1. Ino ty anto’e mahavy antika hagnomey toin-drehake naho fa mivory?

 INO ty anto’e agnatrehantika fivoriagne? Anto’e voaloha’e, ty hideragne i Jehovah. (Sal. 26:12; 111:1) Magnatreke fivoriagne ka tikagne mba hifampaherezagne amo o andro sarotse zao. (1 Tes. 5:11) Ireo ka ty anto’e mahavy antika hanangan-tagnagne mba hagnomey toin-drehake.

2. Isake ombia tika ro managne fahafahagne hagnomey toin-drehake?

² Managne fahafahagne hagnomey toin-drehake tika amy ty fivoriantikagne isan-keregnandro. Afake mandrambe anjara ohatse tika, amy ty Fianaragne Fitalakesan-davitse atao isake fara heregnandro. Amy ty fivoriagne ampagnivoa ty heregnandro ka tika, le afake magnomey toin-drehake amy ty Vatosoa Ara-pagnahy, Fianaragne Baiboly Anoe ty Fiangonagne naho amy ty fiharoagne midineke hafa.

3. Ino ty olagne atrehentika naho fa mieretseretse ty hagnomey toin-drehake, faie akore ty agnampea ty Hebreo 10:24, 25 antika?

³ Fagniriantika tsikiraidraike ty hidera i Jehovah naho ty hampahery o mpiara-manompo amantikagneo. Faie misy olagne va’e hatrehentikagne naho fa hagnomey toin-drehake. Va’e hatahotse tikagne, ndra tika va’e te hagnomey toin-drehake maro faie tsy voatondro mateteke. Ino ty hagnampe antika naho miseho zay? Hagnampe antika hahatrea ty vale izay ty raha sinora i Paoly hoahy o Hebreò. Naho fa nirehake miomba ty maha lahibey ty fivoriagne reke, le nandrisike antika mba “hifampahery.” (Vakio ty Hebreo 10:24, 25.) Tsy hatahotse hagnomey toin-drehake tika, naho mitadidy tie hampahery ty  hafa ty toin-drehake meintika ndra tie tsotra aza. Ndra tie tsy ho voatondro mateteke ka tika, le ho fale avao satria mba managne fahafahagne hagnomey toin-drehake ty hafa.​—1 Pet. 3:8.

4. Ino ty raha telo hodinehentikagne ato?

⁴ Hodinehentika voaloha’e, ty azontika hifampaherezagne naho fiangonagne madineke tsy maro mpandrambe anjara ty misy antika. Afara izay tikagne, handineke ty hifampaherezagne naho amy ty fiangonam-bey maro mpanangan-tagnagne. Le amy ty fara’e tika, hianatse tie karazan-toin-drehake manao akore ro tena hampahery ty hafa.

5. Akore ty hahafahantika mifampahery naho tsy ampe i mpagnatrekey?

⁵ Sahiragne ty mpitarike amy ty fiangonagne madineke ndra ty antoko mpitory ila’e, satria tsy maro ty mpagnomey toin-drehake. Kindraike reke le tsy maintsy mandigne heike. Sarotse ty hahazoagne fampaherezagne satria tsy maintsy tarihegne moramora i mpivorỳ. Ino ty azo’o atao? Mazotoa manangan-tagnagne. Naho manao izay rehe, le handrisike ty hafa mba hazoto handrambe anjara ka.

6-7. Ino ty azontika atao mba hampihegne ty tahotse hagnomey toin-drehake?

⁶ Maro amantika ty matahotse hagnomey toin-drehake. Ino ty hagnampe antika tsy hatahotse? Naho takantika tie fampaherezagne lahibey hoahy ty hafa ty toin-drehake omeantikagne, le hihegne ty tahontika hamale. Akore ty hahavitantika izay?

⁷ Va’e hagnampe azo ty soso-kevetse tamy ty gazete Fitalakesan-davitse b fa naboake taloha. Ohatse, ty fagnomanagne soa. (Ohab. 21:5) Mizàra mampiasa i fitaovagney, mba hampitombo ty fahazotoa’o magnomey toin-drehake. Anò fohe ka ty toin-drehake mea’o. (Ohab. 15:23; 17:27) Tsy ho lako tahotse rehe naho magnomey toin-drehake fohe. Tihoe toin-drehake fohe, le fehezanteny raike ndra roe mora azo ty hafa, fa tsy rehake lavabey misy hevetse maro saro-takaregne. Trea tie nagnomagne soa rehe sady taka’o soa i fianaragney naho fohe sady amy ty fomba fireha’o ty toin-drehake mea’o.

