1. Manao akore ty fomba fivazohoa i Jehovah o aigneo?

 ERETSERETO tie misy ragne’o nagnomey tragno azo. Fa vasoke ty loko’e sady misy simba ka ty fitaovagne ila’e agnate’e ao. Faie ndra tie eo ze olagne rezay, le vola bey ty nilani’e ama’e. Azo antoke areke fa hohevere’o sarobily i tragnoy sady harova’o. Nimey i Jehovah fagnomezagne sarobily ka tika, le ty aigne. Trea tie tena sarobily ama’e ty fiaintikagne, kanao reke nagnomey i An-dahi’ey hisolo voigne antikagne.​—Jaona 3:16.

2. Ino ty raha také i Jehovah amantika, naho henteagne ty 2 Korintianina 7:1?

² I Jehovah ty ifotora o aigneo. (Sal. 36:9) Nagneke izay ty apostoly Paoly, le nirehake tie: “Fa kanao tika velogne naho mihetseke sady misy, le noho ireke.” (Asa. 17:25, 28) Azontika atao areke ty mirehake tie fagnomezagne boake aman’Andrianagnahare o aigneo. Tea’e tikagne le mei’e ze raha ilaentika mba hahavelogne antika. (Asa. 14:15-17) Faie tsy manao fahagagagne ty Jehovah mba hiarovagne ty fiaintikagne. Tea’e naho itika ro manao ze azontika atao mba hahavy antika ho salama avao naho hanompo aze avao. (Vakio ty 2 Korintianina 7:1.) Nagnino tika ro toko’e hiaro ty fahasalamantikagne naho ty aintikagne, le akore ty fomba hanoagne izay?

3. Ino ty anto’e raike mahavy antika toko’e hikezake mba ho salama avao?

³ Toko’e hikezake mba ho salama avao tika, satria izay ty hahavy antika hahavita hanompo i Jehovah arake ze fara herintikagne.  (Mar. 12:30) Teantika hatao ‘sorogne velogne, masigne sady ankasitrahan’Andrianagnahare’ ty vatantikagne. Tsy ataontika areke ze raha haintikagne fa hamparare antika. (Rom. 12:1) Mazava ho aze fa voafetra avao ty raha azontika atao mba hahavy antika ho salama avao. Faie hanao ze azontikagne atao tika, satria teantika hatoro i Babantikagne an-dagnitse agney fa sarobily amantika o aigneo.

4. Ino ty raha nitea i Davida Mpanjaka hatao?

⁴ Nihazavae i Davida Mpanjaka ty anto’e nihevera’e o aigneo ho fagnomezagne boake aman’Agnahare. Hoe reke: “Inogne moa ty tombotsoa naho mate raho, le mizotso an-davake agne? Hidera azo hao o lembo-taneo, sa hirehake miomba ty tsy fivaliha’o?” (Sal. 30:9) Va’e tamy i Davida fa narine ho matey ty nanoratse o rehake rehoe. Faie trea amy io tie tapa-kevetse hanao ze hahavelogne aze avao, arake ze vita’e reke, amy izay afake midera ndra manompo i Jehovah avao. Azo antoke fa te hanao hoe izay ka tika iaby.

5. Ino ty raha azontikagne atao ndra fa antetse tika ndra marare?

⁵ Va’e tsy hahavita raha maro manahake ty taloha sasa tika naho fa marare ndra naho fa antetse. Ty voka’e, va’e ho soregne naho halahelo tika. Faie tsy toko’e ho kivy tika, le tsy hikarakara ty fahasalamantikagne sasa. Ino ty anto’e? Satria mbe afake midera i Jehovah, manahake ty natao i Davida Mpanjaka tika, ndra tie fa antetse naho marare aza. Manohigne fo ty mahafantatse tie sarobily amy i Andrianagnaharentikagney tika ndra tie tsy voririke aza. (Mat. 10:29-31) Ndra tie mate ka aza tika, le mbe hovelome’e amy ty mate. (Joba 14:14, 15) Naho mbe velogne areke tika, le toko’e hanao ze azontikagne atao mba hiarovagne ty fahasalamantikagne naho ty aintikagne.

