1. Ino ty raha rineha ty ajaja raike miomba ty fanantena’e famelomagne ty mate?

 NARARE mafe ty ajaja raike atao tihoe Matthew sady nila rinasa mateteke reke. Nagnente fandaharagne Tele JW iareo keleian-draike tamy ireke nifito taogne. Nisy hira miomba ty famelomagne ty mate tamy ty fara i fandaharagney sady nahatrea ndaty nanalaka ty longo’e vinelogne indraike iareo. b Naho fa nitapetse i fandaharagney le nimbamy i baba’e naho i rene’e mbeo reke sady namihigne ty tagna iareo ro nirehake tie: “Hai’areo baba naho nene ein, ndra tie ho mate aza raho, le mbe ho velogne indraike. Ligniso’areo avao raho fa ko kivy nareo!” Azo’o sare an-tsaigne vao ty nitsapa i rae aman-drene’ey naho fa nahatrea ty finoagne matanjake nanagna i ana iareoy?

2-3. Nagnino ro mahasoa antika ty misaintsaigne miomba ty famelomagne ty mate?

² Mahasoa antika ty misaintsaigne mateteke ty fampitamà ty Baiboly miomba ty famelomagne ty mate amy ty hoavy. (Jaona 5:28, 29) Satria tsy haintika tie va’e harare tampoke tika ndra va’e hisy longo maifitse antika ho mate tampoke. (Mpito. 9:11; Jak. 4:13, 14) Magnampe antikagne hahavita hiaretse o raha sarotse rehoe ty fanantenantika miomba ty famelomagne ty mate. (1 Tes. 4:13) Magnomey toky antika ty Soratse Masigne tie mahafantatse soa antika i Babantika an-dagnitse agney sady tena tea’e tika. (Lioka 12:7) Tsy maintsy mahafantatse soa antika sady mahatadidy ty maha ie antika ty Jehovah mba hahafaha’e mamelogne naho mamorogne antika indraike. Tena tea antika ty Jehovah kanao magnomey antika fahafahagne ho velogne nainai’e sady hamelogne antika indraike naho mate tika.

³ Hodinehentika voaloha’e ty anto’e inoantika ty fampitamagne miomba ty famelomagne ty mate. Afara izay tika handineke tantara magnatanjake finoagne misy i andinin-teny fototse manao  tihoey: “Hovelogne ty rahalahi’o.” (Jaona 11:23) Le amy ty fara’e tika hianatse ty azontikagne atao mba tena hisy dika’e amantikagne ty famelomagne ty mate.

4. Ino ty mahavy antika hatoky ty fampitamagne raike? Mirehafa ohatse.

⁴ Matoky ty fampitamagne raike tika naho ohatse i ndaty mampitamagney ro magniry sady managne hery hagnatanteraha’e i raha ampitamà’ey. Misy ohatse toy: Eretsereto tie rinava ty tsikolony ty tragno’o. Le nampitamà azo ty nama’o tie: ‘Ao fa ampeako rehe le haorentika i tragno’oy.’ Tena vognogne reke le manjare atokisa’o fa magniry hagnampe azo. Naho tena mahay mamboatse tragno reke sady manam-pitaovagne, le matoky rehe fa hovita’e ty hagnampe azo. Hatoky i fampitama’ey rehe. Akore ka ty amy ty fampitaman’Andrianagnahare miomba ty famelomagne ty mate? Tena magniry hanao izay vao reke sady managne hery hagnatanterahagne izay?

5-6. Nagnino tika ro afake matoky fa magniry hamelogne ty mate ty Jehovah?

⁵ Tena magniry hamelogne ty mate vao ty Jehovah? Azo antoke fa magniry hanao izay reke. Maro ty ndaty nampanorate i Jehovah ze fampitamà’e zay agnate Baiboly ao. (Isaia 26:19; Hosea 13:14; Apok. 20:11-13) Tsy maintsy hotanterahe i Jehovah ze raha ampitamae’e. (Jos. 23:14) Magniry mafe hamelogne o ndaty nimateo ty Jehovah. Nagnino tika ro mirehake izay?

