1. Ino ty raha nirehafe i Jesosy tamy ty raike amy i malaso tagnila’e teo rey taloha kede ty nimateza’e? (Lioka 23:39-43)

 NIJALE mafe ty Jesosy naho i malaso roe tagnila’e teo rey taloha ty nimateza iareo. (Lioka 23:32, 33) Sambe nikizake i Jesosy i malaso rey. Tsy mpiana i Jesosy iareo. (Mat. 27:44; Mar. 15:32) Faie niova ty raike amy iareo. Hoe reke: “O Jesosy, tsiarovo raho naho fa avy amy i fanjakà’oy agne rehe.” Le hoe ty natoy i Jesosy aze: “Volagneko ama’o to vata’e anito fa hiarake amako amy i Paradisay agne rehe.” (Vakio ty Lioka 23:39-43.) Tsy afake mirehake tika tie nagneke ty raha nitorie i Jesosy miomba ty ‘Fanjakà i lagnitsey’ o malaso iohoe. Tsy nirehake ka ty Jesosy tie ho amo o Fanjakagne an-dagnitse agne iohoe i lahilahỳ. (Mat. 4:17) I Paradisa an-tane etoỳ ty tea i Jesosy horehafegne. Nagnino tika ro mirehake izay?

2. Nagnino tika ro mirehake tie va’e Jiosy i malaso niova fo-oy?

² Hoe Jiosy o malaso niova fo iohoe. Fa nagnino? Hoe reke tamy i nama’ey: ‘Mbe tsy matahotse an’Andrianagnahare avao vao rehe, ie amy izao voaheloke manahake aze?’ (Lioka 23:40) Andrianagnahare raike avao ty nivavaha o Jiosio, fa ty firenena ila’e nivavake tamy ty andrianagnahare maro. (Eks. 20:2, 3; 1 Kor. 8:5, 6) Naho tsy ni-Jiosy o malaso iohoe, le izao ty ho rineha’e: “Tsy matahotse o andrianagnahareo v’iheo?” Tsy nirahegne tamo o firenena hafao agne ka ty Jesosy, fa tamo o ‘agnondry nimontso tamo o Israelio eo avao.’ (Mat. 15:24) Fagnampe izay, le nambaran’Andrianagnahare o Israelitao tie hovelome’e o ndaty nimateo. Va’e nihay i malaso niova fo-oy ze raha zay. Trea amy ty raha nirehafe’e ka fa nino reke tie hovelome  i Jehovah ty Jesosy, le ho Mpanjaka i Fanjakàn’Andrianagnaharey. Hoe nitamà ka reke tie mbe hovelome i Jehovah.

3. Ino ty raha va’e ho niavy tan-tsay i malasoy ao naho fa nirehake tihoe Paradisa ty Jesosy? Hazavao. (Genesisy 2:15)

³ Naho Jiosy i malaso niova fo-oy, le va’e nahay i Adama naho i Eva vaho i Paradisa namboare i Jehovah hitoboha iareoy. Va’e nino areke o malaso iohoe tie ty tane toy o hanjare soasoao naho fa i Jesosy nirehake tihoe Paradisa.​—Vakio ty Genesisy 2:15.

4. Mahavy antika hieretseretse inogne ty reha i Jesosy tamy ty raike amy i malaso rey?

⁴ Mahavy antika hieretseretse ty ho fiaignagne amy i Paradisay ao ty reha i Jesosy tamy ty raike amy i malaso rey. Magnampe antika hahay ty miomba i Paradisay ty fiaignagne tamy ty andro i Solomona Mpanjaka. Ty anto’e, niadagne ty vahoa’e. Rehafe ty Baiboly tie lahibey ambone i Solomona ty Jesosy. Afake matoky tika tie hovà i Jesosy, i lahibey noho i Solomonay, naho i hiara-manjaka ama’e rey ho paradisa ty tane toy. (Mat. 12:42) Faie toko’e ho fantare o “agnondry hafao” ty raha mila atao iareo mba hahavy iareo hiaigne nainai’e amy i Paradisay ao.​—Jaona 10:16.

5. Hanao akore ty ho fiaignagne amy i Paradisay ao?

⁵ Ino ty avy an-tsai’o ao naho fa mametsevetse ty ho fiaignagne amy i Paradisay ao? Va’e ho tonda soasoa, manahake i ta Edena taoy varagne. (Gen. 2:7-9) Va’e ho tsiaro’o ka i faminania i Mika manao tihoey tie “sambe hitoboke ambane ty voalobo’e naho ty fihami’e iaby” o vahoa i Jehovah-o. (Mika 4:3, 4) Va’e ho tadidi’o i andinin-teny amy Baiboly ao mirehake tihoey tie ho vokatse o hanegneo. (Sal. 72:16; Isaia 65:21, 22) Va’e ho azo’o sare an-tsaigne areke tie amy ty toeragne raike fanjaka rehe, le feno hanegne sambe karaza’e ty ao, malio ty rivotse iaigna’o, sady magnimagnitse iaby ty folera ao. Hoe rei’o iaby ty hehe ty longo’o naho ty nama’o vaho i aze nivelomegne amy ty mate rey, amy iareo miarake mifalefaley. Tsy laporo o raha rehoe. Afake matoky tika fa tena hisy reo. Fa hisy asa mahafinaritse ka hataontikagne naho fa amy i Paradisay ao.

