1-2. Ino ty raha fanjaka tamae o mpanompo i Jehovah-o?

TENA ilaegne ty managne raha tamaegne. Misy ndaty zao mitamà fa hilamigne soa avao ty fiaigna iareo mirovaly. Le ty ila’e mitamà fa ho salama soa avao ty ana iareo. Ty hafa ka mitamà fa ho sitragne amy ty aretegne mahazo aze. Ndra itika mpanompo i Jehovah ka aza mba mitamà ireo. Faie misy raha soa mandikoatse ireo tamaentika amy ty hoavy. Tsy inogne zay fa tihoe hiaigne nainai’e naho tihoe hovelomegne indraike ty longontika fa nimate.

² Hoe ty apostoly Paoly: “Mitamà aman’Andrianagnahare raho ..., fa hisy ty famelomagne ty maregne naho ty tsy maregne.” (Asa. 24:15) Fa nisy ndaty taloha i Paoly nirehake miomba ty famelomagne ty mate, agnisa izay ty Joba. Natoky reke fa ho tsiaroven’Andrianagnahare, le hovelome’e amy ty mate.​—Joba 14:7-10, 12-15.

3. Nagnino ty raha rehafe ty 1 Korintianina toko 15 ro mahasoa antika?

³ Agnisa ty “fampianaragne fototse” inoa o Kristianao ty fampianaragne miomba “ty famelomagne ty mate.” (Heb. 6:1, 2) Trea amy 1 Korintianina toko 15 ao ty raha nirehafe i Paoly miomba izay. Azo antoke fa tena nampahery ty Kristiana tamy ty taonjato voaloha’e ty raha nisorate’e tao. Afake mampahery naho magnomey toky antikagne ka o toko iohoe ndra tie fa ela aza tika ro nino fa hisy ty famelomagne ty mate.

4. Nagnino tika ro matoky fa mbe hovelomegne o longontika fa nimateo?

⁴ Magnomey toky antika ty namelomagne i Jesosy tamy ty mate fa naho mate ty longontika, le mbe hovelomegne indraike. Agnisa ty “talily soa” nitorie i Paoly tamo o Korintianao zay. (1 Kor. 15:1, 2) Nirehake aza reke tie naho tsy mino ty famelomagne  ty mate ty Kristiana raike, le foagne ty raha inoa’e. (1 Kor. 15:17) Naho tsy mino tika tie nivelomegne ty Jesosy, le tsy misy anto’e toko’e hinoantikagne tie hovelomegne o ndaty fa nimateo.

5-6. Midika inogne ho antika ty raha rehafegne amy 1 Korintianina 15:3, 4 ao?

⁵ Naho fa ho nirehake miomba ty famelomagne ty mate ty Paoly, le misy hevetse lahibey telo nirehafe’e retoa: 1) “Mate noho ty fahotantikagne ty Kristy.” 2) “Nalevegne reke.” 3) ‘Nivelomegne tamy ty mate reke tamy ty andro fahatelo, arake ty Soratse Masigne.’​—Vakio ty 1 Korintianina 15:3, 4.

⁶ Rehafe o andine’e reo fa nimate ty Jesosy, le nalevegne sady nivelomegne tamy ty mate. Inogne ty dika izay ho antika? Nirehake ty Isaia mpaminany tie “hafahagne amy ty tane o velogneo” eo i Mesiay sady ‘ho vonoegne miarake amy ty ndaty raty fagnahy, le halevegne.’ Faie nisy raha hafa ka nirehafe’e. Hoe reke: “Hinday ty fahota ty maro reke.” Tanterake zay naho fa nagnomey ty ai’e mba hisolovoigne antika ty Jesosy mba hagnafahagne antika amy ty fate. (Isaia 53:8, 9, 12; Mat. 20:28; Rom. 5:8) Ty fahafateza i Jesosy naho ty nandevegnagne aze vaho ty namelomagne aze tamy ty mate areke, le magnomey antoke antika fa ho afake amy ty ota naho ty fate tika sady hiarake indraike amy i longontika fa nimate rey.

7-8. Nagnino tika ro mino fa tena nivelomegne tamy ty mate ty Jesosy?

⁷ Naho itika te hino fa hisy vata’e ty famelomagne ty mate, le mila rese lahatse tika tie tena nivelomegne tamy ty mate ty Jesosy. Nagnino tika ro matoky izay?

