1-2. Ino ty raha mila ataontikagne amy itika mandigne ty hiavia i tontolo vaovaoy?

 SAROBILY amantikagne ty fampitamà i Jehovah tihoe hagnafake ty tontolo toy le hagnova aze ho tontolo vaovao feno ndaty maregne. (2 Pet. 3:13) Ndra tie tsy haintikagne aza tie ombia ty hiavia i tontolo vaovaoy, le treantika amy ty raha miseho amy izao tie fa tsy ho ela ty hiavi’e.​—Mat. 24:32-34, 36; Asa. 1:7.

² Faie ndra tie fa ela ndra vaho tsiela ty nahaiantikagne ty hamarenagne, le ilaentika iaby ty magnatanjake ty finoantikagne o fampitamaegne iohoe. Ty anto’e, va’e haleme ty finoantika naho tsy manao izay tika. Nirehafe i Paoly tie “ota mora mamehefehe” antika o tsy fanagnagne finoagneo. (Heb. 12:1) Mba tsy hampaleme finoagne antika, le mila dinehentika mateteke ty porofo magnamaregne fa tena fa marine vata’e i tontolo vaovaoy.​—Heb. 11:1.

3. Ino ty hodinehentikagne ato?

³ Hodinehentika ato ty raha telo hagnampe antika hagnatanjake ty finoantika, miomba i fampitamà i Jehovah tontolo vaovaoy. 1) Fisaintsaignagne i solovoigney, 2) fitadidiagne ty hery anagna i Jehovah, 3) bey atao amy ty fanoagne raha ara-pagnahy. Afara izay tika handineke tie, nagnino ty raha nisaontsie i Jehovah tamy i Habakoka ro magnatanjake ty finoantika amy izao. Faie andao heike tika handineke ty olagne va’e hatrehentika ilagne finoagne matanjake. Mila matoky ty fampitamà i Jehovah tontolo vaovao tika naho te hahavita hiatreke irey.

 OLAGNE ILAGNE FINOAGNE MATANJAKE

4. Ino ty fanapahan-kevetse ilagne finoagne matanjake?

⁴ Isan’andro tika, le mandrambe fanapahan-kevetse mitake finoagne matanjake. Ohatse, fanapahan-kevetse miomba ty ndaty atao namagne, fihisagne, fianaragne, fanambaliagne, fiterahagne naho asa. Eretsereto tie: “Trea amy ty fanapahan-kevetse rambeseko vao fa mino vata’e raho tie mandriogne avao ty tontolo toy sady fa tsy ho ela le hosoloen’Andrianagnahare tontolo vaovao? Sa ty raha ataoko mampiseho tie managne ty toe-tsay ty ndaty tsy mino ze o fiaignagne nainai’e amy ty hoavy zao raho?” (Mat. 6:19, 20; Lioka 12:16-21) Handrambe fanapahan-kevetse soa tika naho magnatanjake ty finoantika i tontolo vaovao fa marine hoavỳ.

5-6. Nagnino tika ro mila managne finoagne matanjake naho fa agnate ty fotoan-tsarotse? Magnomeza ohatse.

⁵ Misy olagne hafa atrehentikagne ka mitake finoagne matanjake. Va’e henjehegne tika, harare ndra hiatreke raha sarotse hafa va’e hahakivy antika. Amy ty voaloha’e, le va’e ho vitantika avao ty hiatreke aze. Faie naho mitohy avao ty olagne hoe ireo, le ilaentika ty managne finoagne matanjake mba hahavitantika hiaretse naho hahavita hanohy ty fanompoagne i Jehovah am-pifaleagne.​—Rom. 12:12; 1 Pet. 1:6, 7.

⁶ Naho fa miatreke raha sarotse tika, le va’e hieretseretse tie tsy ho avy ze o tontolo vaovao zao. Midika vao zay tie maleme ty finoantika? Tsy voatere ho izay. Eretsereto toy: Naho fa asotry le hoe le lia’e tsy hafana sasa i androy. Faie tsy midika zay tie tsy ho avy i asaray. Tsy maintsy avy avao i asaray. Hoe izay ka, fa naho fa kivy tika, le va’e hieretseretse tie le lia’e tsy ho avy i tontolo vaovaoy. Faie naho matanjake ty finoantika, le hatoky tika fa tsy maintsy ho tanterake ty fampitamàn’Andrianagnahare. (Sal. 94:3, 14, 15; Heb. 6:17-19) Naho fa matoky izay tika, le hahavita hanao voalohan-draha ty fanompoagne i Jehovah amy ty fiaignantikagne.