8. Akore ty fivazohoa i Jehovah ty kezake mafe ataontika?

⁸ Akore naho fa nagnandragne i soso-kevetse rey rehe faie mbe matahotse avao? Matokia fa ankasitraha i Jehovah ty kezake mafe atao’o. (Lioka 21:1-4) Ty dika tihoe manao ze fara’e soa, le tsy midika tie manao raha tafahoatse. (Fil. 4:5) Fantaro ty raha ho vita’o, le mametraha tanjogne sady mivavaha mba hanagne fo tony. Hagnampe azo hagnomey toin-drehake fohe ty fanoagne ireo.

9. Ino ty olagne miseho naho hagnomey toin-drehake amy ty fiangonam-bey?

⁹ Va’e hiatreke olagne hafa ka tikagne naho fa miharo amy ty fiangonagne misy mpitory maro. Va’e ho maro ty rahalahy naho rahavave manangan-tagnagne mba hagnomey toin-drehake, le va’e tsy ho voatondro mateteke rehe. Fahazara i Danielle ohatse ty magnomey toin-drehake naho fa mivory.  c Agnisa ty fanompoagne ty fihevera’e ty fagnomeagne toin-drehake sady mba hampaherezagne ty hafa ro handeteke ty hamarenagne agnate sai’e ao. Faie naho fa nifindra amy ty fiangonam-bey reke, le tsy nivoatondro mateteke. Misy fotoagne indraike avao ty ahafaha’e magnomey  toin-drehake. “Tena nilagigne raho” hoe reke sady “hoe namoe tombotsoa zay ty fiheverako ty vatako. Naho fa niherenkeregne mateteke ty hoe izay, le nanomboke narikarike raho.”

10. Ino iaby ty azo’o atao mba hahafaha’o magnomey toin-drehake?

¹⁰ Mitovy amy ty raha tsapa i Danielle ka vao ty tsapa’o? Naho izay ty tsapa’o, le va’e ho kivy rehe sady tsy handrambe anjara sasa fa hitsanogne avao. Faie mikezaha hagnomey toin-drehake avao. Ino ty azo’o atao? Magnomana toin-drehake maro. Amy izay naho tsy voatondro rehe amy ty fanomboha i fianaragney, le mbe afake hagnomey toin-drehake avao amparake ty hività i fivoriagney. Naho fa magnomagne Fitalakesan-davitse ohatse rehe, le dineho tie ino ty ifandrambesa i fehentsoratsey amy ty foto-keve i lahatsoratsey. Naho manao izay rehe, le hanan-draha soa azo’o rehafegne. Azo’o atao ka ty magnomagne soa ty fehentsoratse magnasongadigne ty hamarenagne laleke, va’e ho sarotse hazavaegne rey. (1 Kor. 2:10) Va’e tsy ho maro ty mpandrambe anjara amy i fehentsoratse rey le afake mamale rehe. Akore naho fa nampihare’o iaby i soso-kevetse teo rey faie le mbe tsy voatondro avao rehe? Azo’o atao ty mirehake mialoha amy i mpitarikey tie hamale ty fagnonteneagne miomba ty ... rehe.

11. Mandrisike antika hanao ino ty Filipianina 2:4?

¹¹ Vakio ty Filipianina 2:4. Nitarihe ty fagnahy masigne ty apostoly Paoly naho fa nandrisike ty Kristiana mba hipay ze hahasoa ty hafa. Akore ty azontika ampiharagne izay naho fa mivory? Mila tadidientika tie te handrambe anjara manahake antikagne ka ty hafa.

12. Ino ty fomba soa hampaherezagne ty hafa naho fa mivory? (Henteo i sarey.)

 ¹² Dineho zao: Naho fa mideba amy ty nama’o vao rehe, le hanoigne naho hagnarake avao? Azo antoke fa tsy hanao izay rehe. Mba engao’o hirehake ka reke. Hoe izay ka fa teantika naho mba maro ty ndaty mandrambe anjara amy i fivoriagney. Naho ty maregne, le fomba tena soa hampaherezagne o rahalahy naho o rahavaventikagneo, ty fagnengagne iareo hirehake ty finoa’e. (1 Kor. 10:24) Andao hodinehentika ty fomba hanoagne izay.

13. Akore ty fomba hagnengantika ty hafa hagnomey toin-drehake?

¹³ Fomba raike hanoagne izay ty fagnomeagne toin-drehake fohe. Ho maro ty mpandrambe anjara naho manao izay tika. Afake magnomey modely miomba izay ty androanavi-pagnahy naho ty mpitory za-draharaha. Tsy mirehake hevetse maro tihoe magnomey toin-drehake fohe. Tsy hanan-korehafegne sasa ty hafa naho rehafentikagne iaby ze agnate fehentsoratse ao. Hirehake soso-kevetse roe hagnampe antika hagnomey toin-drehake fohe sady tsy hirehake hevetse maro ty fehentsoratse magnarake. Nagnino naho le avy le ampihare’o ty raike amo o soso-kevetse reo naho voatondro hamale voaloha’e rehe?