⁸ Maro ty vavolombelogne nahatrea maso i Jesosy tafara ty namelomagne aze. (1 Kor. 15:5-7) Agnisa ty vavolombelogne nirehafe i Paoly voaloha’e zao ty apostoly Petera (Kefasy). Nisy mpiana i Jesosy maromaro ka nirehake tie nahatrea i Jesosy ty Petera tafara ty namelomagne aze. (Lioka 24:33, 34) Nahatrea aze ka i apostoli’e rey. Tafara izay ty Kristy, le “niseho tamy ty rahalahy 500 mahery.” Va’e tamy iareo navori’e ta Galilia agne, tantaraegne amy Matio 28:16-20 aoy, ty nisehoa’e tamy iareo. Niseho tamy i Jakoba ka ty Jesosy. Azo inoagne fa i Jakoba rahalahi’e io, i tsy nino aze ho Mesiay. (Jaona 7:5) Faie nanjare nino i Jesosy reke naho fa nahatrea aze nivelomegne tamy ty mate. Mbe nivelogne ty ankamaroa o vavolombelogne rehoe tamy ty taogne 55 tagne ho agne, tamy i fotoagne nanorata i Paoly i taratasi’e hoahy o Korintianaoy. Naho nisy nisalasala miomba ty namelomagne i Jesosy tamy ty mate areke, le toko’e ho nagnontane o vavolombelogne rehoe.

9. Nagnino ty Asan’ny Apostoly 9:3-5 ro mampiseho fa tena nivelomegne tamy ty mate ty Jesosy?

⁹ Niseho tamy i Paoly ty Jesosy naho fa tafara tatoy. (1 Kor. 15:8) Naharey ty feo i Jesosy naho nahatrea aze amy ireke an-dagnitse agney ty Paoly (Saoly) tamy ireke ho a Damaskosy agney. (Vakio ty Asan’ny Apostoly 9:3-5.) Porofo tsy hay lieregne o raha nitrea i Paoly iohoe fa tsy talily vande avao ty namelomagne i Jesosy tamy ty mate.​—Asa. 26:12-15.

10. Nandrisike i Paoly hanao inogne ty finoa’e tie nivelomegne tamy ty mate ty Jesosy?

¹⁰ Nahalatsa ty ndaty ila’e ty raha nitorie i Paoly. Fa nagnino? Satria taloha ty nisehoa i Jesosy tama’e, le nagnenjeke o Kristianao reke. Faie naho fa nirese lahatse reke fa nivelomegne tamy ty mate vata’e ty Jesosy, le nikezake mafe reke mba handrese lahatse ty hafa hino izay ka. Naho fa nitory miomba io ka reke, le maro ty raha niareta’e. Niaretse jera reke, ginadra naho nivaky sambo.  (1 Kor. 15:9-11; 2 Kor. 11:23-27) Tena ninoa i Paoly fa nivelomegne tamy ty mate ty Jesosy, le izay ty nahavy aze ho vognogne hitory avao ndra tie va’e ho nahafate aze aza zay. Tsy rese lahatse vao rehe naho fa nahatrea o porofo rehoe fa nivelomegne tamy ty mate vata’e ty Jesosy? Tsy mahavy azo hatoky ka vao reo fa tena hovelomegne vata’e ty mate?

11. Ino ty va’e nahavy ty Kristiana ila’e ta Korinto tagne nanagne heve-diso miomba ty famelomagne ty mate?

¹¹ Nanagne heve-diso miomba ty famelomagne ty mate ty Kristiana ila’e ta Korinto, a Gresy agne. Nisy aza nirehake tie: “Tsy hisy ze o famelomagne ty mate zao.” (1 Kor. 15:12) Fa nagnino? Nisy ndaty filozofa ta Atena a Gresy agne tsy nino tie nivelomegne tamy ty mate ty Jesosy. Izay varagne ty nahavy ty Kristiana ila’e ta Korinto tao nanagne ze hevetse zay. (Asa. 17:18, 31, 32) Misy ka ty nieretseretse fa tsy tihoe hovelomegne ara-bakiteny o ndaty fa nimateo. Mate hoe iareo ty ndaty raike tsy manompo an’Andrianagnahare satria mpanota, le velogne reke naho fa lasa Kristiana satria nahazo famelan-keloke. Faie ndra inogn’inogne anto’e nahavy iareo tsy nino ty famelomagne ty mate, le tsy nisy anto’e toko’e hinoa iareo ty raha ila’e. Naho tsy nivelomegne tamy ty mate ohatse ty Jesosy, le tsy ho nivoaloa i solovoigney sady tsy ho nitamà tika tie ho afake amy ty ota. Tsy tena nanagne raha tamaegne areke o ndaty tsy nino ty famelomagne ty mate rehoe.​—1 Kor. 15:13-19; Heb. 9:12, 14.

12. Ino ty tsy mampitovy ty famelomagne i Jesosy tamy ty mate naho ty famelomagne ty mate taloha izay, naho henteagne ty 1 Petera 3:18, 22?