6. Ino ty asa hataontikagne amy i Paradisay ao? (Henteo i sarey.)

⁶ Natao i Jehovah ho afake hahatrea tsiro’e amy ty asa anoentikagne tika. (Mpito. 2:24) Ho maro ty asa hanoentikagne agnate i Fanjakagne Arivo Tao i Kristỳ. Ty anto’e, hipay akanjo naho hanegne vaho tragno hitobohagne i ndaty ho votso-belogne amy i haoreagne lahibeỳ rey naho i ndaty hovelomegne amy ty mate rey. I Adama naho i Eva avao zao ty nampambolé i Jehovah amy i tane nisy iareoy. Hoe izay ka fa hanagne tombotsoa tika hagnova ty tane toy ho Paradisa. Hahafinaritse ka ty hampianatse i ndaty an-tapetrisa’e tsy tena  nahay i Jehovah naho ty zoton’arofo’e rey. Mbe maro ka ty raha mila hampianaregne i ndaty tsy nivalike nimate taloha ty andro i Jesosy rey.

7. Ino ty raha atokisantika, le ino ty anto’e?

⁷ Afake matoky tika fa hiadagne naho hilamigne naho fa amy i Paradisay ao. Ino ty anto’e? Satria misy tantara nampanorate i Jehovah amy Baiboly ao mampiseho ty ho fiaigna o ndatio naho fa i Ana-dahi’ey ro hanjaka. Tsy ino zay fa ty raha nisy tamy ty fitondrà i Solomona Mpanjaka.

8. Akore ty nahatanteraha ty raha nirehafe i Davida Mpanjaka amy Salamo 37:10, 11, 29 ao? (Henteo ty “Fagnonteneagne Boake amo o Mpamakio” amy ty gazete toy.)

⁸ Nitarihe ty fagnahy masigne ty Davida Mpanjaka mba hanoratse ty ho fiaignagne naho fa i mpanjaka hendre sady azo atokisagney ro hinday. (Vakio ty Salamo 37:10, 11, 29.) Mateteke tika ro mamaky ty Salamo 37:11 naho fa mirehake amo o ndatio ty miomba i Paradisay. Tsy diso tika naho manao izay, satria ndra i Jesosy aza nagneregne nirehake ty rehake amo o Salamo iohoe tamy i Toriteni’e tam-bohitse teoy. Trea amy izay fa hotanterake amy ty hoavy io. (Mat. 5:5) Faie nampiseho ty ho fiaigna o ndatio tamy ty fitondrà i Solomona ka o reha i Davida rehoe. Tena niadagne naho nilamigne o vahoa i Jehovah-o tamy i tane “feno ronono naho tanteley” ao. Hoe ty Jehovah: “Naho magnorike ty liliko vaho miambegne aze avao nareo ..., le hampisy fieragneragnagne amy i taney ao raho, sady hiroro nareo faie tsy hisy hampatahotse anareo.” (Lev. 20:24; 26:3, 6) Nitanterake o fampitamae i Jehovah rehoe naho fa i Solomona ty nanjaka tamo o Israelio eo. (1 Tan. 22:9; 29:26-28) Va’e ‘tsy nisy ndaty raty’ mpanompo sampy ka tamy izay. (Sal. 37:10) Fa nitanterake areke o rehake amo o Salamo 37:10, 11, 29 rehoe, sady mbe hotanterake ka amy ty hoavy.

9. Ino ty raha nirehafe i mpanjakavave i Shebay miomba ty fitondrà i Solomona Mpanjaka?

⁹ Naharey i mpanjakavave i Shebay tie niadagne naho nilamigne o Israelitao tamy ty fitondrà  i Solomona Mpanjaka. Nitea o ampela iohoe hotrea mivantagne zay, hafarà’e nandeha ta Jerosalema agne, ie amy izao lavitse ty misy aze. (1 Mpanj. 10:1) Le izao ty rineha’e naho fa nahatrea ty fanjakà i Solomona: “Kay ndra ty antsasa’e aza tsy nitantaragne tamako.... Sambatse o ndati’ò, sady sambatse ty mpanompo’o retoagne, satria agnatreha’o eto isan’andro, le maharey ty fahendrea’o!” (1 Mpanj. 10:6-8) Faie o fiadanagne nisy tamy ty andro i Solomonao, le sombitsombi’e avao amy ty raha hatao i Jehovah hoahy o ndatio naho fa i Jesosy, i Ana-dahi’ey ro hinday.