6. Ino ty raha tea i Jehovah hataontikagne miomba ty raha hanentika naho inomentikagne?

⁶ Tsy boke miomba ty fahasalamagne ndra mirehake ty raha toko’e ho hanegne naho tsy toko’e ho hanegne ty Baiboly. Faie trea ao ty fomba fiheve i Jehovah miomba o raha reo. Risihe’e ohatse tika mba ‘hihalavitse ze raha’ va’e hanimba ty vatantikagne. (Mpito. 11:10) Rarà ty Baiboly ty hatea hanegne naho ty finoman-toake maro loatse, satria magnoho-doza antika. (Ohab. 23:20) Tea i Jehovah naho managne fifehezan-tegna tika naho fa manapa-kevetse tie ino ty raha hohanentika ndra hinomentikagne, le manao akore ty hamaro’e.​—1 Kor. 6:12; 9:25.

7. Nagnino ty torohevetse amy Ohabolana 2:11 ao ro magnampe antika handrambe fanapahan-kevetse soa miomba ty fahasalamantikagne?

⁷ Azontika atoro amy ty fanapahan-kevetse rambesentikagne fa tena mankasitrake ty aigne, i fagnomezagne boake aman’Agnaharey tika. (Sal. 119:99, 100; vakio ty Ohabolana 2:11.) Mila mandineke soa ohatse tika naho fa hihinan-draha. Naho misy hanegne ohatse teantikagne, faie haintika tie hamparare antika, le hendre tika naho tsy mihinagne izay. Trea ka tie hendre tika naho mikezake mba ho ampe roro, manao sporo tsy tapake, naho managne fahazaragne miandro vaho magnalio ty tragnontikagne.

8. Ino ty raha ampianare ty Baiboly miomba ty fivazohoan’Agnahare ty fiarovagne o aigneo?

⁸ Misy toro lalagne nagnampe o Israelitao ho voaro amy ty loza va’e hiseho an-tragno iareo ao ndra naho fa miasa, ty amy i Lalàna nimey i Jehovah iareoy. (Eks. 21:28, 29; Deot. 22:8) Tena raty ty voka’e naho nisy ndaty nahafate ndaty faie tsy nisatrie’e ty  namono aze. (Deot. 19:4, 5) Naho nisy ndaty aza nahavoadosy ampela mivesatse, le nanjare terake tsy ampe volagne i ampelay, le nitaké i Lalànay ty hagnasazeagne aze. (Eks. 21:22, 23) Trea amo o andinin-teny reo fa tea i Jehovah naho manao ze azontika atao tika mba hiarovagne o aigneo.

9. Ino iaby ty raha azontika atao mba tsy ho azon-doza? (Henteo i sarey.)

⁹ Trea tie mankasitrake ty aigne, i fagnomezagne boake aman’Agnaharey tika naho mikezake mitao mba ho voaro amy ty loza naho fa an-tragno ao ndra miasa. Toko’e hataontika amy ty toeragne voaro ohatse o raha maragnitseo, o raha misy poizigneo ndra o fagnafolio. Tsy toko’e hatao trea o ajajao ka reo. Mila mitao tika naho fa mamelogne afo, mampandeve rano, ndra mampiasa fitaovagne mandeha courant. Tsy toko’e hadodoke avao rey. Tsy minday tobile tika naho tsy afake misaigne soa noho ty fagnafoly hanentikagne ndra ninon-toake, ndra tsy ampe roro, ndra ka rokake. Tsy mikitikitike telefony ka tika naho fa minday tobile.