¹² Tena nitrea i Paoly maso ty Kristy tamy ireke ‘fa nivelomegne tamy ty matey.’ Soa mandikoatse ty famelomagne ty mate nisy taloha rey, o famelomagne i Jesosy iohoe. Ty anto’e, mbe nimate avao i ndaty nivelomegne tamy ty mate rey naho fa tafara tatoy. Nirehake ty Paoly fa “lohavoa amo o nimate reo” ty Jesosy. Ino ty dika izay? I Jesosy ty ndaty voaloha’e nivelomegne tamy ty mate mba ho lasa fagnahy sady ireke ty ndaty voaloha’e niakatse an-dagnitse agne.​—1 Kor. 15:20; Asa. 26:23; vakio ty 1 Petera 3:18, 22.

13. Ino ty raha nirehafe i Paoly fa tsy nampitovy i Adama naho i Jesosy?

¹³ Akore ty hahavy ty fate ty ndaty raike hinday havelogne hoahy ty ndaty an-tapetrisa’e? Mazava soa ty vale’e nimey i Paoly. Nihazavae’e fa tsy mitovy ty voka ty raha natao i Adama naho i Jesosy. Ino zao ty voka ty raha natao i Adama tamo o ndatio? Hoe ty Paoly: “Ndaty raike ty niavia o fateo.” Ninday fate ho aze naho hoahy ty tarana’e ty Adama naho fa nanota. Mbe mijale aza tika hatrake amy izao noho ireke tsy nankatò. Fa noho i Jehovah namelogne i Ana-dahi’ey tamy ty mate, le afake mitamà raha fanjaka o ndatio. Hoe ty Paoly: “Ndaty raike ka ty iavia ty famelomagne ty mate. Fa manahake ty ahafateza ty ndaty iaby amy i Adama ao, ro hamelomagne ty ndaty iaby ka amy i Kristy ao.”​—1 Kor. 15:21, 22.

14. Hovelomegne amy ty mate vao ty Adama? Hazavao.

¹⁴ Ino ty tea i Paoly ho rehafegne amy tihoe ‘mate amy i Adama ao ty ndaty iaby’? Azo antoke fa ty tarana i Adama ty tea’e ho rehafegne amy io satria nandova ota boake ama’e iareo, le nimate. (Rom. 5:12) Tsy agnisa o “hovelomegne” reo ty Adama. Fa nagnino? Tsy mandrambe soa amy i solovoigne natao i Kristỳ reke, satria nivoririke reke faie nisatrie’e ty tsy hankatò an’Andrianagnahare. Mitovy amy ty raha nanjò i Adama ty hanjò ze ndaty hatao ‘i Ana o ndatỳ’ tihoe “ose”, satria ho  ‘amy i fandringanagne nainai’ey agne iareo.’​—Mat. 25:31-33, 46; Heb. 5:9.

15. Ino ty rehafe ty 1 Korintianina 15:22 miomba ty famelomagne ty mate?

¹⁵ Nirehake ka ty Paoly tie “hovelomegne amy i Kristy ao ty ndaty iaby.” (1 Kor. 15:22) Nisorate i Paoly hoahy o Kristiana voahosotse ta Korinto agneo i taratasy hoahy o Korintianaoy. Agnisa o “ndaty iaby” hovelomegne reo areke o Kristiana voahosotseo. “Nihamasinegne tamy i Kristy ao iareo sady jinobogne ho ndaty masigne.” Iareo ka ty tea i Paoly ho rehafegne naho fa nirehake reke tie ‘nimate tamy i Kristy ao iareo.’ (1 Kor. 1:2; 15:18; 2 Kor. 5:17) Nirehake ty Paoly tamy ty taratasy hafa nisorate’e tie ze “nampiharoegne tamy i Kristy tamy ty fahafatezagne manahake i azey, le azo antoke fa ho tafaharo ama’e ka amy ty famelomagne manahake i azey.” (Rom. 6:3-5) Lasa fagnahy ty Jesosy naho fa nivelomegne tamy ty mate, le niakatse an-dagnitse agne. Hoe izay ka ty raha hiseho amy i apostoly i Jesosy rey naho ty Kristiana voahosotse hafa.

