1. Ino ty raha nirehafe i Jesosy tamy i mpiana’e rey miomba ty fotoagne hiavia ty fara’e, le ino ty raha nampitaoa’e iareo?

 ANDRO tsiampeampe taloha ty namonoagne i Jesosy, le nagnontane aze hoe izao ty efatse amy i mpiana’e rey: “Ino ty ho famantaragne fa marine hifaragne ty tontolo toy?” (Mat. 24:3) Azo inoagne fa ty fomba hahafantaragne ty fotoagne handravàgne i Jerosalema naho i tempolỳ ty nitea o mpianatse rehoe ho hay. Faie tsy ty miomba ty fifaragna o tontolo jiosio avao ro nirehafe i Jesosy naho fa namale iareo reke, fa ty miomba ty ‘hifaragna ty tontolo’ iaignantikagne amy izao toy ka. Izao ty nirehafe i Jesosy miomba ty fotoagne hiavia ty fara’e: “Tsy misy mahafantatse ze andro ndra ze lera zay, ndra ty anjely an-dagnitse agne, ndra i Anakey, naho tsy i Rae avao.” Tafara izay reke, le nampitao i mpiana’e rey mba ‘hiambegne avao.’​—Mar. 13:32-37.

2. Nagnino o Kristiana tamy ty taonjato voaloha’eo ro nila niambegne avao?

² Tsy maintsy niambegne avao i Kristiana jiosy tamy ty taonjato voaloha’e rey, satria niankigna ty fiay iareo zay. Nambara i Jesosy i mpanonjohy ty lia’e rey tie ino ty hagnampe iareo hahay tie fa marine ty handravàgne i tontolo jiosỳ. Hoe reke: “Naho fa trea’areo tie misy maramila mitobe magnodidigne i Jerosalema, le fantaro fa marine ty fandravagne aze.” Nila nagnorike i fampitaoa i Jesosỳ iareo tamy izay, le ‘nilay tam-bohitse agne.’ (Lioka 21:20, 21) Nivotso-belogne ze nankatò o fampitaoagne iohoe naho fa niravà o Romanao ty Jerosalema.

3. Ino ty hodinehentikagne ato?

³ Kede sisa le horavagne ty tontolo raty iaignantika toy. Mila misaigne soa naho miambegne avao areke tika. Hodinehentikagne amy ty lahatsoratse toy tie akore ty hanoroantika  fa mahay manahatsahatse tika naho fa mamantatse ty raha miseho amy ty tontolo toy, akore ty hitaoantikagne, le akore ka ty hampiasantikagne amy ty fomba soa i fotoagne kede sisa tavelay.

4. Nagnino ro toko’e hahaliagne antika ty mahatrea tihoe magnatanterake ty faminania ty Baiboly i raha miseho amy izao rey?

⁴ Mahaliagne antika ty hahatrea tie nagnino ro magnatanterake ty faminania ty Baiboly i raha miseho amy izao rey. Nitanisa raha maro hiseho ohatse ty Jesosy mba hagnampeagne antika hahay tie fa marine ty fara ty tontolo i Satana toy. (Mat. 24:3-14) Nirisihe i apostoly Petera tika mba handineke soa ty fahatanteraha i faminaniagne rey, amy izay hatanjake avao ty finoantikagne. (2 Pet. 1:19-21) Izao ty rehake voaloha’e amy boke fara’e amy Baiboly aoy: “Ty raha nabaribary i Jesosy Kristy, sady nimein’Andrianagnahare aze, mba hampisehoagne amy ty mpanompo’e ty raha hiseho tsy ho ela.” (Apok. 1:1) Tena mahaliagne antika areke i raha miseho amy izao rey naho ty hahay tie va’e hagnatanterake ty faminania ty Baiboly i raha rey. Va’e ho teantika aza ty mirehake amy ty hafa ty raha hoe ireo.

5. Ino ty raha toko’e hitaoantikagne, faie ino ka ty raha toko’e hataontikagne? (Henteo i sarey.)

⁵ Faie toko’e hitao tika mba tsy hanombatombagne naho fa mirehake amy ty hafa miomba ty faminania ty Baiboly. Ino ty anto’e? Satria tsy teantika ty hirehake raha va’e hahavy o fiangonagneo hisaratsarake. Ohatse, va’e haharey mpitondra mirehake miomba ty hamaha iareo ty aly raike naho ty fomba hampisia iareo ty fiadanagne naho ty filaminagne tika. Tsy toko’e hanombatombagne tika tie fahatanteraha i faminaniagne amy 1 Tesalonianina 5:3 aoy zay, fa ndra aleo mamantatse ty fagnazavagne fara’e. Naho ohatse mioregne amy ty raha aboa ty fandamina i Jehovah ty raha rehafentika amy ty hafa, le hagnampe o fiangonagneo ‘hiharo saigne naho hiharo hevetse’ tika.​—1 Kor. 1:10; 4:6.