10. Ino ty azontika atao aloha naho agnate ty fotoagne isia ty loza raike?

¹⁰ Tsy misy raha azontika atao mba hikalagnagne o lozao tsy hiseho kindraike. Ohatse amy izay zao, o loza arake ty natiorao, o arete-manjamagneo naho o hapiarotegneo. Faie naho fa miseho ty raha hoe ireo, le misy raha azontika atao mba hahavy antika ho voaro naho tsy ho mate. Manao izay tika naho magnorike ty raha rehafe o manam-pahefagneo, le miala amy ty toeragne misy i lozay. (Rom. 13:1, 5-7) Kindraike ka misy raha azontika atao mba hiomanagne mialoha amy i loza rey. Toko’e hitsanogne ty toromareke rehafe o manam-pahefagneo areke tika, amy izay ho vognogne tika naho fa avy i lozay. Tena mahasoa ohatse ty mamory rano naho hanegne tsy mora simba, naho ty raha tena ilaegne hafa.

11. Ino ty toko’e hataontika naho fa misy aretegne mifindra ty amy ty tane misy antika?

¹¹ Ino ty toko’e hataontika naho fa misy aretegne mifindra ty amy ty tane misy antikagne? Toko’e hagnorike ty toromareke rehafe o manam-pahefagneo tika. Agnisa izay ty manasa tagnagne mateteke, magnaja elagnelagne, manao aro vava naho orogne, vaho migobogne. Naho itika manao ireo, le trea tie tena mankasitrake ty aigne, i fagnomezagne boake aman’Andrianagnaharey.

12. Nagnino ty toro lalagne amy Ohabolana 14:15 ao ro magnampe antika hahay hijobogne ze raha hinoantikagne naho fa misy loza miseho?

¹² Kindraike tika va’e maharey raha tsy maregne boake amy ty namantika ndra ty mpiara-belogne amantika ndra amo o vaovaò, naho fa misy loza ndra aretegne miseho. Ndra aleo areke ze raha tena azo antoke rehafe o manam-pahefagneo naho o dokoterao ro hotsanognentika ta tie le avy le ‘hino i raha nireintikagne’ rey. (Vakio ty Ohabolana 14:15.) Manao ze azo’e atao ty Filan-keve-pitantanagne naho o birò i sampagneo mba hahazoagne vaovao maregne soa, aloha ty hagnomeagne toromareke antika miomba ty fivoriagne naho ty asa fitoriagne. (Heb. 13:17) Miaro ty aintikagne naho ty ahy ty hafa tika naho fa magnorike i toromareke rey. Va’e hahavy o fiangonagneo hanagne laza soa amo o ndatio ka zay.​—1 Pet. 2:12.

13. Akore ty ampisehoantika fa sarobily amantika o aigneo, naho ty lily i Jehovah miomba ty lio ro rehafegne?

¹³ Maro ty ndaty mahay tie tsy magneke hampidiragne lio tika. Ty anto’e, masigne o lio tie amantika. Tsy manao izay tika ndra tie marare mafe aza satria magnorike ty lily i Jehovah miomba o lio. (Asa. 15:28, 29) Faie tsy midika zay tie te ho mate tika. Itika aza tena mihevetse ty aigne ho fagnomezagne sarobily, le vognogne hipay fitsaboagne tena soa tsy ampiasagne lio.

14. Ino ty raha azontika atao mba hahavy antika tsy le hila fitsaboagne bey?

¹⁴ Naho ohatse tika mikarakara ty fahasalamantikagne, le manao i raha nirehafentikagne teo rey, le tsy voatere ho rasaegne ndra hipay fitsaboagne bey. Ho mora sitragne ka tika naho rasaegne, naho ohatse tsy le managne aretegne. Tsy voatere hila fitsaboagne ndra ho rasaegne tampotampoke ka tika naho ohatse mitao amy ze raha va’e hagnoho-doza antika an-tragno ao naho ampiasagne agne, sady mankatò lalàna naho fa minday tobile.