⁶ Dineho ty raha rineha i Joba. Natoky reke fa ndra tie mate le mbe te hamelogne aze indraike ty Jehovah. (Joba 14:14, 15, f.a.p) Hoe izay ka ty fagniria i Jehovah amy ze mpanompo’e nimate. Fa tsy ligne’e ty hamelogne iareo indraike sady hatao’e salama soa naho ho sambatse iareo. Akore ka ty amy i ndaty an-tapetrisa’e nimate tsy mba nahafantatse ty miomba i Jehovah rey? Magniry hamelogne iareo ka i Andrianagnaharentika bey hateay. (Asa. 24:15) Tea’e homeagne fahafahagne mba hiragnetse ama’e naho hiaigne nainai’e an-tane etoy iareo. (Jaona 3:16) Izay ty magnamaregne fa magniry hamelogne ty mate vata’e ty Jehovah.

7-8. Nagnino tika ro afake matoky fa manan-kery hamelomagne ty mate ty Jehovah?

⁷ Manan-kery hamelomagne ty mate ka vao ty Jehovah? Azo antoke zay satria “Tompo ty Hery” reke. (Apok. 1:8) Ampe mba handreseagne ze fahavalo’e iaby, agnisa izay o fateo, ty hery anagna’e. (1 Kor. 15:26) Magnatanjake naho mampahery antika ty fahafantaragne izay. Dineho ty tantara i Rahavave Emma Arnold. Niatreke fitsapagne mafe iareo keleian-draike tamy ty Aly Lahibey II. Izao ty nampionogna’e ty anak’ampela’e, naho fa nimate vinono o Naziao tamy ty tobe fitanagne tao, ty longo iareo: “Naho ohatse tsy hovelomegne sasa o ndaty nimateo, le tsy hidika vao zay tie mahery ambone i Jehovah o fateo?” Mbe misy raha mahery ambone i Jehovah vao? Azo antoke fa tsy hisy zay. Vita i Andrianagnahare Tompo ty Herỳ ty hamelogne indraike o ndaty nimateo noho ireke Mpamorogne.

⁸ Anto’e hafa mahavy an’Andrianagnahare hahavita hamelogne ty mate ka ty fanagna’e fitadidiagne tsy misy fetra’e. O vasiagneo zao tognone’e amy ty agnara’e tsikiraidraike. (Isaia 40:26) Midika zay fa tadidi’e iaby ka ze ndaty nimate. (Joba 14:13; Lioka 20:37, 38) Tsy sarotse ama’e ty mitadidy ty pitsopitson-draha amy iareo naho fa hamelogne aze; agnisa izay ty pozipozy i ndatỳ naho ty raha niaigna’e vaho ty fitadidia’e.

9. Nagnino rehe ro matoky ty fampitamà i Jehovah miomba ty famelomagne ty mate?

 ⁹ Atokisantika ty fampitamà i Jehovah miomba ty famelomagne ty mate noho itika mahafantatse tie magniry hanao izay reke sady managne hery hagnatanteraha’e izay. Intoy ka misy anto’e hafa atokisantika ty fampitamà’e: Fa namelogne ty mate ty Jehovah. Nisy lahilahy tsy nivalike nimea’e hery mba hamelogne ty mate tie taloha; agnisa izay ty Jesosy. Andao tika handineke tantara raike miomba ty famelomagne ty mate natao i Jesosy, voarehake amy Jaona toko faha-11 ao.