6. Ino ty lesogne ianarantikagne boake amy ty 2 Petera 3:11-13?

⁶ Vakio ty 2 Petera 3:11-13. Nagnampe antika hamantatse ty anto’e toko’e handinehagne ty faminania ty Baiboly ty apostoly Petera. Nirisihe’e tika mba ‘hanao an-tsaigne avao i andro i Jehovah-y.’ Fa nagnino? Tsy tihoe, satria tika te hamantatse ty “andro naho ty lera” hampiavia i Jehovah i Aramagedonay, fa noho itika te hampiasa soa ty fotoagne kede sisa tavela anagnantikagne, le hikezake ‘hanagne findesam-batagne masigne naho hahafoe tegna ho an’Andrianagnahare.’ (Mat. 24:36; Lioka 12:40) Naho tsoregne le tihoe, mila managne findesam-batagne malio tika, sady ty hateantika i Jehovah ro toko’e handrisike antika hanao raha ho aze. Mila mitao tika naho te hahavita izay.

7. Akore ty anoroantikagne fa mitao tika? (Lioka 21:34)

⁷ Nirehake tamy i mpiana’e rey ty Jesosy mba hitao amy ty raha miseho amy ty tontolo toy. Faie nampitao iareo amy ty raha atao iareo ka reke. Izay ty trea amy ty Lioka 21:34 ao. (Vakio.) Naniahy antika ty Jesosy tie eo, tie mila miambegne ty findesam-batantikagne naho ty toe-tsaintikagne tika. Mila fantarentikagne areke ze raha va’e hanimba ty fifandrambesantika amy i Jehovah, sady mila manao raha tika mba hagnalaviragne izay. Tsy hiova ty hateantika an’Andrianagnahare amy izay.​—Ohab. 22:3; Joda 20, 21.

8. Ino ty torohevetse nimey i apostoly Paoly o Kristianao?

 ⁸ Nandrisike o Kristianao mba hitao ka ty apostoly Paoly. Izao ohatse ty nirehafe’e tamo o Kristiana ta Efesosy agneo: “Mitaoa soa lognandro amy ze raha atao’areo, amy izay hotrea tie hendre nareo fa tsy gege.” (Efes. 5:15, 16) Isan’andro ty Satana, le manao raha mba hanimbagne ty fifandrambesantikagne amy i Jehovah. Izay ty mahavy ty Baiboly hanoro hevetse antika tie “fantaro lognandro ze zoton’arofo i Jehovah”, amy izay ho vitantika ty hiaro ty tegnantika amy ty fanafiha i Satana.​—Efes. 5:17.

9. Akore ty hahavy antika hahay ty zoton’arofo i Jehovah?

⁹ Tsy rehafe ty Baiboly amy ty pitsopitso’e ty raha va’e hanimba ty fifandrambesantika amy i Jehovah. Mateteke ohatse tika ro mila mandrambe fanapahan-kevetse, faie kindraike tsy rehafe ty Baiboly mivantagne ty raha toko’e hataontika. Mila mamantatse “ty zoton’arofo i Jehovah” areke tika naho te handrambe fanapahan-kevetse soa. Manao izay tika naho mianatse tsy tapake ty Saontsin’Andrianagnahare sady misaintsaigne aze. Naho itika mahay ty zoton’arofo i Jehovah naho managne “ty say i Kristy”, le hotrea amy ty raha atao tika tie hendre tika, ndra tie tsy misy lily mazava miomba ty toko’e hatao aza ty agnate Baiboly ao. (1 Kor. 2:14-16) Kindraike mora ty mamantatse ty raha mila itaoagne faie misy fotoagne avao ka sarotse.

10. Ino iaby ty raha mila itaoantikagne?

¹⁰ Agnisa ty raha mila itaoantikagne ty hatea mitsibore ampela, minon-toake maro loatse, ty hatea hanegne, manao rehake mamparare fo, ty magnente raha misy alialy naho filma vetaveta, naho ty raha hoe ireo. (Sal. 101:3) Lava mipay hirike hanimbagne ty fifandrambesantika amy i Jehovah ty Devoly, i fahavalontikagney. (1 Pet. 5:8) Naho tsy mitao tika, le va’e hanomboke hampitiry eretseretse naho fagniriagne raty an-tsaintika naho am-pontikagne ao ty Satana. Agnisa izay, ty fialognagne, vande, hatea mena, fankalaignagne, firohafagne, naho lolom-po. (Gal. 5:19-21) Va’e tsy ho tena mafe reo amy ty voaloha’e. Faie naho tsy le avy le ombotantikagne agne reo, le hitombo manahake o raha mitiry misy poizigneo sady ho loza ty voka’e.​—Jak. 1:14, 15.