15. a) Nagnino ro tena ilaegne ty minday i karatse fahazoan-dalagne miomba ty fitsaboagney? (Henteo i sarey.) b) Akore ty hahavy antika handrambe fanapahan-kevetse soa miomba ty fitsaboagne ampiasagne lio, arake ty atoro amy i videoy?

¹⁵ Mameno i karatse fahazoan-dalagne miomba ty fitsaboagney (toro lalagne miomba  ty fitsaboagne) naho minday aze amy ze ombantikagne tika, satria mihevetse ty aigne ho fagnomezagne sarobily. b Trea amy io ao ty heventikagne miomba ty fitsaboagne ampiasaegne lio naho ty fitsaboagne ila’e. Mbe i karatse fahazoan-dalagne miomba ty fitsaboagne talohay vao ty ama’o? Ko mangatake andro fa le avy le solò i vaovaoy, ndra mamenoa naho mbe tsy managne rehe. Naho fa voasoratse mialoha ty fitsaboagne teantika horihegne, le ho voatsabo malaky tika satria tsy hila hagnazava amo o dokoterao sasa. Magnampe antika hahazo fitsaboagne ndra fagnafoly tsy hagnoho-doza antikagne ka zay. c

16. Ino ty azontikagne atao naho tsy tena haintika ty mameno i karatse fahazoan-dalagne miomba ty fitsaboagney?

¹⁶ Va’e ho voa ty aksidà ndra harare tampoke tika ndra tie mbe tanora naho salama soa aza. (Mpito. 9:11) Hendre areke tika naho mameno mialoha i karatse fahazoan-dalagne miomba ty fitsaboagney. Naho tsy tena hai’o ty fomba famenoagne aze, le mangataha fagnampeagne amy ty androanavi-pagnahi’ areo. Fa hay iareo ty fomba famenoagne o taratasy iohoe, faie tsy iareo ty hanapa-kevetse miomba ty fitsaboagne hatao ama’o. Andraiki’o zay. (Gal. 6:4, 5) Fa ndra tie eo zay, le afake magnampe azo hahay handrambe fanapahan-kevetse soa iareo naho fa mameno i taratasỳ rehe.

17. Akore ty hanoroantika fa mahay manahatsahatse tika naho ty fahasalamagne ro rehafegne?

¹⁷ Mioregne amy ty raha nianarantika agnate Baiboly ao, ty ankamaroa ty fanapahan-kevetse rambesentika miomba ty fahasalamantikagne naho ty fitsaboagne horihentikagne. (Asa. 24:16; 1 Tim. 3:9) Mila mitadidy ty toro lalagne amy Filipianina 4:5 ao toy tika naho fa manapa-kevetse sady mirehake amy ty hafa ty fanapahan-keventikagne: “Anò hay ty ndaty iaby fa mahay manahatsahatse nareo.” Naho mahay manahatsahatse tika, le tsy hinekoneko loatse miomba ty fahasalamantikagne, ndra hamoresé ty hafa hitovy hevetse amantikagne. Toko’e ho tea naho hagnaja o rahalahy naho o rahavaventikagneo avao tika, ndra tie tsy mitovy hevetse amantika aza iareo.​—Rom. 14:10-12.

18. Akore ty hanoroantikagne fa mankasitrake i fagnomezagne nimey i Jehovah antikagney tika, le ty fiaignagne?

¹⁸ Mampiseho ty fankasitrahantika i Jehovah, i nifotora o aigneoy tika, naho miaro ty fiaintikagne sady magnomey aze ze fara’e soa vitantikagne. (Apok. 4:11) Va’e harare ndra hoazon-doza tika amy izao. Faie tsy hoe izao ty fiaignagne nirie i Mpamorogney hiaignantika. Kede sisa le homei’e havelogne nainai’e tika, sady tsy hanaintaigne naho ho mate sasa tika amy izay. (Apok. 21:4) Faie amparake ty hiavia izay, le ankamamio ty fiaigna’o sady manompoa i Babantika bey hatea an-dagnitse agney, le i Jehovah.