7. Ino ty toe-tsaigne tsy toko’e hanagnantikagne?

⁷ Mila managne finoagne matanjake ka tika naho te hahavita hanohy i asa fitoriagney. Maro amy ty ndaty itoriantikagne ro mieretseretse tie tsy maregne i “talily soa” miomba i tontolo vaovao ampitamàn’Agnaharey. (Mat. 24:14; Ezek. 33:32) Mila mitao tika mba tsy hanagne ty toe-tsay o ndaty misalasala manahake izay. Mba tsy hisehoa izay, le mila magnatanjake ty finoantika tikagne. Andao tika handineke fomba telo azo anoagne izay.

SAINTSAIGNO I SOLOVOIGNEY

8-9. Nagnino ty fisaintsaignagne i solovoigney ro misy voka’e amy ty finoantikagne?

⁸ Agnisa ty fomba raike hagnatanjahantika ty finoantikagne ty fisaintsaignagne i solovoigney. I solovoigney ro antoke atokisantika fa tsy maintsy ho tanterake i fampitamàn’Andrianagnaharey. Soa ty handinehantika laleke ty anto’e nagnomeagne i solovoigney naho ty raha tsy maintsy nafoe i Jehovah. Naho manao izay tika, le vao mainke hitombo ty finoantika fa tsy maintsy ho avy i fiaignagne tsy misy fara’e amy tontolo vaovaoy. Nagnino tika ro afake mirehake izay?

⁹ Ino ty raha tsy maintsy nafoe i Jehovah? Nagnirake i Ana-dahi’e bakotokagne sady namagne maifitse azey ho an-tane etoy ty Jehovah, mba hanjare ndaty voririke. Tamy i Jesosy tan-tane etoy, le niaretse raha sarotse maro. Nampijalegne reke sady nanaintaigne vaho nimate. Mba azo’o sare an-tsaigne vao ty halahibey ty raha nafoe i Jehovah! Ho nagnenga i Ana-dahi’ey hijale naho ho mate vao ty Andrianagnahare, naho ohatse mba hanagnantika fiaignagne soa agnate ty fotoagne fohe avao? (Jaona 3:16; 1 Pet. 1:18, 19) Noho i Jehovah te hagnomey toky antika tie afake hiaigne  amy i tontolo vaovaoy ao tika, le izay ty nahavy aze nagnomey i ana-kiso’ey.

TADIDIO TY HERY ANAGNA I JEHOVAH

10. Ino ty raha azo i Jehovah atao, arake ty Efesianina 3:20?

¹⁰ Ty fisaintsaignagne ty hery i Jehovah ty fomba faharoe azontikagne hagnatanjahagne ty finoantika. Managne hery lahibey reke mba hagnatanterahagne ze fampitamà’e iaby. Va’e tsy ho taka ty say o ndaty tie manao akore maregne ze o fiaignagne tsy misy fara’e amy i tontolo vaovaoy ao zao. Faie mateteke ty Jehovah ro mampitamà raha tsy vita o ndatio ty magnatanterake aze. Vita’e zay satria ireke ro Andrianagnahare Fara Izay ty Mahery. (Joba 42:2; Mar. 10:27) Tsy toko’e hahalatsa antikagne areke naho mampitamà raha tsy ho vita o ndatio reke.​—Vakio ty Efesianina 3:20.

11. Mirehafa fampitamàgne miambake nampitamaen’Andrianagnahare o mpanompo’e talohao? (Henteo ty efajoro tihoe “ Ty Ila’e amy ty Fampitamàgne Miambake fa Nitanterake.”)

¹¹ Dineho ty raha ila’e nampitamà i Jehovah ty mpanompo’e taloha. Le hoe sarotse inoagne zay ty hahatanterake aze. Nagnomey toky i Abrahama naho i Saraha ohatse reke tie hanagne ana-dahy iareo, ie amy izao iareo fa antetse. (Gen. 17:15-17) Nisaontsy tamy i Abrahama reke fa ty tarana’e ro homea’e ty tanà o Kananitao. Faie tagnate ty taogne maro, le niondevo ta Ejipta tagne ty tarana i Abrahama, le o Israelitao. Le hoe tsy ho tanterake zay areke i fampitamàgney. Faie le niavy eo zay. Tafara tatoy ka, le nisaontsy tamy ty rakemba raike atao tihoe Elizabeta ty Jehovah fa hanagne ana-dahy reke. Nisaontsy tamy i Maria, ampela mbe tsy nahavany lahy ka ty Jehovah, fa hiterake i ana-dahi’ey reke. Ze raha zay, le fahatanteraha ty raha nampitamà i Jehovah fa agnarivo’e taogne lasa tamy tonda i Edenay tao.​—Gen. 3:15.

