Nanoratse hoahy i Timoty, androanavi-pagnahy manahake aze hoe izao ty apostoly Paoly: “Mandrisike azo agnatrehan’Agnahare naho i Jesosy Kristy vaho o anjely finilio eo raho, mba hagnorike o toromareke rehoe sady tsy hitsara ivela’e ndra hagnavakavake naho fa manao izay.”​—1 Tim. 5:21.

Tsy manondro i 144 000 rey o anjely rehoe. Mbe tsy nanomboke ty famelomagne iareo ho an-dagnitse agne tamy ty fotoagne nanorata i Paoly o taratasy hoahy i Timoty iohoe. Mbe tsy nanjare fagnahy i apostoly rey naho o voahosotseo, le tsy manondro iareo o ‘anjely finily’ rehoe.​—1 Kor. 15:50-54; 1 Tes. 4:13-17; 1 Jaona 3:2.

Tsy manondro i anjely tsy nankatò tamy ty fotoagne nisia i Safodranoy ka o ‘anjely finily’ reo. Ty anto’e, niarake amy i Satana o anjely tsy nankatò rehoe, le nanjare demonia nanohetse i Jesosy. (Gen. 6:2; Lioka 8:30, 31; 2 Pet. 2:4) Amy ty hoavy, le hogadraegne agnate ty 1 000 taogne amy i lavake tsikeokeokey ao iareo, le hovonovonoegne miarake amy i Devoly afara izay.​—Joda 6; Apok. 20:1-3, 10.

Tsy maintsy anjely an-dagnitse agne manohagne an’Agnahare naho i Jesosy Kristy areke o ‘anjely finily’ nirehafe i Paoly rehoe.

Agn’arivo’e o anjely tsy mivalike rehoe. (Heb. 12:22, 23) Tsy toko’e hieretseretse tika tie, mitovy iaby avao ty fanendreagne nimeagne o anjely reo tsikiraidraike. (Apok. 14:17, 18) Nitendré i Jehovah hanjamagne maramila Asiriana 185 000 ohatse ty anjely raike. (2 Mpanj. 19:35) Va’e nitendregne “hagnafake ze ndaty mahavy ty hafa hanota naho hozatse mandika lalàna soa tie tsy ho agnisa i Fanjaka’ey [i Jesosy]” ty ankamaroa o anjelio. (Mat. 13:39-41) Ty ila’e va’e “hamory ze ndaty jinobogne” ho an-dagnitse agne. (Mat. 24:31) Ty anjely hafa ka nitendregne mba ‘hiaro antika amy ze ombantika.’​—Sal. 91:11; Mat. 18:10; ampitahao amy ty Matio 4:11; Lioka 22:43.

Va’e ze anjely nitendregne hanao raha manokagne misy ifandrambesa’e amo o vahoan’Agnahareo i ‘anjely finily’ rehafegne amy 1 Timoty 5:21 aoy. Amy ty rehake magnodidigne amo o andine’e iohoe, le nagnomey torohevetse am-pahendreagne o androanavi-pagnahy fagneva ty hohajaegne agnivo ty fiangonagne eò ty Paoly. Nirehake reke tie, tsy toko’e “hitsaratsara” ndra “hagnavakavake” o androanavi-pagnahio sady toko’e handineke soa hey aloha ty hanapa-kevetse. Toko’e hagnorike o toroheve i Paoly iohoe iareo satria “agnatrehan’Agnahare naho i Jesosy Kristy vaho o anjely finilio eo” ty anoa iareo ty asa iareo. Mazava areke fa nitendregne hagnampe o fiangonagneo ty anjely ila’e, agnisa izay tihoe magnomey fiarovagne, magnampe amy i asa fitoriagney sady manao tatetse amy i Jehovah.​—Mat. 18:10; Apok. 14:6.