SAMBE neké i Jehovah hatao fagnatetse oroagne o dehò naho o voromahilalao, arake ty Lily nimei’e o Israelio. Mateteke o vorogne rehoe ro tognonegne miarake avao naho fa mirehake i lily miomba ty sorogne rey sady mahasolo o dehò o voromahilalao, le o voromahilalao ka mahasolo o dehò. (Lev. 1:14; 12:8; 14:30) Nagnino zay ro mete soa? Izao ty anto’e raike: Misy fotoagne tsy misy o dehò. Fa nagnino?

Mifindrafindra monegne o dehò. Mipetrake a Israely agne iareo amy ty fotoa i hafanagney. Ie iareo naho fa volagne Oktobra, manomboke mifindra amy ty faritse atimo Israely agne satria mafana ty agne amy izay. Miheregne a Israely agne indraike iareo naho fa lohataogne. (Tonon. 2:11, 12; Jer. 8:7) Sarotse tamo o Israelio areke ty hahatrea deho hatao fagnatetse oroagne naho fa asotry.

Faie o voromahilalao tsy hoe izay. Lava misy avao ty amo o Israelio eo mandava-taogne, satria tsy mifindrafindra monegne iareo. Fagnampe izay ka, tezaegne o voromahilalao. (Ampitahao amy ty Jaona 2:14, 16.) Rehafe ty boke tihoe Ty Raha Mitiry Naho ty Biby amy Baiboly Ao (angilé) fa “sambe niteza voromahilala iaby ty ndaty ... ta Palestina tagne. Ze tragno agne le ahatreavagne tragnom-borogne, ndra ty amy ty manda iareo ro misy lavake azo i vorogney ipetrahagne.”​—Ampitahao amy ty Isaia 60:8.

Trea amy ty fagnekea i Jehovah o vorogne rehoe hatao fagnatetse oroagne areke fa bey hatea naho mahay manahatsahatse reke. Mete ama’e ndra i raike misy mandava-taogne amo o Israelio eoy ty atao sorogne ndra i raike misy fotoa’e avao ty isia’ey.