Tamy ty taogne 1927 raho ty naterake, tamy ze tanàgne kedekede marine i Chicago a Illinois a Etazonia agne zay. Dime zahay ty ana i babako naho i reneko: I Jetha, i Don, iraho, i Karl, naho i Joy. Sambe nitapa-kevetse hanompo i Jehovah tamy ty fo’ay zahay iaby. Nagnatreke ty kilasy faharoe tamy ty Sekoly i Gileada ty Jetha tamy 1943. Nanompo tamy i Betela i Brooklyn a New York agne ty Don tamy 1944, i Karl tamy 1947, le i Joy tamy 1951. Nandrisike ahy hampitombo ty fanompoako ty fitsikombe soa nimea iareo naho i rae aman-dreneko rey.

Tena tea namaky Baiboly ty baba naho i nene sady tea an’Agnahare, le nampianatse anay ho tea Aze ka. Faie tsy nagnaja o fivavahagneo sasa ty baba naho fa avy nanao maramila ta Eoropa agne tamy i Aly Lahibey I ey. Tena nisaotse an’Agnahare ty nene fa tsy nimate ty baba, le hoe reke tama’e: “O Karl, andao tika handeha am-piangonagne agne manahake i nataontika talohay.” Le hoe ty baba: “Hatereko agne rehe fa iraho tsy hilitse ao.” Le hoe ty nene: “Fa nagnino?” Namale reke tie: “Nisy mpinday fivavahagne rezay boake amy ty fivavahagne mitovy faie nitso-drano antoko-maramila roe sambe hafa mialy. Sambe nanohagne i antoko roe rey vao ty Andrianagnahare?”

Nisy Vavolombelo i Jehovah roe niavy ty tama’ay ao tafara izay, amy i reneko mbe tam-piangonagne agney. Nisy boke Ara-baiboly roe atao tihoe Lumière (frantsay) zay nimea iareo i Baba. Nagnazava ty boke i Apokalypsy o boke rehoe. Niliagne ty baba le nirambese’e i boke rey. Le avy le nivakie i nene i boke rey naho fa nitrea’e. Nisy fanasagne ze ndaty liagne hianatse Baiboly amy i boke Lumière rey ze gazete raike tan-toeragne eo zay tie indraike, le nimbeo ty reneko. Naho fa niavy amy i toeragney ao reke, le ze rakemba zay ty namoha aze. Tan-tagna i reneko ey ty raike amy i boke rey, le nagnontane i rakembay reke tie: “Mianatse itoy vao nareo atoa?” Le hoe i rakembay: “Ie, afake mandroso rehe.” Nindese i nene niarake ama’e zahay dime, heregnandro nagnarake igne. Le lia’e nimbeo tsy tapake zahay tafara izay.

 Nampamakie i mpitarikey ty Salamo 144:15 raho tamy ze fivoriagne raike zay. Rehafe o andine’e iohoe tie, sambatse ze ndaty manompo i Jehovah. Tena teako o andinin-teny iohoe naho ty 1 Timoty 1:11. Mirehake reke tie “Andrianagnahare falefale” ty Jehovah. Hoe izay ka ty Efesianina 5:1. Mandrisike antika ‘hanahake an’Andrianagnahare’ o andine’e iohoe. Treako boake amy ireo fa toko’e hahafale ahy ty manompo i Mpamorogney sady toko’e hisaotse aze raho fa nimea’e tombotsoa hanompo aze. Nikezake nanao o raha roe reo raho tamy ty fiaignako.

Roe amby telopolo kilometatse miala i Chicago ty fiangonagne mba narine anay. Faie nikezake nimbeo avao zahay, le nitombo ty raha fantako miomba ty Baiboly. Tadidiko fa nisy fotoagne i mpitarikey nanondro i Jetha mba hagnomey toin-drehake. Naho fa nitsanogne aze raho, le hoe raho tan-tsaiko ao: ‘Nihaiko zay. Toko’e ho nanangan-tagnagne raho le namale.’ Nanomboke nagnomagne raho le nagnomey toin-drehake. Fa ty tena lahibey le tihoe, nanjare nifandrambe maifitse amy i Jehovah manahake i troke raike amako rey raho, le natao badisa tamy 1941.

Tsy ombia hohalignoko ze havoriambey tamy 1942, ta Kilevelandy a Ohio agne zay. Nitoboke tagnate ty tragnolay narine i fanoagne havoriambeỳ teo zahay keleian-draike naho ty keleiagne maro hafa. Nisy rahalahy naho rahavave boake amy ty toeragne hafa 50 mahery a Etazonia ao ka nagnorike i fandaharagney tamy ty telefony. Nihananjeke i Aly Lahibey II ey tie tamy izay sady vao mainke nenjehegne ka o Vavolombelo i Jehovah-o. Nahatrea rahalahy maromaro nampijanogne ty tomabile’e narine i tragnolaỳ eo raho ty hariva igne. Natao iareo afara i toeragney ao i tomabile iareo rey. Nifagnarahagne tie hasiagne mpiambegne tsikiraidraike i tomabile rey amy i halegney, amy izay naho fa misy olagne, le hapile iareo ty maso i ndaty mpanafike rey ty jiro i tomabiley mba tsy hahatreava’e sady hamelogne kilakisony iareo. Afake mamonje malaky ty ila’e tie amy izay. Hoe raho: ‘Tena voaomagne soa amy ze kila raha o vahoa i Jehovah-o.’ Niazon-droro soa raho satria nahatsiaro ho voaro sady tsy nisy olagne ka ty tamy i halegney.