10. Nagnino ty Jesosy ro ambone tie amy i Solomona?

¹⁰ Maro ty raha maha ambone i Jesosy amy i Solomona. Tsy voririke ty Solomona, sady nanao hadisoagne maro. Nahavy o vahoa i Jehovah-o hijale zay. Fa i Jesosy voririke le tsy mba manao hadisoagne zao. (Lioka 1:32; Heb. 4:14, 15) Tsy nivalike ty Jesosy ndra tie nitsapa hevetse aze ty Satana. Trea amy izay, fa tsy hanota ndra hanao raha hagnoho-doza o vahoa’eo ty Kristy. Tsy misy mpanjaka soa mandikoatse aze areke.

11. Ia ty hiara-manjaka amy i Jesosy?

¹¹ Misy ndaty 144 000 hiara-manjaka amy i Jesosy. Iareo ty hagnampe i Jesosy hikarakara o ndatio naho hagnatanterake ty zoton’arofo i Jehovah hoahy ty tane toy. (Apok. 14:1-3) Niatreke raha sarotse naho tsapa hevetse o ndaty rehoe tamy iareo mbe tan-tane etoỳ. Taka iareo soa areke ty raha iaigna ty ndaty ambone tane eto. Ino ty hatao o ndaty hiara-manjaka amy i Jesosy rehoe?

12. Ino ty asa hampanoe i Jehovah i 144 000 rey?

¹² Mbe maro mandikoatse ty asa natao i Solomona ty hatao i Jesosy naho i hiara-manjaka ama’e rey. An-tapetrisa’e avao ty isa ty vahoake niente i Solomona sady tamy ty tane raike avao ty nisy iareo. Faie magneran-tane ty hisy ty vahoake ho ente i ndaty hanjaka amy i Fanjakàn’Andrianagnaharey ao rey, sady tapetrisa tapetrisa ty isa iareo. Tena miambake areke ty tombotsoa nimey i Jehovah o 144 000 rey.

13. Ino ty andraikitse miambake hatao i ndaty hiara-manjaka amy i Jesosy rey?

¹³ Ho mpanjaka naho ho mpisorogne manahake i Jesosy i 144 000 rey. (Apok. 5:10) Tamo o Israelitao mbe nagnorike ty Lalà i Mosesỳ, le andraike o mpisorogneo ty nagnampe iareo ho salama soa avao naho hilongo soa amy i Jehovah. “Talinjo ty raha soa hoavy” o Lalànao. Afake mirehake areke tika tie hagnampe ty vahoa i Jehovah mba hahazo ty raha ilae iareo ara-nofo naho ara-pagnahy i ndaty hiara-manjaka amy i Jesosy rey. (Heb. 10:1) Mbe tsy haintika amy izao tie akore ty fomba hifandrambesa o mpanjaka naho o mpisorogne rehoe amy ty vahoa i Fanjakagney an-tane etoy. Ndra inogn’ino fomba hampiasae i Jehovah, le matoky tika fa tsy maintsy hahazo ze tari-dalagne ilae’e ty ndaty ambone etoy.​—Apok. 21:3, 4.

14. Nagnino o “agnondry hafao” naho o “agnondry tsiampeo” ro rehafegne tie miharo raike?

¹⁴ Nitokave i Jesosy tihoe “agnondry tsiampe” o hiara-manjaka ama’e reo. (Lioka 12:32) Le misy ndaty maro hafa ankoatse ireo nitokave’e tihoe “agnondry hafa.” Miharo raike avao o antoko o ndaty roe rehoe. (Jaona 10:16) Miara-miasa o ndaty rehoe tie amy izao, le mbe hiara-hiasa avao ka iareo naho fa hiova Paradisa ty tane toy. Fa an-dagnitse agne o “agnondry tsiampeo” amy ze fotoagne zay, le o “agnondry hafao” mitamà ty hiaigne nainai’e an-tane etoy. Faie misy raha  toko’e hatao o “agnondry hafao” amy izao mba hahavy iareo hiaigne amy i Paradisay ao.

15. a) Ino ty atao o “agnondry hafao” mba hiaraha iareo miasa amo o rahalahy i Kristy reo? b) Akore ty hanahafa’o o rahalahy atoro amo o sareo eò? (Henteo i sarey.)