11. Ino ty fandrike mila itaoantikagne, le ino ty anto’e?

¹¹ Agnisa ty raha mamandrike antika o naman-dratio. Dineho toy. Andao hatao tihoe miara-miasa amy ty ndaty tsy mpanompo i Jehovah rehe. Tea’o tsy hanagne heve-diso miomba antika i mpiara-miasa ama’oy, le hafarà’o maneho hasoa fagnahy ama’e naho magnampe aze. Va’e hiarake hihinagne ama’e aza rehe kindraike. Faie naho fa mandeha ty fotoagne, le lasa miarake mihinagne mateteke nareo. Ie naho fa nifampirehake nareo, le nirehake raha raty tampoke reke. Tsy nitea’o ze raha zay tamy ty voaloha’e, faie tsy nampagnino azo sasa zay naho fa tafara tatoy. Nanjare zatse nampiasa i rehakey ka aza rehe. Ie indraike andro, le nasae i mpiara-miasa ama’oy hinon-toake rehe, le nagneke. Nanjare nitovy fomba fisaignagne tamy i nama’oy rehe. Naho izay ty raha misy, le tsy ho ela rehe le hanao ty raha fatao i mpiara-miasa ama’oy. Maregne fa toko’e ho soa fagnahy naho hagnaja ze kila ndaty tika. Faie tsy toko’e ho halignontikagne fa tena misy voka’e amantika ze ndaty mifagnosehose amantika mateteke. (1 Kor. 15:33) Naho itika mitao, arake i nirehafe i Jesosỳ, le tsy hifandrambe amy ty ndaty tsy magnorike ty fitsipy i Jehovah naho tsy tihoe  misy anto’e. (2 Kor. 6:15) Hotreantika ty raha hagnoho-doza naho ty fomba hagnalaviragne aze amy izay.

12. Ino ty natao i mpiana i Jesosy rey amparake ty nandignisa iareo ty hifaragna ty tontolo toy?

¹² Tsy nitea i Jesosy hitobotoboke avao i mpiana’e rey tamy iareo nandigne ty hifaragna ty tontolo toỳ. Nimey i Jesosy asa hatao iareo. Nandily iareo reke mba hitory i talily soay a “Jerosalema agne, naho a Jodia vaho a Samaria, sady amy ty faritse fara’e lavitse amy ty tane toy iaby.” (Asa. 1:6-8) Tena asa bey ty nampanoe i Jesosy o mpanonjohy ty lia’eo! Mahafoe tegna iareo naho fa manao o asa nanendreagne iareo io, le mampiasa ty fotoa iareo amy ty fomba soa.

13. Nagnino tika ro mila mampiasa soa ty fotoantikagne? (Kolosianina 4:5)

¹³ Vakio ty Kolosianina 4:5. Mila mandineke ty fomba ampiasantikagne ty fotoantikagne tika naho mitao. Va’e ho voan-draha amy ty andro tsy ampoizegne tika. (Mpito. 9:11) Va’e ho mate tampoke ka tika.

14-15. Akore ty hampiasantika amy ty fomba soa ty fotoantikagne? (Hebreo 6:11, 12) (Henteo ka i sarey.)

¹⁴ Mampiasa soa ty fotoantikagne tika naho manao ty zoton’arofo i Jehovah sady magnasoa ty fifandrambesantikagne ama’e. (Jaona  14:21) Mila mikezake tika mba ‘tsy hagneke ho voaozongozogne naho tsy hiovaova.’ Toko’e ‘hikezake ho bey atao amy ty asa i Tompo’ ka tika. (1 Kor. 15:58) Amy izay naho fa hoavy ty fara’e, va’e ty ho fara ty fiaintikagne zay ndra ty fara ty tontolo raty toy, le tsy hanegnegne tika.​—Mat. 24:13; Rom. 14:8.

¹⁵ Mbe mitarike o mpiana’eo manao i asa fitoriagne magneran-tane miomba i Fanjakàn’Andrianagnaharey ty Jesosy amy izao. Fa nanao ty anjara’e reke. Mampiofagne antika hitory i talily soa amy ty alala i fandaminagne ohatse reke. Amy ty alala io avao ka ro agnomea’e ze fitaovagne ilaentika mba hamitagne i asay. (Mat. 28:18-20) Manao ty anjarantikagne ka tika naho mazoto mitory naho mampianatse sady mitao avao amparake ty andignasantika ty hamaragna i Jehovah ty tontolo toy. Naho itika magnorike ty torohevetse amy Hebreo 6:11, 12 ao, le hipiteke mafe amy i fanantenantikagney “hatrake ampara’e.”​—Vakio.

16. Tapa-kevetse ty hanao ino tika?

¹⁶ Fa nanondro andro naho lera hamaragna’e ty tontolo i Satana toy ty Jehovah. Naho fa avy ze andro zay, le hotanterahe i Jehovah iaby ze raha nampanorate’e agnate Saontsi’e ao. Faie va’e misy fotoagne tika mieretseretse tie hoe mbe ho ela vaho ho avy i andro i Jehovah-y. Faie “tsy ho tara” io. (Hab. 2:3) Lonike areke tika ho tapa-kevetse ty ‘hitamà i Jehovah’, le hanoro amy ty toe-tsaintika fa ‘vognogne handigne i Andrianagnahare ty famonjeagne antikagney.’​—Mika 7:7.