MITOBOKE amy ze tanàgne kedekede a Goatemala agne zay ty Yomara, naho i Marcelo vaho i Hiver rahalahi’e. Yomara ty nianatse Baiboly voaloha’e tamo o Vavolombelo i Jehovah-o, le ie tafara tatoy nanomboke nianatse ka i rahalahi’e rey. Faie nanagne olagne iareo. Sambe goa iareo telo, ro mbe tsy mahay mamaky soratse braille. I rahalahy nampianatse Baiboly iareoy areke ty namaky ze fehentsoratse naho ze andinin-teny amy ty lesogne nianara iareo.

Nisarotse tamy iareo ka ty nagnatreke fivoriagne. Efapolo minitra miala ty misy iareo ty misy Anjomba i Fanjakagney marine iareo. Nanao fandaharagne areke ty rahalahy tamo o fiangonagneo eo mba hangalake iareo, satria tsy afake mandeha mivory irery iareo. Naho fa nanomboke nanao anjara tamy i fivoriagne andavanandroy ka iareo, le nampea o mpiara-manompò mba hahay tsianjery ty anjara iareo.

Nisiagne fivoriagne ty tan-tanà iareo agne nanomboke tamy Mey 2019. Nisy mpivaly raike, mpisava lalagne maharetse zay, nifindra tamy iareo agne tamy izay. Ty tanjo iareo, le ty hampianatse Yomara, naho i Marcelo vaho i Hiver hahay hamaky naho hanoratse braille. Faie ty niolagne, tsy nihay iareo tie akore ty hanoagne aze, satria ndra iareo ka tsy nahay braille. Nandeha tamy ze fagnajariam-boke zay agne iareo, le tagne iareo ty nianatse braille naho ty fomba fampianaragne aze.

Volagne tsiampeampe tafara izay, le nahay namaky soratse braille ty Yomara, i Marcelo naho i Hiver. Nagnampe iareo vao mainke handroso ara-pagnahy zay. Mpisava lalagne maharetse amy izao ty Yomara naho i Hiver, le i Marcelo mpagnampe amy ty fiangonagne sady mpisava lalagne maharetse ka. Mafana fo amy ty fanompoagne iareo, satria maro ty raha atao iareo mifandrambe amy ty fanompoagne i Jehovah isan-keregnandro. Nifindra amo o fiangonagneo ze toe-tsay iareo zay.

Nankasitraha iareo telo ty hatea naseho o fiangonagneo iareo. Hoe ty Yomara: “Nitreako nanomboke tamy ty nifandrambesako tamo o Vavolombelo i Jehovah-o voaloha’e, fa tena managne i hatea kristianay iareo.” Hoe ka ty Marcelo: “Managne ragnetse mahafinaritse maro zahay amo o fiangonagneo eo, sady agnisa ty mpirahalahy mifankatea magneran-tane.” Fa tsy ligne Yomara naho i rahalahi’e rey ty hiavia i fotoagne hahatreava iareo ty hagnovagne ty tane toy ho paradisay.​—Sal. 37:10, 11; Isaia 35:5.