¹⁵ Le nimate avao i malaso niova fo-oy fa tsy mba afake nanoro ty fankasitraha’e ty raha natao i Jesosy ho aze. Fa itika agnisa ty “agnondry hafa” tsy hoe izay. Afake manoro ty fankasitrahantika i Jesosy tika ty amy izao. Trea amy ty fomba indesantika o rahalahi’e voahosotseo ohatse tie teantika reke. Nirehake ty Jesosy fa miankigne amy izay ty hitsarà’e o ndatio tie agnondry ndra ose. (Mat. 25:31-40) Manohagne o rahalahy i Kristy reo tika naho fa mazoto magnampe iareo amy ty asa fitoriagne naho fampianaragne. (Mat. 28:18-20) Izay ty mahavy antika hampiasa soa i fitaovagne fampianaragne Baiboly mey iareo antikagne rey. Agnisa izay zao ty boke Ankamamio Nainai’e o Fiaignagneo! Naho tsy managne mpianatse Baiboly rehe tie amy izao, nagnino naho atao’o tanjogne ty hampianatse Baiboly ndaty maro arake ze vita’o?

16. Ino ty azontika atao manomboke amy izao naho te ho agnisa ty vahoa i Fanjakàn’Agnaharey tika?

¹⁶ Tsy amy i Paradisay agne tika vaho hikezake hanagne ty toetse tea i Jehovah hanagna ty ndaty hiaigne agne. Amy izao tika le fa toko’e hikezake hirehake naho hanao ty maregne vaho hahay hanahatsahatse. Mila mikezake ka tika mba tsy hivalike amy i Jehovah naho ty valintika vaho amo o mpiara-manompò. Vao mainke ho mora amantika ty hankatò i Jehovah amy i Paradisay agne, naho itika mbe miaigne amy ty tontolo raty toy eto zao le fa mankatò aze. Azontika atao ka ty mikezake magnasoa ty fahaiagne anagnantika naho ty hanagne fahazaragne soa magnampe antika ho vognogne hiaigne amy i Paradisay ao. Henteo ty lahatsoratse tihoe “Vognogne ‘Handova ty Tane toy’ vao Rehe?” amy ty gazete toy.

17. Toko’e hahakivy antika vao ty fahotagne nataontika taloha? Hazavao.

¹⁷ Toko’e hikezake mba tsy hagnamelo-tegna noho ty fahotagne nataontika taloha tikagne. Maregne aloha fa tsy toko’e hohararaotentikagne mba ‘hanotagne’ i solovoigney. (Heb. 10:26-31) Faie afake matoky tika tie tena mamela  heloke antika ty Jehovah naho itika tena mibebake sady nangatake fagnampeagne tama’e naho tamo o androanavi-pagnahio vaho nagnova ty findesam-batantikagne. (Isaia 55:7; Asa. 3:19) Ko haligno i reha i Jesosy tamo o Fariseò. Hoe reke: “Tsy niavy hitoka o ndaty maregneo raho fa o mpanotao.” (Mat. 9:13) Mahavita mandrongogne ty fahotantikagne i solovoigney.

18. Ino ty raha tea’o horehafegne amy i malaso raike nimate tagnila i Jesosy eoy?

¹⁸ Fa nametsevetse ty vata’o amy i Paradisay ao mirehake amy i malaso raike nirehake tamy i Jesosỳ vao rehe? Sambe hirehake ty fankasitraha’areo i solovoigne nanoe i Jesosỳ nareo. Va’e hagnontane aze rehe tie: ‘Ino ty raha niseho tagnate i fotoagne fara’e niaigna i Jesosy tan-tane etoỳ? Ino ty raha nitsapa’o naho fa nivalea i Jesosy i fangataha’oy?’ Fa ireke va’e hagnontane azo tie: ‘Nanao akore ze o niaigne tamy ty andro fara’e tamy i tontolo i Satanay zao?’ Ho tombotsoa lahibey ty hampianatse ty Saontsin’Agnahare ty ndaty manahake o lahilahy iohoe.​—Efes. 4:22-24.

19. Nagnino ro tsy hahatofoke ty fiaignagne amy i Paradisay ao? (Henteo ty sare amy ty fogno ty gazete toy.)

¹⁹ Tsy hahatofoke ty fiaignagne amy i Paradisay ao. Hahatrea ndaty vaovao amantika avao tika isan’andro sady hanagne asa mahafinaritse. Fa ty tena hahafale, le hitombo lognandro ty fahafantarantikagne i Babantika an-dagnitse agney, sady hankamamientika ze raha mei’e antika. Lava hisy raha avao hianarantika ty miomba aze, sady mbe maro ka ty raha ho azontika ianaragne amy i raha namboare’e rey. Vao mainke hitombo lognandro areke ty hateantika i Jehovah. Tena mankasitrake i Jehovah naho i Jesosy tika noho iareo nampitamà antika hiaigne nainai’e amy i Paradisay ao!