NISY tanora roe vave zay mitoboke a Baguio, rovabey i Philippines agne. Nandeha tomboke iareo tie indraike, le nahatrea mpitory nanao fampirantiagne. I Helen ty agnara’e i mpitory nitrea iareoy. Nisomimoke ty Helen naho fa nagnente iareo. Tsy nandeha mbamy i fampirantiagney mbeo iareo fa nanohy i lia iareoy avao. Faie tsy nimete afake an-tsay iareo ao i Helen nisomimoke tamy iareoy.

Naho fa nandeha noly iareo tamy i andro ignehoe, le nahatrea soratse jw.org tamy ze Anjomba i Fanjakagney raike zay, tamy iareo tagnate i tobile nandehana iareoy. Le avy le nitsiaro iareo tie hoe fa nahatrea o soratse iohoe iareo tamy iareo nahatrea kalesy fampirantiagney. Nizotso boake amy i tobile nandehana iareoy iareo, le nandeha mbamy i Anjomba i Fanjakagney mbeo. Naho fa niavy tam-bavahady teo iareo, le nitrea iareo teo tie amy fire iaby ty lera ivoria ty fiangonagne mivory amo o Anjomba i Fanjakagney iohoe.

Nanapa-kevetse iareo roe vave fa hivory. Ia ty nitrea iareo, naho fa niavy tamy i Anjomba i Fanjakagney tao iareo? I Helen. Le avy le nihay iareo reke, satria tadidy iareo reke nisomimoke tamy iareoy. Hoe ty Helen: “Natahotse raho naho fa nagnatogne ahy iareo. Nieretseretse raho tie: ‘Kera koahe nisy raha tsy nimete nataoko tamy iareo?’” Faie nihazavae iareo tama’e ty anto’e niavia iareo tao.

Tena nitea iareo i fivoriagney. Nahafale iareo ka ty niarake tamo o rahalahio naho o rahavaveo. Naho fa nahatrea o mpiara-manompò nagnalio i Anjombay iareo, le nagnontane tie: ‘Afake magnalio ka vao zahay?’ Nifindra an-tane hafa agne ty raike amy iareo naho fa tafara tatoy. Fa i raikey nanomboke nivory naho nianatse Baiboly. Tsy ho nisy zay naho tsy nisomimoke tamy iareo ty Helen.