Naho fa nisaintsaigne i havoriambey ignehoeke raho taogne maro tafara tatoy, le tsapako tie tsy ninekoneko ndra natahotse ty reneko. Tena natoky tanterake i Jehovah naho ty fandamina’e reke. Tsy ombia hohalignoko ty fitsikombe soa nimei’e.

Nanao mpisava lalagne maharetse ty reneko taloha kede i havoriambeỳ. Tena nitsanogne’e soa areke i lahajaka nirehake miomba ty fanompoagne marain-tsy hariva rey. Hoe reke tamy izahay tan-dalagney holỳ: “Te hanohy hanao mpisava lalagne raho faie tsy ho arako ty hanao izay ro sady hikarakara soa i tragnontikagney.” Nagnontenea’e zahay tie kera afake magnampe aze, le nagneke. Nimea’e efetse raike ndra roe isa’e areke zahay mba holiove’ay aloha ty hihinanagne maraindray. Naho fa nandeha nianatse zahay, le nihentea’e tie fa milamigne soa vao i efetse rey. Nandeha nanompo reke tafara izay. Tena maro raha atao ty reneko faie tsy natao’e ambanen-draha zahay ana’e. Isake tie noly hihinagne atoandro naho nirava nianatse zahay, le lava teo avao reke hikarakara anay. Nisy fotoagne zahay miarake manompo ama’e naho fa avy nianatse. Nagnampe anay hahafantatse ty asa atao o mpisava lalagneo zay.

Nanomboke nanao mpisava lalagne raho naho fa ni-16 taogne. Ndra tie mbe tsy ni-Vavolombelogne aza ty Babako tamy izay, le nahaliagne aze ty raha nataoko tamy ty fanompoagne. Nitantaraeko ama’e tie indraike hariva zay tie, tsy mba nahatrea ndaty nagniry hianatse Baiboly raho ndra tie fa nikezake mafe aza. Nitsigne hey raho le avy eo nagnontane aze tie: “Mazoto vao rehe naho ampianareko Baiboly?” Nieretseretse kede heike reke le avy eo nagneke. I babako areke ty fampianarako Baiboly voaloha’e. Tena tombotsoa lahibey hoahy igne!

Ty boke “Ny Marina Hahafaka Anareo Tsy ho Andevo” (malagasy) ty nianara’ay. Naho fa nandroso ty fianara’ay, le nitsapako tie nagnampe ahy hagnasoa ty fomba fianarako Baiboly naho ty fampianarako ty hafa ty baba. Naho fa avy namaky fehentsoratse raike ohatse zahay tie indraike hariva zay, le hoe reke: “Treako o fagnazavagne iohoe faie akore ty ahafantara’o tie maregne io?” Tampoke ahy i fagnontenea’ey, le hoe raho tama’e: “Mbe tsy afake magnaporofo izay raho tie amy izao faie hovaleako ze fagnontenea’o zay amy ty fianarantika magnarake.” Nitreako vata’e ty vale i fagnontenea’ey. Nahatrea andinin-teny nagnaporofo i hevetse nianara’aỳ raho. Nomaneko soa ty fianara’ay tafara izay sady nianatse nanao fikarohagne raho. Nagnampe anay amy i babako handroso ara-pagnahy ty fanoako izay. Nampihatse ty raha nianara’e reke, le natao badisa tamy 1952.

Niala tan-tragno ao raho naho fa ni-17 taogne. Lasa misionera ty Jetha, a le i Don lasa Betelita. Sambe nitea iareo ty fanendreagne iareo, le tena nampahery ahike zay. Nanao fangatahagne ho Betelita naho hagnatreke ty Sekoly i Gileada areke raho, le napetrako am-pità i Jehovah eo zay. Ino ty nivoka’e? Nivoantso ho Betelita raho tamy 1946.

Afake niana-draha maro raho tamy i Betela ao satria nahazo fanendreagne maro sambe hafa naho fa nandeha ty taogne. Dime amby fitopolo taogne raho zay ty niasa amy i Betela ao. Nampianaregne hanao pirinty boke naho hanao konte raho tagnate o fotoagne reo. Nianatse nivily naho nandefa entagne ka raho. Tsy vita izay fa tena ankamamieko ka ty fampianaragne azo boake amy ty fotoam-pivavahagne maraindraigne naho ty fandaharagne hafa amy Betela ao.

