Naho fa i Jehovah nandily o ndatio mba “hameno ty tane toy naho hanjaka ama’e,” le te hisaontsy reke tie hanjare paradisa ty tane toy iaby amy ty fara’e. (Gen. 1:28) Mila mankatò ze lily zay ka ze hiaigne nainai’e ambone tane etoa. Tsy le avy le hanjò paradisa iareo, satria fa tsy eo sasa i tonda i Edenay. Maro ty asa hataontika mba hagnaliovagne ze faritse nisimba amy ty tane toy, naho fa vita i Aramagedonay. Tena ho asa bey zay!

Maniahy antika ty asa natao o Israelitao tamy iareo noly boake a Babilona agney zay. Tsy nisy nitoboke i tane iareoy tagnate ty 70 taogne. Faie naminany ty Isaia tie hagnampe iareo ty Jehovah, le ho vita iareo ty hagneregne i tane iareoy ho soasoa indraike. Hoe reke: “Hatao’e manahake i Edena i tane fatrambeỳ, sady hanahake i tonda i Jehovah-y i tane maikey.” (Isaia 51:3) Le izay vata’e ty raha nisy naho fa nampea i Jehovah iareo. Ho vita ze handova ty tane toy ka ty hagnova  ty tane toy ho paradisa noho ty fagnampea i Jehovah. Misy raha azo’o atao vao mba hanoroagne tie te handrambe anjara amy ze asa zay rehe?

Ie. Agnisa ty raike amy izay ty fikezaha’o hagnalio naho handamigne ty tragno’o naho ty magnodidigne azo. Afake manao izay rehe ndra tie tsy manao izay aza ty ndaty magnodidigne azo. Azo’o atao ka ty magnampe amy ty fagnaliovagne naho fikojakojagne i Anjomba i Fanjakagney naho o Anjomba Fanoagne Havoriambeio. Naho afake ka rehe, le azo’o atao ty mameno fangatahagne hiasa an-tsitrapo hagnampe ze niazom-boigne. Izay ty hanoroa’o tie vognogne hagnampe rehe naho fa ilaegne. Saintsaigno zao: ‘Ino ty raha mila ianarako mba hampiasaeko naho ohatse raho engà i Jehovah handova ty tane toy?’

Naho fa nivelome i Jesosy i anak’ampela i Jairoy, le hoe reke: ‘Omeo’areo hanegne reke.’ (Mar. 5:42, 43) Tsy sarotse ty nikarakara o ajaja 12 tao iohoe. Faie mba eretsereto heike ty asa mila hataontika naho fa hagnatanterake ty fampitamà’e toy ty Jesosy: “Ho avy ty andro hahareiza ze an-kibory agne ty feo’e, le hiakatse iareo.” (Jaona 5:28, 29) Tsy rehafe ty Baiboly amy ty pitsopitso’e ty raha hataontika. Faie azo eretseretegne tie hipay hanegne, toeragne hitobohagne, naho akanjo o ndaty hovelomegne amy ty mateo. Ino ty raha azo’o atao amy izao mba hanoroagne fa te handrambe anjara amy ty fagnampeagne iareo rehe? Intoa misy raha mila saintsaigne’o:

Naho fa atalily ty fiangona’areo tie hisy mpiandraikitse faritse hitilike anareo, vognogne hanasa aze hihinagne an-tragno’o agne vao rehe? Naho fa misy mpanompo marain-tsy hariva manokagne, ohatse Betelita, tendregne ho amy i faritaney ey, ndra misy mpiandraikitse faritse tsy afake manao asa ty faritse sasa, afake magnampe iareo vao rehe mba hahita tragno hitobohagne? Naho ohatse misy havoriambey vondrom-paritse ndra vondrom-paritse manokagne ty amy ty tane misy azo, afake miasa an-tsitrapo vao rehe aloha ndra afara i havoriambeỳ ndra handrambe o namantika boake an-tane hafa agneo?

Naho ty Asan’ny Apostoly 24:15 ro henteagne, le hisy agn’arivo tapetrisa’e ty ndaty hovelomegne amy ty mate. Maro amo o ndaty rehoe ro tsy nahay i Jehovah taloha ty nimateza iareo. Faie hanagne fahafahagne hianatse ty miomba aze iareo naho fa hovelomegne. a O mpanompo i Jehovah tsy mivalike sady za-drahao ty hampianatse iareo. (Isaia 11:9) Tena fa tsy ligne i rahavave Charlotte zay. Fa nitory ta Eropa agne, Amerika Atimo naho Afrika agne reke. Hoe reke: “Fa tsy ligneko ty hampianatse o ndaty hovelomegne amy ty mateo. Naho fa mamaky ty tantara o ndaty nivelogne talohao raho, le mateteke ro misaintsaigne hoe izao: ‘Naho nahay i Jehovah o ndaty iohoe, le tsy ho nanao hoe izay ty fiaigna’e.’ Irieko mafe ty hirehake amy iareo i raha tsy nihay iareo rey.”

Mbe maro ka ty raha mila hampianaragne i mpanompo i Jehovah tsy nivalike, nivelogne taloha ty niavia i Jesosy tan-tane etoy rey. Tena ho fale zao tika naho fa hagnazava amy i Daniela ty fahatanteraha i faminaniagne nisorate’e faie tsy nitaka’e rey. (Dan. 12:8) Ho fale ka tika naho fa hagnampe i Rota naho i Naomy hahafantatse tie boake amy ty tarira iareo i Mesiay. Ho fale tika naho fa hampianatse ty ndaty magneran-tane, sady amy izay tsy hisy mpanakatsakagne ndra raha hagnelengelegne manahake ty amy ty tontolo raty toy eto.

Ino ty azo’o atao mba hanoroagne fa vognogne handrambe anjara amo o asa fampianaragne iohoe rehe? Mikezaha mba ho mpampianatse mahay naho handrambe anjara amy i asa fitoriagne atao magneran-taney. (Mat. 24:14) Mikezaha hanao ze fara’e soa vita’o amy i asa fitoriagney amy izao, ndra tie voafetra avao ty vita’o noho irehe fa antetse ndra noho ty anto’e hafa. Izay ty anoroa’o fa vognogne hampianatse i ndaty hovelomegne rey rehe.

Tena soa areke ty hisaintsaignagne ty fagnonteneagne lahibey retoa: Te handova ty tane toy vata’e vao rehe? Fa tsy ligne’o vao ty hagnova ty tane toy ho paradisa, naho ty hikarakara sady hampianatse i ndaty hovelomegne amy ty mate rey? Trea tie vognogne hiaigne nainai’e an-tane etoa rehe naho mazoto mandrambe anjara amy i asa mitovy amy ty hatao’o naho fa amy i Paradisa agney.