14. Ino ty hagnampe antika hanapa-kevetse miomba ty fananganan-tagnagne? (Henteo i sarey.)

¹⁴ Dineho tie impire ty toko’e hagnomea’o toin-drehake. Naho manangan-tagnagne mateteke loatse ohatse tika, le hoe mamoresé i mpitarikey mba hanondro antika sady hikalagne ty fahafaha ty hafa hagnomey toin-drehake. Ho kivy sady tsy hanangan-tagnagne sasa ty hafa naho manao izay tika.​—Mpito. 3:7.

15. a) Akore ty toko’e ho fihetsentika naho tsy voatondro? b) Akore ty fomba anehoa i mpitarikey fiheveragne ty tsikiraidraike? (Henteo ty efajoro tihoe “ Naho Ihe ty Mitarike.”)

¹⁵ Naho maro ty mpitory manangan-tagnagne, le va’e tsy ho afake hagnomey toin-drehake mateteke tika. Kindraike aza, le va’e ho voafetra avao ty ho voatondro i mpitarikey. Ndra tie mampalahelo zay, le tsy toko’e hahalagigne antika.​—Mpito. 7:9.

16. Akore ty azontika hampaherezagne ze nagnomey toin-drehake?

¹⁶ Nagnino rehe naho mitsanogne ty toin-dreha ty hafa sady midera iareo naho tsy afake mamale mateteke arake ty nirie’o? Va’e izay aza ro tena hampahery o rahalahy naho o rahavaventikagneo tie amy ty toin-drehake homei’o. (Ohab. 10:21) Fomba raike hifampaherezantika amy ty hafa ty fideragne aze.

17. a) Akore ty azo ty rae aman-drene agnampeagne ty ana’e hagnomey toin-drehake? b) Ino ty raha efatse mila omanegne rehafe i video i Kalebay? (Henteo ty fagnamarehagne ambane peje.)

¹⁷ Ino ka ty azontika atao mba hifampaherezagne naho fa mivory? Naho rae aman-drene rehe, le ampeo ty ana’o mba hagnomagne toin-drehake mifagnarake amy ty tao’e. (Mat. 21:16) Va’e handineke heve-dalegne miomba ty fanambaliagne ndra findesam-batagne raty tika kindraike. Faie va’e misy fehentsoratse raike ndra roe azo ty ajaja andrambesagne anjara avao ty agnate’e ao. Azontikagne atao ka ty magnampe iareo hahatakatse tie tsy voatere ho voatondro iareo ndra tie fa manangan-tagnagne mateteke. Hagnampe aze tsy ho kivy ty fagnazavagne izay ama’e mialoha naho ndaty hafa ty nivoatondro hamale i nomane’ey.​—1 Tim. 6:18. d

18. Ino ty raha toko’e hitaoantika naho fa magnomey toin-drehake? (Ohabolana 27:2)

¹⁸ Sambe afake magnomey toin-drehake mampahery tikagne iaby. Hagnomey voninahitse i Jehovah naho hampahery o longontika Kristianao tika naho manao izay. (Ohab. 25:11) Va’e hanagne fahafahagne hitantara fohe miomba ty raha niaignantika tikagne, faie mila mifehe tegna mba tsy hirehake raha hampibohaboha antika. (Vakio ty  Ohabolana 27:2; 2 Kor. 10:18) Mikezaha hampifantoke ty hafa amy i Jehovah naho amy ty Saontsi’e vaho amy ty vahoa’e iaby. (Apok. 4:11) Naho mandrisike azo hirehake ty fianaragne rambese’o i fagnonteneagney, le avantagno ama’o ty lesogne azo ampiharegne. Ohatse amy izay ty ho treantika amy ty fehentsoratse magnarake toy.

19. a) Ino ty ho voka’e naho maneho fiheveragne ty hafa ty tsikiraidraike amy i mpagnatrekey? (Romanina 1:11, 12) b) Ino ty hevetse nitea’o miomba ty fagnomeagne toin-drehake?

¹⁹ Tsy le ho sarote’e loatse miomba ty fagnomeagne toin-drehake tika satria sambe afake mifampahery amy ty alala io. Va’e midika zay tie tsy voatere hamale mateteke tika. Ndra fale amy ty toin-drehake fa nimeantika, sady fale ka satria managne tombotsoa hamale ty hafa. Naho mifantoke amy ty hahasoa ty hafa amo o fiangonagneo tika naho fa mivory, le sambe ho fale satria “hisy fifampaherezagne” ty amantikagne eo.​—Vakio ty Romanina 1:11, 12.