vakio ty Lioka 15:7.

9. Risihe i Jehovah hanao ino o ndaty nanotao?

⁹ Nitreantikagne hatreto fa tsy tea i Jehovah hijanogne amo o fiangonagneo eo ze ndaty nanao raty faie tsy mibebake. Faie mbe mikezake magnampe iareo avao reke. Tea’e hiheregne iareo. Naho fa misy ndaty mibebake, le izao ty tsapa i Jehovah miomba iareo amy i Hosea 14:4 ao: “Hagnasitragne iareo raho, le tsy hivalike amako sasa iareo. Zotoko ty hotea iareo satria tsy boseke sasa raho.” Toko’e handrisike o androanavi-pagnahio areke zay mba hipay ze fiovagne kede atao i ndatỳ ahatreavagne tie, manomboke mibebake reke. Magnomey toky ze ndaty niala tamy i Jehovah ka o rehake rehoe tie, tea’e iareo sady irie’e hiheregne ama’e malaky.

10-11. Akore ty atao o androanavi-pagnahio mba hagnampeagne ze ndaty fa nasintake tsy ho amo o fiangonagneo eo tagnate ty taogne maro?

¹⁰ Faie manao akore i ndaty fa nasintake tsy ho amo o fiangonagneo eo tagnate ty taogne maro rey? Va’e fa tsy manao i raha nahavy aze nasintakey i ndaty rey tie amy izao. Ty ila’e ka va’e fa tsy mahatadidy ty anto’e nanitahagne aze. Hipay sady hitilike i ndaty rey o androanavi-pagnahio ndra fa ela ndra vaho tsiela ty nanitahagne aze. Isake tie mitilike aze iareo, le toko’e hiarake hivavake ama’e sady handrisike aze hiheregne indraike. Mazava hoaze fa naho fa ela ty tsy niharoa i ndatỳ amo o fiangonagneo, le azo antoke fa tena maleme ara-pagnahy reke. Naho mirehake reke tie te hiheregne indraike, le va’e hanao fandaharagne o androanavi-pagnahio mba hisy ndaty hampianatse Baiboly aze ndra tie mbe tsy voarae aza reke. Mazava hoaze fa o androanavi-pagnahio ty hifily ze rahalahy ndra rahavave hampianatse Baiboly aze.

¹¹ Mikezake mitretré o ndatio manahake i Jehovah o androanavi-pagnahio, le mipay ze niala tamy i Jehovah sady magnampe iareo  hiheregne ama’e. Naho trea tie, tena mibebake ty ndaty raike nanota sady niala amy i raha raty natao’ey, le toko’e ho rambesegne malaky arake ze azo atao reke.​—2 Kor. 2:6-8.

12. a) Ino ty raha mila itaoa o androanavi-pagnahio? b) Nagnino tika ro tsy toko’e hieretseretse tie tsy hahazo ty famindram-po i Jehovah ty ndaty ila’e? (Henteo i fagnamarehagne ambane pejey.)

¹² Faie amy ty raha ila’e, le mila mitao o androanavi-pagnahio aloha ty handrambesagne ndaty raike nasintake. Naho namahotse ajaja ohatse ty ndaty raike ndra nivalim-pinoagne ndra nipay fomba hisarahagne amy ty vali’e, le mila atao o androanavi-pagnahio azo antoke soa tie, fa nibebake vata’e i ndatỳ aloha ty handrambesagne aze. (Mal. 2:14; 2 Tim. 3:6) Tsy maintsy miaro o fiangonagneo iareo. Faie mila fantantika ka fa mandrambe ze mpanota tena mibebake sady miala amy ty raty natao’e ty Jehovah. Ndra tie mitao mafe amy i  raha nirehafegne teo rey aza o androanavi-pagnahio, le tsy toko’e hieretseretse tie tsy ombia hahazo ty famindram-po i Jehovah ze ndaty nanao ireo. b​—1 Pet. 2:10.

INO TY AZO O FIANGONAGNEO ATAO?

13. Ino ty tsy mampitovy ty fifandrambesantika amy ty ndaty nahazo fagnanaragne naho ty ndaty nasintake tsy ho amo o fiangonagneo eo?