Niana-draha boake amy i Karl zaiko ka raho. Tamy 1947 reke ty niavy amy Betela ao. Tena nahay nianatse naho nampianatse Baiboly reke. Nangatake fagnampeagne ama’e raho tamy ze lahajaka raike nanoeko zay. Nihazavaeko tama’e tie, fa namory fagnazavagne maro raho faie tsy haiko ty hampiasa  aze. Nagnontenea’e raho tie: “Ino ty foto-keve i lahajaka’oy?” Le avy le niazoko ty tea’e hiaviagne. Ze fagnazavagne hagnampe ahy hagnazava i foto-kevetsey avao ty toko’e hampiasaeko fa ze tsy ilaegne tsy ampidireko. Tsy ombia hohalignoko o lesogne iohoe.

Naho te ho fale tegna amy Betela ao, le mila manao ze fara’e soa amy ty asa fitoriagne. Hahatrea raha mampahery ka rehe naho manao izay. Tsy halignoko ze raha niseho ta New York agne indraike hariva zay. Nitilike ze ampela raike nandrambe Fitalakesan-davitse naho Mifohaza! zay zahay amy ze rahalahy raike zay. Hoe zahay tama’e: “Magnampe ndaty hianatse raha mampahery boake agnate Baiboly ao zahay amy ty hariva toy.” Le hoe reke: “Mandroso nareo naho hirehake miomba ty Baiboly.” Namaky naho niara-nidineke andinin-teny maro mirehake miomba ty Fanjakàn’Agnahare vaho i tontolo vaovao hoavỳ zahay. Nampiavie’e eo ka ty ankamaroa ty nama’e heregnandro magnarake igne satria tena nitea’e i fiharoagne midinekey. Nanjare mpanompo i Jehovah tsy mivalike iareo mirovaly tafara tatoy.

Nagniry ty hanambaly raho, le nahatrea rahavave mifagnentagne amako folo taogne tafara tatoy. Ino ty nagnampe ahy hahatrea valy fanjaka? Nivavake tamy i Jehovah raho sady nieretseretse ty raha hatao’ay afara ty mariaze’ay.

Nifankatrea tamy ty rahavave raike atao tihoe Mary Aniol raho tamy 1953 tafara ty havoriambey natao ta Yankee Stadium ao. Sambe ni-kilasy faharoe tamy ty Sekoly i Gileada iareo amy i Jetha, le iareo roe ty nampiarahegne ho misionera. Nafana fo ty Mary ty nitantara amako ty asa misionera atao’e a Karaiba agne naho ty fampianaragne nitarihe’e tagnate ty taogne maro. Naho fa nifankafantatse zahay, le nitrea’ay tie nitovy ty tanjo’ay. Nihanitombo ty fifankateava’ay, le nifanambaly zahay tamy Avrily 1955. Treako boake amy ty raha sambe hafa natao i Mary tie, fagnomezagne boake amy i Jehovah reke sady fitsikombe soa. Mahafale aze ze fanendreagne omeigne aze. Miasa mafe reke, mitretré ty hafa sady lava manao voalohan-draha i Fanjakagney avao. (Mat. 6:33) Nanao ty asa ty faritse tagnate ty telo taogne zahay, le nivoantso hanompo amy i Betela ao tamy 1958.

Maro ty raha nianarako boake amy i Mary. Nanapa-kevetse ohatse zahay naho vaho nifanambaly tie hiarake hamaky Baiboly, le andine’e 15 eo ho eo ty vakiegne. Nihazavae’ay sady nidinehe’ay ty fomba azo ampiharagne ze ampaha’e avy nivakie ty raike ama’ay. Lava nirehafe i Mary amako avao ty raha nianara’e tamy ty Sekoly i Gileada naho tamy ty asa misionera natao’e. Nagnampe ahy hagnasoa ty lahajaka ataoko naho hahay hampahery o rahavaveo ty raha nianarako boake amy i Mary.​—Ohab. 25:11.

Nimate ty Mary mamiko tamy 2013. Fa tsy ligneko ty hahatrea aze indraike amy i tontolo vaovaoy ao! Amparake ty hiavia izay, le tapa-kevetse ty hanohy hianatse naho hatoky i Jehovah amy ty foko iaby avao raho. (Ohab. 3:5, 6) Mampahery sady mahafale ahy ty misaintsaigne ty raha hatao o vahoa i Jehovah-o amy i tontolo vaovaoy ao. Agnisa izay ohatse tihoe, hiana-draha vaovao boake amy i Mpampianatse Lahibeỳ naho hianatse ty miomba aze! Ie, tsy hitako ty rehake hahavoarehake ty fisaorako aze noho ty raha iaby nampianare’e ahy naho ty hasoa fagnahy miambake naseho’e tamako.