Mitoboke amy ty tanàgne raike maro ndaty miasa boake a Filipiny agne ty Mary naho i John a vali’e. Afake nitory i talily soay tamo o ndaty reo iareo. Tsy ty ndaty boake amy i firenena nisy azey ao avao ty nanomboha i Mary fampianaragne Baiboly, fa ze ndaty boake amy ty firenena hafa agne ka tagnate i arete-manjamagne COVID-19-oy. Akore ty fomba nanoa’e izay?

Nagnontenea’e hoe izao i mpiana’e Baiboly rey: “Mahafantatse ndaty hafa te hianatse Baiboly vao rehe?” Naho magneke i mpianatsey, le hoe reke: “Azo’o ampahafantaregne ahike vao iareo?” Misy voka’e soa mateteke o fagnonteneagne tsotra iohoe. Ino ty anto’e? Satria ty ndaty mankasitrake ty Saontsin’Agnahare, le te hirehake ze raha nianara’e boake ao amy ty keleia’e naho ty nama’e. Ino areke ty nivoka o fagnonteneagne iohoe?

Mpiana i Mary Baiboly ty Jasmin. Nisy ndaty efatse nite hianatse Baiboly, le nampahafantare’e i Mary. Tena nitea ty raike amy iareo ty raha nianara’e, le nagnontane i Mary reke naho afake mianatse indroe isan-keregnandro. Tsy ia zay fa i Kristine. Nagnontenea i Mary ka ty Kristine naho mahafantatse ndaty te hianatse Baiboly, le hoe reke: “Ie, ndao fa atoroko azo ze namako rezay.” Heregnandro tsiampeampe tafara izay, le nampahafantare i Kristine i Mary ty nama’e efatse. Te hianatse ka iareo. Mbe natoro’e aze ka ty nama’e hafa tafara izay. Nimea ty ila’e amy iareo i Mary ka ty agnara ze ndaty hafa te hianatse.

Nitea i Kristine haharey ty raha nianara’e miomba o Baibolio ka ty keleia’e a Filipiny agne. Nirehake tamy i Andrea anak’ampela’e areke reke. Tamy ty voaloha’e, le nieretseretse hoe izao ty Andrea: ‘Fivavahagne hafahafa o Vavolombelo i Jehovah-o sady tsy mino i Jesosy, le i Testamenta Talohay avao ty ampiasae iareo.’ Faie vaho nianatse Baiboly indraike avao reke le niova ze eretsere’e zay. Nirehake hoe izao reke naho fa nianatse iareo: “Tsy maintsy maregne zay naho izay ty agnate Baiboly ao!”

Tafara tatoy, le nisy nama i Andrea roe naho mpiara-miasa ama’e natoro’e i Mary. Te hianatse Baiboly ka iareo. Tsy nifanta i Mary ka tie nitsanogne ty raha nianara iareo ty Angela nenitoa i Andrea. Goa reke. Nampirehafe i Angela amy i Mary ty Andrea tie indraike zay mba hampianatse Baiboly aze. Tena nitea i Angela ty raha nianara’e. Nitadidy andinin-teny maro reke tagnate ty vola’e raike sady tea’e hatao in-4 isan-keregnandro ty fianara iareo. Nampea i Andrea reke, le afake nivory tsy tapake tamy ty alala ty vidéoconference.

Naho fa nitrea i Mary nijanogne narine iareo eo ty Joshua valy i Kristine amy iareo mianatsey, le  nangnontenea’e naho afake miarake mianatse amy iareo. Hoe ty Joshua: “Hitsanogne avao raho fa ko agnonteneagne. Hiakatse raho naho agnontenea’o.” Vaho dime minitra ty nianaragne, le nametrake fagnonteneagne maro mandikoatse ty ahy i Kristine reke sady tea’e hotohizagne avao i fianaragne Baibolỳ.

Nahatrea mpianatse Baiboly maro ty Mary noho i fagnonteneagne tsotra napetra’ey. Nasae’e nampea ty Vavolombelogne hafa ty ankamaroa i mpianatse rey. Naho atambatse, le nitarike fampianaragne Baiboly miiake 28 boake amy ty firenena efatse sambe hafa ty Mary.

Natao Badisa tamy Avrily 2021 ty Jasmin, i mpianatse Baiboly voaloha’e nitantaraegne teoy. Natao Badisa tamy Mey 2022 ty Kristine, le niheregne amy i keleia’e rey a Filipiny agne reke. Natao Badisa ka ty roe amy mpianatse Baiboly natoro i Kristine i Mary rey. Natao badisa ty Angela volagne tsiampeampe tafara tatoy, le mpisava lalagne maharetse reke tie amy zao. Mbe mianatse Baiboly avao sady mikezake mifandrambe amy i Jehovah ka ty Joshua valy i Kristine naho i Andrea anak’ampela iareo vaho ty mpianatse Baiboly maro hafa.

Niparitake tsiela tamy ty keleiagne naho ty namagne i talily soay tamy ty taonjato voaloha’e. (Jaona 1:41, 42a; Asa. 10:24, 27, 48; 16:25-33) Nagnino naho agnonteneagne ka i mpiana’o Baiboly rey naho ty ndaty liagne hafa tie: “Mahafantatse ndaty te hianatse Baiboly vao rehe?” Ia moa ty mahafantatse tie kera hahatrea ndaty maro te hianatse Baiboly rehe naho mametrake o fagnonteneagne tsotra iohoe?