¹³ Kindraike, le misy ndaty atalily tie nahazo fagnanaragne. Faie mbe mifandrambe ama’e avao tika, arake i nirehafegne tamy i lahatsoratse taloha itoỳ. Ty anto’e, nibebake reke sady tsy nanao i raha raty natao’ey sasa. (1 Tim. 5:20) Mbe agnisa ty fiangonagne avao reke, le mila fampaherezagne boake amo o rahalahy naho o rahavaveo mba hahavita hanao ty soa avao. (Heb. 10:24, 25) Faie tsy hoe izay ty ataontika naho asintake tsy ho amo o fiangonagneo eo ty ndaty raike. Tsy ‘mifandrambe’ sady ‘tsy miharo fihinagne amy ty ndaty hoe izay’ tika.​—1 Kor. 5:11.

14. Ino ty fanapahan-kevetse azo ty Kristiana tsikiraidraike rambesegne naho misy ndaty raike nasintake tsy ho amo o fiangonagneo eo? (Henteo i sarey.)

¹⁴ Midika vao zay tie, lelia’e tsy dareagne sasa ze ndaty nasintake tsy ho amo o fiangonagneo eo? Oho’o, tsy izay. Maregne fa tsy mifagnosehose ama’e tika. Faie afake mampiasa ty feo ty fieretsereta’e voaofa ty Baiboly o Kristianao, naho fa hanapa-kevetse tie hanasa ty ndaty raike nasintake hivory. Va’e ho agnisa ty longontika reke ndra ninamantikagne maifitse antika. Le akore ty hataontika naho mivory reke? Tsy nanalama iareo tika tie taloha. Mila mampiasa ty feo ty fieretsereta’e voaofa ty Baiboly avao ka ty Kristiana tsikiraidraike naho fa hanapa-kevetse miomba izay. Misy zao ty va’e hanalama i ndatỳ naho fa am-pivoriagne agne ndra hanalama aze tolisoa. Faie tsy hirehake ela bey ndra hiarake hanao raha ama’e tika.

15. Fahotagne manao akore ty rehafe ty 2 Jaona 9-11? (Henteo ka ty efajoro tihoe “ Fahotagne Mitovy vao i Nirehafe i Paoly Naho i Jaonay?”)

¹⁵ Va’e hieretseretse ty ila’e tie: ‘Tsy mirehake vao ty Baiboly tie, manohagne ty raty atao i ndaty nanao raty tsy nibebakey ze manalama  aze?’ (Vakio ty 2 Jaona 9-11.) Naho henteagne ty rehake magnodidigne amo o andinin-teny iohoe, le mihatse amy ty mpivalim-pinoagne naho ze mitaogne ty hafa handika ty fitsipy ty Baiboly o rehake reo. (Apok. 2:20) Tsy hanao fandaharagne mba hitilihagne o ndaty rehoe o androanavi-pagnahio. Faie mbe mitamà avao tika tie, mbe hibebake iareo. Amparake ty hiavia izay, le tsy manalama ndra manasa ty ndaty manao ireo hivory tika.

TAHAFO TY FITRETRÉZA I JEHOVAH NAHO TY FAMINDRAM-PO’E

16-17. a) Ino ty teà i Jehovah hatao o ndaty nanotao? (Ezekiela 18:32) b) Akore ty hampisehoa o androanavi-pagnahio tie miara-miasa amy i Jehovah iareo?

¹⁶ Ino ty nianarantikagne tamy ty gazete toy ato? Tsy teà i Jehovah hisy hozamagne o ndatio! (Vakio ty Ezekiela 18:32.) Teà’e hilongo soa ama’e indraike o ndaty nanotao. (2 Kor. 5:20) Izay ty nahavy i Jehovah amparake izay nandrisike mateteke ty mpanompo’e nanao raty, mba hibebake sady hiheregne ama’e. Managne tombotsoa hiara-miasa amy i Jehovah o androanavi-pagnahio, mba hagnampe o ndaty nanao ratio hibebake.​—Rom. 2:4; 1 Kor. 3:9.

¹⁷ Mba alao sare an-tsaigne moa ty hafalea ty an-dagnitse agne naho fa misy mpanota raike mibebake! Tena fale ty Jehovah, i Babantikagne an-dagnitse agney isake tie misy agnondri’e nimontso miheregne amo o fiangonagneo eo. Mihamitombo ty hateantika i Jehovah naho misaintsaigne miomba ty fitretréza’e, ty famindram-po’e naho ty hasoa fagnahi’e tsy misy hoe’e tika.​—Lioka 1:78.