12. Ino ty toky omey i Jehovah antika miomba ty raha vita’e noho ty heri’e, arake ty Josoa 23:14 naho ty Isaia 55:10, 11?

¹² Ty fisaintsaignagne ty fahatanteraha i fampitamà’e taloha rey, le magnatanjake ty finoantika fa ho vita i Jehovah ty hagnomey antika i tontolo vaovaoy noho ty heri’e. (Vakio ty Josoa 23:14; Isaia 55:10, 11.) Ty fanoagne izay, le magnampe antika ho vognogne hagnampe ty hafa hahatakatse fa tena hisy vata’e i tontolo vaovaoy fa tsy talily vande avao. Ty vata-tegna i Jehovah ro nisaontsy tie hisy lagnitse vaovao naho tane vaovao. Hoe reke naho fa nampitamà izay: “Azo antoke sady maregne o rehake rehoe.”​—Apok. 21:1, 5.

MIKEZAHA HO BEY ATAO AMY TY RAHA ARA-PAGNAHY

13. Nagnino ty fivoriagne ro magnatanjake ty finoantikagne? Hazavao.

¹³ Ty fanoagne raha ara-pagnahy tsy tapake ty fomba fahatelo hagnatanjahagne ty finoantikagne. Mareho ohatse ty soa ho azontikagne naho fa magnatreke ty fivoria ty fiangonagne. Dineho ty raha nirehafe i Anna, mpanompo marain-tsy hariva fa tagnate ty taogne maro. Maro ty fanendreagne fa niazo’e. Hoe reke: “Magnatanjake ty finoako ty fagnatrehagne fivoriagne. Ndra tie tsy le mahay soa aza i mpanao lahajakay ndra tsy mirehake hevetse vaovao, le mateteke ze raha reiko ro magnampe ahy vao mainke hahatakatse ty hamarenagne agnate Baiboly ao. Izay ro magnatanjake ty finoako.” b Azo antoke fa magnatanjake ty finoantika ka ty toin-dreha ty hafa.​—Rom. 1:11, 12; 10:17.

14. Nagnino ty fanompoagne ro magnatanjake ty finoantika?

¹⁴ Magnatanjake ty finoantikagne ka tika naho fa mandrambe anjara amy ty fanompoagne amy  i tonday ey. (Heb. 10:23) Izao ty nirehafe i Barbara fa nanompo i Jehovah tagnate ty 70 taogne mahery: “Tsapako tie tena magnatanjake ty finoako ty asa fitoriagne. Vao mainke velombelogne naho matanjake ty finoako, arakarake ty irehafako amy ty hafa, ty miomba i fampitamà i Jehovah fanjaka rey.”

15. Nagnino ty fianaragne raike ro magnatanjake ty finoantikagne? (Henteo i sarey.)

¹⁵ Mareho ka ty raha hafa magnatanjake ty finoantika toy. Tsy ino zay fa ty fianaragne raike. Trea i Susan fa tena magnampe aze ty fanoagne fandaharam-potoagne mba hanoagne fianaragne raike. Hoe reke: “Naho fa lahady raho, le magnomagne Fitalakesan-davitse hianaragne amy heregnandro magnarake. Naho fa tinainy naho talata raho, le magnomagne fivoriagne ampagnivoa i heregnandroy. Le ty andro ankoatse izay raho, manao fianaragne raike.” Noho i Susan nagnaja ty fandaharam-potoa’e hanoagne fianaragne raike, le izay ty nagnatanjake ty finoa’e. Miasa amy Foibeintikagne agne fa tagnate ty taogne maro ka ty Irene. Nagnatanjake ty finoa’e ty fianaragne ty faminania ty Baiboly. Hoe reke: “Tena mahalatse ahy tihoe tanterake amy ty pitsopitso’e ty faminaniagne saontsie i Jehovah.” c