10. Ino ty raha niseho tamy ty Jesosy nanao fanompoagne tan-daferoy i Jordana tey, le akore ty natao’e? (Jaona 11:1-3)

¹⁰ Vakio ty Jaona 11:1-3. Dineho ty raha niseho ta Betania tagne tamy ty farampara ty taogne 32. Nisy ragne i Jesosy maifitse aze ty tao. Le i Lazarosy miharo ty rahavave’e roe atao tihoe Maria naho i Marta. (Lioka 10:38-42) Nivali-doha i rahavave’e rey satria narare mafe ty Lazarosy. Nagnirake ndaty ho mbamy i Jesosy mban-daferoy i Jordana mbeo iareo. Lia roe andro ty Betania naho ty tanàgne homba iareo. (Jaona 10:40) Faie mampalahelo fa naito ty Lazarosy amparake ty niavia i ndaty nirahegney tamy i Jesosy agne. Maregne fa hay i Jesosy tie fa mate i ragne’ey, faie le mbe nandeha mba Betania mbeo avao reke ndra tie lia roe andro aza vaho avy agne. Fa efatse andro ty nimateza i Lazarosy ty zoe’e. Io ty fotoagne hagnomea i Jesosy voninahitse an’Agnahare naho hanoa’e raha soa hoahy i nama’e rey.​—Jaona 11:4, 6, 11, 17.

11. Ino ty ianarantika miomba ty atao tihoe namagne boake amy ty raha natao i Jesosy?

¹¹ Mampianatse antika miomba ty atao tihoe tena namagne i tantara ignehoe. Dineho fa tsy nangatake ty hiavia i Jesosy a Betania agne ty Maria naho i Marta naho fa nagnirake ndaty ho mbama’e mbeo. Nirehake avao iareo tie marare i ragne’oy tie ao. (Jaona 11:3) Azo i Jesosy natao ty namelogne i Lazarosy ndra tie nifankalavitse ty toeragne nisy iareo. Faie ndra aleo i Jesosy nandeha a Betania mbeo mba hihaogne amy i Maria naho i Marta ragne’e. Fa nisy nama’o vao le avy le nagnampe azo ndra tie tsy nangataha’o fagnampeagne? Fanta’o boake amy izay tie namagne azo’o ianteheragne amy ty “fotoan-tsarotse” reke. (Ohab. 17:17) Lonike tika mba ho tena namagne manahake i Jesosy! Andao hiheregnantika indraike i tantaray naho ty raha niseho magnarake.

12. Ino ty nampitamà i Jesosy i Marta, le nagnino zay ro azo atokisagne? (Jaona 11:23-26)

¹² Vakio ty Jaona 11:23-26. Fanta i Marta fa marine ho avy amy iareo eo ty Jesosy. Le nilay nanalaka aze mbeo reke sady nirehake tie: “O Ragnandria, naho teto rehe, le tsy ho nimate ty rahalahiko.” (Jaona 11:21) Maregne ty aze satria ho nisitragne ty Lazarosy naho teo reke. Faie naho ty maregne, le te hanao raha miambake ty Jesosy. Hoe reke: “Hovelogne ty rahalahi’o.” Nagnomey toky i Marta ka ty Jesosy sady nampitamà tie: “Izaho ty famelomagne ty mate naho fiaignagne.” Nimean’Andrianagnahare hery hamelomagne ty mate reke. Fa namelogne ajaja ampela raike vaho niala aigne ty Jesosy sady fa namelogne ajalahy raike, va’e tamy i andro nimateza’ey avao. (Lioka 7:11-15; 8:49-55) Faie akore naho ohatse ndaty fa mate efatse andro sady fa nanomboke ho logne ty nofo’e ro hovelome’e? Ho vita’e vao zay?

13. Arake ty Jaona 11:32-35, nanao akore ty fihetse i Jesosy naho fa nahatrea i Maria naho i ndaty hafa nitomagny rey? (Henteo i sarey.)

¹³ Vakio ty Jaona 11:32-35. Dineho ty raha niseho magnarake. Niakatse ho mbamy i Jesosy mbeo ka ty Maria, i rahavave i Lazarosỳ. Mbe nahere’e indraike i raha nirehafe i rahavave’ey tie: “O Ragnandria, naho teto rehe le tsy ho nimate i rahalahikoy.” Tena nalahelo reke naho ty ndaty hafa niarake ama’e teo. Naho fa naharey sady nahatrea iareo tomagnỳ ty Jesosy le vata’e nalahelo ka. Noho ze alahelo’e i nama’e rey zay, le nitagny reke. Tena taka’e soa tie mafe ze o mamoe ndaty teagne zao. Ie, tena fa tsy ligne’e ty hagnafake o raha mahavy antikagne halahelò.

