Nanoratse hoe izao hoahy ty Kristiana ta Tesalonika agne ty apostoly Paoly: “Naho misy ndaty tsy mankatò ze raha rehafegne amy ty taratasy toy ato, le mareho ze ndaty zay.” (2 Tes. 3:14) Nirehake tika taloha tie, natao hoahy o androanavi-pagnahio o toromareke iohoe. Naho misy ndaty tsy magnorike ty toro lala ty Baiboly, ndra tie fa nanoro hevetse aze mateteke aza o androanavi-pagnahio, le va’e hanao lahajaka fampitaoagne hoahy o fiangonagneo o androanavi-pagnahio. Tsy hifagnosehose amy i ndaty marehegney sasa o mpitorio afara izay.

Faie mila ahitsy o fagnazavagne iohoe. Takantikagne tie amy izao, fa ty teà i Paoly horehafegne amy i toroheve’ey, le tihoe anjara ty tsikiraidraike amy ty fiangonagne eo ty manapa-kevetse. Tsy mila manao lahajaka fampitaoagne areke o androanavi-pagnahio. Nagnino ro niova ty fahazoantika ty 2 Tesalonianina 3:14? Andao hodinehentikagne tie, nirehake miomba ty ino ty Paoly naho fa nagnomey o torohevetse iohoe.

Nirehake ty Paoly tie ‘tsy nimete anaregne’ ty ndaty ila’e tamo o fiangonagne iohoe ao. Nanoro hevetse iareo mioregne amy ty Saontsin’Agnahare reke faie tsy nagnorike izay iareo. Fa nanoro hevetse iareo reke tamy ty fitiliha’e taloha io tie: “Ze tsy mete miasa, le tsy toko’e hihinagne.” Faie mbe tsy namelon-tegna avao ty ila’e ndra tie afake nanao izay aza. Tsy vita izay fa mbe nilitsilitse amy ty afera ty hafa ka iareo. Akore ty toko’e ho findesa o Kristianao ze ndaty tsy mete anaregne hoe izay?​—2 Tes. 3:6, 10-12.

Hoe ty Paoly: “Mareho ze ndaty zay.” Izao ty teagne horehafegne amy ty rehake Grike nangalagne io: Mamantatse soa ty ndaty hoe izay sady mitao mba tsy ho voatao’e. Mivantagne amo o fiangonagneo iaby areke i toroheve i Paolỳ fa tsy amo o androanavi-pagnahio avao. (2 Tes. 1:1; 3:6) Va’e hahamareke ty Kristiana raike tie, misy rahalahy ndra rahavave tsy magnorike ty toroheve ty Saontsin’Agnahare. Va’e hifily ty “tsy hifagnosehose” amy ty ndaty tsy mete anaregne hoe izay areke reke.

Midika vao zay tie manahake ty findesagne o ndaty nasintake tsy ho amo o fiangonagneo eò ty ho findesagne aze? Aỳ! Izao indraike ty nirehafe i Paoly: “Anaro lognandro manahake o rahalahio reke.” Mbe hiarake hivory amantika ndra hiarake hanompo amantika avao ty ndaty marehegne hoe izay, faie va’e hifily ty tsy hiarake hihisa ama’e ndra hitsangatsangagne miarake ama’e tika. Ino ty anto’e? “Amy izay reke ho megnatse,” hoe ty Paoly. Naho fa tsy mifagnosehose ama’e hoe izay tikagne, le va’e ho megnatse reke amy i raha atao’ey sady hiova.​—2 Tes. 3:14, 15.

Akore ty hahafantara o Kristianao tie, mila marehegne ty ndaty raike? Voaloha’e, mila fantarentikagne soa tie “tsy mete anaregne” manahake i nirehafe i Paolỳ vao reke naho henteagne ty findesam-bata’e. Tsy ze ndaty tsy mitovy safidy amantikagne amy ty raha iankigna ty feo ty fieretseretagne ndra tsy mitovy raha teagne amantika ty tea i Paoly horehafegne. Tsy i ndaty nanao raha nampalahelo antikagne rey ka io, fa ze ndaty fa nahazo fagnanaragne mioregne amy ty Saontsin’Agnahare faie mbe mifily ty tsy hankatò avao.

Naho mahatrea Kristiana tsy tea mankatò a hoe izay tikagne tie amy izao, le afake manapa-kevetse ty tsy hiarake hihisa ama’e ndra hitsangatsangagne miarake ama’e. Fanapahan-keventikagne manokagne io, le tsy toko’e horehafegne amy ty ndaty hafa ankoatse ty keleiantikagne an-tragno ao. Mbe miarake mivory amantika avao ty Kristiana tsy tea mankatò sady mbe miarake manompo amantika. Naho miova reke, le hifandrambe ama’e manahake ty taloha indraike tikagne.