Oho’o. Azo ekegne sady maregne o raha nisorate i Davida iohoe.

Dineho ty raha nisorate’e amo o andine’e iohoe naho ty andinin-teny mitovy amy io. Hoe reke: “Hihira fideragne hoahy ty tahina’o nainai’e raho, sady hitagne lognandro ty vava nanoeko.” “O Jehovah Andrianagnahareko, midera azo amy ty foko raho! Homeiko voninahitse nainai’e ty tahina’o.” ‘Hidera ty tahina’o nainai’e nainai’e raho.’​—Sal. 61:8; 86:12; 145:1, 2.

Tsy nanombo rehake ty Davida satria tsy nieretseretse reke tie tsy ho mate zao. Nihai’e tie ho mate o ndatio satria mpanota, sady nagneke reke tie mpanota ty vata’e. (Gen. 3:3, 17-19; Sal. 51:4, 5) Nihai’e ka fa ndra i lahilahy nanam-pinoagne rey mbe nimate avao. Agnisa izay ty Abrahama, Isaka naho i Jakoba. Nihai’e areke fa ndra ireke ho mate ka. (Sal. 37:25; 39:4) Fa o reha i Davida amo o Salamo 61:8 ao iohoe, le manoro tie magniry sady tapa-kevetse ty hidera an’Agnahare nainai’e reke, naho mbe velogne avao.​—2 Sam. 7:12.

Kindraike ty Davida nanoratse ty raha niaigna’e, arake ty treantika amy ty rehake fampidiragne amy ty Salamo 18, 51 naho 52. Nirehake reke amy Salamo 23 ao tie mpiarake aze ty Jehovah, le magnomey tari-dalagne naho mamelombelogne vaho miaro aze. Fa ni-mpiarake agnondry reke tie taloha. Izay ty nahavy aze te hanompo an’Agnahare ‘amy ty andro iveloma’e iaby.’​—Sal. 23:6.

Ko haligno fa i Jehovah ty nampanoratse i Davida ze raha nisorate’e iaby. Faminaniagne ho tanterake ela bey afara atoy ty ila’e amy ty raha nisorate’e. Amy Salamo 110 ao ohatse reke, le nanondro fotoagne ‘hitoboha i Tompo’ey ankavanan’Andrianagnahare eo’ naho ty hahazoa’e fahefàgne lahibey. Hanao ino? Hanjaka amo o fahavalon’Agnahareo naho ‘hampihatse lilim-pitsaragne amo o firenena’ an-tane etoao. Agnisa ty razambey i Mesia ty Davida. Hinday boake an-dagnitse o Mesia iohoe sady ho “mpisorogne nainai’e.” (Sal. 110:1-6) Nihamafese i Jesosy fa nirehake miomba aze vata’e i faminaniagne amy Salamo 110 aoy, sady ho tanterake amy ty hoavy.​—Mat. 22:41-45.

Nitarike i Davida ty Jehovah mba hanoratse miomba ty raha tamy ty andro’e naho ty fotoagne hamelomagne aze amy ty mate. Ho afake hidera an’Agnahare nainai’e reke amy izay. Magnampe antika hahatrea zay fa ty Salamo 37:10, 11, 29 le azo rehafegne tie nampiseho ty raha nisy ta Israely agne taloha. Ho tanterake magneran-tane ka io amy ty hoavy naho fa ho tanterahe i Jehovah i fampitamà’e rey.​—Henteo ty fehentsoratse faha-8 amy ty lahatsoratse tihoe “Hiarake Amako amy i Paradisay Agne Rehe”, amy ty gazete toy.

Ty Salamo 61:8 naho ty andinin-teny mitovy amy io areke, le manoro ty nifagniria i Davida hagnomey voninahitse i Jehovah ta Israely agne, amparake ty nimateza’e. Mirehake ty raha hirie i Davida hatao naho fa ireke hovelome i Jehovah amy ty mate ka rey.