14. Ino ty ianarantika miomba i Jehovah naho fa dinehegne ty nifehetse i Jesosy tamy ireke nahatrea i Maria nitagnỳ?

¹⁴ Trea tie tena Andrianagnahare mitretré ty Jehovah naho henteagne ty fihetse i Jesosy tamy ireke nahatrea i Maria nitomagnỳ. Nagnino tikagne ro mirehake izay? Nitreantikagne tamy i lahatsoratse taloha itoỳ, fa nitovy tanterake aman-dRae’e ty fomba fiheve’e naho ty fihetseham-po’e. (Jaona 12:45) Naho fa i Jesosy areke nalahelo i nama’e niore mafe rey, le azontika sare an-tsaigne fa hoe izay ka ty tsapa i Jehovah naho fa mahavazoho ty alahelontika. (Sal. 56:8) Tsy mandrisike azo hiharine i Andrianagnaharentika mitretréy vao ty fahafantara’o izay?

15. Arake ty tantaraegne amy Jaona 11:41-44 ao, ino ty raha niseho tamy i kibory nisy i Lazarosỳ teo? (Henteo i sarey.)

¹⁵ Vakio ty Jaona 11:41-44. Niavy tamy i kibory nisy i Lazarosỳ teo ty Jesosy, le nampagnafaha’e i vato nagnily azey. Tsy nagneke izay ty Marta, le nirehake tie tsy maintsy fa maimbo i vata’ey hinane zay. Faie hoe ty Jesosy: “Tsy fa nirehake tama’o moa raho tie naho mino rehe, le hahatrea ty voninahin’Andrianagnahare?” (Jaona 11:39, 40) Tafara izay ty Jesosy le niandra sady nivavake tagnatreha iareo teo. Tea’e ty hagnomey voninahitse i Jehovah amy ty raha hatao’e afara izay. Le nitoka mafe ty Jesosy tie: “O Lazarosy, miakara!” Niakatse boake an-kibory ao amy izay ty Lazarosy! Nahavita raha tsy nieretserete o ndatio hisy ty Jesosy.​—Henteo ty gazete Ny Tilikambo Fiambenana 1 Janoary 2008, pejy 31 fehintsoratra 4-7.

16. Nagnino i fitantaragne amy Jaona toko faha-11 aoy ro magnamafe ty finoantikagne ty famelomagne ty mate?

¹⁶ Mahavy antikagne tena hino ty famelomagne ty mate i fitantaragne trea amy Jaona toko faha-11 aoy. Mareho moa ty raha nampitamae i Jesosy i Marta toy: “Hovelogne ty rahalahi’o.” (Jaona 11:23) Managne fagniriagne naho hery hagnatanterahagne ze fampitamagne zay ty Jesosy, manahake an-dRae’e avao ka. Trea boake amy ireke nitagnỳ fa magniry mafe ty hamelogne o ndaty nimateo reke sady magniry hagnafake ty alahelo atera izay. Trea tie managne hery hamelomagne ty mate ka reke naho fa niakatse boake an-kibory ao ty Lazarosy. Saintsaigno ka ty raha nitiahive i Jesosy i Marta toy. Hoe reke tama’e: “Tsy fa nirehake tama’o moa raho tie naho mino rehe, le hahatrea ty voninahin’Andrianagnahare?” (Jaona 11:40) Maro areke ty anto’e mahavy antikagne hino fa ho avy eo vata’e i fampitamàn’Andrianagnahare hamelogne ty matey. Ino areke ty azontikagne atao mba hahavy ze raha tamaentikagne zay ho velombelogne amantikagne ao avao?

17. Ino ty raha mila ataontikagne an-tsaigne naho fa mamaky i fitantaragne miomba ty famelomagne ty mate amy Baiboly ao rey?