16. Ino ty tea i Paoly ho rehafegne naho fa nirehake reke tie “lohavoa” ty Jesosy?

¹⁶ Nirehake ty Paoly fa i Kristy “ty lohavoa amo o fa nimate reo.” Maregne fa maro ty ndaty fa nivelomegne tamy ty mate taloha i Jesosy, agnisa izay ty Lazarosy. Faie i Jesosy ty ndaty voaloha’e nivelomegne tamy ty mate mba ho lasa fagnahy sady lelia’e hovelogne nainai’e. Azo ampitoviegne amy i lohavoa natolo o Israelitao ho an’Andrianagnaharey reke. Naho fa i Paoly areke nirehake tie “lohavoa” ty Jesosy, le te hirehake reke tie hisy ndaty hafa ka hovelomegne amy ty mate mba hiaigne an-dagnitse agne. Tsy ia zay fa i apostoli’e rey naho o Kristiana voahosotseo. Hovelomegne manahake i Jesosy ka iareo.

17. Ombia i apostoly rey naho o Kristiana voahosotseo ro nanomboke nivelomegne tamy ty mate?

¹⁷ Ombia o ndaty rehoe ro nanomboke nivelomegne mba hiaigne an-dagnitse agne? Mbe tsy nivelomegne iareo tamy i fotoagne nanorata i Paoly i taratasi’e hoahy o Korintianaoy. Nirehafe’e fa mbe afara agne zay ro hiseho. Hoe reke: “Sambe arake ty filahara’e iaby: I Kristy ty lohavoa, vaho izay ze ahy i Kristy, agnate i fagnatreha’ey.” (1 Kor. 15:23; 1 Tes. 4:15, 16) Miaigne agnate o “fagnatreha” i Kristy iohoe tika zao. Tsy maintsy nandigne ty nanomboha o fagnatreha i Kristy iohoe areke i apostoly rey naho ty Kristiana voahosotse hafa fa nimate vaho hovelomegne manahake i Jesosy naho hahazo i valesoa iareo an-dagnitse agney.

18. a) Nagnino tika ro afake mirehake fa mbe hisy famelomagne ty mate afara ty hamelomagne o aze hovelomegne mba hiaigne an-dagnitse agne reo? b) Ino ty raha fantantika miomba o voahosotseo, naho henteagne ty 1 Korintianina 15:24-26?

¹⁸ Rehafe ty Baiboly fa ‘nahazo i famelomagne alohay’ ty Paoly naho ty Kristiana hafa ho an-dagnitse agne. (Fil. 3:11) Midika areke zay fa mbe hisy famelomagne ty mate karaza’e hafa ty afara io. Izay i nirehafe i Joba fa hiseho ama’e amy ty hoavỳ. (Joba 14:15) Fa tsy hisy Kristiana voahosotse sasa ty an-tane etoy naho fa hagnafoagne ty fitondragne naho ty fahefàgne naho ty hery iaby miarake amy i Jesosy iareo. Ndra ‘ty fahafatezagne, i fahavalo fara’ey’ aza, ho foagne iaby. Tsy ho mate sasa i Kristiana nivelomegne mba hiaigne an-dagnitse agne rey. Fa akore ty amo o Kristiana tsy mivalike faie tsy ho an-dagnitse agne reo?​—Vakio ty 1 Korintianina 15:24-26.

19. Ino ty raha tamae ze ndaty tsy ho an-dagnitse agne?

¹⁹ Inogne ty raha tamae o ndaty tsy hiaigne an-dagnitse agne reo? Mitamà ty raha nirehafe i Paoly toy iareo. Hoe reke: ‘Mitamà raho fa hisy ty famelomagne ty maregne naho ty tsy maregne.’ (Asa. 24:15) Haintika soa fa tsy afake hiaigne an-dagnitse agne o ndaty tsy maregneo. Hiaigne ambone tane eto avao areke iareo naho fa hovelomegne.

20. Nagnino ty fianaragne toy ro nagnatanjake ty finoa’o fa hisy vata’e ty famelomagne ty mate?

²⁰ Tsy isalasalagne areke fa hisy vata’e ty famelomagne ty mate. Ze ndaty tsy ho an-dagnitse agne, le afake mitamà ty hiaigne nainai’e ambone tane etoy naho fa hovelomegne amy ty mate. Tena afake matoky rehe fa ho tanterake ze fampitamagne zay sady tena hampahery azo ty misaintsaigne aze naho ohatse nimate ty longo’o maifitse azo. Hovelomegne iareo agnate i 1000 taogne hanjakà i Jesosy naho i mpiara-manjaka ama’e reỳ. (Apok. 20:6) Afake matoky ka rehe fa mbe hovelomegne ndra tie mate aloha ty hanomboha o Fanjakagne Arivo Taogne iohoe aza. Tsy ho diso tamà ze mitamà izay. (Rom. 5:5) Hagnatanjake azo ka zay manomboke amy izao sady hagnampe azo ho fale amy ty fanompoa’o i Jehovah. Faie inogne ka ty raha mbe azontika ianaragne boake amy ty 1 Korintianina toko 15? Izay ty hotreantika amy ty lahatsoratse magnarake.