“TSY MAINTSY HO AVY EO” TY FAMPITAMA’E

16. Nagnino ty toky nimey i Jehovah i Habakoka ro mbe mahakasike antika amy izao? (Hebreo 10:36, 37)

¹⁶ Fa tagnate ty taogne maro ty mpanompo i Jehovah ila’e ro nandigne ty hifaragna ty tontolo toy. Misy ndaty mieretseretse tie ela loatse ty hiavia ty fara’e. Faie taka i Jehovah soa ty raha tsapa ty mpanompo’e. Nagnomey toky i Habakoka mpaminany ohatse reke tie: “Fa mbe ho amy ty andro fa tinondro vaho ho tanterake i fahitagney, sady lomay mafe mbamy i fara’ey mbeo le tsy havande. Ndra tie ela ty fiavi’e, le ligniso avao fa tsy maintsy ho avy. Tsy halaogne zay.” (Hab. 2:3) I Habakoka avao vao  ro mandrambe soa amo o toky nimean’Andrianagnahare aze iohoe? Sa mbe mahakasike antikagne amy izao ka? Nitarihe ty fagnahy masigne ty apostoly Paoly le naniahy o rehake rehoe ty Kristiana mandigne ty hiavia i tontolo vaovaoy. (Vakio ty Hebreo 10:36, 37.) Afake matoky areke tika fa ndra tie hoe ela zay aza ty hiavia i fampitamaegney, le ‘tsy maintsy ho tanterake avao sady tsy halaogne.’

17. Akore ty nampihara ty rahavave raike ty raha nisaontsie i Jehovah tamy i Habakoka?

¹⁷ Maro ty mpanompo i Jehovah amy izao fa mampihatse ty toroheve i Jehovah tihoe: “Ligniso avao.” Nisy aza ty fa nanao izay tagnate ty taogne maro. Agnisa izay ohatse ty Louise. Tamy 1939 reke ro nanomboke nanompo i Jehovah. Hoe reke: “Nisy fotoagne raho nieretseretse tie ho avy aloha ty hahavità ty fianarako amy lisé ey i Aramagedonay. Faie tsy izay ty raha nisy. Treako fa tena nagnampe ahy ty famakiagne ty tantara o ndaty nandigne ty hahatanteraha ty fampitamà i Jehovah. Agnisa izay ohatse ty Noa, ty Abrahama, ty Josefa naho i ndaty hafa tsy maintsy nandigne tagnate ty fotoagne lava, vaho izay nahazo ty valesoa’e boake amy i Jehovah rey. Ty finoagne fa tsy maintsy ho tanterake i fampitamaegne rey ro nagnampe ahy naho ty ndaty hafa hatoky fa marine i tontolo vaovaoy.” Maro amy ty mpanompo i Jehovah fa ela ka ro magneke izay!

18. Nagnino ty fandinehagne o raha finorogneo ro magnatanjake ty finoantikagne tie ho avy vata’e i tontolo vaovaoy?

¹⁸ Maregne fa mbe tsy eo i tontolo vaovaoy. Faie dineho moa ty raha ila’e fa eo agnisa izay o vasiagneo, o hataeo, o bibio, naho o ndatio. Tsy misy ndaty afake mandietse tie tsy tena misy o raha rehoe ndra tie tsy fantatse aza ty fotoagne nampisy iareo. Faie nanjare nisy o raha rehoe satria niforogne i Jehovah. (Gen. 1:1, 26, 27) Nampitamà ka ty Jehovah fa hampisy tontolo vaovao. Hotanterahe’e ze fampitamà’e zay. Naho fa amy i tontolo vaovaoy ao, le ho salama soa sady ho voririke o ndatio naho hankamamy o fiaignagneo nainai’e. Afake matoky areke tika fa hisy vata’e i tontolo vaovaoy amy ty fotoagne fa tinondro i Jehovah.​—Isaia 65:17; Apok. 21:3, 4.

19. Ino ty azo’o atao mba hagnatanjaha’o ty finoa’o?

¹⁹ Amparake ty hiavia izay, le anò ze azo’o atao mba hagnatanjahagne ty finoa’o. Ampitombò ty fankasitraha’o i solovoigney. Tadidio ty hery lahibey anagna i Jehovah. Mikezaha ho bey atao amy ty raha ara-pagnahy. Naho manao ireo rehe, le ho “agnisa i aze handova i fampitamàgney, noho iareo nanam-pinoagne naho faharetagne.”​—Heb. 6:11, 12; Rom. 5:5.