¹⁷ Vakio sady saintsaigno i tantara o ndaty fa nivelomegne taloha rey. Misy ndaty valo tantarae ty Baiboly fa nivelomegne amy ty mate. c Nagnino naho mianatse ty tsikiraidraike amy i tantara rey? Naho fa manao izay rehe, le tsiarovo fa ndaty tena nisy iareo. Nisy tamy iareo lahilahy, ampela naho ajaja. Mipaliava lesogne azo’o ianaragne ama’e. Saintsaigno boake amy i tantaray tie, akore ty ahatreavagne fa managne fagniriagne naho hery hamelomagne ty mate ty Andrianagnahare. Ambone izay, le ko haligno ty misaintsaigne ty namelomagne i Jesosy tamy ty mate satria io ty fara izay ty miambake. Tsiarovo  fa ndaty an-jato’e ty nahatrea maso fa nivelogne indraike ty Jesosy. Izay ty mahavy antikagne tena mino fa hisy vata’e o famelomagne ty mateo.​—1 Kor. 15:3-6, 20-22.

18. Toko’e ataontika akore i hirantikagne miomba ty famelomagne ty mate rey? (Henteo ty fagnamarehagne ambane peje.)

¹⁸ Mikezaha hianatse i “hira masigne” miomba ty famelomagne ty matey. d (Efes. 5:19) Mahavy antikagne tena hino naho hatoky o fampitamàgne fanjaka iohoe i hira rey. Tsanogno iareo. Ianaro ty fomba fihiragne aze sady iharò midineke amy ty fotoam-pivavaha ty keleia’areo ty togno’e. Ianaro tsianjery ty togno’e sady saintsaigno soa amy izay vao mainke hatanjake ty finoa’o. Naho misy raha atahoragne va’e hahafate azo ndra misy longo’o mate, le afake magnampe azo hahatsiaro i hira rey ty fagnahy masy i Jehovah. Hampionogne naho hampahery azo i hira rey.

19. Ino ty azontikagne saintsaignegne miomba ty famelomagne ty mate? (Henteo ka ty efajoro tihoe “ Ino ty Hagnontenea’o Iareo?”)

¹⁹ Eretsereto tie, hoe fa amy i tontolo vaovaoy agne ty tegna’o. Nimea i Jehovah fahaiagne hangalake sare an-tsaigne ty tegnantikagne amy i tontolo vaovaoy ao tikagne. Hoe ze rahavave raike zay: “Manokagne fotoagne raho mba hieretseretako ty tegnako hoe fa amy tontolo vaovao agne. Hoe fa reiko iaby ty fofo i folera soasoa amy i Paradisay ao.” Saintsaigno tie hifankatrea amy ty lahilahy naho ty ampela nanam-pinoagne tantaraegne amy Baiboly ao rey rehe. Ia ty fa tsy ligne’o ty hahatrea aze. Inogne iaby ty hagnontenea’o aze? Saintsaigno ka tie fa mihaogne amy i longo’o fa nimate rey rehe. Dineho amy ty pitsopitso’e moa ty raha hatao’o naho fa hihaogne nareo. Ohatse ty raha ho rehafe’o voaloha’e, ty ho tsapa’o naho fa mamihigne iareo, vaho ty ho hafalea’o iaby.

20. Tapa-kevetse hanao ino tikagne?

²⁰ Tena mankasitrake i Jehovah tikagne noho ireke mampitamà fa hamelogne ty mate! Afake matoky tikagne fa ho avy eo vata’e o fampitamàgne iohoe, satria reke managne fagniriagne naho hery hagnatanterahagne izay. Lonike tikagne ho tapa-kevetse ty hagnatanjake ty finoantikagne o fampitamàgne sarobily iohoe. Naho manao izay tikagne, le vao mainke hiharine an’Andrianagnahare, i mampitamà antikagne tsikiraidraikey tie: ‘Hovelogne i ndaty tsy foe’oy!’